A KO wleawufo to afọnnu nado yì lizọnyizọn lọ mẹ to gbeegbe a ma nọ yì azọ́nmẹ. A whleawu na ojlẹ de, na nuṣikọna we wutu. E jlo we dọ a ni gbọjẹ vude! Amọ́, a hodẹ̀ bo magbe nado yì. Mẹmẹyọnnu yọnhonọ nugbonọ de po hiẹ po wẹ wazọ́n, bọ akọndonanu po homẹdagbe etọn po yinuwado ji we. Dile mì to owẹ̀n lọ lá sọn whédegbè jẹ whédegbè, a flindọ mọjanwẹ mẹmẹsunnu po mẹmẹyọnnu towe lẹ po to owẹ̀n dopolọ lá lẹdo aihọn pé do, bo to owe mítọn dopolọ lẹ yizan bọ yemẹpo to alemọyi sọn azọ́nplọnmẹ dopolọ mẹ. To kọlilẹ yì whé godo, a vọ́ huhlọn mọyi, bọ e vivi na we dọ a ma gbọṣi whégbè!

To alọnu din, lizọnyizọn Klistiani tọn wẹ yin azọ́n tangan lọ he wà Ahọluduta Jiwheyẹwhe tọn te. Jesu dopagbe dọ azọ́n yẹwhehodidọ tọn na gbayipe taun to azán godo tọn lẹ mẹ. (Mat. 24:14) Nawẹ dọdai etọn ko mọ hẹndi sọ? To adà ehe mẹ, mí na gbadopọnna mẹhe to wẹndagbe lọ lá lẹ, aliho he yizan yé te lẹ gọna azọ́nwanu he ko yí adà titengbe de wà to lizọnyizọn Klistiani tọn lọ mẹ lẹ, bo to alọgọna gbẹtọ livi susu lẹdo aihọn pé nado mọ Ahọluduta Jiwheyẹwhe tọn taidi nujọnu de.