Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Sọha 1 2017

Be Nukunnumọjẹnumẹ Agọ̀ Poun Wẹ Ya?

Be Nukunnumọjẹnumẹ Agọ̀ Poun Wẹ Ya?

Viyọnnu pẹvi de mọ bọ azọ̀ titli he taidi aslọ de to tintọ́njẹgbonu sọn azọ́nwhé de. E wá tadona kọ̀n dọ aslọ wẹ azọ́nwhé lọ nọ basi. Nukunnumọjẹnumẹ agọ̀ ovi pẹvi enẹ tọn sọgan do nukiko namẹ. Ṣigba, nukunnumọjẹnumẹ agọ̀ he sinyẹn hú mọ de sọgan bẹpla gbẹzan mítọn. Di apajlẹ, anademẹ he to pali amasin tọn de go ṣìṣì hia sọgan hẹn nugbajẹmẹji sinsinyẹn lẹ wá.

Nukunnumọjẹnumẹ agọ̀ tintindo gando Biblu go tlẹ sọgan ylan hú mọ. Di apajlẹ, mẹdelẹ mọnukunnujẹ nuplọnmẹ Jesu tọn lẹ mẹ to aliho agọ̀ mẹ. (Johanu 6:48-68) Kakati nado plọnnu yinukọn dogọ, yé gbẹkọ nuplọnmẹ Jesu tọn lẹpo go. Onú daho wẹ gbọ yé go!

Be a nọ hia Biblu nado mọ anademẹ ya? E sọgbe nado wàmọ. Ṣigba, be owù de to e mẹ dọ a ni mọnukunnujẹ nuhe a hia de mẹ to aliho agọ̀ mẹ ya? E nọ jọ do mẹsusu go. Mì gbọ mí ni pọ́n nukunnumọjẹnumẹ agọ̀ he gbayipe atọ̀n.

  • Mẹdelẹ nọ mọnukunnujẹ gbedide Biblu tọn nado “dibusi Jiwheyẹwhe nugbo lọ” mẹ to aliho agọ̀ mẹ. Yé nọ dọ dọ obu sijọsijọ tọn tintindo na Jiwheyẹwhe wẹ enẹ zẹẹmẹdo. (Yẹwhehodọtọ 12:13) Amọ́, Jiwheyẹwhe ma jlo dọ sinsẹ̀n-basitọ emitọn lẹ ni tindo numọtolanmẹ enẹ. E dọmọ: “A dibu blo, na yẹn tin hẹ we. A yin magbọjẹnọ blo, na yẹn wẹ Jiwheyẹwhe towe. Yẹn na hẹn we lodo, mọwẹ, n’na gọalọna we.” (Isaia 41:10) Nado dibusi Jiwheyẹwhe zẹẹmẹdo nado tindo sisi sisosiso na ẹn.

  • Be aigba na yin fifiọ wẹ ya?

    Mẹdelẹ nọ mọnukunnujẹ ohó gbọdo ehelẹ mẹ to aliho agọ̀ mẹ, enẹ wẹ: “Nulẹpo wẹ ojlẹ dide de tin na, . . . ojlẹ de nado ji podọ ojlẹ de nado kú.” Yé nọ wá tadona kọ̀n dọ, Jiwheyẹwhe ko de ojlẹ tangan he mẹ mẹdopodopo na kú te. (Yẹwhehodọtọ 3:1, 2) Ṣigba, gbẹzan mítọn hodọ wẹ wefọ ehe te bo to didohia dọ dopodopo mítọn wẹ na wá kú. Ohó Jiwheyẹwhe tọn sọ plọnmẹ dọ nudide mítọn lẹ sọgan yinuwado tedidi gbẹzan mítọn tọn ji. Di apajlẹ, mí hia dọmọ: “Budisi Jehovah nọ namẹ gbẹ̀gaa.” (Howhinwhẹn lẹ 10:27; Salmu lẹ 90:10; Isaia 55:3) Gbọnna? Di apajlẹ, sisi tintindo na Ohó Jiwheyẹwhe tọn na whàn mí nado dapana walọyizan ylankan delẹ taidi ahànnumu po fẹnnuwiwa po.—1 Kọlintinu lẹ 6:9, 10.

  • Mẹdelẹ nọ mọnukunnujẹ hogbe Biblu tọn he dọ dọ olọn po aigba po yin “whiwhla na miyọ́n” mẹ to aliho tlọlọ tọn mẹ, bo nọ wá tadona kọ̀n dọ Jiwheyẹwhe na và aigba lọ sudo. (2 Pita 3:7) Ṣigba, Jiwheyẹwhe dopagbe dọ emi ma na dike aigba ehe ni yin vivasudo gbede. Jiwheyẹwhe “ko do aigba ai do dodonu etọn lẹ ji; e ma na yin tẹnsẹna pọ́n gbede.” (Salmu lẹ 104:5; Isaia 45:18) Titonu aihọn ehe tọn he ko yin hinhẹnflu wẹ na yin vivasudo taidi dọ yè yí miyọ́n do fiọ ẹ nkọ, e ma yin aigba lọ lọsu gba. Na nuhe dù olọn lẹ, to paa mẹ e sọgan dlẹnalọdo jiwhé, fie sunwhlẹvu lẹ te, kavi fininọ Jiwheyẹwhe tọn. Depope to ehelẹ mẹ ma na yin vivasudo.

NAEGBỌN MẸSUSU NỌ SABA MỌNUKUNNUJẸ BIBLU MẸ TO ALIHO AGỌ̀ MẸ?

Dile apajlẹ he wayi lẹ dohia do, gbẹtọ lẹ nọ saba mọnukunnujẹ wefọ Biblu tọn lẹ mẹ to aliho agọ̀ mẹ. Naegbọn Jiwheyẹwhe nọ na dotẹnmẹ enẹ nado jọ? Mẹdelẹ sọgan lẹndọ: ‘Eyin Jiwheyẹwhe yin nuyọnẹntọ nugbonugbo wẹ, e na ko wleawuna owe de he yin kinkan to aliho he họnwun mẹ, na mẹlẹpo nido mọnukunnujẹemẹ po awubibọ po. Naegbọn e ma do wàmọ?’ Mì gbọ mí ni pọ́n whẹwhinwhẹ́n atọ̀n he wutu gbẹtọ lẹ nọ saba mọnukunnujẹ Biblu mẹ to aliho agọ̀ mẹ.

  1. Whiwhẹnọ he jlo nado plọnnu lẹ wẹ na mọnukunnujẹ Biblu mẹ. Jesu dọna Otọ́ etọn dọmọ: “Yẹn pà we to gbangba, hiẹ Otọ́, Oklunọ olọn po aigba po tọn, na hiẹ ko yí sọwhiwhe do whlá onú  ehelẹ do nuyọnẹntọ lẹ po weyọnẹntọ lẹ po bo ko de yé hia ovi pẹvi lẹ.” (Luku 10:21) Biblu yin kinkan to aliho de mẹ bọ mẹhe tindo pọndohlan he sọgbe lẹ kẹdẹ wẹ na mọnukunnujẹ owẹ̀n etọn mẹ. Gbigbọ goyiyi tọn, ehe “nuyọnẹntọ lẹ po weyọnẹntọ lẹ po” nọ saba tindo nọ zọ́n bọ yé nọ mọnukunnujẹ Biblu mẹ to aliho agọ̀ mẹ. Ṣigba, mẹhe nọ hia Biblu po pọndohlan “ovi pẹvi lẹ” tọn nkọ po lẹ, enẹ wẹ whiwhẹ po ojlo lọ nado plọnnu po nọ mọnukunnujẹ Biblu mẹ ganji. Lehe Jiwheyẹwhe yí azọ́nyinyọnẹn do wleawuna Biblu do sọ!

  2. Jiwheyẹwhe wleawuna Biblu na ahundoponọ he jlo dọ ewọ ni gọalọna yé nado mọnukunnujẹemẹ lẹ. Jesu dohia dọ gbẹtọ lẹ tindo nuhudo alọgọ tọn nado mọnukunnujẹ nuhe e plọnmẹ lẹ mẹ ganji. Nawẹ yé na mọ alọgọ enẹ gbọn? Jesu dọmọ: “Alọgọtọ lọ, yèdọ gbigbọ wiwe, he Otọ́ na dohlan to oyín ṣie mẹ, enẹlọ wẹ na plọn mì nulẹpo.” (Johanu 14:26) Enẹwutu, Jiwheyẹwhe nọ na gbẹtọ lẹ gbigbọ wiwe etọn, yèdọ huhlọn-yido-wazọ́n etọn na yé nido mọnukunnujẹ nuhe yé hia to Biblu mẹ lẹ mẹ. Amọ́, Jiwheyẹwhe ma nọ na gbigbọ wiwe etọn mẹhe ma nọ ganjẹ ewọ go, enẹwutu yé ma nọ saba mọnukunnujẹ Biblu mẹ. Gbigbọ wiwe sọ nọ sisẹ́ Klistiani he tindo nukunnumọjẹnumẹ gigọ́ lẹ nado gọalọna mẹhe tindo nuhudo etọn lẹ.—Owalọ lẹ 8:26-35.

  3. Ojlẹ dide de mẹ wẹ wefọ Biblu tọn delẹ na yin nukunnumọjẹemẹ te. Di apajlẹ, yè dọna Daniẹli nado kàn owẹ̀n sọgodo tọn de dai. Angẹli de dọna ẹn dọmọ: “Daniẹli, hẹn ohó lọ lẹ taidi aṣli de bo yí hiadonu do tlẹ́ owe lọ kakajẹ ojlẹ opodo tọn mẹ.” Na owhe kanweko susu, mẹsusu hia owe Daniẹli tọn bo ma mọnukunnujẹemẹ ganji. Na nugbo tọn, Daniẹli lọsu ma tlẹ mọnukunnujẹ nuhe e wlan delẹ mẹ. E gbọn whiwhẹ dali yigbe dọmọ: “N’sè, ṣigba n’ma mọnukunnujẹemẹ.” Gbẹtọ lẹ wá mọnukunnujẹ dọdai Jiwheyẹwhe tọn he Daniẹli kàn dai mẹ, amọ́ to ojlẹ dide Jiwheyẹwhe tọn mẹ. Angẹli lọ dọmọ: “Yì, Daniẹli, na ohó lọ lẹ dona yin hinhẹn taidi aṣli bo yin hiadonu yí do tlẹ́ kakajẹ ojlẹ opodo tọn mẹ.” Mẹnu lẹ wẹ na mọnukunnujẹ owẹ̀n Jiwheyẹwhe tọn lẹ mẹ? “Depope to mẹylankan lẹ mẹ ma na mọnukunnujẹemẹ; ṣigba mẹhe tindo zinzin lẹ na mọnukunnujẹemẹ.” (Daniẹli 12:4, 8-10) Enẹwutu, Jiwheyẹwhe ma nọ de zẹẹmẹ wefọ delẹ tọn hia kakajẹ whenue ojlẹ sọ̀ nado wàmọ.

Be ojlẹ dide lẹ ko zọ́n bọ Kunnudetọ Jehovah tọn lẹ mọnukunnujẹ Biblu mẹ to aliho agọ̀ mẹ pọ́n ya? Mọwẹ. Ṣigba, eyin ojlẹ sọ̀ na Jiwheyẹwhe nado hẹn nulẹ họnwun, Kunnudetọ lẹ nọ wleawufo nado jla nukunnumọjẹnumẹ yetọn do. Yé nọ gbọnmọ dali kudeji dọ emi to apajlẹ apọsteli Klisti tọn lẹ tọn hodo, yèdọ mẹhe nọ gbọn whiwhẹ dali jla pọndohlan yetọn do to whedepopenu he Jesu gọalọna yé nado wàmọ.—Owalọ lẹ 1:6, 7.

Linlẹn agọ̀ viyọnnu pẹvi de tọn gando fie aslọ to tintọ́n sọn lọ go sọgan yin nukunnumọjẹnumẹ agọ̀ de poun. Ṣigba, nuplọnmẹ Biblu tọn lẹ yin nujọnu taun na we. Owẹ̀n Biblu tọn yin nujọnu sọmọ bọ mẹdepope ma dona nọ lẹndọ emi sọgan mọnukunnujẹemẹ na emide eyin emi ko gbẹ́ nọ hia Biblu. Enẹwutu, nọ dín alọgọ nado mọnukunnujẹ nuhe hia a te mẹ. Nọ dín mẹhe nọ yí whiwhẹ do plọn Biblu lẹ, yèdọ mẹhe nọ ganjẹ gbigbọ wiwe Jiwheyẹwhe tọn go nado mọnukunnujẹ Biblu mẹ lẹ, enẹ wẹ mẹhe kudeji dọ mí to gbẹnọ to ojlẹ de mẹ he Jiwheyẹwhe jlo dọ mí ni mọnukunnujẹ Biblu mẹ hú gbede pọ́n lẹ. Ma whleawu nado dọho hẹ Kunnudetọ Jehovah tọn lẹ kavi hianu gando dodinnanu sọwhiwhe tọn yetọn lẹ go to nọtẹn Intẹnẹt tọn jw.org ji blo. Biblu dopagbe dọmọ: “Eyin hiẹ nọ dawhá ylọ nukunnumọjẹnumẹ . . . , hiẹ . . . nasọ mọ oyọnẹn Jiwheyẹwhe tọn.”—Howhinwhẹn lẹ 2:3-5.

Plọnnu Dogọ

GBLỌNDO NA KANBIỌ SINAI DO BIBLU JI LẸ

Be Biblu Sọta Ede Wẹ Ya?

Gbadopọnna hodidọ Biblu tọn delẹ he taidi nuhe sọta yede gọna nunọwhinnusẹ́n he sọgan gọalọ nado hẹn zẹẹmẹ yetọn họnwun lẹ.