Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Ahọluduta Jiwheyẹwhe Tọn to Gandu!

 WETA 6

Mẹhe to Yẹwhehodọ lẹ—Lizọnyizọnwatọ lẹ Ze Yede Jo sọn Ojlo mẹ Wá

Mẹhe to Yẹwhehodọ lẹ—Lizọnyizọnwatọ lẹ Ze Yede Jo sọn Ojlo mẹ Wá

NUHE WETA LỌ BẸHẸN

Ahọlu lọ wleawuna awhànpa yẹwhehodọtọ lẹ tọn de

1, 2. Azọ́n daho tẹwẹ Jesu dọ dọdai etọn, podọ kanbiọ titengbe tẹwẹ fọndote?

GANDUTỌ TONUDỌTỌ lẹ nọ saba dopà bo ma nọ de. Mẹhe tlẹ tindo linlẹn dagbe to yé mẹ lẹ sọgan nọma penugo nado depà yetọn lẹ. To vogbingbọn mẹ, Ahọlu Mẹsia, yèdọ Jesu Klisti, nọ depà etọn lẹ to whepoponu.

2 To whenue Jesu lẹzun Ahọlu to 1914, e wleawufo nado hẹn dọdai de he e ko dọ sọn nudi owhe 1 900 die di. Ojlẹ vude whẹpo Jesu do kú, e dọ dọdai dọmọ: “Yẹwheho wẹndagbe Ahọluduta lọ tọn ehe na yin didọ to aigba fininọ lẹpo ji.” (Mat. 24:14) Hẹndi dọdai enẹ tọn na yin apadewhe ohia tintin tofi etọn tọn to huhlọn Ahọluduta tọn mẹ. Ṣigba, kanbiọ titengbe de fọndote dọmọ: Nawẹ Ahọlu lọ na penugo nado wleawuna awhànpa yẹwhehodọtọ mẹdezejotọ lẹ tọn de to azán godo tọn lẹ mẹ gbọn—yèdọ ojlẹ he mẹ gbigbọ ṣejannabi tọn, owanyi matindo tọn po ojlo matindo na sinsẹ̀n tọn po gbayipe te? (Mat. 24:12; 2 Tim. 3:1-5) Mí dona yọ́n gblọndo kanbiọ enẹ tọn, na gblọndo lọ gando Klistiani nugbo lẹpo go.

3. Jidide tẹwẹ Jesu dohia, podọ fie wẹ e hẹn jidide mọnkọtọn sọn?

3 Mì gbọ mí ni pọ́n dọdai he Jesu dọ lọ whladopo dogọ. Be hodidọ lọ ‘yẹwheho na yin didọ’ ma do jide hia ya? Na nugbo tọn, e do jide hia! Jesu kudeji dọ emi na tindo godonọnamẹtọ mẹdezejotọ lẹ to azán godo tọn lẹ mẹ. Fie wẹ e hẹn jidide enẹ sọn? E plọn ehe sọn Otọ́ etọn dè. (Joh. 12:45; 14:9) Whẹpo Jesu do wá aigba ji, e mọdọ Jehovah nọ tindo jide to gbigbọ mẹdezejo tọn he sinsẹ̀n-basitọ Etọn lẹ nọ dohia mẹ. Mì gbọ mí ni pọ́n lehe Jehovah do jidide enẹ hia do.

“Omẹ Towe lẹ Na Ze Yede Jo sọn Ojlo mẹ Wá”

4. Azọ́n tẹwẹ Jehovah basi oylọna Islaelivi lẹ nado nọgodona, podọ nawẹ yé yinuwa gbọn?

4 Flin nuhe jọ to whenue Jehovah na anademẹ Mose nado gbá gòhọtúntún kavi gòhọ he na yin ahọnkan sinsẹ̀n-bibasi tọn na akọta Islaeli tọn. Jehovah gbọn Mose gblamẹ basi oylọna gbẹtọ lọ lẹpo nado nọgodona azọ́n lọ. Mose dọna yé dọmọ: “Mì gbọ mẹdepope he tindo ojlo ni hẹn onú ehelẹ wá taidi nunina de na Jehovah.” Etẹwẹ yin kọdetọn lọ? Gbẹtọ lọ lẹ “zindonukọn bo to nunina sọn ojlo mẹ wá lẹ hẹnwa . . . egbesọegbesọ.” Yé  hẹn nususu wá sọmọ bọ yè dona dọna yé nado “doalọtena nulẹ hinhẹnwa”! (Eks. 35:5; 36:3, 6) Islaelivi lẹ yinuwa sọgbe hẹ jidide he Jehovah tindo to yé mẹ.

5, 6. Sọgbe hẹ Salmu lẹ 110:1-3, gbigbọ tẹwẹ Jehovah podọ Jesu lọsu nọ donukun dọ emi na mọ to sinsẹ̀n-basitọ nugbo lẹ ṣẹnṣẹn to ojlẹ opodo tọn lọ mẹ?

5 Be Jehovah donukun dọ emi na mọ gbigbọ mẹdezejo tọn mọnkọtọn to sinsẹ̀n-basitọ emitọn lẹ mẹ to azán godo tọn lẹ mẹ ya? Mọwẹ! Hugan owhe 1 000 whẹpo Jesu do yin jiji do aigba ji, Jehovah gbọdo Davidi nado wlanwe gando ojlẹ he mẹ Mẹsia na jẹ gandu ji te go. (Hia Salmu lẹ 110:1-3.) Jesu he ṣẹṣẹ hẹ ofìn ji taidi Ahọlu na tindo kẹntọ he na diọnukunsọ ẹ lẹ. Etomọṣo, e nasọ tindo awhànpa godonọnamẹtọ lẹ tọn de. Yé ma na yin hinhẹn gánnugánnu nado sẹ̀n Ahọlu lọ. Jọja he tlẹ tin to yé mẹ lẹ na ze yede jo sọn ojlo mẹ wá po awubibọ po, yé nasọ lẹzun susugege sọmọ bọ yé sọgan yin yiyijlẹdo kùnkùn ahun tọn madosọha he nọ ṣinyọ́n aigba to afọnnu go. *

Godonọnamẹtọ mẹdezejotọ Ahọluduta lọ tọn lẹ taidi ahun susugege (Pọ́n hukan 5)

6 Jesu yọnẹn dọ dọdai he to Salmu lẹ 110 mẹ lọ gando emi go. (Mat. 22:42-45) Enẹwutu, e tindo whẹwhinwhẹ́n lẹpo nado deji dọ emi na mọ godonọnamẹtọ nugbonọ lẹ he na ze yede jo sọn ojlo mẹ wá nado dọyẹwheho to aigba lẹpo ji. Etẹwẹ whenuho ko dohia? Na nugbo tọn, be Ahọlu lọ ko wleawuna awhànpa yẹwhehodọtọ mẹdezejotọ lẹ tọn de to azán godo tọn ehelẹ mẹ ya?

“Lẹblanulọkẹyi po Azọngban Ṣie po Wẹ Nado Lá Owẹ̀n Enẹ”

7. To whenue Jesu ko yin zizedo ofìn ji taidi Ahọlu, afọdide tẹlẹ wẹ e ze nado wleawuna godonọnamẹtọ etọn lẹ na azọ́n he to nukọn?

7 Ojlẹ vude to whenue Jesu yin zizedo ofìn ji di Ahọlu godo, e ze afọdide lẹ nado wleawuna hodotọ etọn lẹ na azọ́n daho he dona yin wiwà. Dile mí mọ to Weta 2tọ mẹ do, e basi dlapọn po klọ́we de po bẹsọn 1914 jẹ bẹjẹeji 1919 tọn. (Mal. 3:1-4) Enẹgodo to 1919, e de afanumẹ nugbonọ lọ nado nọ deanana nulẹ  to hodotọ etọn lẹ ṣẹnṣẹn. (Mat. 24:45) Titengbe sọn ojlẹ enẹ mẹ sọyi, afanumẹ enẹ jẹ núdùdù gbigbọmẹ tọn má ji—gbọn hodidọ plidopọ tọn lẹ po owe zinjẹgbonu lẹ po gblamẹ—he nọ zinnudeji pludopludo dọ azọngban Klistiani dopodopo tọn wẹ nado nọ dọyẹwheho.

8-10. Nawẹ plidopọ lẹ whànmẹ na azọ́n yẹwhehodidọ tọn gbọn? Na apajlẹ de. (Sọ pọ́n apotin lọ “ Plidopọ Dowhenu Tọn lẹ He Whànmẹ Na Azọ́n Yẹwhehodidọ Tọn.”)

8 Hodidọ plidopọ tọn lẹ. Na Biblu Plọntọ lẹ to jejeji nado mọ anademẹ lẹ yí wutu, yé pli dopọ to tòdaho Cedar Point, Ohio tọn mẹ, to États-Unis, sọn 1er jẹ 8 septembre 1919, na plidopọ ayidego tọn tintan he yin bibasi to Wẹkẹ-Whàn I godo tlolo. To azán awetọ gbè, Mẹmẹsunnu Rutherford na hodidọ de he mẹ e dọna mẹplidopọ lẹ te tlọlọ dọmọ: “Azọ́ndenamẹ Klistiani de tọn to aigba ji . . . wẹ nado lá owẹ̀n ahọluduta Oklunọ tọn.”

9 Adà ayidego tọn hugan plidopọ lọ tọn wá aimẹ to azán atọ̀n godo, whenue Mẹmẹsunnu Rutherford na hodidọ he tindo hosọ lọ “Hodidọ Na Azọ́nwatọ Hatọ Lẹ,” ehe yin zinzinjẹgbonu to Atọ̀họ̀-Nuhihọ́ lọ Tọn mẹ to hosọ lọ “Lá Ahọluduta lọ” glọ. E dọmọ: “To ojlẹ he mẹ Klistiani de to nulẹnpọn sisosiso te, e nọ kanse ede dọ, Etẹwutu n’to gbẹ̀mẹ? Podọ gblọndo etọn dona yin, Oklunọ ko gbọn mẹtọnhopọn dali de mi taidi afọzedaitọ etọn nado lá owẹ̀n whẹgbigbọ tọn na aihọn, podọ lẹblanulọkẹyi po azọngban ṣie po wẹ nado lá owẹ̀n enẹ.”

10 To hodidọ ayidego tọn enẹ mẹ, Mẹmẹsunnu Rutherford lá dọ linlinnamẹwe yọyọ de, he na yin yiylọdọ L’Âge d’Or (todin Réveillez-vous!), na nọ yin zinzinjẹgbonu nado dọ̀n ayidonugo gbẹtọ lẹ tọn wá Ahọluduta lọ ji taidi todido dopo akàn lọ na gbẹtọvi lẹ. Enẹgodo, e kanse mẹplidopọ lẹ dọ mẹnu lẹ wẹ jlo nado tindo mahẹ to linlinnamẹwe ehe mimá mẹ. Linlin he gando plidopọ lọ go de basi zẹẹmẹ dọmọ: “Gbẹtọ 6 000 he tin to plidopọ lọ tẹnmẹ lẹpo wẹ fọnṣite nado dohia dọ yé tindo ojlo nado tindo mahẹ to azọ́n lọ mẹ. Ehe jiawu taun.” * E họnwun dọ, Ahọlu lọ tindo godonọnamẹtọ mẹdezejotọ lẹ he to jejeji nado lá Ahọluduta etọn!

11, 12. Etẹwẹ Atọ̀họ̀-Nuhihọ́ lọ Tọn dọ to 1920 gando whenue azọ́n he Jesu dọ dọdai dọ e na yin wiwà go?

11 Owe zinjẹgbonu lẹ. Gbọn Atọ̀họ̀-Nuhihọ́ lọ Tọn gblamẹ, nujọnu-yinyin azọ́n he Jesu dọ dọdai etọn—yèdọ yẹwheho wẹndagbe Ahọluduta lọ tọn lilá—wá họnwun dogọ. Pọ́n apajlẹ delẹ he wá aimẹ to bẹjẹeji 1920 lẹ tọn.

12 Owẹ̀n tẹwẹ na yin lilá nado hẹn dọdai he tin to Matiu 24:14 mẹ di? Whetẹnu wẹ azọ́n enẹ na yin wiwà? Zinjẹgbonu Atọ̀họ̀-Nuhihọ́ lọ Tọn 1er juillet 1920 tọn basi zẹẹmẹ to hosọ lọ “Wẹndagbe Ahọluduta lọ Tọn” mẹ dọmọ: “Tofi, wẹndagbe lọ gando vivọnu titonu hoho ehe tọn po didoai ahọluduta Mẹsia tọn po go.” Hosọ lọ do whenue owẹ̀n ehe na yin lilá hia hezeheze dọmọ: “Owẹ̀n ehe dona yin lilá to wẹkẹ whàn daho lọ [Wẹkẹ-Whàn I] po ‘nukunbibia daho lọ’ po ṣẹnṣẹn.” Enẹwutu,  hosọ lọ zinnudeji dọmọ: “Din wẹ ojlẹ lọ . . . nado lá wẹndagbe ehe na Mẹylọhodotọklisti tọn lẹdo aihọn pé.”

13. Nawẹ Atọ̀họ̀-Nuhihọ́ lọ Tọn to 1921 dozolanmẹna Klistiani yiamisisadode lẹ nado wà azọ́n lọ sọn ojlo mẹ wá gbọn?

13 Be huhlọn wẹ yè na yí do hẹn omẹ Jiwheyẹwhe tọn lẹ nado wà azọ́n he Jesu dọ dọdai etọn lọ ya? Lala. Hosọ lọ “Mì Gọ́ Na Adọgbigbo,” he tin to zinjẹgbonu Atọ̀họ̀-Nuhihọ́ lọ Tọn 15 mars 1921 tọn mẹ dozolanmẹna Klistiani yiamisisadode lẹ nado wà azọ́n lọ sọn ojlo mẹ wá. Dopodopo yetọn yin tulina nado kanse ede dọmọ: “Be e ma yin lẹblanulọkẹyi daho po azọngban de po wẹ e yin na mi nado tindo mahẹ to azọ́n ehe mẹ ya?” Hosọ lọ zindonukọn dọmọ: “Mí tindo jide dọ eyin a mọ ẹn [taidi lẹblanulọkẹyi nado tindo mahẹ to azọ́n lọ mẹ], a na taidi Jelemia, ahun mẹhe tọn mẹ ohó Oklunọ tọn ‘taidi miyọ́n de he to jiji he yin ginglọndo ohú etọn lẹ mẹ’ te, bo nọ to whinwhàn ẹn nado dọ ohó lọ.” (Jel. 20:9) Tulinamẹ zohunhunnọ enẹ do jide he Jehovah po Jesu po tindo to godonọnamẹtọ nugbonọ Ahọluduta lọ tọn lẹ mẹ hia.

14, 15. To 1922, aliho tẹ mẹ wẹ Atọ̀họ̀-Nuhihọ́ lọ Tọn dotuhomẹna Klistiani yiamisisadode lẹ nado hẹn owẹ̀n lọ jẹ mẹdevo lẹ dè te?

14 Nawẹ Klistiani nugbo lẹ dona hẹn owẹ̀n Ahọluduta lọ tọn jẹ mẹdevo lẹ dè gbọn? Hosọ gli de he yin “Sinsẹ̀nzọn lọ Yin Dandannu” to Atọ̀họ̀-Nuhihọ́ lọ Tọn 15 août 1922 tọn mẹ dotuhomẹna Klistiani yiamisisadode lẹ nado nọ “yí zohunhun do hẹn owẹ̀n he yin zinzinjẹgbonu lọ jẹ gbẹtọ lẹ dè bo nọ dọhona yé to ohọ̀n yetọn lẹ kọ̀n, nado dekunnu dọ ahọluduta olọn tọn ko sẹpọ.”

15 E họnwun dọ, bẹsọn 1919, Klisti ko yí afanumẹ nugbonọ podọ nuyọnẹntọ lọ zan nado zinnudeji pludopludo dọ lẹblanulọkẹyi po azọngban Klistiani de tọn po to aigba ji wẹ nado lá owẹ̀n Ahọluduta lọ tọn. Ṣigba, nawẹ Biblu Plọntọ dowhenu tọn enẹlẹ yinuwa hlan tudohomẹnamẹ lọ nado tindo mahẹ to azọ́n Ahọluduta lọ tọn lilá mẹ gbọn?

“Nugbonọ lẹ Na Ze Yede Jo”

16. Nawẹ mẹho he yin dide gbọn vòbibla dali delẹ jẹagọdo linlẹn lọ dọ mẹlẹpo ni tindo mahẹ to lizọnyizọn lọ mẹ gbọn?

16 To 1920 po 1930 lẹ po gblamẹ, mẹdelẹ jẹagọdo linlẹn lọ dọ Klistiani yiamisisadode lẹpo wẹ dona tindo mahẹ to lizọnyizọn lọ mẹ. Atọ̀họ̀-Nuhihọ́ lọ Tọn 1er novembre 1927 tọn basi zẹẹmẹ nuhe to jijọ tọn dọmọ: “Mẹdelẹ tin to ṣọṣi [agun] lọ mẹ to egbehe bo tin to otẹn azọngban mẹho tọn mẹ . . . he nọ gbẹ́ nado tindo mahẹ to lizọnyizọn lọ mẹ, bosọ nọ gbẹ́ nado na tuli mẹmẹsunnu yetọn lẹ nado wàmọ. . . . Yé nọ mọhodọdo anademẹ lọ go nado yì sọn họndekọn jẹ họndekọn bo hẹn owẹ̀n Jiwheyẹwhe tọn, Ahọlu etọn po ahọluduta etọn po tọn jẹ gbẹtọ lẹ dè.” Hosọ lọ dọ tlọlọ dọmọ: “Ojlẹ lọ ko sọ̀ na nugbonọ lẹ nado dohiagona omẹ enẹlẹ podọ nado dapana yé, podọ nado dọna yé dọ mí ma nasọ nọ ze omẹ mọnkọtọn lẹ do otẹn azọngban mẹho tọn mẹ ba.” *

17, 18. Nawẹ suhugan hagbẹ agun tọn lẹ setonuna anademẹ he wá sọn tatọ́-tẹnnọ gbọn, podọ nawẹ gbẹtọ livi susu lẹ ko yinuwa gbọn to nuhe hugan owhe 100 he wayi lọ mẹ?

17 Mí dopẹ́ dọ mẹsusu to agun lẹ mẹ yí zohunhun do setonuna anademẹ he wá sọn tatọ́-tẹnnọ. Yé mọdọ lẹblanulọkẹyi  de wẹ e yin nado tindo mahẹ to owẹ̀n Ahọluduta lọ tọn lilá mẹ. Atọ̀họ̀-Nuhihọ́ lọ Tọn 15 mars 1926 tọn, dọ to aliho ehe mẹ dọmọ: “Nugbonọ lẹ na ze yede jo . . . nado lá owẹ̀n ehe na gbẹtọ lẹ.” Nugbonọ mọnkọtọn lẹ yinuwa to kọndopọ mẹ hẹ dọdai he tin to Salmu lẹ 110:3 mẹ bo desọn ojlo mẹ nado nọgodona Ahọlu Mẹsia.

18 To owhe 100 he wayi gblamẹ, gbẹtọ livi susu lẹ ko ze yede jo nado lá Ahọluduta lọ. To weta he bọdego lẹ mẹ, mí na dọhodo lehe yé ko dọyẹwheho gbọn ji—aliho po azọ́nwanu he yé ko yizan lẹ po—gọna kọdetọn etọn lẹ. Ṣigba jẹnukọn whẹ́, mì gbọ mí ni dọhodo nuhewutu gbẹtọ livi susu ko tindo mahẹ to azọ́n yẹwheho Ahọluduta lọ tọn didọ sọn ojlo mẹ wá ji, mahopọnna dọ mí to aihọn ṣejannabi tọn de mẹ. Dile mí to dogbapọnna nuhewutu wẹ, e na yọ́n nado kanse míde dọ, ‘Naegbọn n’nọ lá wẹndagbe lọ na mẹdevo lẹ?’

“Mì Zindonukọn Nado to Ahọluduta lọ . . . Dín Whẹ́”

19. Naegbọn mí nọ setonuna ayinamẹ Jesu tọn lọ he dọ “mì zindonukọn nado to Ahọluduta lọ . . . dín whẹ́”?

19 Jesu na ayinamẹ hodotọ etọn lẹ dọ “mì zindonukọn nado to Ahọluduta lọ . . . dín whẹ́.” (Mat. 6:33) Etẹwutu mí nọ setonuna ayinamẹ enẹ? Do glido, na mí yọ́n nujọnu-yinyin Ahọluduta lọ tọn wutu, na e yin dandan na lẹndai Jiwheyẹwhe tọn nido mọ hẹndi. Dile mí mọ to weta he jẹnukọn na ehe mẹ do, gbigbọ wiwe ko de nugbo ojlofọndotenamẹ tọn lẹ hia vudevude gando Ahọluduta lọ go. Eyin nugbo họakuẹ Ahọluduta lọ tọn jẹ ahun mítọn mẹ, e nọ whàn mí nado dín Ahọluduta lọ whẹ́.

Dile homẹ dawe he mọ adọkunnu whiwhla de tọn hùn taun do, homẹ Klistiani lẹ tọn nọ hùn na yé ko mọ nugbo Ahọluduta lọ tọn wutu (Pọ́n hukan 20)

20. Nawẹ apajlẹ he Jesu na gando adọkunnu he yin zizewhla lọ go do lehe hodotọ etọn lẹ na yinuwa hlan ayinamẹ lọ nado ze Ahọluduta lọ do otẹn tintan mẹ gbọn?

20 Jesu yọ́n lehe hodotọ etọn lẹ na yinuwa hlan ayinamẹ lọ nado zindonukọn nado to Ahọluduta lọ dín whẹ́ do. Lẹnnupọndo apajlẹ he e na gando adọkunnu he yin zizewhla go ji. (Hia Matiu 13:44.) To whenue pakanọ he apajlẹ lọ dọho etọn to azọ́n etọn wà, e mọ adọkunnu de he yin whiwhla do ogle lọ mẹ bọ afọdopolọji e yọ́n obá he mẹ e họakuẹ jẹ. Etẹwẹ ewọ wà? “Na ayajẹ he e tindo wutu, e yì bo sà nuhe e tindo lẹpo bosọ họ̀ ogle lọ.” Etẹwẹ mí plọn sọn ehe mẹ? Eyin mí mọ nugbo Ahọluduta lọ tọn bo yọ́n obá he mẹ e họakuẹ jẹ, mí na yí ayajẹ do basi avọ́sinsan depope he e biọ nado ze Ahọluduta lọ do otẹn he jẹ mẹ—enẹ wẹ do otẹn tintan mẹ to gbẹzan mítọn mẹ. *

21, 22. Nawẹ mẹhe yin nugbonọ na Ahọluduta lọ lẹ nọ dohia dọ yé to Ahọluduta lọ dín whẹ́ gbọn? Na apajlẹ de.

21 Mẹhe yin nugbonọ na Ahọluduta lọ lẹ nọ dohia gbọn nuyiwa yetọn dali dọ yé ze Ahọluduta lọ do otẹn tintan mẹ, e ma yin gbọn nùmẹ-yozò poun dali gba. Yé nọ yí gbẹzan, nugopipe po nutindo yetọn lẹ po zan nado dọyẹwheho Ahọluduta lọ tọn. Mẹsusu ko basi avọ́sinsan susu nado sọgan doafọna sinsẹ̀nzọn whenu-gigọ́ tọn. E ko họnwun na yẹwhehodọtọ mẹdezejotọ enẹ lẹpo dọ Jehovah nọ dona mẹhe ze Ahọluduta lọ do otẹn tintan mẹ lẹ. Apajlẹ dopo die.

 22 Avery po Lovenia Bristow po he yin owe-mátọ (gbehosọnalitọ) lẹ sẹ̀n dopọ to vivọnu 1920 lẹ tọn to hùwaji États-Unis tọn. To owhe delẹ godo, Mẹmẹyọnnu Lovenia flin dọmọ: “Yẹn po Avery po ko duvivi azọ́n gbehosọnalitọ tọn na owhe susu to pọmẹ sọn whenẹnu gbọ́n. Ojlẹ delẹ nọ wá tin bọ mí ma tlẹ nọ yọ́n fie amì-kuẹ kavi nudànu lẹ nọ wá sọn. Ṣigba, Jehovah nọ saba wleawu nude tọn to aliho de kavi devo mẹ. Mí nọ saa to nukọnzindo poun. Mí nọ saba mọ nuhe sin hudo mí tindo janwẹ.” Lovenia flin nujijọ de to whenue yé to sinsẹ̀n to tòdaho Pensacola, Floride tọn mẹ, bọ akuẹ po nudànu yetọn lẹ po ko dibla vọ̀. Yé lẹkọwa mọto he taidi ohọ̀ yetọn kọ̀n bo mọ nudànu lẹ gọ́ saki daho awe mẹ po wekanhlanmẹ kleun de po he dọ dọ, “Nunina owanyinọ kleun de wẹ sọn pipli Pensacola tọn mẹ.” * To whenue Lovenia lẹnnupọndo owhe susu he e ko yizan to sinsẹ̀nzọn whenu-gigọ́ tọn mẹ ji, e dọmọ: “Jehovah ma gbẹkọ mí go gbede. E ma hẹn mí jẹflumẹ gbede na jide he mí tindo do e go.”

23. Numọtolanmẹ tẹwẹ a tindo gando nugbo Ahọluduta lọ tọn he a ko mọ go, podọ etẹwẹ a magbe nado wà?

23 Mímẹpo ma sọgan dọyẹwheho jẹ obá dopolọ mẹ. Ninọmẹ mítọn lẹ gbọnvo. Etomọṣo, mímẹpo wẹ sọgan pọ́n ẹn hlan taidi lẹblanulọkẹyi de nado lá wẹndagbe lọ po alindọn lẹpo po. (Kol. 3:23) Na mí nọ ylọ nugbo họakuẹ Ahọluduta lọ tọn he mí mọ dọ nujọnu wutu, mí nọ desọn ojlo mẹ—mọwẹ, mí nọ to jejeji—nado basi avọ́sinsan depope he e biọ nado sẹ̀n jẹ obá depope he yọnbasi mẹ. Be e ma yin gbemima towe niyẹn ya?

24. Etẹwẹ yin dopo to onú daho hugan he Ahọluduta lọ ko wadotana to azán godo tọn lẹ mẹ?

24 Na nugbo tọn, to owhe kanweko he wayi gblamẹ, Ahọlu lọ ko hẹn dọdai etọn he to Matiu 24:14 mẹ di. Podọ e wàmọ matin mẹhẹn po huhlọn po. To whenue hodotọ etọn lẹ ko tọ́n sọn aihọn ṣejannabi tọn ehe mẹ godo, yé ko ze yede jo sọn ojlo mẹ wá nado dọyẹwheho. Yẹwheho wẹndagbe lọ tọn didọ lẹdo aihọn pé yin apadewhe ohia tintin tofi Jesu tọn to huhlọn Ahọluduta tọn mẹ—podọ dopo to onú daho hugan he Ahọluduta lọ ko wadotana to azán godo tọn lẹ mẹ.

^ huk. 5 To Biblu mẹ, jijá ahun tọn nọ saba dlẹnalọdo nususu.—Jen. 27:28; Mika 5:7.

^ huk. 10 Alọnuwe pẹvi de he yin À qui l’œuvre est confiée [Mẹhe Azọ́n lọ Yin Zizedo Alọmẹ Na] basi zẹẹmẹ dọmọ: “Owẹ̀n ahọluduta lọ tọn lilá sọn whédegbè jẹ whédegbè whenu wẹ yè na yí L’Âge d’Or zan te. . . . To nujijla lọ whenu, vọkan L’Âge d’Or tọn dopo na nọ yin nina owhé dopodopo, vlavo yé basi akuẹdida kavi lala.” To owhe lẹ godo, tuli yin nina mẹmẹsunnu lẹ nado nọ ze akuẹdida L’Âge d’Or po Atọ̀họ̀-Nuhihọ́ lọ Tọn po tọn donukọnna gbẹtọ lẹ. Bẹsọn 1er février 1940, tuli yin nina omẹ Jehovah tọn lẹ nado nọ má vọkan linlinnamẹwe lẹ tọn na gbẹtọ lẹ bosọ nọ na linlin sọha he yé dogbonu tọn.

^ huk. 16 To ojlẹ enẹ mẹ, mẹho lẹ nọ yin dide to agun mẹ gbọn vòbibla dali. Enẹwutu, agun de sọgan gbẹ́ nado blavo na sunnu he jẹagọdo yẹwhehodidọ lẹ. Vọjlado gando mẹho lẹ dide to yẹwhehọluduta-liho go na yin hodọdeji to Weta 12tọ mẹ.

^ huk. 20 Jesu zinnudo onú mọnkọtọn de ji to apajlẹ he e na gando ajọwatọ tomẹyitọ de go mẹ, mẹhe yì nado yì dín peali he họakuẹ tlala de. To whenue ajọwatọ lọ mọ ẹn, e sà nuhe e tindo lẹpo bosọ họ̀ ẹ. (Mat. 13:45, 46) Apajlẹ awe lọ lẹ sọ plọn mí dọ mí sọgan plọn nugbo Ahọluduta lọ tọn to aliho voovo lẹ mẹ. Mẹdelẹ nọ dukosọ hẹ ẹ poun; mẹdevo lẹ nọ dín in whẹpo do mọ ẹn. Ṣigba, mahopọnna aliho he mẹ mí mọ nugbo lọ te, mímẹpo wẹ nọ desọn ojlo mẹ nado yí onú delẹ do sanvọ́ nado ze Ahọluduta lọ do otẹn tintan mẹ to gbẹzan mítọn mẹ.

^ huk. 22 Pipli wẹ agun lẹ nọ yin yiylọdọ to whenẹnu.

Plọnnu Dogọ

Sẹ̀n Jehovah Whenuena Azán Awufiẹsa Tọn lẹ Ma Ko Wá

Dotẹnmẹ vonọtaun tẹlẹ wẹ hundote na Klistiani mẹhomẹ lẹ nado gbloada na lizọnyizọn yetọn?