Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN JUILLET 2015

 HOSỌ HE JẸNUKỌN | LEHE HIẸ SỌGAN PEHẸ MAGBỌJẸ DO

Magbọjẹ Tintindo Gando Owùnu lẹ Go

Magbọjẹ Tintindo Gando Owùnu lẹ Go

Alona dọmọ: “To whenue n’sè bọ ogàn avase namẹ tọn lẹ jẹ núdọ ji, ahun ṣie zẹ̀ bọ n’họ̀n biọ ohọ̀ gángán de mẹ. Ṣigba etlẹ yin to finẹ, ayiha ṣie ma vò. Ayimajai lọ nọ sinyẹn taun eyin n’tin to gbonu, to fie ohọ̀ he mẹ n’sọgan họnbẹ do de ma tin te. To gbèdopo he n’to zọnlinzin to tòhomẹ-liho ji, n’jẹ avivi ji sọmọ bọ n’ma sọgan gbọ ganji ba. Gànhiho susu godo wẹ n’wá mọ dee mẹ. To enẹgodo, ogàn lọ lẹ sọ gọjẹ núdọ ji.”

Alona

Awhàn yin dopo poun to nuhe nọ hẹn owù wá lẹ mẹ. Di apajlẹ, eyin doto dọna we dọ hiẹ kavi mẹyiwanna towe de to azọ̀n sinsinyẹn de jẹ, enẹ sọgan zọ́n bọ a na dibu taidi mẹhe sè nudidọ bọmbu de tọn. Podọ budidi gando sọgodo go sọgan hẹn magbọjẹ wá na mẹdevo lẹ. Yé nọ to nuhà dọ, ‘Be aihọn he mẹ awhàn, danuwiwa, nugbajẹmẹji, po aigba hinhẹnflu po tin te bọ ninọmẹ aimẹ tọn nọ to didiọ te wẹ ovi kavi ovivi mítọn lẹ na nọgbẹ̀ te ya?’ Nawẹ mí sọgan pehẹ magbọjẹ mọnkọtọn lẹ gbọn?

“Gbẹtọ zinzin mọ oylan jẹnukọn, bosọ yí ede whlá,” na e yọnẹn dọ onú ylankan lẹ nọ jọ wutu. (Howhinwhẹn lẹ 27:12) Kẹdẹdile mí nọ dovivẹnu nado basi hihọ́na agbasa mítọn do, mí sọgan ze afọdide he jẹ lẹ nado basi hihọ́na ayiha po ahun mítọn lẹ po. Ayidedai danuwiwa tọn po linlin televiziọn ji tọn he nọ bẹ yẹdide gblezọn hẹn lẹ po pinpọn nọ hẹn magbọjẹ mítọn po ovi mítọn lẹ tọn po jideji. Eyin mí nọ dapana onú ehelẹ pinpọn, enẹ ma dohia dọ mí to gbigbẹ́ dọ onú mọnkọtọn  lẹ ma nọ jọ nugbonugbo gba. Jiwheyẹwhe ma dá ayiha mítọn na mí nido nọ to nulẹnpọn do onú ylankan lẹ ji. Kakatimọ, mí dona nọ ze ayiha do “nudepope he yin nugbo, . . . dodo, . . . wiwe, . . . [bo] jẹna owanyi” ji. Eyin mí wàmọ, “Jiwheyẹwhe jijọho tọn” na na mí jijọho ayiha mẹ tọn po ahun mẹ tọn po.—Filippinu lẹ 4:8, 9.

DẸ̀HIHO YIN NUJỌNU

Yise nujọnu tọn nọ gọalọna mí nado pehẹ magbọjẹ. Biblu dotuhomẹna mí nado “nọ to aṣeji nado nọ hodẹ̀.” (1 Pita 4:7) Mí sọgan biọ alọgọ Jiwheyẹwhe tọn gọna nuyọnẹn po adọgbigbo po nado duto nuhahun mítọn lẹ ji, bo deji dọ “e nọ sè mítọn gando nudepope he mí to bibiọ go.”—1 Johanu 5:15.

Po asu etọn Avi po

Biblu dohia dọ Satani “wẹ to gandu do aihọn lọ ji,” e ma yin Jiwheyẹwhe, podọ “aihọn lọ pete tin to huhlọn mẹylankan lọ tọn glọ.” (Johanu 12:31; 1 Johanu 5:19) Enẹwutu, Jesu ma to nuyijlẹdonugo de poun basi to whenue e plọn mí nado nọ hodẹ̀ dọmọ: “Whlẹn mí sọn mẹylankan lọ si.” (Matiu 6:13) Alona dọmọ: “Whedepopenu he ogàn avase namẹ tọn lọ dọnú, n’nọ biọ Jehovah dọ ni gọalọna mi nado duto numọtolanmẹ ṣie lẹ ji. Podọ asu yiwanna ṣie nọ ylọ mi gbọn alokan ji bo nọ hodẹ̀ hẹ mi. Dẹ̀hiho gọalọna mi taun.” Ehe sọgbe hẹ nuhe Biblu dọ dọmọ: “OKLUNỌ ma dẹn do yé he to awhádo ylọ ẹ lẹ dè gba, e tin to yakẹ yé he to awhádo ylọ ẹ to nugbo mẹ lẹpo tọn.”—Psalm 145:18.

TODIDO MÍTỌN GANDO SỌGODO GO

Jesu plọn hodotọ etọn lẹ to Yẹwhehodidọ Osó ji tọn etọn mẹ nado nọ hodẹ̀ dọmọ: “Na ahọluduta towe ni wá.” (Matiu 6:10) Ahọluduta Jiwheyẹwhe tọn na de magbọjẹ ylankan lẹpo sẹ̀ mlẹnmlẹn. Gbọn Jesu he yin “Ahọvi Jijọho tọn” lọ dali, Jiwheyẹwhe na hẹn “awhàn gbọ kakajẹ aigba pòdo.” (Isaia 9:6; Psalm 46:9) “Ewọ [Jiwheyẹwhe] bo nasọ dawhẹ to gbẹtọ susu ṣẹnṣẹn, . . . akọta ma nasọ ze ohí daga do akọta ji, mọ yé ma nasọ plọn awhàn gbede ba. . . . Podọ mẹde ma nasọ hẹn yé savò gba.” (Mika 4:3, 4) Whẹndo ayajẹnọ lẹ “na gbá ohọ̀, bosọ nọ nọ̀ yé mẹ, yé na do vẹngle, bosọ dù sinsẹ́n yetọn.” (Isaia 65:21) Podọ “finẹnu lẹ ma to na dọmọ, yẹn to azọ̀njẹ.”—Isaia 33:24.

To egbehe, mahopọnna lehe mí to aṣeji sọ, e ma nọ yọnbasi to whelẹponu nado dapana “ojlẹ po kosọ po” kavi nado hẹn ẹn diun dọ mí ma tin to fide to ojlẹ he mẹ nujijọ ylankan de na wá aimẹ te. (Yẹwhehodọtọ 9:11) Sọn owhe kanweko susu lẹ die wẹ awhàn, danuwiwa po azọ̀n po to gbẹtọ dagbe lẹ hù. Ṣigba, todido tẹwẹ homẹvọnọ enẹlẹ tindo?

Gbẹtọ livi susu na gọwá nọgbẹ̀, podọ Jiwheyẹwhe kẹdẹ wẹ yọ́n sọha yetọn lẹ. Ṣigba todin whẹ́, yé damlọn bo tin to oflin Jiwheyẹwhe tọn mẹ kakajẹ azán he gbè “mẹhe to yọdò oflin tọn lẹ mẹ lẹpo na . . . tọ́njẹgbonu.” (Johanu 5:28, 29) To whenue Biblu to hodọ gando fọnsọnku go, e dọmọ: “Todido ehe, he mí tindo tin taidi húnsingàn de na alindọn mítọn, bo yin nujikudo tọn bosọ lodo.” (Heblu lẹ 6:19) Podọ Jiwheyẹwhe “ko sọ na jide gbẹtọ lẹpo to enẹ mẹ dọ e ko fọ́n [Jesu] sọn oṣiọ lẹ mẹ.”—Owalọ lẹ 17:31.

Ṣigba todin whẹ́, mẹhe tlẹ to vivẹnudo nado hẹn homẹhun Jiwheyẹwhe lẹ na pehẹ magbọjẹ lẹ. Paul, Janet po Alona po penugo nado duto magbọjẹ yetọn lẹ ji, na yé ze afọdide nujọnu tọn lẹ, bo hodẹ̀ nado dọnsẹpọ Jiwheyẹwhe, bosọ tindo yise to opagbe Biblu tọn na sọgodo lẹ mẹ. “Na Jiwheyẹwhe he nọ namẹ todido ni yí ayajẹ po jijọho lẹpo po do gọ́ mì mẹ gbọn yiyise mìtọn dali,” dile ewọ wà na omẹ ehelẹ do.—Lomunu lẹ 15:13.

Plọnnu Dogọ

GBLỌNDO NA KANBIỌ SINAI DO BIBLU JI LẸ

Jijọho to Aigba Ji—Nawẹ E Na Wá Gbọn?

Plọnnu gando lehe Jiwheyẹwhe dopagbe nado hẹn jijọho wá aihọn mẹ gbọn Ahọluduta etọn gblamẹ do go.