Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Ahọluduta Jiwheyẹwhe Tọn to Gandu!

 WETA 5

Ahọlu lọ Tá Hinhọ́n Do Ahọluduta lọ Ji

Ahọlu lọ Tá Hinhọ́n Do Ahọluduta lọ Ji

NUHE WETA LỌ BẸHẸN

Omẹ Jiwheyẹwhe tọn lẹ wá mọnukunnujẹ nugbo tangan lẹ mẹ gando Ahọluduta lọ, gandutọ etọn lẹ, mẹjidugando etọn lẹ po nubiọtomẹsi etọn lẹ po go

1, 2. Aliho tẹ mẹ wẹ Jesu yin anademẹtọ nuyọnẹntọ de te?

MÍ NI dọ dọ numimọnọ de wẹ to anadena mì bọ mì to sadi gbọn tòdaho whanpẹnọ daho de mẹ. Mì na ayidonugo nuhe dọ e te lẹpo, na whla tintan niyẹn he hiẹ po mẹhe zọnhẹ we lẹ po yì tòdaho lọ mẹ. Hiẹ po hagbẹ towe lẹ po nọ to kanbiọ lẹ kanse gando tòdaho lọ go, na mì to jejeji nado yọ́n nususu dogọ wutu. Ṣigba, eyin mì kàn kanbiọ lẹ biọ gando onú delẹ go, mẹhe plan mì ma nọ na mì gblọndo to afọdopolọji gba, e nọ saba nọte kakajẹ whenue mì jẹ filọ whẹpo do na gblọndo. Enẹ zọ́n bọ mì sọ vọ́ dejido e go dogọ dile mì to yìyì, na e nọ dọ nuhe mì dona yọnẹn lẹ na mì to ojlẹ he sọgbe mẹ.

2 Ninọmẹ mọnkọtọn de mẹ wẹ Klistiani nugbo lẹ te. Mí to nuplọn gando tòdaho whanpẹnọ hugan de go, “tòdaho lọ he tindo dodonu nujọnu tọn lẹ,” yèdọ Ahọluduta Jiwheyẹwhe tọn. (Heb. 11:10) To whenue Jesu to aigba ji, ewọ lọsu wẹ deanana hodotọ etọn lẹ bo gọalọna yé nado tindo oyọnẹn sisosiso gando Ahọluduta enẹ go. Be e na gblọndo na kanbiọ yetọn lẹpo bo dọ nulẹpo na yé gando Ahọluduta enẹ go to tẹndo dopolọ mẹ wẹ ya? Paali. E dọmọ: “Yẹn gbẹ́ tindo nususu nado dọna mì, ṣigba mì ma penugo nado hẹn yé todin gba.” (Joh. 16:12) Jesu he yin anademẹtọ nuyọnẹntọ hugan lọ ma yí oyọnẹn he hodotọ etọn lẹ ma sọgan hẹn lẹ do doagban pinpẹn na yé gba.

3, 4. (a) Nawẹ Jesu zindonukọn nado to nuplọn nugbonọ lẹ gando Ahọluduta Jiwheyẹwhe tọn go gbọn? (b) Etẹwẹ mí na gbadopọnna to weta ehe mẹ?

3 To ozán godo tọn he Jesu yizan to aigba ji lọ mẹ wẹ e dọ hogbe he to Johanu 16:12 mẹ lẹ. To okú etọn godo, nawẹ e na zindonukọn nado to nuplọn nugbonọ lẹ gando Ahọluduta Jiwheyẹwhe tọn go gbọn? E na jide apọsteli etọn lẹ dọmọ: “Gbigbọ nugbo lọ, . . . na deanana mì nado mọnukunnujẹ nugbo lọ mẹ to gigọ́ mẹ.” * (Joh. 16:13) Mí kudeji dọ anademẹtọ sọwhiwhenọ de wẹ gbigbọ wiwe lọ yin. Gbigbọ lọ yin aliho de he Jesu nọ yí do plọn hodotọ etọn lẹ nudepope he yé dona yọnẹn gando Ahọluduta Jiwheyẹwhe tọn go—to ojlẹ he sọgbe mẹ.

4 Mì gbọ mí ni gbadopọnna lehe gbigbọ wiwe Jehovah tọn ko to anadena Klistiani ahundoponọ lẹ nado tindo oyọnẹn  dogọ gando Ahọluduta lọ go do. Jẹnukọn whẹ́, mí na gbadopọnna lehe mí wagbọn do yọ́n whenue Ahọluduta Jiwheyẹwhe tọn jẹ gandu ji. Enẹgodo, mí na dindona mẹhe yin gandutọ po mẹjidugando Ahọluduta lọ tọn lẹ po gọna todido yetọn lẹ. To godo mẹ, mí na mọ lehe hodotọ Klisti tọn lẹ wagbọn do tindo nukunnumọjẹnumẹ he họnwun gando nubiọtomẹsi Ahọluduta lọ tọn lẹ go.

Owhe Ayidego Tọn de Yinyọnẹn

5, 6. (a) Pọndohlan agọ̀ tẹlẹ wẹ Biblu Plọntọ lẹ tindo gando Ahọluduta lọ didoai po jibẹwawhé lọ po go? (b) Naegbọn pọndohlan agọ̀ enẹlẹ ma dona fọ́n ayihaawe dote gando Jesu go taidi mẹhe to anadena hodotọ etọn lẹ?

5 Dile Weta 2tọ owe ehe tọn dohia do, owhe susu lẹ jẹnukọn wẹ Biblu Plọntọ lẹ ko to alọdlẹndo 1914 taidi owhe tangan de na hẹndi dọdai Biblu tọn. Ṣigba to ojlẹ enẹ mẹ, yé yise dọ tintin tofi Klisti tọn ko bẹjẹeji sọn 1874 bọ ewọ ko jẹ gandu ji to olọn mẹ sọn 1878 podọ Ahọluduta lọ ma na yin didoai to gigọ́ mẹ kakajẹ octobre 1914. Yé sọ yise dọ jibẹwawhé lọ na dlẹnkan sọn 1874 jẹ 1914 bo na wá vivọnu po mẹyiamisisadode lẹ bibẹpli do olọn mẹ po. Be linlẹn agọ̀ ehelẹ fọ́n ayihaawe dote gando Jesu go dọ ewọ yí gbigbọ wiwe do to anadena nugbonọ enẹlẹ wẹ ya?

6 Gbede pọ́n! Sọ flin apajlẹ bẹjẹeji tọn mítọn. Be kanbiọ he mì to kinkanbiọ, na jejejininọ wutu lẹ na zọ́n bọ mì na hẹn jide bu to mẹhe to anadena mì lọ mẹ wẹ ya? Paali! Mọdopolọ, dile etlẹ yindọ omẹ Jiwheyẹwhe tọn lẹ nọ tẹnpọn nado pàhodọ gando lẹndai Jehovah tọn go to whedelẹnu whẹpo gbigbọ wiwe nọ wá deanana yé nado yọ́n nugbo lọ, e gbẹ́ họnwun dọ Jesu wẹ to anadena yé. Enẹwutu wẹ mẹhe yin nugbonọ lẹ nọ kẹalọyi vọjlado bo nọ gbọn whiwhẹ dali vọ́ pọndohlan yetọn lẹ jlado.—Jak. 4:6.

7. Hinhọ́n gbigbọmẹ tọn tẹlẹ wẹ yin nina omẹ Jiwheyẹwhe tọn lẹ?

7 To owhe he bọdo 1919 go lẹ mẹ, hinhọ́n gbigbọmẹ tọn debọdo-dego lẹ yin nina omẹ Jiwheyẹwhe tọn lẹ. (Hia Salmu lẹ 97:11.) To 1925, hosọ ayidego tọn de tọ́n to Atọ̀họ̀-Nuhihọ́ lọ Tọn mẹ he dọ, “Jiji Akọta lọ Tọn.” E na kunnudenu he dutomẹji lẹ sọn Owe-wiwe lẹ mẹ dọ Ahọluduta Mẹsia tọn ko yin jiji to 1914, taidi hẹndi na dọdai he numimọ etọn yin mimọ gando yọnnu Jiwheyẹwhe tọn he to viji to olọn mẹ go, dile e yin kinkandai to Osọhia weta 12 mẹ do. * Hosọ lọ sọ dohia yinukọn dogọ dọ homẹkẹn po nuhahun he wá omẹ Jehovah tọn lẹ ji to ojlẹ awhàn tọn enẹlẹ mẹ po yin ohia he họnwun lẹ dọ Satani ko yin yinyan sọn olọn mẹ wá aigba ji, “po homẹgble daho po, na e yọnẹn dọ whenu gli de wẹ emi tindo wutu.”—Osọ. 12:12.

8, 9. (a) Nawẹ Ahọluduta Jiwheyẹwhe tọn wá lẹzun nujọnu hugan gbọn? (b) Kanbiọ tẹlẹ wẹ mí na gbadopọnna?

8 Nawẹ Ahọluduta lọ yin nujọnu sọ? Atọ̀họ̀-Nuhihọ́ lọ Tọn jẹ nùzindeji ji sọn 1928 dọ Ahọluduta lọ yin nujọnu hú whlẹngán mítọn titi gbọn ofligọ lọ gblamẹ. Na taun tọn, gbọn Ahọluduta Mẹsia tọn lọ gblamẹ wẹ Jehovah na klan oyín etọn do wiwe bo suwhẹna nupojipetọ-yinyin etọn bosọ hẹn lẹndai etọn lẹpo di na gbẹtọvi lẹ.

 9 Mẹnu lẹ wẹ na duahọlu hẹ Klisti to Ahọluduta lọ mẹ? Mẹnu lẹ wẹ na nọ Ahọluduta lọ glọ to aigba ji? Podọ azọ́n tẹwẹ dona hẹn alọnu ján na hodotọ Klisti tọn lẹ?

Azọ́n Jibẹwawhé Mẹyiamisisadode lẹ Tọn

10. Etẹwẹ omẹ Jiwheyẹwhe tọn lẹ ko mọnukunnujẹemẹ sọn ojlẹ dindẹn die gando gbẹtọ 144 000 lẹ go?

10 Owhe susu jẹnukọnna 1914, Klistiani nugbo lẹ ko mọnukunnujẹemẹ dọ hodotọ Klisti tọn nugbonọ 144 000 lẹ wẹ na dugán hẹ ẹ to olọn mẹ. * Biblu Plọntọ enẹlẹ yọnẹn dọ sọha ehe ma yin yẹhiadonu tọn de gba podọ yé ko jẹ yinyin bibẹpli ji sọn owhe kanweko tintan W.M. tọn mẹ.

11. Etẹwẹ mẹhe na wá lẹzun hagbẹ asiyọyọ Klisti tọn lẹ wá mọnukunnujẹemẹ gando azọ́ndenamẹ aigba ji tọn yetọn go?

11 Ṣigba, azọ́n tẹwẹ yin didena mẹhe na wá lẹzun hagbẹ asiyọyọ Klisti tọn lẹ to whenue yé gbẹ́ pò to aigba ji? Yé mọdọ Jesu ko zinnudo azọ́n yẹwhehodidọ tọn lọ ji bo ko hẹn ẹn tindo kanṣiṣa hẹ ojlẹ jibẹwawhé tọn de. (Mat. 9:37; Joh. 4:35) Dile mí mọ to Weta 2tọ mẹ do, yé yise na ojlẹ de dọ ojlẹ jibẹwawhé tọn lọ na dẹn na owhe 40 bo na wá vivọnu po mẹyiamisisadode lẹ bibẹpli do olọn mẹ po. Ṣigba, na azọ́n lọ zindonukọn to owhe 40 lọ lẹ godo, hinhọ́n devo lẹ họnwun. Todin, mí yọnẹn dọ ojlẹ jibẹwawhé tọn lọ—ojlẹ likun lẹ kinklandovo na ogbé ylankan lẹ tọn, yèdọ Klistiani yiamisisadode nugbonọ lẹ kinklandovo na Klistiani lalo lẹ—bẹjẹeji to 1914. Ojlẹ lọ ko wá nado na ayidonugo pipotọ hagbẹ olọn mẹ tọn lẹ tọn bibẹpli!

Owhe 1914 tọn wẹ dohiagona bẹjẹeji ojlẹ jibẹwawhé lọ tọn (Pọ́n hukan 11)

12, 13. Nawẹ apajlẹ Jesu tọn gando awhli ao lẹ po talẹnti lẹ po go yin hinhẹndi to azán godo tọn lẹ mẹ gbọn?

12 Sọn 1919, Klisti ko to anadena afanumẹ nugbonọ podọ nuyọnẹntọ lọ nado to nùzindo azọ́n yẹwhehodidọ tọn ji. E ko deazọ́n enẹ namẹ sọn owhe kanweko tintan whenu. (Mat. 28:19, 20) E sọ dọ jẹhẹnu he hodotọ yiamisisadode etọn lẹ dona tindo nado sọgan hẹn azọ́ndenamẹ yẹwhehodidọ tọn enẹ di. Gbọnna? To apajlẹ awhli ao lẹ tọn mẹ, e dohia dọ mẹyiamisisadode lẹ dona to alihọ́, bo gbọṣi nukle to gbigbọ-liho, eyin yé na jẹ yanwle yetọn kọ̀n nado tindo mahẹ to hùnwhẹ alọwle tọn lọ mẹ to olọn mẹ, to whenue Klisti na yin kinkọndopọ hẹ “asiyọyọ” etọn 144 000 lẹ. (Osọ. 21:2) Enẹgodo, to apajlẹ talẹnti lẹ tọn mẹ, Jesu plọnmẹ dọ devizọnwatọ yiamisisadode etọn lẹ na  yí zohunhun do wà azọ́n yẹwhehodidọ tọn he e zedo alọmẹ na yé.—Mat. 25:1-30.

13 Mẹyiamisisadode lẹ ko dohia dọ yé to nukle bo yin zohunhunnọ to owhe kanweko he wayi ehe gblamẹ. Yé na duale alihihọ́ yetọn tọn dandan! Ṣigba, be pipotọ gandutọgbẹ́ 144 000 Klisti tọn lẹ kẹdẹ wẹ na yin bibẹpli to azọ́n jibẹwawhé tọn daho lọ whenu ya?

Ahọluduta lọ Bẹ Mẹjidugando Aigba Ji Tọn Etọn lẹ Pli!

14, 15. Pipli voovo ẹnẹ tẹlẹ go wẹ owe Le mystère accompli dọho gando?

14 Sọn ojlẹ dindẹn die wẹ e ko nọ paṣa sunnu po yọnnu nugbonọ lẹ po dọ, mẹnu wẹ yin “gbẹtọ susugege” he yin nùdego to Osọhia 7:9-14 mẹ lẹ? E ma yin nupaṣamẹ de gba, dọ whẹpo ojlẹ Klisti tọn nido wá nado hẹn mẹhe pipli daho ehe yin họnwun, ohó susu wẹ ko yin pipàdọ he gbọnvo pete na nugbo he họnwun bo bọawu he mí yọnẹn bo yiwanna to egbehe lẹ.

15 To 1917, owe lọ Le mystère accompli dohia dọ “whlẹngán Olọn mẹ tọn wunmẹ voovo awe wẹ tin podọ whlẹngán aigba ji tọn wunmẹ voovo awe wẹ sọ tin.” Mẹnu lẹ wẹ pipli voovo ẹnẹ he tindo todido whlẹngán tọn enẹlẹ bẹhẹn? Tintan yin omẹ 144 000 he na dugán hẹ Klisti lẹ. Awetọ yin gbẹtọgun daho lọ. To whenẹnu, linlẹn lọ wẹ yindọ omẹ ehelẹ yin mẹhe ylọ yede dọ Klistiani bo gbẹ́ to awukọndopọ hẹ ṣọṣi Mẹylọhodotọklisti tọn lẹ. Yé tindo yise jẹ obá de mẹ ṣigba yise yetọn ma pé nado hẹn tenọgli go. Enẹwutu, otẹn he yìdo de na yin nina yé to olọn mẹ. Na pipli aigba ji tọn, linlẹn lọ wẹ yindọ pipli atọ̀ntọ de he bẹ “omẹ nukundeji hohowhenu tọn lẹ” hẹn—taidi Ablaham, Mose po nugbonọ devo lẹ po—na mọ otẹn aṣẹpipa tọn de yí nado dugán do pipli ẹnẹtọ, he yin gbẹtọvi paa lẹ ji.

16. Hinhọ́n gbigbọmẹ tọn tẹlẹ wẹ họ́n to 1923 po 1932 po?

16 Amọ́, nawẹ gbigbọ wiwe deanana hodotọ Klisti tọn lẹ nado tindo nukunnumọjẹnumẹ he mí tindo to egbehe gbọn? Ehe jọ vudevude, gbọn hinhọ́n gbigbọmẹ tọn debọdo-dego lẹ gblamẹ. To 1923, Atọ̀họ̀-Nuhihọ́ lọ Tọn dọ̀n ayidonugo wá pipli de ji he ma tindo todido olọn mẹ tọn, bo na nọgbẹ̀ to gandudu Klisti tọn glọ. To 1932, Atọ̀họ̀-Nuhihọ́ lọ Tọn dọho gando Jonadabi (Jehonadabi) go, mẹhe kọnawudopọ hẹ Ahọlu Islaeli tọn Jehu, he Jiwheyẹwhe yiamisisadode bo nọgodona ẹn to awhànfunfun sọta sinsẹ̀n-bibasi lalo mẹ. (2 Ahọ. 10:15-17) Hosọ lọ dọ dọ pipli gbẹtọ lẹ tọn de tin to egbezangbe he taidi Jonadabi, bo yidogọ dọ Jehovah na plan pipli ehe “nado jugbọn hunyanhunyan Amagẹdọni tọn mẹ” nado nọgbẹ̀ to aigba ji fi.

17. (a) Hinhọ́n gbigbọmẹ tọn daho tẹwẹ họ́n to 1935? (b) Nawẹ nukunnumọjẹnumẹ yọyọ lọ gando gbẹtọgun daho lọ go yinuwado Klistiani nugbo lẹ ji gbọn? (Pọ́n apotin lọ “ Kọgbọ Daho De.”)

17 Amọ́ to 1935, hinhọ́n gbigbọmẹ tọn daho de họ́n. To plidopọ Washington, D.C. tọn ji, gbẹtọgun daho lọ yin didohia taidi pipli aigba ji tọn, ehe yin nudopolọ po lẹngbọ he go Jesu donù to oló lẹngbọ po gbọgbọẹ lẹ po tọn mẹ po. (Mat. 25:33-40) Gbẹtọgun daho lọ na yin apadewhe “lẹngbọ devo lẹ”  tọn he go Jesu dọ gando dọmọ: “Yewlẹ ga wẹ yẹn dona hẹnwa.” (Joh. 10:16) To whenue hodọtọ lọ, J. F. Rutherford, kanse dọ: “Be mẹhe tindo todido nado nọgbẹ̀ kakadoi to aigba ji lẹpo sọgan jaale bo fọnṣite ya?” hugan mado-awe mẹplidopọ lẹ tọn wẹ fọnṣite! Whenẹnu, hodọtọ lọ dọmọ: “Mì pọ́n! Gbẹtọgun daho lọ!” Homẹ mẹsusu tọn wẹ hùn nado yọ́n todido yetọn na sọgodo.

18. Nawẹ hodotọ Klisti tọn lẹ na ayidonugo yetọn lẹpo lizọnyizọn lọ gbọn, podọ etẹwẹ yin kọdetọn lọ?

18 Sọn whenẹnu gbọ́n wẹ Klisti ko to anadena omẹ etọn lẹ nado na ayidonugo hagbẹ gbẹtọ susugege lọ tọn lẹ bibẹpli, yèdọ mẹhe na lùn nukunbibia daho lọ tọ́n gbẹ̀te lẹ. To bẹjẹeji, mẹhe yin bibẹpli lẹ ma sù sọmọ. Mẹmẹsunnu Rutherford tlẹ dọ to ojlẹ de mẹ dọmọ: “E taidi dọ ‘gbẹtọgun daho’ lọ ma na sù sọmọ.” Amọ́ todin, mí mọ lehe Jehovah ko dona azọ́n jibẹwawhé tọn lọ do kakajẹ din! To anademẹ Jesu po gbigbọ wiwe po tọn glọ, hagbẹ mẹyiamisisadode po hagbẹ yetọn “lẹngbọ devo lẹ” po tọn ko wá lẹzun nuhe sin dọdai Jesu dọ—yèdọ “lẹngbọpa dopo” he to sinsẹ̀n to “lẹngbọhọtọ dopo” glọ.

Mẹmẹsunnu Rutherford ma sọgan mọ lehe gbẹtọ susugege lọ na wá sù sọ hlan (Sọn amiyọnwhé yì adusiwhé: Nathan H. Knorr, Joseph F. Rutherford po Hayden C. Covington po)

19. Nawẹ mí sọgan tindo mahẹ to gbẹtọ susugege lọ hinhẹn sudeji mẹ gbọn?

19 Susugege gbẹtọvi nugbonọ lẹ tọn wẹ na nọgbẹ̀ kakadoi to aigba he lẹzun paladisi de ji, to gandudu Klisti po ganduhẹmẹtọ etọn 144 000 lẹ po tọn glọ. Be e ma yin ayajẹnu de wẹ e yin nado mọ lehe Klisti ko deanana omẹ Jiwheyẹwhe tọn lẹ do nado mọnukunnujẹ todido Owe-wiwe tọn he họnwun lọ mẹ na sọgodo ya? Lẹblanulọkẹyi daho wẹ e yin na mí nado nọ lá todido enẹ na mẹhe mí nọ dukosọ hẹ to lizọnyizọn lọ mẹ lẹ! Mì gbọ mí ni yin zohunhunnọ sọgbe hẹ nugopipe mítọn, na gbẹtọ susugege lọ nido to susudeji nado hẹn pipà daho dogọ wá na oyín Jehovah tọn!—Hia Luku 10:2.

Sọha gbẹtọ susugege lọ tọn nọ fọ́n bo to jijideji

Nubiọtomẹsi Ahọluduta lọ Tọn Lẹ

20. Tito tẹlẹ wẹ titobasinanu Satani tọn bẹhẹn, podọ nawẹ ehe gando nugbonọ-yinyin Klistiani lẹ tọn go gbọn?

20 Dile omẹ Jiwheyẹwhe tọn lẹ to nuplọn gando Ahọluduta lọ go, yé sọ dona yọ́n nubiọtomẹsi gandudu olọn mẹ tọn enẹ tọn lẹ. Gando ehe go, Atọ̀họ̀-Nuhihọ́ lọ Tọn dọ to 1922 dọ titobasinanu awe wẹ to azọ́nwa, yèdọ Jehovah tọn po Satani tọn po, bọ Satani tọn bẹ tito ajọwiwa tọn, sinsẹ̀n tọn po tonudidọ tọn po hẹn. Mẹhe yin nugbonọ na Ahọluduta Jiwheyẹwhe tọn to Klisti glọ lẹ ma dona tindo mahẹ he ma sọgbe depope to titobasinanu Satani tọn de mẹ. (2 Kọl. 6:17) Etẹwẹ enẹ zẹẹmẹdo?

21. (a) Nawẹ afanumẹ nugbonọ lọ ko na avase omẹ Jiwheyẹwhe tọn lẹ gando ajọwiwa dahodaho lẹ go gbọn? (b) Etẹwẹ Atọ̀họ̀-Nuhihọ́ lọ Tọn dehia gando “Babilọni Daho lọ” go to 1963?

21 Whepoponu wẹ núdùdù gbigbọmẹ tọn he afanumẹ nugbonọ lọ nọ wleawuna nọ to gòhùnna oklọ he ajọwiwa dahodaho lẹ nọ bẹhẹn lẹ bo nọ na avase omẹ Jiwheyẹwhe tọn lẹ ma nado joawuna gbigbọ adọkunnu bibẹpli tọn. (Mat. 6:24) Humọ, owe mítọn lẹ ma nọ nọma dọ̀n ayidonugo wá sinsẹ̀n ji taidi adà titobasinanu Satani tọn. To 1963, Atọ̀họ̀-Nuhihọ́ lọ Tọn dohia hezeheze dọ “Babilọni Daho lọ” ma nọtena Mẹylọhodotọklisti kẹdẹ gba ṣigba bẹplidopọ sinsẹ̀n lalo lẹpo tọn to pọmẹ.  Enẹwutu, dile mí na mọ to gigọ́ mẹ to Weta 10tọ owe ehe tọn mẹ do, omẹ Jiwheyẹwhe tọn lẹ to aigba lẹpo ji podọ to aṣa lẹpo mẹ ko yin alọgọna nado “tọ́n sọn e mẹ,” bo klọ́ yede wé sọn aṣa sinsẹ̀n lalo tọn lẹpo mẹ.—Osọ. 18:2, 4.

22. To Wẹkẹ-Whàn I lọ whenu, nawẹ susu to omẹ Jiwheyẹwhe tọn lẹ mẹ mọnukunnujẹ Lomunu lẹ 13:1 mẹ gbọn?

22 Ṣigba, etẹwẹ dogbọn adà tonudidọ tọn titobasinanu Satani tọn dali? Be Klistiani nugbo lẹ sọgan tindo mahẹ to awhàn po hunyanhunyan akọta tọn lẹ po mẹ wẹ ya? To Wẹkẹ-Whàn I whenu, Biblu Plọntọ lẹ mọnukunnujẹemẹ to paa mẹ dọ hodotọ Klisti tọn lẹ ma dona hù gbẹtọvi hatọ yetọn lẹ. (Mat. 26:52) Amọ́ na susu yetọn, tonusisena tudohomẹnamẹ Lomunu lẹ 13:1 tọn nado setonuna “aṣẹpipa daho lẹ” zẹẹmẹdo dọ yé dona kọnawudopọ hẹ awhànfuntọ lẹ bo do awhànwù bosọ ze awhànfunnu lẹ; ṣigba eyin e biọ dọ yé ni hù kẹntọ lẹ, yé nọ desòdo jẹhọn mẹ.

23, 24. Nawẹ mí wá mọnukunnujẹ Lomunu lẹ 13:1 mẹ gbọn to Wẹkẹ-Whàn II lọ whenu, podọ pọndohlan he sọgbe hugan tẹwẹ hodotọ Klisti tọn lẹ wá yin anadena nado tindo?

23 Amọ́, to ojlẹ he mẹ Wẹkẹ-Whàn II to gbigbajẹgbonu to 1939, Atọ̀họ̀-Nuhihọ́ lọ Tọn dọhodo kadaninọ ji to gigọ́ mẹ. Hosọ lọ dohia hezeheze dọ Klistiani lẹ ma dona tindo mahẹ depope to awhàn lẹ po hunyanhunyan akọta aihọn Satani tọn lẹ po mẹ. Anademẹ he wá do gànmẹ nankọ die! Gbọnmọ dali, hodotọ Klisti tọn lẹ yin hihọ́-basina sọn hùnhọ́dudu he mẹ akọta lẹ tlọ biọ to awhàn enẹ mẹ. Podọ bẹsọn 1929, owe mítọn lẹ ko sọ hẹn ẹn họnwun dọ aṣẹpipa daho he Lomunu lẹ 13:1 dọho etọn ma yin gandutọ aihọn tọn lẹ gba, ṣigba Jehovah po Jesu po. Nuhudo gbẹ́ tin na nukunnumọjẹnumẹ he sọgbe devo.

 24 To 1962 wẹ gbigbọ wiwe deanana hodotọ Klisti tọn lẹ nado tindo nukunnumọjẹnumẹ enẹ, to whenue hosọ ayidego tọn lẹ yin zinzinjẹgbonu do Lomunu lẹ 13:1-7 ji do Atọ̀họ̀-Nuhihọ́ lọ Tọn 15 novembre po 1er décembre po mẹ. To godo mẹ, omẹ Jiwheyẹwhe tọn lẹ wá mọnukunnujẹ nuhe taliai he tindo dogbó zẹẹmẹdo mẹ, dile Jesu dohia to hodidọ he diyin etọn mẹ do dọmọ: “Mì yí nuhe yin Sesali tọn lẹ na Sesali, ṣigba nuhe yin Jiwheyẹwhe tọn lẹ na Jiwheyẹwhe.” (Luku 20:25) Klistiani nugbo lẹ ko wá mọnukunnujẹemẹ todin dọ huhlọn aihọn tọn lẹ wẹ yin aṣẹpipa daho lẹ bọ Klistiani lẹ dona nọ litaina yé. Ṣigba, taliai yetọn dona do dogbó. Eyin aṣẹpipa aihọn tọn lẹ biọ to mí si nado vẹtolina Jehovah Jiwheyẹwhe, be mí dona gblọn dile apọsteli hoho tọn lẹ dọ do: “Míwlẹ dona setonuna Jiwheyẹwhe taidi ogán kakati nido yin gbẹtọ lẹ.” (Owalọ 5:29) To Weta 13 po 14tọ owe ehe tọn po mẹ, mí na mọ lehe omẹ Jiwheyẹwhe tọn lẹ ko yí nunọwhinnusẹ́n kadaninọ Klistiani tọn do yizan mẹ do.

Lẹblanulọkẹyi nankọ die nado lá todido Biblu tọn na ogbẹ̀ madopodo na mẹdevo lẹ!

25. Naegbọn hiẹ do yọ́n pinpẹn anademẹ gbigbọ wiwe tọn nado mọnukunnujẹ Ahọluduta Jiwheyẹwhe tọn mẹ?

25 Yí nukun homẹ tọn do pọ́n nuhe ko yin pinplọn hodotọ Klisti tọn lẹ gando Ahọluduta lọ go lẹpo to owhe kanweko he wayi gblamẹ. Mí ko yọ́n whenue Ahọluduta Jiwheyẹwhe tọn yin didoai to olọn mẹ podọ lehe e yin nujọnu sọ. Todido awe he yin zizedonukọnna mẹhe yin nugbonọ lẹ ko họnwun na mí, yèdọ todido olọn mẹ tọn po aigba ji tọn po. Mí ko sọ yọ́n lehe mí na yin nugbonọ na Ahọluduta Jiwheyẹwhe tọn bọ taliliai mítọn na aṣẹpipa aihọn tọn lẹ dona do dogbó do. Kanse dewe dọ, ‘Be n’sọgan ko yọ́n nugbo họakuẹ enẹlẹ eyin Jesu Klisti ma ko deanana afanumẹ nugbonọ etọn to aigba ji nado mọnukunnujẹ yé mẹ bo plọn mí ya?’ Dona nankọ die dọ Klisti po gbigbọ wiwe po wẹ to anadena mí!

^ huk. 3 Sọgbe hẹ owe alọdlẹndonu tọn de, hogbe Glẹki tọn na “deanana” to wefọ enẹ mẹ zẹẹmẹdo “nado do ali hia.”

^ huk. 7 Jẹnukọnna ojlẹ enẹ, linlẹn lọ wẹ yindọ numimọ lọ to alọdlẹndo awhàn de to sinsẹ̀n kosi Lomu tọn lẹ po sinsẹ̀n Katoliki Lomu tọn po ṣẹnṣẹn.

^ huk. 10 To juin 1880, Atọ̀họ̀-Nuhihọ́ lọ Tọn [Glẹnsigbe] dohia dọ gbẹtọ 144 000 lọ lẹ na yin Ju agbasalan tọn he na lẹzun yisenọ to 1914 lẹ. Ṣigba, jei vivọnu 1880 lẹ tọn, nukunnumọjẹnumẹ de yin zinzinjẹgbonu he sọgbe hẹ dehe mí tindo sọn whenẹnu kakajẹ din.

Plọnnu Dogọ

ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN

“Nususu Gbẹ́ Pò Nado Yin Wiwà to Azọ́n Jibẹwawhé Tọn lọ Mẹ”

Kunnudetọ Jehovah tọn he hugan 760 000 wẹ to nugbo Biblu tọn lá to Brésil. Nawẹ Biblu Plọntọ lẹ bẹ azọ́n jibẹwawhé tọn lọ jẹeji to Amérique du Sud gbọn?