Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN JUILLET 2014

 HOSỌ HE JẸNUKỌN | BE MẸDE SỌGAN YỌ́N NUHE NA JỌ TO SỌGODO YA?

Nuhe Yé Dọ Gando Sọgodo Go Delẹ Yin Nugbo, Amọ́ Susu Yin Lalo

Nuhe Yé Dọ Gando Sọgodo Go Delẹ Yin Nugbo, Amọ́ Susu Yin Lalo

Be a jlo na yọ́n sọgodo towe ya? Mẹsusu wẹ nọ jlo na yọ́n sọgodo yetọn. Gbẹtọ susu wẹ nọ dọ nuhe na wá jọ to nukọn mẹ lẹ—delẹ nọ yin nugbo podọ devo lẹ nọ yin lalo. Lẹnnupọndo apajlẹ he bọdego ehelẹ ji:

  • DODINNANUTỌ LẸ nọ yí azọ́nwanu he gẹdẹ lẹ zan bosọ nọ zan akuẹ susu nado dọ nuhe na wá jọ to nukọn mẹ lẹ. Di apajlẹ, yé nọ dọ lehe ozi ylankan he nọ hẹn jẹhọn flu lẹ na wá hẹn aigba gble do, bosọ nọ dọ vlavo eyin jikun na ja to lẹdo de mẹ kavi lala.

  • MẸHE NỌ NA AYINAMẸ DO AJỌWIWA PO TONUDIDỌ PO JI LẸ nọ dọ ojlẹ he mẹ akuẹ viva do ajọwiwa mẹ na hẹn ale wá kavi na yin ahọ́ te lẹ bosọ nọ dọ nuhe na jọ to tonudidọ-liho lẹ. Warren Buffett he yin dopo to ajọwatọ daho hugan aihọn tọn lẹ mẹ dọ ojlẹ he mẹ akuẹ viva do ajọwiwa mẹ na hẹn ale wá kavi na yin ahọ́ te lẹ, podọ yè sù yinkọ dọṣẹdọtọ tọn na ẹn, na nuhe e dọ lẹ wá jọ pẹpẹ. Dodinnanu ayinamẹtọ Nate Silver tọn lẹ ko gọalọna ẹn nado dọ nususu gando sọgodo tonudidọ États-Unis tọn go kakajẹ ajọ̀ voovo he azọ́nwhé sinima tọn daho Amelika tọn (Hollywood) na dù kavi na na lẹ ji.

  • KANDAI PO OTÀN HOHOWHENU TỌN LẸ PO nọ yin pinpọnhlan taidi dọdai. Mẹdelẹ mọdọ kandai gigẹdẹ he Michel de Notredame basi to owhe 1 500 gblamẹ lẹ wẹ to hẹndi mọ to egbehe. Mẹdevo lẹ basi zẹẹmẹ dọ sunzanhiawe Maya lẹ tọn he wá vivọnu to 21 décembre 2012 yin ohia dọ nujijọ ylankan delẹ na wá aihọn lọ ji.

  • SINSẸ̀NGÁN LẸ nọ dọ to whedelẹnu dọ nuylankan delẹ na jọ do aihọn lọ ji. Yé nọ dọmọ nado na avase podọ na mẹsusu nido wá sinsẹ̀n yetọn mẹ. Yẹwhenọ Harold Camping po sinsẹ̀nvi etọn lẹ po lá gbọn fisusu dọ to 2011 aihọn lọ na yin vivasudo. Amọ́ kakajẹ egbé, aihọn lọ gbẹ́ pò to ote.

  • MẸHE TINDO HUHLỌN HE MA YIN JỌWAMỌ TỌN LẸ nọ sọalọakọ́n dọ emi sọgan dọ nuhe na jọ to osọ lẹ. Edgar Cayce po Jeane Dixon po dọ dọ nujijọ delẹ na wá aimẹ to gblagbla owhe 1901 jẹ 2000 tọn lẹ mẹ, podọ nulọ lẹ wá jọ nugbo. Amọ́, nususu wẹ dopodopo yetọn sọ dọ he ma wá jọ. Di apajlẹ, Dixon dọ dọ Wẹkẹ-Whàn III de na bẹ to 1958, podọ Cayce dọ dọ ohù na wá gbà ṣinyọ́n New York to owhe 1975 lẹ gblamẹ.

Be aliho dejidego de tin nugbo nado yọ́n sọgodo ya? Kanbiọ he e jẹ dọ yè ni kanse de wẹ ehe yin. Eyin a ko yọ́n nuhe na jọ to sọgodo lẹ wẹ, vlavo enẹ sọgan ko yinuwado gbẹzan towe po nudide towe lẹ po ji.