Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 8: Asuka lẹ to Aigba Ji

Otàn 8: Asuka lẹ to Aigba Ji

EYIN mẹde ja dè we bo dite sọmọ bọ ota etọn dibla sọ́ ozà, be obu ma na di we ya? Mọwẹ, asuka de wẹ omẹ mọnkọtọn na ko yin! Asuka lẹ nọ aigba ji fi pọ́n to ojlẹ de mẹ wayi. Biblu dohia dọ angẹli he wá sọn olọn mẹ lẹ wẹ yin otọ́ yetọn. Ṣigba nawẹ enẹ sọgan yinmọ gbọn?

Asuka danuwatọ lẹ

Flindọ angẹli ylankan lọ Satani fọ́n bo to gbẹtọ lẹ sisẹ́ nado waylan. E tlẹ tẹnpọn nado hẹn angẹli Jiwheyẹwhe tọn lẹ waylan. To nukọn mẹ, delẹ to angẹli ehelẹ mẹ jẹ todoaina Satani ji. Yé jo azọ́n he Jiwheyẹwhe dena yé to olọn mẹ do. Yé sọ wá aigba ji bo ze agbasa gbẹtọ tọn do. Be a yọ́n nuhewutu wẹ?

Biblu dọ dọ visunnu Jiwheyẹwhe tọn ehelẹ wàmọ na yé mọ yọnnu whanpẹnọ lẹ to aigba ji bo jlo nado nọpọ́ hẹ yé. Enẹwutu yé wá aigba ji bo dà yọnnu ehelẹ. Biblu dọ dọ nuhe yé wà ma yọ́n na olọn mẹ wẹ Jiwheyẹwhe jlo dọ angẹli lẹ ni nọ.

To whenuena angẹli lọ lẹ po asi yetọn lẹ po jẹ ovi lẹ ji ji, ovi ehelẹ gbọnvo. Tlolo whẹ́, vogbingbọn lọ ma họnwun sọmọ. Ṣigba yé fọ́n bo to whinwhẹ́n poun bo to huhlọn tindo dogọ kakajẹ whenue yé wá lẹzun asuka lẹ.

Mẹylankan wẹ asuka ehelẹ. Podọ na yé dite bo tli bosọ dohuhlọn taun wutu, yé nọ gbleawuna mẹdevo lẹ. Yé nọ tẹnpọn nado yí huhlọn do hẹn mẹlẹpo wà nuylankan di yelọsu.

Enọku ko kú, ṣigba dawe de tin to aigba ji todin he yin mẹdagbe. Noa wẹ dawe ehe nọ yin. Nuhe Jiwheyẹwhe jlo dọ ni wà lẹ wẹ e nọ wà to whepoponu.

To gbèdopo, Jiwheyẹwhe dọna Noa dọ ojlẹ ko sọ na Emi nado và mẹylankan lẹpo sudo. Ṣigba Jiwheyẹwhe na whlẹn Noa, whẹndo etọn po kanlin susu po. Gbọ mí ni pọ́n lehe Jiwheyẹwhe wà ehe do.

Gẹnẹsisi 6:1-8; Juda 6.



Kanbiọ lẹ

  • Etẹwẹ jọ to whenuena angẹli Jiwheyẹwhe tọn delẹ dotoaina Satani?
  • Naegbọn angẹli delẹ doalọtena azọ́n yetọn to olọn mẹ bo jẹte wá aigba ji?
  • Naegbọn e ma sọgbe dọ angẹli lọ lẹ ni wá aigba ji bo ze agbasa gbẹtọ tọn do?
  • Etẹwẹ ovi angẹli lọ lẹ tọn lẹ yí do gbọnvo na mẹdevo lẹ?
  • Dile yẹdide lọ dohia do, etẹwẹ ovi angẹli lọ lẹ tọn lẹ wà to whenuena yé lẹzun asuka?
  • Dawe jijọ dagbenọ tẹwẹ nọ aigba ji to Enọku godo, podọ naegbọn Jiwheyẹwhe yiwanna ẹn?

Kanbiọ devo lẹ

  • Hia Gẹnẹsisi 6:1-8.

    Etẹwẹ Gẹnẹsisi 6:6 dohia gando lehe walọ mítọn sọgan yinuwado numọtolanmẹ Jehovah tọn lẹ ji do go? (Ps. 78:40, 41; Howh. 27:11)

  • Hia Juda 6.

    Nawẹ nuyiwa angẹli he “ma gbọṣi otẹn dowhenu tọn yetọn mẹ” to azán Noa tọn gbè lẹ tọn yin nuflinmẹ de na mí to egbehe gbọn? (1 Kọl. 3:5-9; 2 Pita 2:4, 9, 10)