Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN OCTOBRE 2012

 Plọn Ovi Towe Lẹ

Nukunkẹn Hẹnnugble Na Gehazi

Nukunkẹn Hẹnnugble Na Gehazi

BE NUDE ko jlo we taun pọ́n ya? * Eyin mọ wẹ, be a ma gbọnvo na suhugan gbẹtọ lẹ tọn. Ṣigba, be hiẹ dona dolalo nado sọgan mọ nuhe jlo we lọ yí wẹ ya?— Lala, hiẹ ma dona wàmọ. Eyin mẹde wàmọ, be nukunkẹnnọ wẹ ewọ yin. Gbọ mí ni pọ́n lehe nukunkẹn zọ́n bọ dawe de he nọ yin Gehazi hẹn owanyi he Jiwheyẹwhe tindo na ẹn bu do. Ewọ yin devizọnwatọ Eliṣa he yin yẹwhegán Jiwheyẹwhe nugbo lọ, Jehovah tọn.

Eliṣa po Gehazi po nọgbẹ̀ to ojlẹ dindẹn die, yèdọ nudi owhe fọtọ́n whẹpo Visunnu Jiwheyẹwhe tọn, Jesu do yin jiji to aigba ji. Jehovah yí Eliṣa zan nado wà onú jiawu lẹ—yèdọ azọ́njiawu lẹ! Di apajlẹ, Biblu dọho gando dawe nukundeji de to awhànpa Silia tọn mẹ go he to azọ̀n ylankan de jẹ, yèdọ pòzọ̀n. Mẹdepope ma penugo nado hẹnazọ̀ngbọna ẹn, ṣigba Eliṣa wàmọ.

Eliṣa ma nọ kẹalọyi akuẹ to whenue Jiwheyẹwhe yí i zan nado hẹnazọ̀ngbọna gbẹtọ lẹ. Be hiẹ yọ́n nuhewutu wẹ ya?— Na Eliṣa yọnẹn dọ Jehovah dè wẹ azọ́njiawu enẹlẹ wá sọn—e ma yin sọn ewọ lọsu dè. To whenue Naamani jẹgangan, homẹhun in sọmọ bọ e jlo na na sika, fataka po avọ̀ dagbedagbe lẹ po Eliṣa. Eliṣa ma jlo na yí nudepope, ṣigba onú enẹlẹ to jijlo Gehazi taun.

Dile Naamani dedo, Gehazi dómọna ẹn bo ma dọ nudepope na Eliṣa. To whenue Gehazi plá Naamani, be a yọ́n nuhe e dọna ẹn ya?— ‘Eliṣa do mi hlan nado dọna we dọ jonọ awe wá na emi tlolo din. E jlo dọ a ni na emi didiọ  avọ̀ tọn awe na emi nido sọgan yí yé na dawe lọ lẹ.’

Ṣigba, lalo wẹ! Gehazi lọsu wẹ pà ohó enẹ dọ. E dọ mọ na e jlo na tindo avọ̀ he Naamani tẹnpọn nado na Eliṣa lọ lẹ wutu. Na nugbo tọn, Naamani ma yọ́n ehe. Enẹwutu homẹ etọn hùn nado yí onú lọ lẹ na Gehazi. Naamani tlẹ na onú susu hugan nuhe Gehazi biọ lẹ. Be a yọ́n nuhe jọ bọdego ya?

To whenue Gehazi lẹkọwa whégbè, Eliṣa kanse e dọmọ: ‘Fie wẹ a yì.’

Gehazi dọmọ: ‘N’ma yì fide.’ Ṣigba, Jehovah ko hẹn nuhe Gehazi wà zun yinyọnẹn na Eliṣa. Enẹwutu, Eliṣa dọmọ: ‘E ma yin ojlẹ lọ die nado kẹalọyi akuẹ po avọ̀ po!’

Gehazi yí akuẹ po avọ̀ he ma yin etọn lẹ po. Enẹwutu, Jiwheyẹwhe hẹn pòzọ̀n Naamani tọn wá Gehazi ji. Etẹwẹ a lẹndọ mí sọgan plọn sọn enẹ mẹ?— Dopo to nuhe e plọn mí lẹ mẹ wẹ yindọ mí ma dona nọ dọ nuhe ma yin nugbo kavi pàhodọ.

Naegbọn Gehazi do pà ohó he yin lalo de dọ?— Na Gehazi yin nukunkẹnnọ wutu wẹ. E jlo na tindo nuhe ma yin etọn, podọ e dolalo nado sọgan mọ onú enẹlẹ yí. Enẹwutu wẹ e jẹ azọ̀n sinsinyẹn de na pipotọ gbẹzan etọn tọn.

Na nugbo tọn, Gehazi sọ jiya nuhe ylan hugan pòzọ̀n de tọn. Be a yọ́n nulọ ya?— E hẹn nukundagbe Jiwheyẹwhe tọn bu, enẹ wẹ owanyi etọn. Mí ma dona dike enẹ ni jọ do mí go gbede! Kakatimọ, gbọ mí ni nọ do homẹdagbe hia bo nọ wleawufo nado má nuhe mí tindo lẹ hẹ mẹdevo lẹ.

^ huk. 3 Eyin hiẹ to wehia na yọpọvu de, ohù kleun ehe (—) tin to finẹ taidi nuflinmẹ de na hiẹ nido mitán bo na tuli ovi lọ nado dọho.