Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 5: Yajiji Bẹ

Otàn 5: Yajiji Bẹ

ONÚ lẹ ma bọawuna Adam po Evi po to gbonu jipa Edẹni tọn. Yé dona wazọ́n sinsinyẹn whẹpo do mọ núdù. Kakati yé nido mọ atin-sinsẹ́n dagbedagbe lẹ, atin owùnnọ lẹ wẹ lẹdo yé. Nuhe jọ to whenuena Adam po Evi po vẹtolina Jiwheyẹwhe bo masọ yin họntọn Etọn ba niyẹn.

Adam po visunnu etọn po to azọ́nwa sinsinyẹn

Ṣigba nuhe sọ ylan hugan enẹ wẹ yindọ, Adam po Evi po ma sọgan nọgbẹ̀ kakadoi ba. Flindọ Jiwheyẹwhe na yé avase dọ yé na kú eyin yé dù sọn sinsẹ́n atin tangan de tọn mẹ. Sọn gbeegbe yé dù atin-sinsẹ́n lọ, yé jẹ yọnho pò ji vudevude bo wá kú to godo mẹ. Nulunu nankọ die dọ yé ma setonuna Jiwheyẹwhe!

Adam po Evi po ji ovi yetọn lẹpo to whenuena Jiwheyẹwhe ko yàn yé sọn jipa Edẹni tọn mẹ godo. Ehe dohia dọ ovi yetọn lẹ lọsu na poyọnho bosọ kú.

Eyin Adam po Evi po ko setonuna Jehovah wẹ, yewlẹ po ovi yetọn lẹ po na ko zan gbẹzan ayajẹ tọn. E na ko yọnbasi na yemẹpo nado duvivi ogbẹ̀ tọn kakadoi to aigba ji. Mẹde ma na ko poyọnho, jẹazọ̀n kavi kú gba.

Jiwheyẹwhe jlo dọ gbẹtọ lẹ ni nọgbẹ̀ kakadoi to ayajẹ mẹ, podọ E dopagbe dọ e na wá yinmọ to gbèdopo. Gbọnvona dọ aigba lọ blebu wẹ na yọnwhanpẹ, mẹlẹpo nasọ tindo agbasalilo dagbe. Humọ, mẹhe tin to aigba ji lẹpo wẹ na jihọntọn hẹ yenọzo podọ hẹ Jiwheyẹwhe.

Evi po ovi etọn lẹ po

Ṣigba Evi masọ yin họntọn Jiwheyẹwhe tọn ba. Enẹwutu e ma bọawuna ẹn nado ji ovi etọn lẹ. E mọ awufiẹsa. Matin ayihaawe, tolivivẹ na Jehovah hẹn awubla susu wá na ẹn, kavi etẹ a lẹn?

Adam po Evi po ji visunnu po viyọnnu susu po. To whenuena visunnu yetọn tintan yin jiji, yé do yinkọ na ẹn dọ Kaini. Yé ylọ visunnu yetọn awetọ dọ Abẹli. Etẹwẹ jọ do yé go? Be a yọnẹn ya?

Gẹnẹsisi 3:16-23; 4:1, 2; Osọhia 21:3, 4.



Kanbiọ lẹ

  • Gbẹzan tẹwẹ Adam po Evi po zan to gbonu jipa Edẹni tọn?
  • Etẹwẹ jọ do Adam po Evi po go, podọ etẹwutu?
  • Naegbọn ovi Adam po Evi po tọn lẹpo dona poyọnho bo kú?
  • Eyin Adam po Evi po ko setonuna Jehovah wẹ, nawẹ gbẹzan yetọn po ovi yetọn lẹ po tọn na ko te?
  • Nawẹ tolivivẹ Evi tọn hẹn awufiẹsa wá na ẹn gbọn?
  • Nawẹ visunnu Adam po Evi po tọn tintan po awetọ po nọ yin?
  • Ovi devo tẹlẹ wẹ tin to yẹdide lọ mẹ?

Kanbiọ devo lẹ

  • Hia Gẹnẹsisi 3:16-23 po 4:1, 2 po.

    Nawẹ odẹ̀ he yin hihodo aigba yinuwado gbẹzan Adam tọn ji gbọn? (Gẹn. 3:17-19; Lom. 8:20, 22)

    Naegbọn e do sọgbe dọ yọnnu lọ ni yin yiylọdọ Evi, he zẹẹmẹdo “Mẹhe to Ogbẹ̀”? (Gẹn. 3:20)

    Nawẹ Jehovah do mẹtọnhopọn hia Adam po Evi po to whenuena yé tlẹ ko waylando godo gbọn? (Gẹn. 3:7, 21)

  • Hia Osọhia 21:3, 4.

    “Onú tintan” tẹlẹ wẹ hiẹ to nukundo dọ yé na yin didesẹ?