Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 13: Ablaham—Họntọn Jiwheyẹwhe Tọn

Otàn 13: Ablaham—Họntọn Jiwheyẹwhe Tọn

DOPO to fie gbẹtọ lẹ yì nọ to Singigọ godo lẹ mẹ nọ yin yiylọdọ Uli. Nọtẹn ehe wá lẹzun tòdaho nukundeji de he mẹ owhé dagbedagbe lẹ tin te. Ṣigba, mẹhe nọ nọ̀ finẹ lẹ nọ sẹ̀n yẹwhe lalo lẹ. Nudopolọ wẹ mẹhe to Babẹli lẹ lọsu nọ wà. Mẹhe nọ nọ̀ Uli po Babẹli po lẹ ma taidi Noa po visunnu etọn Ṣẹm po, he zindonukọn nado to Jehovah sẹ̀n.

To godo mẹ, owhe 350 to singigọ lọ godo, dawe nugbonọ lọ Noa kú. Owhe awe poun to ehe godo wẹ dawe he a to mimọ to yẹdide ehe mẹ yin jiji. Jiwheyẹwhe yiwanna ẹn taun. Ablaham wẹ e nọ yin. Ewọ po whẹndo etọn po nọ nọ̀ tòdaho Uli tọn mẹ.

Ablaham to sunwhlẹvu lẹ pọ́n

To gbèdopo, Jehovah dọna Ablaham dọmọ: ‘Tọ́n sọn Uli, hiẹ po hẹnnumẹ towe lẹ po, bo yì aigba he yẹn na dohia we ji.’ Be Ablaham setonuna Jiwheyẹwhe bo jo gbẹzan dagbe he zan e te to Uli do ya? Mọwẹ, e wàmọ. Podọ Ablaham wá lẹzun họntọn Jiwheyẹwhe tọn na e nọ setonuna Jiwheyẹwhe to whepoponu wutu.

Delẹ to hagbẹ whẹndo Ablaham tọn lẹ mẹ hodo e to whenuena e tọ́n sọn Uli. Otọ́ etọn Tela hodo e. Tavẹ-ylọvi etọn Lọti lọsu sọ wàmọ ga. Podọ e họnwun dọ asi Ablaham tọn Sala lọsu yì po e po. To nukọn mẹ, yé wá jẹ fihe nọ yin yiylọdọ Halani bọ Tela kú to finẹ. Yé ko dẹn do Uli to whenẹnu.

To ojlẹ vude godo, Ablaham po whẹndo etọn po tọ́n sọn Halani bo wá aigba he nọ yin yiylọdọ Kenani ji. To finẹ Jehovah dọna ẹn dọmọ: ‘Aigba he yẹn na na ovi towe lẹ die.’ Ablaham gbọṣi Kenani bo nọ nọ̀ gòhọ lẹ mẹ.

Jiwheyẹwhe jẹ alọgọna Ablaham ji sọmọ bọ e wá tindo lẹngbọ susu po kanlin devo lẹ po gọna devi kanweko susu. Ṣigba ewọ po Sala po ma penugo nado jivi.

To whenuena Ablaham tindo owhe 99, Jehovah dọna ẹn dọmọ: ‘Yẹn dopagbe na we dọ hiẹ na lẹzun otọ́ akọta susu tọn.’ Ṣigba nawẹ ehe sọgan jọ gbọn, to whenuena e yindọ Ablaham po Sala po ko poyọnho taun bo ma sọgan jivi ba?

Gẹnẹsisi 11:27-32; 12:1-7; 17:1-8, 15-17; 18:9-19.



Kanbiọ lẹ

  • Gbẹtọ nankọtọn lẹ wẹ nọ nọ̀ tòdaho Uli tọn mẹ?
  • Mẹnu wẹ tin to yẹdide lọ mẹ, whetẹnu wẹ e yin jiji, podọ otò tẹ mẹ wẹ e nọ?
  • Etẹwẹ Jiwheyẹwhe dọna Ablaham nado wà?
  • Naegbọn Ablaham do yin yiylọdọ họntọn Jiwheyẹwhe tọn?
  • Mẹnu lẹ wẹ hodo Ablaham to whenuena e tọ́n sọn Uli?
  • Etẹwẹ Jiwheyẹwhe dọna Ablaham to whenuena e jẹ aigba Kenani tọn ji?
  • Opagbe tẹwẹ Jiwheyẹwhe do na Ablaham to whenuena e tindo owhe 99?

Kanbiọ devo lẹ

  • Hia Gẹnẹsisi 11:27-32.

    Kanṣiṣa whẹndo tọn tẹwẹ tin to Ablaham po Lọti po ṣẹnṣẹn? (Gẹn. 11:27)

    Dile etlẹ yindọ Tela wẹ Biblu dlẹnalọdo taidi mẹhe plan whẹndo etọn yì Kenani, nawẹ mí wagbọn do yọnẹn dọ Ablaham wẹ basi dide tẹnsisẹ enẹ tọn na taun tọn, podọ naegbọn e do wàmọ? (Gẹn. 11:31; Owalọ 7:2-4)

  • Hia Gẹnẹsisi 12:1-7.

    Etẹwẹ Jehovah yidogọ alẹnu Ablaham tọn to whenuena Ablaham jẹ aigba Kenani tọn ji godo? (Gẹn. 12:7)

  • Hia Gẹnẹsisi 17:1-8, 15-17.

    Nawẹ yinkọ Ablam tọn yin didiọ do to whenuena e tindo owhe 99, podọ etẹwutu? (Gẹn. 17:5)

    Dona sọgodo tọn tẹlẹ wẹ Jehovah dopagbe etọn na Sala? (Gẹn. 17:15, 16)

  • Hia Gẹnẹsisi 18:9-19.

    Azọngban tẹlẹ wẹ yin didena otọ́ lẹ to Gẹnẹsisi 18:19 mẹ? (Deut. 6:6, 7; Efe. 6:4)

    Numimọ he Sala tindo tẹwẹ dohia dọ mí ma sọgan whlá nudepope do Jehovah? (Gẹn. 18:12, 15; Ps. 44:21)