Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Juillet 2015

 HOSỌ HE JẸNUKỌN | LEHE HIẸ SỌGAN PEHẸ MAGBỌJẸ DO

Magbọjẹ Tintindo Gando Whẹndo Go

Magbọjẹ Tintindo Gando Whẹndo Go

Janet dọmọ: “To whenue otọ́ ṣie kú, e ma dẹn bọ asu ṣie dọna mi dọ emi to asi devo dà. To ojlẹ vude godo, e bẹagbàn bo yì, bo ma dọ nude na mi dogọ etlẹ yin e yì whedenu tata, podọ e jo yẹn po ovi mítọn awe lẹ po do.” Janet mọ azọ́n de, ṣigba akuẹ he e nọ dù ma pé nado nọ sú họ̀-kuẹ. Podọ e ma yin nuhahun akuẹ tọn kẹdẹ wẹ e pehẹ. E dọmọ: “Magbọjẹ sinsinyẹn he n’tindo na azọngban he yẹn kẹdẹ dona hẹndi todin lẹ nọ hẹn mi jẹflumẹ. N’nọ gblewhẹdo dee dọ n’ma nọ penugo nado penukundo ovi ṣie lẹ go dile mẹjitọ devo lẹ nọ wà do. Podọ kakajẹ din, n’gbẹ́ nọ hanú gando nukun he mẹdevo lẹ nọ yí do pọ́n yẹn po ovi ṣie lẹ po go. Be yé nọ mọdọ n’wà nuhe n’dona wà lẹpo nado hẹn alọwle ṣie dote ya?”

Janet

Dẹ̀hiho gọalọna Janet nado duto numọtolanmẹ etọn lẹ ji bo hẹn haṣinṣan etọn hẹ Jiwheyẹwhe lodo. “Ninọmẹ lọ nọ ylan taun to zánmẹ lẹ, na filẹpo nọ to abọẹ bọ flumẹjijẹ ṣie nọ sinyẹn deji. Dẹ̀hiho po Biblu hihia po nọ gọalọna mi nado damlọn. Wefọ he n’yiwanna hugan wẹ Filippinu lẹ 4:6, 7 he dọmọ: ‘Mì yin magbọjẹnọ na nudepope blo, ṣigba to onú lẹpo mẹ, mì nọ yí odẹ̀, ovẹ̀, po pẹdido po do hẹn obiọ mìtọn lẹ zun yinyọnẹn na Jiwheyẹwhe; jijọho Jiwheyẹwhe tọn he yiaga hugan linlẹn lẹpo nasọ họ́ ahun mìtọn po nugopipe apọ̀nmẹ tọn mìtọn po.’ Ozán susu wẹ n’yí do hodẹ̀, bosọ mọdọ jijọho Jehovah tọn miọnhomẹna mi.”

To Yẹwhehodidọ Osó ji tọn Jesu tọn whenu, ohó jidenamẹ tọn he e dọ gando odẹ̀ go yọ́n-na-yizan to magbọjẹ wunmẹ lẹpo whenu. E dọmọ: “Jiwheyẹwhe Otọ́ mìtọn yọ́n nuhe mì tindo nuhudo etọn lẹ, yèdọ whẹpo mì tlẹ do biọ sọn e dè.” (Matiu 6:8) Etomọṣo, mí dona nọ biọ ẹ. Dẹ̀hiho wẹ yin aliho tintan nado “dọnsẹpọ Jiwheyẹwhe.” Ale tẹwẹ mọwiwà na hẹnwa? Enẹ na zọ́n bọ “ewọ na dọnsẹpọ [mí].”—Jakọbu 4:8.

Na nugbo tọn, dẹ̀hiho nọ zọ́n bọ mí nọ voawu to whenue mí dọ magbọjẹ mítọn lẹ tọ́n godo, podọ e sọ nọ hẹn ale devo lẹ wá. Jehovah, yèdọ ‘Mẹhe nọ sè odẹ̀’  sọ nọ yinuwado ota mẹhe dín in po yise po lẹ tọn mẹ. (Psalm 65:2) Enẹwutu wẹ Jesu plọn hodotọ etọn lẹ nado “nọ hodẹ̀ to whepoponu podọ ma nado gbọjọ.” (Luku 18:1) Mí dona nọ to anademẹ po alọgọ Jiwheyẹwhe tọn po biọ zọnmii, bo deji dọ ewọ na suahọ mí na yise he mí dohia. Mí ma dona nọ tindo ayihaawe gbede gando ojlo etọn kavi nugopipe etọn nado yinuwado ota mítọn mẹ go. Eyin mí nọ “hodẹ̀ to whepoponu” to aliho ehe mẹ, enẹ nọ dohia dọ mí tindo yise nujọnu tọn.—1 Tẹsalonikanu lẹ 5:17.

NUHE YISE TINTINDO ZẸẸMẸDO TAUN

Ṣigba, etẹwẹ yise yin na taun tọn? Yise tintindo nọ biọ dọ yè ni “to vivẹnudo zọnmii nado yọ́n” Jiwheyẹwhe taidi omẹ nujọnu tọn de. (Johanu 17:3) Nado jẹ enẹ kọ̀n, onú tintan he mí dona wà wẹ nado plọn linlẹn Jiwheyẹwhe tọn he to Biblu mẹ lẹ. Mí plọn dọ ewọ nọ mọ dopodopo mítọn bosọ jlo na gọalọna mí. Ṣigba, yise nujọnu tọn bẹ nususu hẹn hugan nado yọ́n nude gando Jiwheyẹwhe go poun. E sọ zẹẹmẹdo nado jihọntọn nujọnu tọn hẹ ẹ. To paa mẹ, gbẹtọvi lẹ ma nọ jihọntọn hẹ ode awetọ to zánto dopo mẹ, mọdopolọ mí ma sọgan jihọntọn hẹ Jiwheyẹwhe to zánto dopo mẹ. Yise he mí tindo to ewọ mẹ nọ “to jijideji” dile ojlẹ to yìyì bọ mí to nuplọn dogọ gando ewọ go, bo “nọ wà nuhe nọ hẹn homẹhun in lẹ,” podọ dile mí to mimọ dọ ewọ to alọgọna mí nugbonugbo. (2 Kọlintinu lẹ 10:15; Johanu 8:29) Yise mọnkọtọn wẹ gọalọna Janet nado doakọnna magbọjẹ etọn lẹ.

Janet dọmọ: “Na n’mọdọ Jehovah tin hẹ mi to whepoponu wutu, enẹ gọalọna mi taun nado tindo yise. Whlasusu wẹ mí pehẹ whẹdida mawadodo bọ e nọ taidi dọ mí ma sọgan luntọ́n. Mí nọ hodẹ̀ hlan Jehovah, podọ e nọ deali na mí to whelẹponu, yèdọ ali de he yẹnlọsu ma na ko penugo nado mọ gbede. Pẹdido na ẹn nọ zọ́n bọ n’nọ flin lehe dagbe he e wà na mi lẹ sù sọ. E nọ gọalọna mí to whepoponu to ojlẹ sisọ mẹ, yèdọ to ogàn he jẹ mẹ. Podọ e na mi họntọn nugbo lẹ, enẹ wẹ mẹmẹsunnu po mẹmẹyọnnu nujọnu tọn lẹ po. Yé nọ tin to finẹ nado gọalọna mi to whelẹponu podọ yé yin apajlẹ dagbe na ovi ṣie lẹ.” *

“N’yọ́n nuhewutu Jehovah do dọ to Malaki 2:16 mẹ dọ ‘Emi gbẹwanna gbẹdai.’ Na gbẹdai wẹ yin nuyiwa nugbonọ-mayin tọn he nọ hẹn awufiẹsa wá hugan na alọwlemẹ homẹvọnọ de. E ko yì owhe susu todin he asu ṣie jo mi do, ṣogan to whedelẹnu n’gbẹ́ nọ mọdọ n’to odò etọn jẹ. To ojlẹ enẹlẹ mẹ, n’nọ tẹnpọn bo nọ wà nude nado gọalọna mẹdevo, podọ ehe nọ saba wà dagbe na yẹnlọsu.” Janet yí ayinamẹ Biblu tọn ma nado nọ klan míde dovo do yizan mẹ, bọ gbọnmọ dali magbọjẹ etọn depò. *Howhinwhẹn lẹ 18:1.

Jiwheyẹwhe yin “otọ́ tọṣiọvi tọn, whẹdatọ asuṣiọsi lẹ tọn.”—Psalm 68:5

Janet dọmọ: “Homẹ ṣie hùn nado yọnẹn dọ Jiwheyẹwhe yin ‘otọ́ tọṣiọvi tọn, whẹdatọ asuṣiọsi lẹ tọn.’ E ma na jo mí do gbede dile asu ṣie wà do.” (Psalm 68:5) Janet yọnẹn dọ Jiwheyẹwhe ma nọ whlé mí pọ́n “po onú ylankan lẹ po.” Ṣigba, e nọ “yí alọtútlú do na [nuyọnẹn] mẹlẹpo,” bo nọ na mí “huhlọn he hú jọwamọ tọn” nado gọalọna mí, na mí nido pehẹ magbọjẹ lẹ.—Jakọbu 1:5, 13; 2 Kọlintinu lẹ 4:7.

Ṣigba, eyin mí nọ tindo magbọjẹ na ogbẹ̀ mítọn tin to owù mẹ wutu lo?

^ huk. 10 Nado mọ aliho yọ́n-na-yizan devo lẹ nado sọgan doakọnna magbọjẹ lẹ, pọ́n hosọ lọ Êtes-vous maître de votre vie?(Be A to Anadena Gbẹzan Towe Ya?) he tindo adà debọdo-dego to Réveillez-vous! juillet 2015 mẹ, he sọ tin-to-aimẹ to www.jw.org ji.