Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 3: Sunnu Tintan po Yọnnu Tintan Po

Otàn 3: Sunnu Tintan po Yọnnu Tintan Po

ETẸWẸ yin nuyọyọ to yẹdide ehe mẹ? Gbẹtọ he tin to e mẹ lẹ wẹ. Sunnu tintan po yọnnu tintan lọ po wẹ. Mẹnu wẹ dá yé? Jiwheyẹwhe wẹ. Be a yọ́n yinkọ etọn ya? Jehovah wẹ e nọ yin. Podọ sunnu po yọnnu lọ po nọ yin Adam po Evi po.

Adam po Evi po to jipa Edẹni tọn mẹ

Gbọ mí ni pọ́n lehe Jehovah Jiwheyẹwhe dá Adam do. E yí kọ́gudu vude sọn aigba mẹ bo yí i do basi agbasa pipé de, yèdọ agbasa sunnu de tọn. Enẹgodo, e gbọ do awọntinslo sunnu lọ tọn mẹ, bọ Adam lẹzun gbẹtọ gbẹ̀te.

Jehovah Jiwheyẹwhe ze azọ́n de do alọmẹ na Adam. E dọna Adam nado do yinkọ na kanlin wunmẹwunmẹ lẹpo. Adam na ko yí whenu susu do pọ́n nuyiwa kanlin lọ lẹ tọn ganji nado sọgan do yinkọ he sọgbe hugan na yemẹpo. To whenuena Adam to yinkọ do na kanlin lẹ, e doayi nude go. Be a yọ́n nulọ ya?

Kanlin asu lẹpo wẹ tindo asi. Ajinnakú asu lẹ tin to finẹ po ajinnakú asi lẹ po, podọ kinnikinni asu lẹ po kinnikinni asi lẹ po. Ṣigba Adam ma tindo mẹdepope he na yin asi etọn. Enẹwutu Jehovah hẹn Adam nado damlọn yìkànmẹ bo yí dopo to adàjahú etọn lẹ mẹ. Jehovah yí adàjahú ehe do basi yọnnu de na Adam bọ e sọ lẹzun asi etọn.

Pọ́n lehe homẹ Adam tọn hùn todin do sọ! Sọ pọ́n lehe homẹ Evi tọn na ko hùn do to whenuena e mọ ede to jipa whanpẹnọ ehe mẹ! Todin yé sọgan ji ovi lẹ bosọ nọgbẹ̀ to pọmẹ po ayajẹ po.

Jehovah jlo dọ Adam po Evi po ni nọgbẹ̀ kakadoi. E jlo dọ yé ni hẹn aigba lọ blebu yọnwhanpẹ taidi jipa Edẹni tọn. Lehe homẹ Adam po Evi po tọn na ko hùn do sọ dile yé to nulẹnpọndo azọ́n he to nukọn na yé ehe ji! Be e na ko jlo we nado gọalọ to aigba blebu hinhẹn zun jipa whanpẹnọ de mẹ ya? Ṣigba ayajẹ Adam po Evi po tọn ma dẹn-to-aimẹ. Gbọ mí ni pọ́n nuhewutu wẹ.

Psalm 83:18; Gẹnẹsisi 1:26-31; 2:7-25.



Kanbiọ lẹ

  • Vogbingbọn tẹwẹ tin to yẹdide otàn 3tọ po 2tọ po tọn ṣẹnṣẹn?
  • Mẹnu wẹ dá sunnu tintan lọ, podọ nawẹ sunnu lọ nọ yin?
  • Azọ́n tẹwẹ Jiwheyẹwhe dena Adam nado wà?
  • Naegbọn Jiwheyẹwhe do hẹn Adam nado damlọn yìkànmẹ?
  • Nawẹ Adam po Evi po sọgan ko nọgbẹ̀ dẹnsọ, podọ azọ́n tẹwẹ Jehovah jlo dọ yé ni wà?

Kanbiọ devo lẹ

  • Hia Psalm 83:18.

    Nawẹ Jiwheyẹwhe nọ yin, podọ aṣẹpipa vonọtaun tẹwẹ e tindo do aigba ji? (Jel. 16:21; Dan. 4:17)

  • Hia Gẹnẹsisi 1:26-31.

    Nudida tẹwẹ Jiwheyẹwhe yí do dotana azán nudida tọn ṣidopotọ, podọ etẹwẹ nudida ehe yí do gbọnvo na kanlin lẹ? (Gẹn. 1:26)

    Núdùdù tẹwẹ Jehovah wleawu etọn na gbẹtọ po kanlin lẹ po? (Gẹn. 1:30)

  • Hia Gẹnẹsisi 2:7-25.

    Etẹwẹ azọ́n he yin didena Adam nado na yinkọ kanlin lẹ bẹhẹn? (Gẹn. 2:19)

    Nawẹ Gẹnẹsisi 2:24 gọalọna mí gbọn nado mọnukunnujẹ pọndohlan Jehovah tọn mẹ gando alọwle, kinklan, po gbẹdai po go? (Mat. 19:4-6, 9)