Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 4: Nuhewutu Yé Do Yin Yinyan sọn Jipa lọ Mẹ

Otàn 4: Nuhewutu Yé Do Yin Yinyan sọn Jipa lọ Mẹ

PỌ́N nuhe to jijọ todin. Adam po Evi po yin yinyan jẹgbonu sọn jipa whanpẹnọ Edẹni tọn mẹ. Be a yọ́n nuhewutu wẹ?

Adam po Evi po yin yinyan jẹgbonu sọn jipa Edẹni tọn mẹ

Na yé wà nuhe ylan taun de wutu wẹ. Enẹ wẹ zọ́n bọ Jehovah do domẹplọnlọ yé go. Be a yọ́n nuylankan he Adam po Evi po wà ya?

Yé wà nuhe Jiwheyẹwhe ko gbẹ́ na yé ma nado wà. Jiwheyẹwhe dọna yé dọ yé sọgan dù sinsẹ́n atin he to jipa lọ mẹ lẹ tọn. Ṣigba Jiwheyẹwhe gbẹ́ na yé ma nado dù sinsẹ́n atin dopo de tọn, e ma yinmọ yé na kú. Jiwheyẹwhe de atin enẹ dovo na ede. Mí ka yọnẹn dọ e ma sọgbe nado yí onú mẹdevo tọn, kavi e ma yin mọwẹ? Eyọn, nawẹ nulẹ wá yì do?

To gbèdopo, whenuena Evi tin edeṣo to jipa lọ mẹ, odàn de dọhona ẹn. Pọ́n bo! E dọna Evi nado dù sinsẹ́n atin he Jiwheyẹwhe gbẹ́ na yé ma nado dù lọ tọn. Ṣigba, to whenuena Jehovah dá odàn lẹ, e ma dá yé nado nọ dọho gba. Ehe dohia dọ mẹde wẹ to hodọ gbọn odàn lọ gblamẹ. Mẹnu wẹ?

E ma yin Adam gba. E dona ko yin dopo to angẹli lẹ mẹ. Flindọ Jehovah ko dá angẹli lẹ hoho whẹpo do wá dá aigba. Mí ma sọgan mọ nudida ehelẹ. Dopo to yé mẹ wá lẹzun goyitọ. E jẹ mimọ to ede mẹ ji dọ emi lọsu dona lẹzun ogán taidi Jiwheyẹwhe. Podọ e jlo dọ gbẹtọ lẹ ni setonuna emi kakati nido yin Jehovah. Ewọ wẹ angẹli he dọho gbọn odàn lọ gblamẹ.

Angẹli ehe penugo bo klọ Evi. To whenuena e dọna ẹn dọ e na taidi Jiwheyẹwhe eyin e dù atin-sinsẹ́n lọ, Evi yí i sè. Enẹwutu e dù atin-sinsẹ́n lọ bọ Adam lọsu sọ dù. Adam po Evi po vẹtolina Jiwheyẹwhe, podọ enẹwutu wẹ yé do yin yinyan sọn jipa whanpẹnọ yetọn mẹ.

Ṣigba, to gbèdopo, Jiwheyẹwhe na hẹn ẹn diun dọ aigba lọ blebu yọnwhanpẹ taidi jipa Edẹni tọn. To nukọn mẹ, mí na plọn lehe hiẹ lọsu sọgan gọalọ to ehe wiwà mẹ do. Todin whẹ́, gbọ mí ni dindona nuhe jọ do Adam po Evi po go.

Gẹnẹsisi 2:16, 17; 3:1-13, 24; Osọhia 12:9.



Kanbiọ lẹ

  • To yẹdide lọ mẹ, etẹwẹ jọ do Adam po Evi po go?
  • Naegbọn Jehovah do domẹplọnlọ yé go?
  • Etẹwẹ odàn de dọna Evi?
  • Mẹnu wẹ dọhona Evi gbọn odàn lọ gblamẹ?
  • Naegbọn Adam po Evi po do yin yinyan sọn jipa whanpẹnọ yetọn mẹ?

Kanbiọ devo lẹ

  • Hia Gẹnẹsisi 2:16, 17 po 3:1-13, 24 po.

    Nawẹ kanbiọ he odàn lọ kanse Evi do Jehovah hia to aliho agọ̀ mẹ gbọn? (Gẹn. 3:1-5; 1 Joh. 5:3)

    Avase tẹwẹ mí mọyi sọn nuṣiwa Evi tọn mẹ? (Flp. 4:8; Jak. 1:14, 15; 1 Joh. 2:16)

    Nawẹ Adam po Evi po gboawupo nado kẹalọyi nuṣiwa yetọn gbọn? (Gẹn. 3:12, 13)

    Nawẹ kelubimi he yin dide do whèzẹtẹn jipa Edẹni tọn lẹ nọgodona nupojipetọ-yinyin Jehovah tọn gbọn? (Gẹn. 3:24)

  • Hia Osọhia 12:9.

    Obá tẹ mẹ wẹ Satani ko tindo kọdetọn dagbe jẹ to vivẹnudido etọn mẹ nado hẹn gbẹtọvi lẹ jẹagọdo gandudu Jiwheyẹwhe tọn? (1 Joh. 5:19)