Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 11: Aidowhẹdo Tintan Lọ

Otàn 11: Aidowhẹdo Tintan Lọ

BE A yọ́n onú tintan he Noa wà to whenuena ewọ po whẹndo etọn po tọ́n sọn aki lọ mẹ ya? E sanvọ́ kavi na nunina de hlan Jiwheyẹwhe. A sọgan mọ ẹn dile e to mọwà to yẹdide he tin to odò lọ mẹ. Noa yí kanlin lẹ do sanvọ́ nado dopẹna Jiwheyẹwhe, mẹhe whlẹn whẹndo etọn sọn singigọ daho lọ mẹ.

Aki lọ po aidowhẹdo de po

Be a lẹndọ homẹ Jehovah tọn hùn do nunina ehe go ya? Mọwẹ, homẹ etọn hùn. Enẹwutu e dopagbe na Noa dọ emi ma nasọ yí singigọ do và aihọn sudo gbede ba.

To ojlẹ kleun de godo, osin hú pete sọn aigba ji bọ Noa po whẹndo etọn po bẹ gbẹninọ yọyọ de jẹeji to gbonu aki lọ tọn. Jiwheyẹwhe dona yé bo dọna yé dọmọ: ‘Mì ji ovi susu. Sọha mìtọn ni jideji kakajẹ whenue gbẹtọ na gọ́ aigba ji.’

Ṣigba, eyin gbẹtọ lẹ wá sè dogbọn singigọ daho lọ dali to nukọn mẹ, yé sọgan dibu dọ singigọ mọnkọtọn na gbẹsọ wá to gbèdopo. Enẹwutu Jiwheyẹwhe ze nude dote he na nọ flinnu gbẹtọ lẹ dọ ewọ ko dopagbe ma nado hẹn singigọ wá aigba blebu ji gbede ba. Be a yọ́n nuhe e zedote nado nọ flinnu yé lọ ya? Aidowhẹdo wẹ.

Noa po whẹndo etọn po

Aidowhẹdo nọ saba yin mimọ to agahomẹ eyin owhè jẹ hùnhùn ji to whenuena jikun ja godo. Aidowhẹdo nọ tindo sinmẹ whanpẹnọ susu. Be a ko mọ aidowhẹdo de pọ́n ya? Be a mọ dehe tin to yẹdide lọ mẹ ya?

Nuhe Jiwheyẹwhe dọ die: ‘Yẹn dopagbe dọ singigọ ma nasọ và gbẹtọ po kanlin lẹpo po sudo gbede ba. Yẹn yí aidowhẹdo ṣie do aslọ lẹ mẹ. Podọ eyin aidowhẹdo sọawuhia, yẹn na mọ ẹn bosọ flin opagbe ṣie ehe.’

Enẹwutu, eyin a mọ aidowhẹdo de, etẹwẹ e dona flin we? Mọwẹ, e dona hẹn we flin opagbe he Jiwheyẹwhe do dọ emi ma nasọ yí singigọ daho de do và aihọn sudo gbede ba.

Gẹnẹsisi 8:18-22; 9:9-17.



Kanbiọ lẹ

  • Dile yẹdide lọ dohia do, etẹwẹ yin onú tintan he Noa wà to whenuena e tọ́n sọn aki lọ mẹ?
  • Gbedide tẹwẹ Jiwheyẹwhe na Noa po whẹndo etọn po to Singigọ lọ godo?
  • Opagbe tẹwẹ Jiwheyẹwhe do?
  • Eyin mí mọ aidowhẹdo, etẹwẹ e dona nọ flin mí?

Kanbiọ devo lẹ

  • Hia Gẹnẹsisi 8:18-22.

    Nawẹ mí sọgan wleawuna ‘owán gbọjẹ tọn’ de hlan Jehovah to egbehe gbọn? (Gẹn. 8:21; Heb. 13:15, 16)

    Etẹwẹ Jehovah dọ gando ninọmẹ ahun mẹ tọn gbẹtọvi tọn go, podọ aṣejininọ tẹwẹ ehe biọ to mí si? (Gẹn. 8:21; Mat. 15:18, 19)

  • Hia Gẹnẹsisi 9:9-17.

    Alẹnu tẹwẹ Jehovah basi hẹ nudida aigba ji tọn lẹpo? (Gẹn. 9:10, 11)

    Nawẹ alẹnu aidowhẹdo tọn lọ na dẹn-to-aimẹ sọ? (Gẹn. 9:16)