Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Sọha 1 2017

 HOSỌ HE JẸNUKỌN | A SỌGAN MỌALEYI SỌN BIBLU HIHIA MẸ DOGỌ

Nawẹ Biblu Sọgan Hẹn Gbẹzan Ṣie Pọnte Dogọ Gbọn?

Nawẹ Biblu Sọgan Hẹn Gbẹzan Ṣie Pọnte Dogọ Gbọn?

Biblu ma yin owe paa de poun. E bẹ ayinamẹ lẹ hẹn sọn Mẹdatọ mítọn dè. (2 Timoti 3:16) Nudọnamẹ he to e mẹ lẹ sọgan yinuwado mí ji sisosiso. Biblu lọsu tlẹ dọ dọ: “Ohó Jiwheyẹwhe tọn tin to ogbẹ̀ bo tindo huhlọn.” (Heblu lẹ 4:12) E tindo huhlọn nado hẹn gbẹzan mítọn pọnte dogọ to aliho titengbe awe mẹ—e nọ na mí anademẹ gando gbẹzan egbesọ tọn mítọn go bo nọ gọalọna mí nado yọ́n Jiwheyẹwhe po opagbe etọn lẹ po.—1 Timoti 4:8; Jakọbu 4:8.

Gbẹzan towe hinhẹn pọnte dogọ todin. Biblu sọgan gọalọ nado didẹ whẹho mẹdetiti tọn lẹ. E na ayinamẹ yọ́n-na-yizan lẹ to adà he bọdego ehelẹ mẹ

Asu po asi po jọja de to Asie yọ́n pinpẹn ayinamẹ yọ́n-na-yizan Biblu tọn lẹ tọn taun. Taidi asu po asi po yọyọ susu, e nọ vẹawuna yé nado doakọnna gbẹtọ-yinyin ode awetọ tọn podọ nado tindo hodọdopọ dagbe. Amọ́, yé jẹ nuhe yé nọ hia to Biblu mẹ lẹ yizan ji. Etẹwẹ yin kọdetọn lọ? Vicent he yin asu lọ dọmọ: “Nuhe n’hia to Biblu mẹ lẹ gọalọna mi nado pehẹ nuhahun lẹ to alọwle mítọn mẹ po kọdetọn dagbe po. Gbẹninọ sọgbe hẹ ayinamẹ Biblu tọn lẹ ko zọ́n bọ mí tindo gbẹzan ayajẹnọ.” Annalou he yin asi etọn dọmọ: “Apajlẹ he to Biblu mẹ lẹ hihia ko gọalọna mí. Todin, alọwle mítọn po yanwle mítọn lẹ po nọ hẹn ayajẹ po pekọ po wá na mi.”

Jiwheyẹwhe yinyọnẹn. Vicent yidogọ dọmọ: “Biblu hihia ko zọ́n bọ n’dọnsẹpọ Jehovah dogọ todin hugan gbede pọ́n.” Numimọ Vicent tọn do onú titengbe de hia—Biblu sọgan gọalọna we nado yọ́n Jiwheyẹwhe. Gbọnmọ dali, a na mọaleyi sọn ayinamẹ etọn lẹ mẹ bo nasọ wá dọnsẹpọ ẹ taidi họntọn de. Podọ a na mọdọ e de nususu hia gando sọgodo dagbe de go, yèdọ ojlẹ he mẹ a sọgan duvivi “ogbẹ̀ nujọnu tọn” te, ehe na nọ aimẹ kakadoi. (1 Timoti 6:19) Owe devo depope ma bẹ nuplọnmẹ mọnkọtọn hẹn.

Eyin a nọ dovivẹnu nado hia Biblu bo ma gbọjọ, hiẹ lọsu sọgan duvivi ale enẹlẹ tọn—gbẹzan towe na pọnte dogọ todin bọ a nasọ wá yọ́n Jiwheyẹwhe. Etomọṣo, dile a to Biblu hia, e yọnbasi dọ a ni nọ lẹnnupọndo kanbiọ susu ji. Dile a to mọwà, hẹn apajlẹ dagbe ahọluzọnwatọ Etiopianu de he nọgbẹ̀ to owhe 2 000 die tọn do ayiha mẹ. Kanbiọ susu wẹ e tindo gando Biblu go. To whenue yè kanse e eyin ewọ mọnukunnujẹ nuhe hia e te mẹ, e dọmọ: “Na taun tọn, nawẹ yẹn sọgan wàmọ do, adavo mẹde deanana mi?” * Enẹgodo, e yí jejejininọ do kẹalọyi alọgọ mẹhe pegan nado plọn ẹn Biblu de tọn, enẹ wẹ Filipi, yèdọ devi Jesu tọn tintan de. (Owalọ lẹ 8:30, 31, 34) Mọdopolọ, eyin a jlo na yọ́n nususu gando Biblu go, mí to oylọ-basina we nado do obiọ towe hlan gbọn nọtẹn Intẹnẹt tọn www.jw.org ji kavi kanwehlan adlẹsi he sẹpọ we to dehe yin sislẹ to linlinnamẹwe ehe mẹ lẹ mẹ. A sọgan sọ dọnsẹpọ Kunnudetọ Jehovah tọn he to lẹdo towe mẹ lẹ kavi dla Plitẹnhọ Ahọluduta tọn he to lẹdo towe mẹ de pọ́n. Naegbọn a ma na jẹ Biblu hia ji bẹsọn egbé, bo dike ni deanana we nado zan gbẹzan dagbe de?

Eyin e nọ vẹawuna we nado dejido Biblu go mlẹnmlẹn, jaale bo pọ́n video kleun he hosọ etọn yin Nawẹ Mí Sọgan Kudeji Gbọn dọ Biblu Yin Nugbo? A sọgan mọ ẹn gbọn ohia wlanwlan ehe yiyizan dali kavi to jw. org ji.

^ huk. 8 Nado mọ ayinamẹ yọ́n-na-yizan Biblu tọn lẹ gando apajlẹ devo lẹ go, yì nọtẹn Intẹnẹt tọn mítọn jw.org ji. Pọ́n NUHE BIBLU PLỌN MÍ > GBLỌNDO NA KANBIỌ SINAI DO BIBLU JI LẸ glọ.

^ huk. 11 Sọ pọ́n hosọ lọ “Be Nukunnumọjẹnumẹ Agọ̀ Poun Wẹ Ya?” to zinjẹgbonu ehe mẹ.