Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 6: Visunnu Dagbe po Visunnu Ylankan de Po

Otàn 6: Visunnu Dagbe po Visunnu Ylankan de Po

PỌ́N Kaini po Abẹli po todin. Yé omẹ awe lẹ ko whẹ́n. Kaini ko lẹzun glesi. E nọ dó jinu, omá po atin-sinsẹ́n lẹ po.

Kaini po Abẹli po to avọ́san na Jiwheyẹwhe

Abẹli ko lẹzun lẹngbọyìntọ. E yiwanna nukunpipedo lẹngbọvu lẹ go. Lẹngbọvu lọ lẹ wá whẹ́n bọ Abẹli tindo kanlinpó daho he go e nọ penukundo.

To gbèdopo, Kaini po Abẹli po hẹn nunina de wá na Jiwheyẹwhe. Kaini hẹn delẹ to jinukun he e dó lẹ mẹ wá. Podọ Abẹli hẹn lẹngbọ he yọ́n hugan to kanlinpó etọn mẹ wá. Homẹ Jehovah tọn hùn do Abẹli po nunina etọn po go. Ṣigba homẹ etọn ma hùn do Kaini po nunina etọn po go. Be a yọ́n nuhewutu wẹ?

E ma yindọ nunina Abẹli tọn yọ́n hugan Kaini tọn kẹdẹ wutu wẹ gba, Abẹli sọ yin mẹdagbe ga. E yiwanna Jehovah po mẹdaho etọn po. Ṣigba Kaini yin mẹylankan; e ma yiwanna nọvi etọn.

Enẹwutu Jiwheyẹwhe dọna Kaini dọ e ni diọ jijọ etọn. Ṣigba Kaini ma dotoai. E gblehomẹ tlala na Jiwheyẹwhe yiwanna Abẹli hugan wutu. Kaini dọna Abẹli dọ, ‘Gbọ mí ni yì glemẹ.’ To whenuena yé jẹ dọ́n bọ mẹde ma to finẹ, Kaini linú nọvi etọn. E linú Abẹli sọmọ bọ e kú. Be e ma yin danú wẹ ehe yin bọ Kaini wà ya?

Kaini to hinhọ̀n to whenue e ko hù Abẹli godo

Dile etlẹ yindọ Abẹli ko kú, Jiwheyẹwhe gbẹ́ to finflin in. Mẹdagbe de wẹ Abẹli yin, podọ Jehovah ma nọ wọn omẹ mọnkọtọn lẹ gbede. Enẹwutu Jehovah Jiwheyẹwhe na hẹn Abẹli gọwá ogbẹ̀ to gbèdopo. To whenẹnu, Abẹli ma nasọ kú gbede ba. E na penugo nado nọgbẹ̀ kakadoi tofi to aigba ji. Be e ma na yọ́n nado jẹakọ hẹ gbẹtọ taidi Abẹli nkọ lẹ to ojlẹ enẹ mẹ ya?

Ṣigba Jiwheyẹwhe ma yiwanna gbẹtọ taidi Kaini nkọ lẹ. Enẹwutu to whenuena Kaini ko hù nọvi etọn godo, Jiwheyẹwhe domẹplọnlọ e go bo yàn ẹn dogbé sọn whẹndo etọn mẹ. To whenue Kaini jei nado yì nọ fidevo to aigba ji, e plan dopo to nọviyọnnu etọn lẹ mẹ yì bọ e wá lẹzun asi etọn.

To nukọn mẹ, Kaini po asi etọn po jẹ ovi lẹ ji ji. Ovi Adam po Evi po tọn he pò lẹ lọsu wlealọ bo ji ovi lẹ. To ojlẹ vude godo, gbẹtọ lẹ wá sù to aigba ji. Gbọ mí ni plọnnu gando delẹ to yé mẹ go.

Gẹnẹsisi 4:2-26; 1 Johanu 3:11, 12; Johanu 11:25.



Kanbiọ lẹ

  • Azọ́n tẹlẹ wẹ Kaini po Abẹli po nọ wà?
  • Nunina tẹlẹ wẹ Kaini po Abẹli po hẹnwana Jehovah?
  • Naegbọn Jehovah kẹalọyi nunina Abẹli tọn, podọ naegbọn e ma kẹalọyi Kaini tọn?
  • Gbẹtọ nankọ wẹ Kaini yin, podọ nawẹ Jehovah tẹnpọn nado jla pọndohlan etọn do gbọn?
  • Etẹwẹ Kaini wà to whenuena ewọ po nọvi etọn po yì glemẹ bọ mẹde ma to finẹ?
  • Etẹwẹ jọ do Kaini go to whenuena e ko hù nọvi etọn godo?

Kanbiọ devo lẹ

  • Hia Gẹnẹsisi 4:2-26.

    Nawẹ Jehovah basi zẹẹmẹ owù he mẹ Kaini tin te tọn gbọn? (Gẹn. 4:7)

    Nawẹ Kaini do nuhe tin to ahun etọn mẹ hia gbọn? (Gẹn. 4:9)

    Etẹwẹ yin pọndohlan Jehovah tọn gando ohùn homẹvọnọ tọn kinkọndai go? (Gẹn. 4:10; Isa. 26:21)

  • Hia 1 Johanu 3:11, 12.

    Naegbọn Kaini do gblehomẹ tlala, podọ nawẹ ehe yin avase de na mí to egbehe gbọn? (Gẹn. 4:4, 5; Howh. 14:30; 28:22)

    Nawẹ Biblu dohia gbọn dọ eyin hagbẹ whẹndo mítọn tọn lẹpo tlẹ diọnukunsọ Jehovah, mí gbẹ́ sọgan hẹn tenọgli mítọn go? (Ps. 27:10; Mat. 10:21, 22)

  • Hia Johanu 11:25.

    Jidide tẹwẹ Jehovah na mí gando mẹhe kú na dodo tọn wutu lẹpo go? (Joh. 5:24)

Plọnnu Dogọ

Abẹli—“Dile Ewọ Tlẹ Ko Kú, E Gbẹ́ to Hodọ”

Etẹwẹ mí sọgan plọn sọn Abẹli dè podọ sọn yise etọn mẹ to whenue e yindọ Biblu ma dọ nususu gando ewọ go?