Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 7: Dawe Adọgbotọ De

Otàn 7: Dawe Adọgbotọ De
Enọku

DILE sọha gbẹtọ lẹ tọn jẹ susu ji to aigba ji, suhugan yetọn wẹ wà nuylankan lẹ taidi Kaini. Ṣigba dawe dopo de tin he gbọnvo. Dawe ehe wẹ, he nọ yin Enọku. Dawe adọgbotọ de wẹ Enọku. Mẹhe lẹdo e lẹpo wẹ nọ wà nuylankan lẹ, ṣigba Enọku gbẹ́ to Jiwheyẹwhe sẹ̀n janwẹ.

Be a yọ́n nuhewutu gbẹtọ lẹ do wà nuylankan lẹ sọmọ to whenẹnu ya? Lẹnnupọn vude, Mẹnu wẹ hẹn Adam po Evi po nado vẹtolina Jiwheyẹwhe bo dù atin-sinsẹ́n he Jiwheyẹwhe dọ dọ yé ma dona dù lọ? Angẹli ylankan de wẹ. Biblu ylọ ẹ dọ Satani. Podọ e to tintẹnpọn nado hẹn mẹlẹpo zun mẹylankan.

Ajojijẹ po mẹhuhu po

To gbèdopo, Jehovah Jiwheyẹwhe biọ to Enọku si nado yì dowẹn he gbẹtọ lẹ ma na yiwanna de na yé. Owẹ̀n lọ wẹ yindọ: ‘Azán lọ na wá bọ Jiwheyẹwhe na và mẹylankan lẹpo sudo.’ Gbẹtọ lẹ na ko gblehomẹ tlala to whenuena yé sè ehe. Yé tlẹ sọgan ko tẹnpọn nado hù Enọku. Enẹwutu Enọku dona gboadọ taun nado sọgan dọ nuhe Jiwheyẹwhe jlo na wà na gbẹtọ lẹ.

Jiwheyẹwhe ma dike na Enọku ni nọgbẹ̀ dẹn to mẹylankan enẹlẹ ṣẹnṣẹn. Owhe 365 poun wẹ Enọku nọgbẹ̀ na. Naegbọn mí do dọ “owhe 365 poun”? Na mẹhe nọgbẹ̀ to whenẹnu lẹ dohuhlọn taun bosọ nọ nọgbẹ̀ dẹn hugan mí to egbehe. Di apajlẹ, visunnu Enọku tọn Mẹtusela nọgbẹ̀ na owhe 969!

Gbẹtọ lẹ to onú ylankan lẹ wà

Ṣigba to okú Enọku tọn godo, walọ gbẹtọ lẹ tọn to yinylan dogọ. Biblu dọ dọ ‘nuylankan kẹdẹ ji wẹ yé nọ lẹnnupọndo to whepoponu,’ bọ ‘aigba sọ gọ́ na danuwiwa.’

Be a yọ́n dopo to nuhewutu tukla do sù to aigba ji to ojlẹ enẹlẹ mẹ ya? Nulọ wẹ yindọ Satani mọ aliho yọyọ devo nado hẹn gbẹtọ lẹ wà nuylankan lẹ. Ehe wẹ mí na plọn bọdego.

Gẹnẹsisi 5:21-24, 27; 6:5, 11-13; Heblu lẹ 11:5; Juda 14, 15.



Kanbiọ lẹ

  • Aliho tẹ mẹ wẹ Enọku gbọnvo te?
  • Naegbọn mẹhe nọgbẹ̀ to ojlẹ Enọku tọn mẹ lẹ do wà nuylankan susu sọmọ?
  • Nuylankan tẹlẹ wẹ gbẹtọ lẹ to wiwà? (Pọ́n yẹdide.)
  • Naegbọn Enọku do tindo nuhudo adọgbigbo tọn?
  • Nawẹ gbẹtọ lẹ nọ nọgbẹ̀ dẹnsọ to whenẹnu, ṣigba nawẹ Enọku nọgbẹ̀ dẹnsọ?
  • Etẹwẹ jọ to okú Enọku tọn godo?

Kanbiọ devo lẹ

  • Hia Gẹnẹsisi 5:21-24, 27.

    Haṣinṣan tẹwẹ Enọku tindo hẹ Jehovah? (Gẹn. 5:24)

    Sọgbe hẹ Biblu, mẹnu wẹ nọgbẹ̀ dẹn hugan to aigba ji, podọ owhe nẹmu wẹ e tindo whẹpo do kú? (Gẹn. 5:27)

  • Hia Gẹnẹsisi 6:5.

    Obá tẹ mẹ wẹ ninọmẹ lẹ ylan jẹ to aigba ji to okú Enọku tọn godo, podọ nawẹ ehe sọgbe hẹ nuhe to jijọ to azán mítọn gbè gbọn? (2 Tim. 3:13)

  • Hia Heblu lẹ 11:5.

    Jẹhẹnu Enọku tọn tẹwẹ “hẹn homẹ Jiwheyẹwhe tọn hùn,” podọ etẹ mẹ wẹ ehe dekọtọn do? (Gẹn. 5:22)

  • Hia Juda 14, 15.

    Nawẹ Klistiani egbehe tọn lẹ sọgan hodo apajlẹ adọgbigbo Enọku tọn gbọn to whenuena yé to avase na gbẹtọ lẹ gando awhàn Amagẹdọni tọn he ja go? (2 Tim. 4:2; Heb. 13:6)