Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN OCTOBRE 2015

 BIBLU NỌ DIỌ GBẸZAN MẸTỌN

N’Mọdọ N’sọgan Gọalọna Mẹdevo lẹ Todin

N’Mọdọ N’sọgan Gọalọna Mẹdevo lẹ Todin
  • OWHE HE MẸ N’YIN JIJI: 1981

  • OTÒ HE MẸ N’WÁ SỌN: GUATEMALA

  • OTÀN ṢIE: ADÁN DE GBÒ MI TO OVU WHENU

NUHE N’YIN DAI:

N’yin jiji to Acul, yèdọ tòpẹvi he to olá to pópló whèyihọ-waji Guatemala tọn ji. Whẹndo ṣie yin Ixil-nu, yèdọ akọ̀ de he wá sọn Maya lẹ mẹ. Gbọnvona Espagne-gbè, n’nọ do ogbè lẹdo lọ tọn sọn ovu whenu ṣie gbọ́n. N’gbẹ́ pò to ovu taun to ojlẹ he mẹ tòwhan Guatemala tọn he dẹn-to-aimẹ na owhe 36 to yìyì. To ojlẹ enẹlẹ mẹ, susu mẹhe nọ do Maya-gbè lẹ tọn wẹ kú.

To whenue n’tindo owhe ẹnẹ, mẹdaho ṣie sunnu he tindo owhe ṣinawe to aihunda po bọmbu pẹvi de po bọ to ajiji mẹ bọmbu lọ wú. N’tọ́nnukun to nujijọ lọ whenu, podọ e blawu dọ mẹdaho ṣie kú. To enẹgodo, n’zan ovu whenu ṣie lẹpo to fie yè nọ penukundo yọpọvu he tọ́nnukun lẹ go te to tòdaho Guatemala tọn mẹ, podọ n’sọ plọn nukinkan nukuntọ́nnọ lẹ tọn to finẹ. Na whẹwhinwhẹ́n he n’ma yọnẹn to gigọ́ mẹ lẹ wutu, mẹhe nọ wazọ́n to finẹ lẹ dosẹ́n na mi ma nado nọ dọhodopọ hẹ yọpọvu devo lẹ, podọ wehọmẹvigbẹ́ ṣie lẹ nọ họ̀nna mi. N’nọ tin to ṣokẹdẹ bo nọ to jejeji dọ osun awe he n’nọ yizan to whégbè hẹ onọ̀ ṣie to owhe dopodopo mẹ lẹ ni yawu wá, na ewọ nọ jọmẹ bosọ nọ vẹawu mi wutu. Ṣigba, e blawu dọ onọ̀ ṣie kú to whenue n’tindo owhe ao poun. N’jẹflumẹ taun, na n’mọdọ omẹ dopo gee he yiwanna mi to aihọn lọ mẹ kú do mi.

To whenue n’tindo owhe 11, n’lẹkọyi gbétatò ṣie mẹ bo nọpọ́ hẹ nọvisunnu daa ṣie po whẹndo etọn po. Yé nọ penukundo go e to agbasa-liho, ṣigba mẹdepope ma sọgan gọalọna mi to numọtolanmẹ-liho. To whedelẹnu, n’nọ dawhá hlan Jiwheyẹwhe dọmọ: “Naegbọn onọ̀ ṣie do kú? Naegbọn n’do tọ́nnukun?” Gbẹtọ lẹ nọ dọna mi dọ Jiwheyẹwhe wẹ jlo bọ nugbajẹmẹji ehelẹ do jọ. N’wá tadona lọ kọ̀n dọ Jiwheyẹwhe yin mawadodonọ bo ma nọ homẹtọnpọn. Nuhe zọ́n bọ n’ma do hù dee poun wẹ yindọ n’ma mọ aliho he mẹ n’na wàmọ te.

Na n’yin nukuntọ́nnọ wutu, n’nọ tin to ṣokẹdẹ bo ma sọgan basi hihọ́na dee to agbasa-liho. To whenue n’to pẹvi, whlasusu wẹ n’yin hinhẹn po huhlọn po nado tindo kọndopọ zanhẹmẹ tọn. N’ma nọ dọ nujijọ enẹlẹ na mẹdepope, na n’nọ lẹndọ mẹde ma na yí nude wà. Gbẹtọ lẹ ma nọ saba dọho hẹ mi, podọ yẹnlọsu ma nọ dọho hẹ mẹde. N’nọ tin to ṣokẹdẹ bo nọ jẹflumẹ taun, podọ n’ma sọ nọ dejido mẹdepope go.

LEHE BIBLU DIỌ GBẸZAN ṢIE DO:

To whenue n’ṣẹṣẹ biọ owhe aflanmẹ tọn mẹ, Kunnudetọ Jehovah tọn awe (asu po asi po de) wá dè e to gbọjẹ whenu to wehọmẹ. Yọnnu de he yin mẹplọntọ to wehọ  ṣie mẹ he ninọmẹ ṣie nọ duahunmẹna wẹ biọ to yé si nado wá dla mi pọ́n. Yé dọhona mi gando opagbe Biblu tọn go dọ oṣiọ lẹ na wá fọ́n, podọ nukuntọ́nnọ lẹ na wá mọnú to gbèdopo. (Isaia 35:5; Johanu 5:28, 29) N’yiwanna nuhe yé plọn mi lẹ, amọ́ e nọ vẹawuna mi nado dọhodopọ hẹ yé, na e ma ko yin aṣa ṣie nado nọ dọhodopọ hẹ gbẹtọ lẹ dai. Ṣigba, dile etlẹ yindọ n’ma do ojlo hia, yé yí homẹdagbe po homẹfa po do zindonukọn nado nọ wá dè e nado sọgan plọn Biblu hẹ mi. Asu po asi po ehe nọ zinzọnlin na kilomẹtlu 10 linlán gbọn pipli osó lẹ tọn de gblamẹ nado wá tòpẹvi he mẹ n’nọ nọ̀.

Nọvisunnu daa ṣie nọ dọna mi dọ yé nọ sọnú ganji ṣigba wamọnọ wẹ yé yin. Etomọṣo, onú ṣie nọ duahunmẹna yé bọ yé nọ hẹn nunina kleunkleun lẹ wá na mi. N’mọdọ Klistiani nugbo lẹ kẹdẹ wẹ sọgan do gbigbọ mẹde-yido-sanvọ́ tọn mọnkọtọn hia.

N’yí owe nukuntọ́nnọ lẹ tọn zan nado plọn Biblu. Dile etlẹ yindọ n’nọ mọnukunnujẹ nuhe plọn n’te lẹ mẹ, numọtolanmẹ he n’nọ tindo nọ zọ́n bọ e nọ vẹawuna mi nado kẹalọyi delẹ to yé mẹ. Di apajlẹ, e vẹawuna mi taun nado yise dọ Jiwheyẹwhe nọ hò ṣie pọ́n, podọ nado yise dọ mẹdevo lẹ nọ hò ṣie pọ́n dile Jiwheyẹwhe nọ wà do. N’wá mọnukunnujẹ nuhewutu Jehovah do jotẹnna kanyinylan na ojlẹ de mẹ, ṣigba e ma bọawuna mi nado nọ pọ́n ewọ hlan di Otọ́ owanyinọ de. *

Nuhe n’plọn to Biblu mẹ lẹ gọalọna mi nado diọ pọndohlan ṣie vudevude. Di apajlẹ, n’plọn dọ Jiwheyẹwhe nọ tindo awuvẹmẹ sisosiso na mẹhe to yaji lẹ. Jiwheyẹwhe dọ gando sinsẹ̀n-basitọ etọn he yè to nuyiwa hẹ to aliho agọ̀ mẹ lẹ go dọmọ: “Nugbonugbo yẹn ko mọ nukunbibia omẹ ṣie lẹ tọn . . . Yẹn yọ́n awufiẹsa yetọn lẹ.” (Eksọdusi 3:7) To whenue n’plọnnu gando jẹhẹnu Jehovah tọn lẹ go, n’yin whinwhàn nado klan gbẹzan ṣie do wiwe hlan ẹn. To 1998, n’yí baptẹm bo lẹzun dopo to Kunnudetọ Jehovah tọn lẹ mẹ.

Yẹn po mẹmẹsunnu he whẹndo etọn yí mi do whégbè po

To owhe he bọdego mẹ, n’yì wehọmẹ nukuntọ́nnọ lẹ tọn de to fie ma dẹn do tòdaho Escuintla tọn. Mẹho agun tọn lẹdo lọ tọn de doayi lehe e nọ vẹawuna mi nado tọ́n sọn gbétatò ṣie mẹ bo yì opli lẹ do go. Agun he sẹpọ mi hugan tin to pipli osó tọn he gblamẹ asu po asi po he nọ plọnnu mi lọ nọ gbọn nado wá dè e lọ godo, podọ e nọ vẹawuna mi nado basi gbejizọnlin lọ. Nado gọalọna mi, mẹho lọ dọho hẹ whẹndo Kunnudetọ de he nọ nọ̀ Escuintla, he tindo ojlo nado yí mi do owhé yetọn gbè bo nasọ nọ gọalọna mi nado nọ yì opli agun tọn lẹ. Kakajẹ egbehe, yé nọ penukundo go e taidi dọ n’yin dopo to hagbẹ whẹndo yetọn tọn mẹ wẹ nkọ.

N’sọgan donù apajlẹ owanyi nujọnu tọn he hagbẹ agun lọ tọn lẹ ko dohia mi lẹ go. Numimọ ehelẹ hẹn mi kudeji dọ taidi Kunnudetọ Jehovah tọn de, n’tin to Klistiani nugbo lẹ ṣẹnṣẹn.—Johanu 13:34, 35.

ALE HE N’MỌYI LẸ:

N’masọ nọ tindo numọtolanmẹ nuvọ́nọ-yinyin tọn kavi todido matindo tọn ba. Todin gbẹzan ṣie tindo lẹndai nujọnu tọn. Taidi lizọnyizọnwatọ whenu gigọ́ tọn to azọ́n Biblu pinplọnmẹ Kunnudetọ Jehovah tọn lẹ tọn mẹ, n’nọ ze ayidonugo ṣie do nugbo Biblu tọn pinplọn mẹdevo lẹ ji kakati nido yin do oblọ ṣie ji. Podọ, n’tindo lẹblanulọkẹyi nado to sinsẹ̀n taidi mẹho agun tọn bo nọ na hodidọ na mẹlẹpo to agun he to lẹdo lọ mẹ lẹ mẹ. N’tlẹ sọ tindo lẹblanulọkẹyi lọ nado nọ na hodidọ sinai do Biblu ji lẹ to plidopọ daho lẹ ji, ehe gbẹtọ fọtọ́n susu lẹ nọ wá.

N’to Biblu nukuntọ́nnọ lẹ tọn ṣie yizan to hodidọ de whenu

To 2010, n’yí gbedewema Wehọmẹ Azọ́nplọnmẹ Devizọnwiwa tọn (ehe nọ yin yiylọ todin dọ Wehọmẹ Wẹndagbe-Jlatọ Ahọluduta lọ tọn lẹ tọn) he yin bibasi to Salvador. Wehọmẹ ehe plọnazọ́n mi nado nọ hẹn azọngban agun tọn ṣie lẹ di dile e jẹ do. Azọ́nplọnmẹ ehe gọalọna mi nado mọdọ n’họakuẹ taun na Jehovah Jiwheyẹwhe bọ e sọ yiwanna mi, yèdọ mẹhe nọ hẹn mẹdepope pegan nado wazọ́n etọn.

Jesu dọmọ: “Ayajẹ sù to nunamẹ mẹ hú to mimọyi mẹ.” (Owalọ lẹ 20:35) Na nugbo tọn, n’sọgan dọ todin dọ n’tindo ayajẹ, podọ n’mọdọ n’sọgan gọalọna mẹdevo lẹ todin, dile etlẹ yindọ n’nọ lẹn to ojlẹ de mẹ wayi dọ ehe ma sọgan yọnbasi gbede.

^ huk. 13 Na nudọnamẹ gando nuhewutu Jiwheyẹwhe do jotẹnna kanyinylan go, pọ́n weta 11tọ owe lọ Etẹwẹ Biblu Plọn Mí Taun? tọn, ehe Kunnudetọ Jehovah tọn lẹ zinjẹgbonu.