Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN OCTOBRE 2013

 PLỌN OVI TOWE LẸ

Nuyiwa Towe Sọgan Hẹn Homẹgble Jiwheyẹwhe—Lehe Mí Sọgan Hẹn Homẹ Etọn Hùn Do

Nuyiwa Towe Sọgan Hẹn Homẹgble Jiwheyẹwhe—Lehe Mí Sọgan Hẹn Homẹ Etọn Hùn Do

Be mẹde ko gbleawuna we sọmọ bọ a viavi pọ́n ya? * Matin ayihaawe, mímẹpo go wẹ enẹ ko jọ do pọ́n. Ṣigba to whedelẹnu, awugble lọ sọgan nọma yin to agbasa go. Mẹde sọgan dọho ylankan he ma yin nugbo lẹ gando mí go. Enẹ sọgan gbleawuna mí, kavi e ma yin mọ wẹ?— Jiwheyẹwhe lọsu sọgan gblehomẹ eyin yè dolalo dokọna ẹn. Gbọ mí ni dọhodo ehe ji bo pọ́n lehe mí sọgan hẹn homẹ Jiwheyẹwhe tọn hùn kakati nado hẹn homẹgble e do.

Biblu dohia dọ mẹdelẹ he dọ dọ emi yiwanna Jiwheyẹwhe ko ‘hẹn homẹgble e.’ Mọwẹ, ‘yé hẹn awufiẹsa wá na’ Jiwheyẹwhe! E họnwun dọ mẹdepope ma sọgan gbleawuna agbasa he Jehovah Jiwheyẹwhe tindo. Na ewọ wẹ ganhunupotọ lọ. Enẹwutu, gbọ mí ni pọ́n nuhewutu Jehovah do nọ gblehomẹ eyin mí ma wà nuhe ewọ dọ.

Omẹ awe tintan he Jehovah dá to aigba ji lẹ hẹn awufiẹsa sinsinyẹn wá na ẹn. Yé omẹ awe lẹ yin zizedo Paladisi aigba ji tọn he nọ yin yiylọdọ “jipa Edẹni tọn” lọ mẹ. Mẹnu wẹ omẹ awe ehelẹ yin?— Omẹ tintan wẹ Adam podọ to ojlẹ vude godo Evi. Gbọ mí ni pọ́n nuhe yé wà bo hẹn awufiẹsa wá na Jehovah.

To whenue Jehovah ze yé do jipa lọ mẹ godo, e dọna yé nado penukundo e go. E sọ dọna yé dọ yé sọgan ji ovi lẹ podọ yé sọgan nọpọ́ to jipa lọ mẹ bo ma na kú. Ṣigba, whẹpo Adam po Evi po do ji ovi lẹ, nuhe ylan taun de jọ. Be a yọ́n nuhe jọ lọ ya?— Angẹli de hẹn Evi podọ enẹgodo Adam nado ṣiatẹ sọta Jehovah. Gbọ mí ni pọ́n lehe enẹ jọ do.

Angẹli lọ yí odàn de zan nado dọhona Evi. Ewọ yiwanna nuhe e sè, na odàn lọ dọna ẹn dọ ewọ  na tin “di Jiwheyẹwhe.” Enẹwutu, ewọ wà nuhe odàn lọ dọna ẹn dọ ni wà. Be a yọ́n nulọ ya?

Evi dù atin-sinsẹ́n he Jehovah dọna Adam dọ yé ma dona dù lọ. Whẹpo Jiwheyẹwhe do dá Evi, ewọ ko dọna Adam dọmọ: “Atin he tin to jipa mẹ lẹpo hiẹ sọgan yí ojlo do dù sọn e mẹ. Ṣigba sọn atin yinyọ́n dagbe po oylan po lọ tọn mẹ hiẹ ma na dù: gbeegbe hiẹ dù enẹ tọn mẹ hiẹ na kú dandan.”

Evi yọ́n osẹ́n enẹ. Amọ́, na e zín nukun etọn do atin lọ ji wutu, e mọdọ atin-sinsẹ́n lọ “yọ́n na núdùdù, podọ e sọ yọnwhanpẹ to nukunta . . . e yí sọn sinsẹ́n etọn mẹ, bo dù.” To godo mẹ, e na atin-sinsẹ́n lọ Adam, podọ “ewọ sọ dù.” Na hiẹ tọn, etẹwẹ zọ́n bọ Adam do wàmọ?— Na ewọ wá yiwanna Evi hugan Jehovah wutu wẹ. E de nado hẹn homẹ Evi tọn hùn kakati nido yin Jehovah tọn. Ṣigba, tonusisena Jehovah yin nujọnu hugan tonusisena mẹdevo depope!

Be a flin odàn he dọhona Evi lọ ya? Dile mẹde sọgan deanana ṣiṣavi de nado dọho do, mọ wẹ mẹde yí odàn enẹ zan nado dọho do. Mẹnu wẹ to hodọ gbọn odàn lọ ji?“Odàn hoho lọ, he nọ yin yiylọdọ Lẹgba podọ Satani” wẹ.

Be a yọ́n lehe a sọgan hẹn homẹ Jehovah hùn do ya?— A sọgan wàmọ gbọn tonusisena ẹn to whepoponu dali. Satani dọ dọ emi sọgan hẹn mẹlẹpo nado wà nuhe emi jlo dọ yé ni wà. Enẹwutu, Jehovah dotuhomẹna mí dọmọ: “Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi.” Satani nọ vlẹ Jehovah kò. E dọ dọ emi sọgan gọkọna mẹlẹpo sọn Jiwheyẹwhe sinsẹ̀n mẹ. Enẹwutu, eyin a nọ setonuna Jehovah bo nọ basi sinsẹ̀n hlan ẹn, a na hẹn homẹ etọn hùn! Be a na dovivẹnu vẹkuvẹku nado wàmọ ya?

^ huk. 3 Eyin hiẹ to wehia na yọpọvu de, ohù kleun ehe (—) tin to finẹ taidi nuflinmẹ de na hiẹ nido mitán bo na tuli ovi lọ nado dọho.