Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN JUILLET 2012

 Plọn Ovi Towe Lẹ

E Sinyẹnta to Tintan Whenu Ṣigba E Wá Setonu to Godo Mẹ

E Sinyẹnta to Tintan Whenu Ṣigba E Wá Setonu to Godo Mẹ

BE HIẸ ko sinyẹnta pọ́n bo gbẹ́ ma nado setonu ya? * Vlavo hiẹ pọ́n tito-to-whinnu televiziọn ji tọn de he otọ́ towe kavi onọ̀ towe gbẹna we ma nado pọ́n. A sọgan wá lẹnnupọndo nuhe a wà lọ ji bọ e na vẹna we dọ a vẹtoli. Dopo to mẹhe vẹtoli to tintan whenu lẹ mẹ wẹ Naamani. Gbọ mí ni pọ́n lehe yè gọalọna ẹn do ma nado sinyẹnta ba.

Mí ni dọ dọ mí to gbẹnọ to owhe 3 000 linlán die. Awhàngán nukundeji de wẹ Naamani yin to Silia. Ewọ wẹ nọ dọ nuhe awhànfuntọ etọn lẹ dona wà, podọ yé nọ setonuna ẹn. Ṣigba Naamani wá bẹ pòzọ̀n he yin azọ̀nylankan de he nọ hẹn agbasa gble. Azọ̀n enẹ hẹn agbasa etọn gble bo na ko nọ hẹn awufiẹsa wá na ẹn taun.

Asi Naamani tọn tindo deviyọnnu pẹvi de he wá sọn Islaeli. To gbèdopo, viyọnnu lọ dọhona ogán etọn gando Eliṣa go, yèdọ dawe de he nọ nọ̀ otò he mẹ ewọ wá sọn. E dọ dọ dawe lọ sọgan hẹnazọ̀ngbọna Naamani. Tlolo he Naamani sè ehe, e jlo na yì Eliṣa dè. E bẹ nunina susu hẹn bo basi gbejizọnlin po awhànfuntọ etọn lẹ po yì Islaeli. E yì ahọlu Islaeli tọn dè nado dọ nuhe hẹn ẹn wá lọ na ẹn.

Eliṣa sè ohó lọ bo do wẹnsagun de hlan ahọlu lọ nado plan Naamani wá e dè. Whenue Naamani jẹ owhé Eliṣa tọn gbè, Eliṣa do wẹnsagun de hlan nado dọna ẹn dọ ni yì lawu whla ṣinawe to Tọ̀sisa Jọdani mẹ. Eliṣa dọ dọ Naamani na jẹgangan eyin e wàmọ. Nawẹ a  lẹndọ e na ko ṣí na Naamani to whenue e sè ehe?

E gblehomẹ. Enẹwutu, e sinyẹnta bo gbẹ́ ma nado setonuna yẹwhegán Jiwheyẹwhe tọn. E dọna awhànfuntọ etọn lẹ dọmọ: ‘Tọ̀sisa he yọ́n hugan he mẹ n’sọgan lawu te lẹ tin to otò ṣie mẹ.’ Naamani lẹkọ dedo whé. Ṣigba be hiẹ yọ́n nuhe awhànfuntọ etọn lẹ kanse e ya?— ‘Eyin onú daho de wẹ yẹwhegán lọ biọ to asi we, be hiẹ ma na wà ẹ ya? Enẹwutu, naegbọn hiẹ ma na setonu to whenuena e dọna we nado wà nuhe bọawu sọmọ?’

Naamani setonuna nuhe awhànfuntọ etọn lẹ dọ. E ylọn ede do tọ̀sisa lọ mẹ bo gọ̀ tọn whla ṣidopo. To whenue e tọ́n sọn osin lọ mẹ whla ṣinawetọ, e paṣa ẹ dọ azọ̀n he to agbasago na ẹn lọ busẹ. E jẹgangan! To afọdopolọji, e zingbejizọnlin na kilomẹtlu 48 yì owhé Eliṣa tọn gbè nado dopẹna ẹn. E jlo na na onú akuẹgegenu tọn lẹ Eliṣa, ṣigba yẹwhegán lọ gbẹ́.

Enẹwutu, Naamani biọ nude to Eliṣa si. Be a yọ́n nulọ ya?— ‘Gbọ yè ni na mẹmẹsi towe agbàn awe otlò lẹ tọn sọn okọ́ mẹ nado hẹn yì whé.’ Be a yọ́n nuhe e jlo na yí do wà ya?— Naamani dọ dọ emi jlo na sanvọ́ hlan Jiwheyẹwhe to okọ́ he yè hẹnwa sọn Islaeli mẹ ji, yèdọ otò omẹ Jiwheyẹwhe tọn lẹ tọn. Humọ, Naamani dopà ma nado sẹ̀n yẹwhe devo ba adavo Jehovah! E masọ yin tasinyẹntọ, kakatimọ e wleawufo nado setonuna Jiwheyẹwhe nugbo lọ.

Etẹwẹ apajlẹ Naamani tọn plọn we?— Eyin hiẹ tlẹ ko sinyẹnta pọ́n di Naamani, a sọgan diọ. A sọgan kẹalọyi alọgọ bo ma na sinyẹnta ba.

Hia to Biblu Towe Mẹ

^ huk. 3 Eyin hiẹ to wehia na yọpọvu de, ohù kleun ehe (—) tin to finẹ taidi nuflinmẹ de na hiẹ nido mitán bo na tuli ovi lọ nado dọho.