Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 1: Jiwheyẹwhe Jẹ Nulẹ Basi Ji

Otàn 1: Jiwheyẹwhe Jẹ Nulẹ Basi Ji

ONÚ dagbe he mí tindo lẹpo wẹ wá sọn Jiwheyẹwhe dè. E dá owhè nado na mí hinhọ́n to okle, podọ osun po sunwhlẹvu lẹ po na mí nido sọgan mọ hinhọ́n to zánmẹ. Jiwheyẹwhe sọ dá aigba na mí nido nọ nọ̀ e ji.

Ṣigba, e ma yin owhè, osun, sunwhlẹvu lẹ po aigba po wẹ Jiwheyẹwhe dá jẹnukọn gba. Be a yọ́n nuhe e dá jẹnukọn ya? Angẹli lẹ wẹ Jiwheyẹwhe dá jẹnukọn. Mí ma sọgan mọ angẹli lẹ, dile mí ma sọgan mọ Jiwheyẹwhe do. Jiwheyẹwhe dá angẹli lẹ nado nọ nọ̀ po e po to olọn mẹ.

Angẹli tintan he Jiwheyẹwhe dá nọ yin yiylọdọ Ovi tintan Jiwheyẹwhe tọn. Jiwheyẹwhe yiwanna ẹn taun, podọ e wazọ́n hẹ Otọ́ etọn. E gọalọna Jiwheyẹwhe nado dá nuhe pò lẹpo. E gọalọna Jiwheyẹwhe nado dá owhè, osun, sunwhlẹvu lẹ po aigba mítọn lọsu po.

Nawẹ aigba te do to whenẹnu? To bẹjẹeji, mẹdepope ma sọgan nọ aigba ji. Nudepope ma tin; osin kẹdẹ wẹ ṣinyọ́n aigba blebu ji. Ṣigba Jiwheyẹwhe jlo dọ gbẹtọ lẹ ni nọ aigba ji. Enẹwutu, e jẹ awuwlena nulẹ ji na mí. Etẹwẹ e wà?

Tintan whẹ́, e jẹ dọ aigba ni tindo hinhọ́n. Enẹwutu, Jiwheyẹwhe hẹn owhè nado tá hinhọ́n do aigba ji. E wleawuna hinhọ́n lọ to aliho de mẹ bọ ozán na nọ kú bọ ai na nọ họ́n. Enẹgodo, Jiwheyẹwhe hẹn aigba tọ́n wá aga sọn osin mẹ.

To bẹjẹeji, nudepope ma tin to aigba ji. E taidi yẹdide he a to mimọ tofi nkọ. Vounvoun, atin kavi kanlin depope ma tin. Whèvi depope ma tlẹ tin to otọ̀ lẹ mẹ. Jiwheyẹwhe gbẹsọ dona wazọ́n susu na aigba nido yin fininọ dagbe de na kanlin lẹ po gbẹtọ lẹ po.

Jelemia 10:12; Kọlọsinu lẹ 1:15-17; Gẹnẹsisi 1:1-10.

Aigba gbọgbé


Kanbiọ lẹ

  • Mẹnu dè wẹ onú dagbe lẹpo wá sọn, podọ be a sọgan na apajlẹ de ya?
  • Etẹwẹ Jiwheyẹwhe dá jẹnukọn?
  • Naegbọn angẹli tintan lọ do gbọnvo?
  • Basi zẹẹmẹ lehe aigba te do to bẹjẹeji tọn. (Pọ́n yẹdide.)
  • Nawẹ Jiwheyẹwhe jẹ awuwlena aigba ji na kanlin lẹ po gbẹtọ lẹ po gbọn?

Kanbiọ devo lẹ

  • Hia Jelemia 10:12.

    Jẹhẹnu Jiwheyẹwhe tọn tẹlẹ wẹ sọawuhia to nudida etọn lẹ mẹ? (Isa. 40:26; Lom. 11:33)

  • Hia Kọlọsinu lẹ 1:15-17.

    Adà tẹwẹ Jesu yiwà to azọ́n nudida tọn lẹ mẹ, podọ nawẹ ehe dona yinuwado lehe mí nọ pọ́n ẹn hlan do ji gbọn? (Kọl. 1:15-17)

  • Hia Gẹnẹsisi 1:1-10.

    Nawẹ aigba bẹjẹeji gbọn? (Gẹn. 1:1)

    Etẹwẹ jọ to azán nudida tọn tintan gbè? (Gẹn. 1:3-5)

    Basi zẹẹmẹ nuhe jọ to azán nudida tọn awetọ gbè tọn. (Gẹn. 1:7, 8)