Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Janvier 2015

Be Mí Dona Nọ Hodẹ̀ Hlan Jesu Wẹ Ya?

Be Mí Dona Nọ Hodẹ̀ Hlan Jesu Wẹ Ya?

T O AGỌE, dodinnanutọ de kanhose jọja 800 linlán sọn sinsẹ̀n wiawe linlán mẹ nado yọnẹn eyin yé yise dọ Jesu nọ sè odẹ̀. Jọja 480 linlán wẹ yigbe dọ emi kudeji dọ Jesu nọ wàmọ. Ṣigba, jọja dopo zẹhudo yinkọ Jesu tọn ji bo wlan dọ “Jiwheyẹwhe” wẹ nọ sè odẹ̀.

Etẹwẹ hiẹ lẹn? Be mí dona hodẹ̀ hlan Jesu wẹ ya kavi Jiwheyẹwhe? * Nado mọ gblọndo lọ, gbọ mí ni gbadopọnna lehe Jesu plọn devi etọn lẹ nado nọ hodẹ̀ do.

MẸNU WẸ JESU PLỌN DEVI ETỌN LẸ NADO NỌ HODẸ̀ HLAN?

Jesu dohia mí bosọ plọn mí mẹhe mí dona hodẹ̀ hlan.

Jesu nọ hodẹ̀ hlan Otọ́ olọn mẹ tọn etọn. Nuhe mílọsu dona wà niyẹn

NUPLỌNMẸ ETỌN: To whenue devi de dọna Jesu dọ “Oklunọ, plọn mí lehe mí na nọ hodẹ̀ do,” Jesu gblọn dọmọ: “Whedepopenu he mì to dẹ̀ho, mì nọ dọ, ‘Otọ́.’” (Luku 11:1, 2) Gbọnvona enẹ, to hodidọ ayidego tọn he Jesu na to osó ji lọ whenu, e na tuli todoaitọ etọn lẹ nado nọ hodẹ̀. E dọmọ: “Hodẹ̀ hlan Otọ́ towe.” E sọ na yé jide po hogbe ehelẹ po: “Otọ́ mìtọn yọ́n nuhe mì tindo nuhudo etọn lẹ, yèdọ whẹpo mì tlẹ do biọ sọn e dè.” (Matiu 6:6, 8) To ozán godo tọn he Jesu zan to aigba ji lọ mẹ, e dọna devi etọn lẹ dọmọ: “Eyin mìwlẹ biọ nudepope Otọ́, ewọ na na ẹn mì to oyín ṣie mẹ.” (Johanu 16:23) Gbọnmọ dali, Jesu plọn mí nado nọ hodẹ̀ hlan mẹhe yin Otọ́ etọn podọ Otọ́ mítọn, yèdọ Jehovah Jiwheyẹwhe.—Johanu 20:17.

APAJLẸ ETỌN: Odẹ̀ he Jesu nọ hò lẹ sọgbe hẹ nuplọnmẹ etọn. To ninọmẹ de mẹ, e hodẹ̀ dọmọ: “Yẹn pà we to gbangba, hiẹ Otọ́, Oklunọ olọn po aigba po tọn.” (Luku 10:21) To ninọmẹ devo mẹ, “Jesu ze nukun etọn lẹ daga hlan olọn bo dọmọ: ‘Otọ́, yẹn dopẹna we dọ hiẹ ko sè ṣie.’” (Johanu 11:41) Podọ, whẹpo Jesu na kú, e hodẹ̀ dọmọ: “Otọ́, alọ towe mẹ wẹ yẹn jo gbigbọ ṣie do.” (Luku 23:46) Jesu ze apajlẹ dagbe he mímẹpo dona hodo lọ dai gbọn dẹ̀hiho hlan Otọ́ olọn mẹ tọn etọn—“Oklunọ olọn po aigba po tọn”—dali. (Matiu 11:25; 26:41, 42; 1 Johanu 2:6) Be devi tintan lẹ mọnukunnujẹ anademẹ Jesu tọn lẹ mẹ domọ ya?

MẸNU WẸ KLISTIANI TINTAN LẸ NỌ HODẸ̀ HLAN?

Osẹ delẹ to whenue Jesu lẹkọyi olọn mẹ godo, nukundiọsọmẹtọ lẹ yangbé devi lẹ tọn bo sìn-adán na yé. (Owalọ lẹ 4:18) Devi lẹ biọ alọgọ to odẹ̀ mẹ. Ṣigba, mẹnu wẹ yé hodẹ̀ hlan? Owalọ lẹ 4:24, 30 dohia dọ “yé ze ogbè yetọn daga to kọndopọ mẹ hlan Jiwheyẹwhe,” bo biọ ẹ dọ Ewọ ni to alọgọna yé “gbọn oyín devizọnwatọ wiwe [etọn], Jesu tọn gblamẹ.” Ehe dohia dọ devi Jesu tọn lẹ setonuna anademẹ he e na gando odẹ̀ go lẹ. Jiwheyẹwhe wẹ yé nọ hodẹ̀ hlan, e ma yin Jesu gba.

To owhe delẹ godo, apọsteli Paulu dọ lehe ewọ po gbẹdohẹmẹtọ etọn lẹ po nọ hodẹ̀ do. To wekanhlanmẹ etọn hlan Klistiani hatọ etọn lẹ mẹ, ewọ dọmọ: “Whepoponu wẹ mí nọ dopẹna Jiwheyẹwhe Otọ́ Oklunọ mítọn Jesu Klisti tọn to whenue mí to dẹ̀ho do ota mìtọn mẹ.” (Kọlọsinu lẹ 1:3) Paulu sọ kanwehlan yisenọ hatọ etọn lẹ dọ emi ‘nọ dopẹna Jiwheyẹwhe podọ Otọ́ mítọn to whepoponu na onú  lẹpo to oyín Oklunọ mítọn Jesu Klisti tọn mẹ.’ (Efesunu lẹ 5:20) Hogbe ehelẹ dohia dọ Paulu na tuli mẹdevo lẹ nado nọ hodẹ̀ hlan ‘Jiwheyẹwhe podọ Otọ́ etọn na onú lẹpo,’ ṣigba to oyín Jesu tọn mẹ.—Kọlọsinu lẹ 3:17.

Mílọsu sọgan hodo apajlẹ Klistiani tintan lẹ tọn bo do owanyi mítọn hia Jesu gbọn tonusisena ayinamẹ he e na do odẹ̀ ji lẹ dali. (Johanu 14:15) Eyin mí nọ hodẹ̀ hlan Otọ́ olọn mẹ tọn mítọn, podọ hlan ewọ kẹdẹ, mí na mọ nugbo-yinyin hogbe Psalm 116:1, 2 tọn he dọmọ: “Yẹn yiwanna OKLUNỌ, na ewọ ko sè ogbè ṣie . . . Yẹn na nọ dawhá ylọ ẹ le yẹn tin to ogbẹ̀ dẹnsọ.” *

^ huk. 3 Sọgbe hẹ Owe-wiwe lẹ, Jiwheyẹwhe po Jesu po ma sọzẹn. Na nudọnamẹ dogọ, pọ́n weta 4tọ owe Etẹwẹ Biblu Plọn Mí Taun? tọn, he Kunnudetọ Jehovah tọn lẹ zinjẹgbonu.

^ huk. 11 Eyin Jiwheyẹwhe na sè odẹ̀ mítọn lẹ, mí dona dovivẹnu nujọnu tọn nado nọ setonuna osẹ́n etọn lẹ. Na nudọnamẹ dogọ, pọ́n weta 17tọ owe Etẹwẹ Biblu Plọn Mí Taun? tọn.

Plọnnu Dogọ

Etẹwẹ Biblu Plọn Mí Taun?

Dọnsẹpọ Jiwheyẹwhe to Odẹ̀ Mẹ