Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 9: Noa Basi Aki De

Otàn 9: Noa Basi Aki De
Gbẹtọ lẹ to Noa ṣanko

NOA tindo asi de po visunnu atọ̀n po. Yinkọ visunnu etọn lẹ tọn nọ yin Ṣẹm, Ham, po Jafẹti po. Podọ visunnu atọ̀n ehelẹ tindo asi dopodopo. Ehe dohia dọ omẹ ṣinatọ̀n wẹ whẹndo Noa tọn bẹhẹn.

Todin, Jiwheyẹwhe biọ to Noa si nado wà nuhe mẹde ma ko wà pọ́n de. E biọ to e si nado basi aki daho de. Aki ehe gblo sọ bato daho de, ṣigba awusọhia etọn taidi apotin daho gaa de. ‘Basi i na e ni tindo petlezìn atọ̀n bosọ gbò abò lẹ do e mẹ,’ wẹ Jiwheyẹwhe dọ. Abò lọ lẹ tin na Noa, whẹndo etọn, kanlin lẹ, po núdùdù he yemẹpo na dù lẹ po.

Jiwheyẹwhe sọ dọna Noa nado và osẹ̀n pinpẹn do aki lọ go na osin nikaa biọ e mẹ. Jiwheyẹwhe dọmọ: ‘Yẹn na hẹn singigọ daho de wá bo na và nulẹpo sudo to aigba ji. Mẹhe ma tin to aki lọ mẹ lẹpo wẹ na kú.’

Noa po visunnu etọn lẹ po setonuna Jehovah bo jẹ aki lọ gbá ji. Ṣigba gbẹtọ lẹ to yé kò poun bosọ zindonukọn to nuylankan lẹ wiwà mẹ. Mẹdepope ma yí Noa sè to whenuena e dọ nuhe Jiwheyẹwhe jlo na wà na yé.

Whẹndo Noa tọn to kanlin lẹ po núdùdù po bẹ do aki lọ mẹ

Aki lọ gbigbá yí whenu susu na e klo taun. To owhe susu godo, azọ́n lọ wá fó. Todin Jiwheyẹwhe dọna Noa nado bẹ kanlin lẹ do aki lọ mẹ. Jiwheyẹwhe dọ dọ e ni hẹn kanlin delẹ biọ e mẹ awe-awe, asu po asi po; devo lẹ ṣinawe-ṣinawe. Jiwheyẹwhe sọ dọna Noa nado hẹn ohẹ̀ wunmẹ lẹpo biọ aki lọ mẹ. Noa wà nuhe Jiwheyẹwhe dọ pẹpẹ.

To godo mẹ, Noa po whẹndo etọn po biọ aki lọ mẹ ga. Enẹgodo, Jiwheyẹwhe sú ohọ̀n aki lọ tọn. Noa po whẹndo etọn po dona nọtepọn nuhe na jọ. Mí ni dọ dọ a tin to aki lọ mẹ po yé po bo to tenọpọn nuhe na jọ. Be singigọ lọ na wá nugbonugbo dile Jiwheyẹwhe dọ do ya?

Gẹnẹsisi 6:9-22; 7:1-9.



Kanbiọ lẹ

  • Omẹ nẹmu wẹ tin to whẹndo Noa tọn mẹ, podọ nawẹ visunnu etọn atọ̀n lẹ nọ yin?
  • Nuhe mẹde ma ko wà pọ́n tẹwẹ Jiwheyẹwhe biọ to Noa si nado wà, podọ etẹwutu?
  • Nawẹ kọmẹnu Noa tọn lẹ yinuwa gbọn to whenuena e dọhona yé gando aki lọ go?
  • Etẹwẹ Jiwheyẹwhe biọ to Noa si nado wà na kanlin lẹ?
  • Etẹwẹ Noa po whẹndo etọn po dona wà, to whenuena Jiwheyẹwhe sú ohọ̀n aki lọ tọn godo?

Kanbiọ devo lẹ

  • Hia Gẹnẹsisi 6:9-22.

    Etẹwutu Noa do yin sinsẹ̀n-basitọ Jiwheyẹwhe nugbo lọ tọn he jẹna ayidego de? (Gẹn. 6:9, 22)

    Nukun tẹwẹ Jehovah nọ yí do pọ́n danuwiwa, podọ nawẹ ehe dona yinuwado nudide ayidedai tọn mítọn ji gbọn? (Gẹn. 6:11, 12; Ps. 11:5)

    Nawẹ mí sọgan hodo apajlẹ Noa tọn to whenuena mí mọ anademẹ yí gbọn titobasinanu Jehovah tọn gblamẹ gbọn? (Gẹn. 6:22; 1 Joh. 5:3)

  • Hia Gẹnẹsisi 7:1-9.

    Nawẹ nugbo lọ dọ Jehovah pọ́n Noa he yin mapenọ hlan taidi omẹ dodonọ de na tuli mí to egbehe gbọn? (Gẹn. 7:1; Howh. 10:16; Isa. 26:7)