Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 12: Gbẹtọ lẹ Gbá Atọ̀họ̀ Daho De

Otàn 12: Gbẹtọ lẹ Gbá Atọ̀họ̀ Daho De

OWHE susu ko juwayi. Visunnu Noa tọn lẹ ko ji ovi susu. Podọ ovi yetọn lẹ lọsu whẹ́n bo ji ovi susu dogọ. To ojlẹ vude godo, gbẹtọ lẹ sù to aigba ji.

Dopo to omẹ ehelẹ mẹ wẹ ovivi Noa tọn he nọ yin Nimlọdi. Mẹylankan de wẹ he nọ yangbé bo nọ hù kanlin po gbẹtọ po. Nimlọdi sọ yí ede do doahọlu nado dugán do mẹhe pò lẹ ji. Jiwheyẹwhe ma yiwanna Nimlọdi.

Ogbè dopolọ wẹ gbẹtọ lẹpo nọ do to ojlẹ enẹ mẹ. Nimlọdi jlo na bẹ yemẹpo pli do fidopo nado sọgan dugán do yé ji. Be a yọ́n nuhe e wà ya? E dọna gbẹtọ lẹ nado wleawuna tòdaho de bo gbá atọ̀họ̀ daho de do e mẹ. Pọ́n lehe yé to bliki sún do to yẹdide lọ mẹ.

Homẹ Jehovah Jiwheyẹwhe tọn ma hùn do họgbigbá ehe go. Ojlo Jiwheyẹwhe tọn wẹ yindọ gbẹtọ lẹ ni gbàpe gbọn aigba ji. Ṣigba gbẹtọ lẹ dọmọ: ‘Mì wá! Mì gbọ mí ni wleawuna tòdaho de gọna atọ̀họ̀ de he na yiaga kaka bo sọ́ olọn. Gbọnmọ dali, mí na diyin!’ Yé to gigo dín na yede, kakati nido yin na Jiwheyẹwhe.

Enẹwutu Jiwheyẹwhe hẹn gbẹtọ lẹ nado doalọtena atọ̀họ̀ lọ gbigbá. Be a yọ́n lehe e wàmọ gbọn ya? To ajiji mẹ, e hẹn gbẹtọ lẹ nado jẹ ogbè voovo lẹ do ji, kakati nido yin ogbè dopo gee. Họgbátọ lọ lẹ masọ mọnukunnujẹ ogbè ode awetọ tọn mẹ ba. Enẹ wẹ zọ́n bọ tòdaho yetọn do yin yiylọdọ Babẹli kavi Babilọni, he zẹẹmẹdo “Bẹwlu.”

Todin, gbẹtọ lẹ jẹ yìyì ji sọn Babẹli. Mẹhe mọdọ yé nọ do ogbè dopolọ lẹ nọ zọnpọ nado yì nọ fidevo to aigba ji.

Gẹnẹsisi 10:1, 8-10; 11:1-9.

Azọ́nwatọ lẹ to atọ̀họ̀ daho de gbá


Kanbiọ lẹ

  • Mẹnu wẹ Nimlọdi, podọ nukun tẹwẹ Jiwheyẹwhe yí do pọ́n ẹn?
  • Naegbọn gbẹtọ lẹ do to bliki sún to yẹdide lọ mẹ?
  • Naegbọn homẹ Jehovah tọn ma hùn do azọ́n họgbigbá tọn lọ go?
  • Nawẹ Jiwheyẹwhe hẹnalọdotena mẹhe to atọ̀họ̀ lọ gbá lẹ gbọn?
  • Nawẹ tòdaho lọ yin yiylọdọ, podọ etẹwẹ yinkọ enẹ zẹẹmẹdo?
  • Etẹwẹ jọ do gbẹtọ lọ lẹ go to whenue Jiwheyẹwhe wlu ogbè do kọ̀nu na yé?

Kanbiọ devo lẹ

  • Hia Gẹnẹsisi 10:1, 8-10.

    Jijọ tẹwẹ Nimlọdi tindo, podọ avase tẹwẹ mí mọyi sọn ehe mẹ? (Howh. 3:31)

  • Hia Gẹnẹsisi 11:1-9.

    Etẹwutu wẹ gbẹtọ lẹ jlo na gbá atọ̀họ̀ lọ, podọ naegbọn azọ́n lọ dona gboawupo dandan? (Gẹn. 11:4; Howh. 16:18; Joh. 5:44)