Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) NOVEMBRE 2015

Kanbiọ lẹ sọn Wehiatọ lẹ Dè

Kanbiọ lẹ sọn Wehiatọ lẹ Dè

Kunnudenu tẹwẹ dohia dọ awhànpa he gbawhàn tòdaho Jẹliko hohowhenu tọn lọ ma dosla lẹdo e na ojlẹ dindẹn?

Sọgbe hẹ Jọṣua 6:10-15, 20, awhànpa Islaeli tọn zinzọnlin lẹdo Jẹliko whladopo to gbèdopo na azán ṣidopo. To azán ṣinawetọ gbè, yé zinzọnlin lẹdo tòdaho lọ whla ṣinawe, enẹgodo Jiwheyẹwhe hẹn adó daho Jẹliko tọn lẹ họ́. Ehe zọ́n bọ Islaelivi lẹ penugo nado biọ otò Jẹliko tọn mẹ bo gbawhàn etọn. Be whenuho-kantọ dòkuntọ lẹ mọ nude he dohia dọ awhànpa he gbawhàn Jẹliko tọn ma dosla lẹdo e na ojlẹ dindẹn dile Biblu dọ do ya?

To hohowhenu, awhànpa he tọ́nawhàn tòdaho he yè do adó lẹdo de nọ saba dosla lẹdo e nado gbawhàn etọn. Mahopọnna lehe awhànpa de dosla lẹdo tòdaho de dẹnsọ, eyin e gbawhàn tòdaho lọ tọn, e nọ bẹ adọkun po nutindo tòdaho lọ tọn he pò lẹ po. Ṣigba, whenuho-kantọ dòkuntọ lẹ mọ núdùdù susugege to gbakija Jẹliko tọn mẹ. Gando whẹho ehe go, linlinwe de dọmọ: “Gbọnvona núzinzan okò tọn lẹ, nuhe yin mimọ to gbakija lọ mẹ hugan wẹ jinukun lẹ. . . . Onú ayidego tọn de wẹ enẹ yin to kandai whenuho dòkunkun tọn Palestine tọn mẹ. Vlavo tọ̀zẹ́n dopo kavi awe sọgan yin mimọ, ṣigba jinukun susugege mọnkọtọn ma nọ saba yin mimọ.”—Biblical Archaeology Review.

Sọgbe hẹ kandai Owe-wiwe lẹ tọn lọ, Islaelivi lẹ tindo whẹwhinwhẹ́n dagbe ma nado bẹ jinukun Jẹliko tọn lẹ yì. Jehovah ko degbena yé ma nado wàmọ. (Jọṣ. 6:17, 18) Islaelivi lẹ dosla lẹdo tòdaho lọ to nudi osun mars jẹ avril tọn mẹ, enẹ wẹ to ojlẹ jibẹwawhé tọn godo tlolo to whenue jinukun susu nọ tin-to-aimẹ. (Jọṣ. 3:15-17; 5:10) Nugbo lọ dọ jinukun susu gbẹ́ yin mimọ to Jẹliko dohia dọ Islaelivi lẹ ma dosla lẹdo tòdaho lọ na ojlẹ dindẹn, kẹdẹdile Biblu dọ do.