Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN OCTOBRE 2014

 HOSỌ HE JẸNUKỌN | AHỌLUDUTA JIWHEYẸWHE TỌN—ALE TẸLẸ WẸ E NA HẸNWA NA WE

Naegbọn Mí Dona Tindo Ojlo to Ahọluduta Jiwheyẹwhe Tọn Mẹ?

Naegbọn Mí Dona Tindo Ojlo to Ahọluduta Jiwheyẹwhe Tọn Mẹ?

Lẹdo aihọn pé, gbẹtọ livilivi lẹ wẹ tindo todido to Ahọluduta Jiwheyẹwhe tọn mẹ. Yé nọ hodo apajlẹ Jesu tọn, mẹhe plọn devi etọn lẹ nado nọ hodẹ̀ dọ: “Ahọludu towe ni wá. Ojlo towe ni yin wiwà to aigba go.”—Matiu 6:10, Biblu Wiwe lọ—Gun Alada.

To whenue gbẹtọ susu to ojlo nujọnu tọn tindo to Ahọluduta Jiwheyẹwhe tọn mẹ, e blawu dọ suhugan sinsẹ̀n lẹ tọn ma nọ tindo ojlo sọmọ to e mẹ. Gando whẹho ehe go, whenuho-kantọ H. G. Wells dohia dọ e jẹna ayidego taun dọ Jesu na “ayidonugo vonọtaun . . . nuplọnmẹ he gando nuhe ewọ [lọsu] ylọdọ Ahọluduta Olọn tọn go.” Wells zinnudeji dọ “suhugan sinsẹ̀n Klistiani tọn lẹ wẹ . . . ma nọ ylọ nuplọnmẹ ehe dọ nujọnu to mẹpinplọn yetọn lẹ mẹ.”

Ṣigba, Kunnudetọ Jehovah tọn lẹ gbọnvo, na yé nọ na ayidonugo nujọnu tọn Ahọluduta Jiwheyẹwhe tọn. Lẹnnupọndo ehe ji: Linlinwe tangan mítọn he a to hihia to alọnu nọ yin zinzinjẹgbonu to ogbè 220 mẹ. Nudi vọkan livi 46 zinjẹgbonu dopodopo tọn wẹ nọ yin didetọn; podọ na nugbo tọn, linlinwe ehe wẹ nọ yin mimá lẹdo aihọn pé hú linlinwe devo depope. Podọ, etẹwẹ yin owẹ̀n tangan linlinwe ehe tọn? Doayi hosọ etọn blebu go: Atọ̀họ̀-Nuhihọ́ lọ Tọn He to Ahọluduta Jehovah Tọn Lá.  *

Naegbọn Kunnudetọ Jehovah tọn lẹ nọ dovivẹnu sọmọ nado lá Ahọluduta Jiwheyẹwhe tọn? Tintan whẹ́, mí yise dọ Ahọluduta Jiwheyẹwhe tọn wẹ yin owẹ̀n tangan he tin to Biblu mẹ, yèdọ owe he yin nujọnu hugan to gbẹ̀mẹ. Humọ, mí kudeji dọ Ahọluduta Jiwheyẹwhe tọn kẹdẹ wẹ sọgan didẹ nuhahun he gbẹtọvi lẹ to pipehẹ.

Kunnudetọ Jehovah tọn lẹ nọ dovivẹnu nado hodo apajlẹ Jesu tọn, enẹ wẹ zọ́n bọ yé nọ zinnudo Ahọluduta Jiwheyẹwhe tọn ji. To whenue Jesu to aigba ji, Ahọluduta Jiwheyẹwhe tọn wẹ yin nujọnu hugan to gbẹzan etọn mẹ, podọ Ahọluduta lọ ji wẹ e nọ zinnudo to yẹwhehodidọ etọn mẹ. (Luku 4:43) Naegbọn Ahọluduta lọ do nọ duahunmẹna ẹn sọmọ? Podọ, ale tẹlẹ wẹ Ahọluduta lọ sọgan hẹnwa na we? Mí na we tuli nado gbadopọnna gblọndo he Biblu na na kanbiọ ehelẹ to hosọ he bọdego lẹ mẹ.

^ huk. 5 Jehovah wẹ oyín Jiwheyẹwhe tọn dile Biblu dohia do.