Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN AVRIL 2013

 PLỌN OVI TOWE LẸ

Pita po Ananias po Dolalo—Etẹwẹ Mí Sọgan Plọn sọn E Mẹ?

Pita po Ananias po Dolalo—Etẹwẹ Mí Sọgan Plọn sọn E Mẹ?

To paa mẹ, lalodido zẹẹmẹdo nado dọ nude he a yọnẹn dọ e ma yin nugbo. Be hiẹ ko dolalo pọ́n ya? * Mẹhe ko whẹ́n mẹho bo tlẹ yiwanna Jiwheyẹwhe delẹ ko dolalo pọ́n. E yọnbasi dọ hiẹ ni yọ́n mẹde to Biblu mẹ he wàmọ. Yinkọ etọn wẹ Pita, yèdọ dopo to apọsteli 12 Jesu tọn lẹ mẹ. Gbọ mí ni dotoaina otàn he do nuhewutu e do dolalo hia.

To whenue Jesu ko yin wiwle godo, ewọ yin pinplan sọyi owhé yẹwhenọ daho tọn gbè. Ogàn wiawe zánmẹ tọn ko hò wayi. Pita biọ awánu owhé yẹwhenọ daho tọn mẹ bọ mẹsusu ma doayi e go. To hinhọ́n nù, deviyọnnu yẹwhenọ daho lọ tọn he ko na dotẹnmẹ Pita nado biọ owhé lọ gbè penugo todin nado mọ ẹn ganji. Enẹwutu, ewọ dọna ẹn dọmọ: “Hiẹ lọsu ga nọ zọnhẹ Jesu.” Na Pita dibu wutu, e gbẹ́ dọ emi ma nọ zọnhẹ Jesu.

Biblu dọ dọ to nukọn mẹ, “viyọnnu devo mọ ẹn,” bo dọmọ: “Dawe ehe nọ zọnhẹ Jesu.” Whladopo dogọ, Pita gbẹ́. To ojlẹ vude godo, mẹdevo lẹ wá bo dọna Pita dọmọ: “Matin ayihaawe, hiẹ lọsu yin dopo to yé mẹ.”

Obu daho de jẹ Pita ji. Enẹwutu, e dolalo whla atọ̀ntọ dọmọ: “Yẹn ma yọ́n dawe lọ!” To whenẹnu, koklosu de dosé. Jesu yìnnukun pọ́n Pita, bọ Pita flindọ to gànhiho delẹ jẹnukọn, Jesu dọna emi dọmọ: “Whẹpo koklo na dosé, hiẹ na mọ́n mi whla atọ̀n.” Pita jẹflumẹ pete, bo viavi. Nuhe e wà lọ vẹna ẹn taun!

Be onú mọnkọtọn sọgan jọ do gowe ya?— Mí ni dọ dọ hiẹ tin to wehọmẹ bo sè bọ wehọmẹvigbẹ́ towe lẹ to hodọ gando Kunnudetọ Jehovah tọn lẹ go. Mẹdopo dọ dọ, “Yé ma nọ ji tohàn.” Mẹdevo yidogọ dọ, “Yé ma nọ hoavùn do otò yetọn tamẹ.” Mẹdevo sọ dọ dọ, “Yé ma yin Klistiani, na yé ma nọ dù hùnwhẹ Noẹli tọn wutu.” Podọ mẹdopo wá pannukọn we bo dọna we dọ, “Be hiẹ lọsu ma yin dopo to Kunnudetọ Jehovah tọn lẹ mẹ?” Etẹwẹ hiẹ na gblọn?

 Hiẹ dona wleawudai nado na gblọndo he sọgbe whẹpo ninọmẹ mọnkọtọn nido sọawuhia. Pita gboawupo nado wleawudai. Enẹwutu, to whenue e tin to kọgbidinamẹ glọ, e dolalo! Etomọṣo, nuhe e wà lọ vẹna ẹn taun, podọ Jehovah jona ẹn.

To owhe kanweko tintan whenu, devi Jesu tọn devo he dolalo wẹ Ananias. Ṣigba, Jiwheyẹwhe ma jona ewọ po asi etọn Safila po. Ewọ kọngbedopọ hẹ asu etọn nado dolalo. Gbọ mí ni pọ́n nuhewutu Jiwheyẹwhe ma jona Ananias po Safila po.

Azán ao to whenue Jesu lẹkọyi olọn mẹ godo, omẹ 3000 wẹ yí baptẹm to Jelusalẹm. Susu yetọn wẹ wá sọn fidindẹn nado basi Hùnwhẹ Pẹntikọsti tọn, podọ to whenue yé lẹzun devi Jesu tọn godo yé jlo na gbọṣi finẹ na ojlẹ de, nado plọn nususu dogọ gando yise yọyọ yetọn go. Enẹwutu, delẹ to devi Jesu tọn lẹ mẹ yí akuẹ yetọn titi zan nado penukundo yé go.

Ananias po asi etọn po sà aigba yetọn de nado tindo akuẹ he yé na yí do gọalọna mẹhe yí baptẹm yọyọ lọ lẹ. To whenue Ananias hẹn akuẹ lọ wá apọsteli lẹ dè, e dọ dọ akuẹ he yé do sà aigba lọ niyẹn. Ṣigba, lalo wẹ! E ze apadewhe akuẹ lọ tọn whlá! Jiwheyẹwhe hẹn ẹn zun yinyọnẹn na Pita, enẹwutu, Pita dọna Ananias dọmọ: “Hiẹ ma dolalo na gbẹtọ gba, ṣigba na Jiwheyẹwhe.” To afọdopolọji, Ananias họ́jai bo kú! To nudi gànhiho atọ̀n godo, asi etọn biọ họmẹ. Na ewọ ma yọ́n nuhe jọ do asu etọn go wutu, ewọ lọsu dolalo bo họ́jai bosọ kú.

Nuplọnmẹ titengbe nankọ die! Nujọnu wẹ e yin nado nọ dọ nugbo! Na nugbo tọn, mímẹpo wẹ dona plọnnu sọn nujijọ ehe mẹ. Nugbo wẹ dọ mímẹpo wẹ nọ ṣinuwa, titengbe to whenue mí pò to jọja. Be homẹ towe ma hùn dọ Jehovah yiwanna we bo na jona we dile e jona Pita do ya?— Ṣigba, flindọ mí dona nọ dọ nugbo. Podọ eyin e wá jọ gbede bọ mí dolalo, mí dona vẹ̀ Jiwheyẹwhe vẹkuvẹku na ewọ ni jona mí. Matin ayihaawe, nuhe Pita wà niyẹn, podọ ewọ yin jijona. Eyin mí dovivẹnu vẹkuvẹku ma nado vọ́ dolalo, Jiwheyẹwhe na jona mílọsu ga.

^ huk. 3 Eyin hiẹ to wehia na yọpọvu de, ohù kleun ehe (—) tin to finẹ taidi nuflinmẹ de na hiẹ nido mitán bo na tuli ovi lọ nado dọho.