Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN AVRIL 2015

 HOSỌ HE JẸNUKỌN | NAEGBỌN MÍ DONA PLỌN BIBLU?

Tito Biblu Pinplọn Tọn

Na Mẹlẹpo

Tito Biblu Pinplọn Tọn

Na Mẹlẹpo

Mẹsusu yọ́n Kunnudetọ Jehovah tọn lẹ na yẹwhehodidọ yetọn. Ṣigba, be a yọnẹn dọ mí sọ tindo tito Biblu pinplọnmẹ tọn de lẹdo aihọn pé ya?

To owhe 2014 tọn mẹ, Kunnudetọ 8 000 000 linlán to otò 240 mẹ wẹ nọ plọn Biblu hẹ diblayi gbẹtọ 9 500 000 to osun dopodopo mẹ. * Na nugbo tọn, sọha mẹhe mí to Biblu plọn hẹ lẹ tọn zẹ̀ sọha tòvi otò voovo 140 tọn go!

Nado sọgan wà azọ́n mẹpinplọn tọn ehe, Kunnudetọ Jehovah tọn lẹ nọ zín Biblu, owe lẹ, linlinwe lẹ po owe sinai do Biblu ji devo lẹ po tọ́n, ehe sọha yetọn nọ yì liva dopo daa to whemẹwhemẹ to nudi ogbè 700 mẹ! Vivẹnudido nado zín owe lẹ tọ́n to ogbè susu enẹlẹ mẹ zọ́n bọ gbẹtọ lẹ sọgan plọn Biblu to ogbè he jlo yé mẹ.

 GBLỌNDO NA KANBIỌ HE MẸSUSU NỌ KANSE GANDO TITO BIBLU PINPLỌNMẸ TỌN MÍTỌN GO LẸ

Nawẹ oplọn lọ nọ yì do?

Mí nọ yí hosọ Biblu tọn voovo lẹ bo nọ gbadopọnna wefọ Biblu tọn he tindo kanṣiṣa hẹ hosọ enẹlẹ. Di apajlẹ, Biblu na gblọndo kanbiọ delẹ tọn taidi: Mẹnu wẹ yin Jiwheyẹwhe? Omẹ nankọ wẹ ewọ yin? Be e tindo oyín de ya? Fie wẹ e nọ nọ̀? Be mí sọgan dọnsẹpọ ẹ ya? Ṣigba, nawẹ mí sọgan mọ wefọ he na gblọndo kanbiọ lọ lẹ tọn to Biblu mẹ gbọn?

Nado gọalọna gbẹtọ lẹ nado mọ gblọndo lẹ, mí nọ saba zan owe lọ Etẹwẹ Biblu Plọn Mí Taun? * he tindo weda 224. Owe ehe yin awuwlena titengbe nado gọalọna gbẹtọ lẹ nado mọnukunnujẹ nuplọnmẹ dodonu tọn Biblu tọn lẹ mẹ. Nupinplọn owe lọ tọn lẹ gando Jiwheyẹwhe, Jesu Klisti, yajiji gbẹtọvi lẹ tọn, fọnsọnku, odẹ̀ po hosọ susu devo lẹ po go.

 Whetẹnu podọ fie wẹ oplọn lọ sọgan yin bibasi te?

E sọgan yin bibasi to ogàn he jlo we mẹ, podọ to fie yọ́n na we.

Nawẹ oplọn dopodopo nọ dẹnsọ?

Mẹsusu nọ de nudi gànhiho dopo dovo to osẹ dopodopo mẹ nado plọn Biblu. Ṣigba, oplọn lọ sọgan nọ yin bibasi sọgbe hẹ tito towe lẹ. Mẹdelẹ nọ plọnnu na nukunwhiwhe 10 kavi 15 poun to sẹmẹsẹmẹ.

Nẹmu wẹ yè nọ sú na oplọn lọ?

Vọnu wẹ oplọn lọ po owe he a na yizan lẹ po. Ehe sọgbe hẹ anademẹ he Jesu na devi etọn lẹ dọmọ: “Vọnu wẹ mì mọyi, vọnu wẹ mì ni namẹ.” —Matiu 10:8.

Osun kavi owhe nẹmu wẹ oplọn lọ nọ dẹn na?

Hiẹ wẹ na basi nudide lọ. Owe lọ Etẹwẹ Biblu Plọn Mí Taun? bẹ nupinplọn 19 hẹn. Mí sọgan plọn depope to nupinplọn lọ lẹ mẹ kavi popolẹpo, podọ sọgbe hẹ nugopipe towe.

Be n’dona lẹzun Kunnudetọ Jehovah tọn wẹ ya?

Lala. Mí yọnẹn dọ mẹdopodopo tindo jlọjẹ nado basi nudide sinsẹ̀n he jlo e tọn. Ṣigba, mẹhe ko yọ́n nuplọnmẹ dodonu tọn Biblu tọn lẹ sọgan basi nudide sọgbe hẹ nuhe yé ko plọn lẹ.

 Fie wẹ n’sọgan mọ nudọnamẹ te dogọ?

Nọtẹn Intẹnẹt tọn jw.org bẹ nudọnamẹ he sọgbe lẹ hẹn gando nuyise po nuwiwa Kunnudetọ Jehovah tọn lẹ tọn po go.

Nawẹ n’sọgan biọ dọ mẹde ni wá plọn Biblu hẹ mi gbọn?

  • Kanwe gọ́ obiọwema he tin to www.jw.org ji.

  •  
  • Dọnsẹpọ Kunnudetọ Jehovah tọn he tin to lẹdo towe mẹ lẹ.

^ huk. 4 To paa mẹ, mí nọ plọn Biblu hẹ mẹdopo kavi pipli pẹvi gbẹtọ lẹ tọn.

^ huk. 9 He Kunnudetọ Jehovah tọn lẹ zinjẹgbonu. Vọkan owe ehe tọn he lán to livi 230 ji wẹ yin zinzinjẹgbonu to ogbè 260 linlán mẹ.