Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) SEPTEMBRE 2015

Be A Sọgan Dejido Ayihadawhẹnamẹnu Towe Go Ya?

Be A Sọgan Dejido Ayihadawhẹnamẹnu Towe Go Ya?

“Yanwle gbedide ehe tọn wẹ owanyi sọn ahun wiwe de mẹ podọ sọn ayihadawhẹnamẹnu dagbe de mẹ.”—1 TIM. 1:5.

OHÀN LẸ: 57, 48

1, 2. Mẹnu wẹ na mí ayihadawhẹnamẹnu, podọ naegbọn mí sọgan dopẹ́ dọ mí tindo nunina họakuẹ ehe?

JEHOVAH JIWHEYẸWHE dá gbẹtọvi lẹ po mẹdekannujẹ nudide bibasi tọn po, enẹ wẹ yindọ yé vò nado nọ basi nudide to onú awe ṣẹnṣẹn. Jiwheyẹwhe wleawuna onú vonọtaun de he na deanana sunnu po yọnnu tintan lọ po gọna ovivi yetọn lẹ, enẹ wẹ ayihadawhẹnamẹnu, yèdọ nugopipe lọ nado yọ́n dagbe gbọnvona oylan. Eyin mí yí ayihadawhẹnamẹnu mítọn zan ganji, e sọgan gọalọna mí nado nọ wà nudagbe bo dapana nuylankan wiwà. Enẹwutu, ayihadawhẹnamẹnu he mí tindo dohia dọ Jiwheyẹwhe yiwanna mí bosọ jlo dọ gbẹtọvi lẹ ni nọ wà nudagbe bo tin to pọninọ mẹ.

2 To egbehe, gbẹtọ lẹ gbẹ́ tindo ayihadawhẹnamẹnu. (Hia Lomunu lẹ 2:14, 15.) Dile etlẹ yindọ mẹsusu ko dovọ́na nujinọtedo walọ dagbe tọn Biblu tọn lẹ, mẹdelẹ gbẹ́ nọ wà nudagbe bo nọ gbẹwanna nuylankan. Ayihadawhẹnamẹnu nọ gọalọna mẹsusu ma nado wà nuylankan. Yí nukun homẹ tọn do pọ́n lehe ninọmẹ aihọn lọ tọn na te eyin mẹdepope ma tindo ayihadawhẹnamẹnu! E yọnbasi dọ mí na nọ sè linlin ylankan lẹ hugan lehe mí nọ sè do to egbehe. Lehe mí  dopẹ́ dọ Jiwheyẹwhe na ayihadawhẹnamẹnu gbẹtọvi lẹ do sọ!

3. Naegbọn ayihadawhẹnamẹnu mítọn nọ tindo nuyiwadomẹji dagbe do agun Klistiani tọn ji?

3 To vogbingbọn mẹ na gbẹtọ lẹ to paa mẹ, omẹ Jehovah tọn lẹ nọ jlo nado plọn ayihadawhẹnamẹnu yetọn. Yé nọ jlo dọ nuhe ayihadawhẹnamẹnu yetọn nọ whàn yé nado wà lẹ ni sọgbe hẹ nujinọtedo dagbe po oylan po tọn he to Biblu mẹ. Eyin mí plọn ayihadawhẹnamẹnu mítọn ganji, enẹ nọ yinuwado agun lọ ji to aliho dagbe mẹ. Ṣigba, nado plọn ayihadawhẹnamẹnu Klistiani tọn mítọn bo nọ yí i zan bẹ nususu hẹn hugan ayihamẹlinlẹnpọn poun. Biblu dohia dọ ayihadawhẹnamẹnu dagbe tindo kanṣiṣa hẹ yise po owanyi po. Paulu wlan dọmọ: “Yanwle gbedide ehe tọn wẹ owanyi sọn ahun wiwe de mẹ podọ sọn ayihadawhẹnamẹnu dagbe de mẹ podọ sọn yise matin yẹnuwiwa mẹ.” (1 Tim. 1:5) Dile mí to ayihadawhẹnamẹnu mítọn plọn bosọ nọ setonuna ẹn, owanyi mítọn na Jehovah nọ siso deji bọ yise mítọn nọ lodo. Lehe mí nọ yí ayihadawhẹnamẹnu mítọn zan do nọ do gbigbọnọ-yinyin mítọn, ninọmẹ ahun mẹ tọn mítọn, po obá he mẹ mí jlo nado hẹn homẹ Jehovah tọn hùn jẹ po hia. Na nugbo tọn, ogbè homẹ tọn ehe nọ do mẹhe mí yin hia.

4. Nawẹ mí sọgan plọn ayihadawhẹnamẹnu mítọn gbọn?

4 Ṣigba, nawẹ mí sọgan plọn ayihadawhẹnamẹnu mítọn gbọn? Aliho titengbe he mẹ mí sọgan wà ehe te lẹ wẹ nado nọ hodẹ̀ bo nọ plọn Biblu to gbesisọ mẹ, bo nọ lẹnayihamẹpọn do nuhe mí hia lẹ ji, bosọ nọ yí nuhe mí plọn lẹ do yizan mẹ. E họnwun dọ ehe bẹ nususu hẹn hugan nado plọn nugbo po anademẹ Biblu tọn lẹ po poun. Biblu pinplọn mítọn dona gọalọna mí vudevude nado yọ́n Jehovah, pọndohlan etọn, jẹhẹnu etọn lẹ, gọna nuhe ewọ yiwanna po nuhe e gbẹwanna lẹ po. Ayihadawhẹnamẹnu mítọn na nọ yinuwa sọgbe hẹ aliho Jehovah Jiwheyẹwhe tọn. Ehe nọ hẹn homẹ mítọn hùn bọ mí nọ jlo na hodo apajlẹ etọn.

5. Etẹlẹ ji wẹ mí na dọhodo to hosọ ehe mẹ?

5 Todin, mí sọgan kanse míde dọ: Nawẹ ayihadawhẹnamẹnu he yin pinplọn ganji de sọgan gọalọna mí to whenue mí jlo na basi nudide lẹ gbọn? Nawẹ mí sọgan nọ na sisi nudide he yisenọ hatọ de basi sọgbe hẹ ayihadawhẹnamẹnu etọn gbọn? Podọ, nawẹ ayihadawhẹnamẹnu mítọn sọgan whàn mí nado nọ yí zohunhun do wà azọ́n dagbe lẹ gbọn? Po kanbiọ enẹlẹ po to ayiha mẹ, mì gbọ mí ni dọhodo onú atọ̀n delẹ ji, ehe mẹ ayihadawhẹnamẹnu mítọn sọgan gọalọna mí te: (1) nukunpedomẹgo agbasalilo tọn, (2) ayidedai, podọ (3) lizọnyizọn lọ.

NỌ YIN LẸNPỌN DAGBENỌ

6. Whẹho tẹwẹ nọ fọ́n kanbiọ lẹ dote bo nọ biọ dọ nudide lẹ dona yin bibasi?

6 Biblu na tuli mí nado dapana nuylankan wiwà, bo nọ nọ̀ jlẹkaji to walọyizan mítọn mẹ, taidi to dùdù po nùnù po mẹ. (Howh. 23:20; 2 Kọl. 7:1) Eyin mí nọ yí nunọwhinnusẹ́n Biblu tọn lẹ do yizan mẹ, mí na basi hihọ́na agbasalilo mítọn jẹ obá de mẹ, dile etlẹ yindọ mẹhowhe po azọ̀n po gbẹ́ sọgan dotukla mí. To otò delẹ mẹ, aliho nukunpedomẹgo dotowhé tọn po aliho nukunpedomẹgo tọn voovo devo lẹ po wẹ tin-to-aimẹ. Sọn ojlẹ de mẹ jẹ devo mẹ, mẹmẹsunnu po mẹmẹyọnnu po he to nulẹnpọn do aliho nukunpedomẹgo tọn he yé na de ji lẹ nọ kanwehlan alahọ mẹ. Mẹsusu nọ kanse dọ, “Be sinsẹ̀n-basitọ Jehovah tọn de sọgan kẹalọyi aliho nukunpedomẹgo tọn ehe ya?”

7. Nawẹ mí sọgan basi nudide gando aliho nukunpedomẹgo dotowhé tọn lẹ go gbọn?

7 Wekantẹn alahọ tọn kavi mẹho lẹ ma tindo jlọjẹ nado basi nudide aliho nukunpedomẹgo tọn lẹ tọn na Kunnudetọ de, eyin ewọ tlẹ kàn nuhe e dona wà sè yé. (Gal. 6:5) Kakatimọ, yé sọgan dọ̀n ayidonugo etọn wá nuhe Jehovah dọ ji he sọgan gọalọna ẹn nado basi nudide etọn. Di apajlẹ, Klistiani de dona nọ flin gbedide Biblu tọn “nado nọla na . . . ohùn.” (Owalọ 15:29) E họnwun dọ ehe jẹagọdo aliho  nukunpedomẹgo dotowhé tọn lẹ, he nọ bẹ ohùn kavi depope to nugonu titengbe ẹnẹ ohùn tọn lẹ dido do lanmẹ hẹn. Ehe yinyọnẹn sọgan yinuwado ayihadawhẹnamẹnu Klistiani de tọn ji to whenue e to nudide basi nado kẹalọyi nugonu pẹvi pete ohùn tọn lẹ he yin yíyí sọn dopo to nugonu ẹnẹ enẹlẹ mẹ kavi nado gbẹ́ yé dai. * Ṣigba, ayinamẹ Biblu tọn devo tẹwẹ sọgan deanana mí to whenue mí to nulẹnpọn do aliho nukunpedomẹgo tọn de ji?

8. Na nuhe dù nukunpedomẹgo agbasalilo tọn, nawẹ Filippinu lẹ 4:5 sọgan gọalọna mí gbọn?

8 Howhinwhẹn lẹ 14:15 dọmọ: “Wunvinọ yí ohó popo sè: ṣigba omẹ zinzin jlẹ aliho ede tọn pọ́n tlala.” Azọ̀n delẹ sọgan nọma tindo pọngbọ. Enẹwutu, nuyọnẹnnu wẹ e na yin nado tin to aṣeji gando nukunpedomẹgo agbasalilo tọn lẹ go he mẹsusu nọ to pipà dọ e nọ wazọ́n, ṣigba bọ kunnudenu de ma do enẹ hia. Paulu wlan to gbọdo glọ dọmọ: “Mì gbọ lẹnpọn dagbenọ-yinyin mìtọn ni yin yinyọnẹn na gbẹtọ lẹpo.” (Flp. 4:5) Lẹnpọn dagbenọ-yinyin sọ nọ gọalọna mí ma nado nọ yí suhugan whenu mítọn tọn zan na whẹho agbasalilo tọn lẹ bo gbọnmọ dali dovọ́na gbigbọnu lẹ. Eyin whẹho nukunpedomẹgo agbasalilo tọn lẹ nọ duahunmẹna mí zẹjlẹgo, ehe sọgan zọ́n bọ mí na lẹzun ṣejannabinọ. (Flp. 2:4) Gbigbọnu lẹ wẹ yin nujọnu hugan, podọ mí dona nọ yin lẹnpọn dagbenọ na nuhe dù whẹho agbasalilo tọn lẹ.—Hia Filippinu lẹ 1:10.

Be a nọ hẹn mẹdevo lẹ po huhlọn po nado kẹalọyi pọndohlan towe wẹ ya? (Pọ́n hukan 9)

9. Nawẹ Lomunu lẹ 14:13, 19 yọ́n-na-yizan to whenue mí to nudide lẹ basi gando whẹho agbasalilo tọn go gbọn, podọ nawẹ pọninọ mítọn sọgan yin zize do owù mẹ gbọn?

9 Klistiani lẹnpọn dagbenọ de ma nọ hẹn mẹdevo lẹ po huhlọn po nado kẹalọyi pọndohlan etọn. To otò Europe tọn de mẹ, asu po asi po de nọ yí zohunhun do lá na mẹdevo lẹ dọ amasin po núdùdù tangan delẹ po nọ namẹ agbasalilo. Yé diọlinlẹnna mẹmẹsunnu delẹ nado zan amasin enẹlẹ, ṣigba mẹdevo lẹ gbẹ́. To godo mẹ, nulẹ ma wá yì dole yé dọ do, podọ ehe zọ́n bọ mẹsusu gblehomẹ. Asu po asi po lọ tindo jlọjẹ nado de na yede eyin yé na zan amasin de kavi dù núdùdù tangan de, ṣigba be e sọgbe hẹ lẹnpọn dagbe nado ze pọninọ agun lọ tọn do owù mẹ na whẹho agbasalilo tọn wutu ya? To ojlẹ de mẹ, Klistiani lẹ to Lomu hohowhenu tọn tindo linlẹn voovo gando núdùdù delẹ dùdù po gbọjẹzan delẹ yìnyìn po go. Ayinamẹ tẹwẹ Paulu na yé? Gando gbọjẹzan yìnyìn go, e dọmọ: “Omẹ de nọ pọ́n azán de hlan taidi dehe yiaga hugan devo; omẹ devo nọ pọ́n azán de hlan taidi nudopolọ hẹ dehe pò lẹpo; mì gbọ omẹ dopodopo ni tindo nujikudo mlẹnmlẹn to ayiha etọn titi mẹ.” Mì gbọ mí ni tin to aṣeji ma nado nọ hẹn mẹdevo lẹ dahli.—Hia Lomunu lẹ 14:5, 13, 15, 19, 20.

10. Naegbọn mí dona nọ na sisi nudide mẹdetiti tọn he mẹdevo lẹ basi? (Pọ́n yẹdide he tin to bẹjẹeji hosọ ehe tọn.)

10 Eyin yisenọ hatọ de basi nudide sọgbe hẹ ayihadawhẹnamẹnu etọn do whẹho mẹdetiti tọn de ji bọ mí ma mọnukunnujẹemẹ, mí ma dona yawu dawhẹna ẹn kavi gbidikọna ẹn nado  diọlinlẹn. Vlavo ayihadawhẹnamẹnu etọn gbẹ́ yin “madogánnọ” bọ e dona plọn ẹn dogọ kavi ayihadawhẹnamẹnu etọn nọ yawu dọhona ẹn gando whẹho tangan delẹ go. (1 Kọl. 8:11, 12) To alọ devo mẹ, e sọgan yindọ míwlẹ wẹ dona gbeje ayihadawhẹnamẹnu mítọn pọ́n, vlavo e na biọ dọ mí ni yí nunọwhinnusẹ́n Jiwheyẹwhe tọn lẹ do plọn ẹn dogọ. To whẹho agbasalilo tọn po whẹho mọnkọtọn devo lẹ po mẹ, mẹdopodopo wẹ dona basi nudide etọn bosọ kẹalọyi kọdetọn depope he e sọgan hẹnwa.

NỌ DUVIVI AYIDEDAI DAGBE LẸ TỌN

11, 12. To whenue mí to ayidedai lẹ de, ayinamẹ Biblu tọn tẹwẹ mí dona hẹn do ayiha mẹ?

11 Aliho he mẹ Jehovah dá gbẹtọvi lẹ te nọ hẹn ẹn yọnbasi na yé nado duvivi ayidedai lẹ tọn bo mọaleyi sọn yé mẹ. Sọlomọni wlan dọ “whenu nukiko tọn” de tin podọ “whenu wedudu tọn” de tin. (Yẹwh. 3:4) Ṣigba, e ma yin ayidedai lẹpo wẹ nọ hẹn ale po awuvivi po wá; mọdopolọ e ma na yọ́n dọ mí ni nọ deayidai zẹjlẹgo kavi to whelẹponu. Nawẹ ayihadawhẹnamẹnu sọgan gọalọna mí nado duvivi ayidedai dagbe lẹ tọn bosọ mọaleyi sọn yé mẹ gbọn?

12 Owe-wiwe lẹ na avase mí gando walọyizan delẹ go, he yin yiylọdọ “azọ́n agbasalan tọn lẹ.” Azọ́n ehelẹ bẹ “boṣiọ-sinsẹ̀n, afinyọnnuwiwa, okẹ̀n, avùn, awuwhàn, adánjijẹ whẹwhẹ, wiwọ́, kinklan, plọngiglọ, nuvẹun, ahànnu-zẹjlẹgo, paṣadudu, po onú mọnkọ lẹ po” hẹn. Paulu wlan dọ “mẹhe nọ wà onú mọnkọtọn lẹ ma na dugu ahọluduta Jiwheyẹwhe tọn.” (Gal. 5:19-21) Enẹwutu, mí sọgan kanse míde dọ: ‘Be ayihadawhẹnamẹnu ṣie nọ whàn mi nado dapana aihundida lanmẹyiya tọn he bẹ owù, agbàwhinwhlẹn, wanyina otò mẹtọn, kavi danuwiwa hẹn lẹ ya? Be ogbè homẹ tọn ṣie nọ na mi avase to whenue n’yin whiwhlepọn nado pọ́n sinima de he bẹ yẹdide fẹnnuwiwa tọn lẹ hẹn kavi dehe mẹ fẹnnuwiwa, ahànnumu, po afinyọnnuwiwa po nọ yin didohia te taidi nuhe ma ylan lẹ ya?’

13. Nawẹ ayinamẹ he tin to 1 Timoti 4:8 po Howhinwhẹn lẹ 13:20 po mẹ sọgan gọalọna mí gando ayidedai lẹ go gbọn?

13 Biblu sọ bẹ nunọwhinnusẹ́n lẹ hẹn he sọgan gọalọna mí nado plọn ayihadawhẹnamẹnu mítọn gando whẹho ayidedai tọn lẹ go. Dopo dọ dọ “agbasa yiyizan yin alenu na onú vude.” (1 Tim. 4:8) Mẹsusu wẹ wá mọdọ nado nọ daihun lanmẹyiya tọn to gbesisọ mẹ nọ zọ́n bọ yè nọ tindo agbasalilo bosọ nọ hẹn awuya agbasa po ayiha po. Eyin mí jlo na deayidai hẹ mẹdevo lẹ, be mẹdepope poun wẹ yé na yin ya? Howhinwhẹn lẹ 13:20 dọmọ: “Ewọ he to zọnlinzin hẹ nuyọnẹntọ na yọnnuin: ṣigba ogbẹ́ nulunọ lẹ tọn na sudo.” Be ehe ma dohia dọ mí dona nọ yí sọwhiwhe do ṣinyan ayidedai mítọn lẹ sọgbe hẹ ayihadawhẹnamẹnu mítọn he yin pinplọn gbọn Biblu dali ya?

14. Nawẹ jọja de yí nunọwhinnusẹ́n he tin to Lomunu lẹ 14:2-4 mẹ lẹ zan gbọn?

14 Christian po Daniela po yin mẹjitọ he tindo viyọnnu aflanmẹ awe. Christian dọmọ: “To sinsẹ̀n-bibasi whẹndo tọn mítọn whenu, mí dọhodo ayidedai ji. Mí kọngbedopọ dọ ayidedai delẹ sọgbe podọ devo lẹ ylan. Mẹnu wẹ mí sọgan pọnhlan taidi họntọn dagbe? Dopo to viyọnnu mítọn lẹ mẹ dọ dọ to gbọjẹ whenu to wehọmẹ, Kunnudetọ jọja delẹ yinuwa to aliho de mẹ he emi lẹndọ e ma sọgbe. Podọ emi yin whiwhlepọn nado yinuwa to aliho dopolọ mẹ. Mí dohia ẹ dọ dopodopo mítọn wẹ tindo ayihadawhẹnamẹnu, podọ mí dona dike ni nọ deanana mí nado de nuhe mí na wà po mẹhe mí na wà nulọ hẹ po.”—Hia Lomunu lẹ 14:2-4.

Ayihadawhẹnamẹnu towe he yin pinplọn gbọn Biblu dali sọgan gọalọna we nado dapana owù lẹ (Pọ́n hukan 14)

15. To whenue mí to tito basi nado deayidai, nawẹ nulinlẹnpọn do Matiu 6:33 ji sọgan gọalọna mí gbọn?

15 Nujọnu wẹ e sọ yin nado nọ lẹnnupọndo ojlẹ he mẹ mí nọ deayidai te ji. To tito towe mẹ, be a nọ ze nuwiwa yẹwhehọluduta tọn lẹ, taidi opli lẹ, kunnudegbe, po oplọn mẹdetiti tọn po donukọnna ayidedai ya? Kavi a nọ basi tito ayidedai tọn whẹpo do nọ dín whenu na nuwiwa gbigbọmẹ tọn lẹ? Etẹlẹ wẹ tin to  otẹn tintan mẹ na we? Jesu dọmọ: “Enẹwutu, mì zindonukọn nado to ahọluduta lọ po dodowiwa etọn po dín whẹ́, podọ onú devo ehe lẹpo na yin yiyidogọ na mì.” (Mat. 6:33) Be ayihadawhẹnamẹnu towe nọ whàn we nado de nuhe a na zedo otẹn tintan mẹ lẹ sọgbe hẹ ayinamẹ Jesu tọn ehe ya?

NỌ TINDO MAHẸ TO AZỌ́N DAGBE LẸ MẸ

16. Etẹwẹ ayihadawhẹnamẹnu mítọn nọ yiwà do yẹwhehodidọ mítọn ji?

16 Ayihadawhẹnamẹnu dagbe ma nọ whàn mí nado dapana nuylankan lẹ wiwà kẹdẹ gba. E sọ nọ whàn mí nado wà azọ́n dagbe lẹ. Tintan to azọ́n ehelẹ mẹ wẹ lizọnyizọn whédegbè jẹ whédegbè tọn po dotẹnmẹ hundote he mí nọ yizan nado dekunnu mayin aṣa tọn po. Ayihadawhẹnamẹnu Paulu tọn whàn ẹn nado wàmọ. E wlan dọmọ: “Dandannu wẹ e yin na mi. Na taun tọn, dindọn wẹ e na yin na mi eyin yẹn ma lá wẹndagbe lọ!” (1 Kọl. 9:16) Dile mí to apajlẹ etọn hodo, ayihadawhẹnamẹnu mítọn nọ dọhona mí, bo nọ hẹn mí kudeji dọ mí to nudagbe wà. Humọ, to whenue mí to wẹndagbe lọ lá, mí nọ ze apajlẹ dai na mẹhe mí to hodọna lẹ podọ ehe sọgan gọalọna mí nado jẹ ahun yetọn mẹ. Paulu dọmọ: “To Jiwheyẹwhe nukọn, mí nọ do mídelẹ hia gbẹtọ lẹpo to aliho he na dọ̀n ayihadawhẹnamẹnu yetọn dogo de mẹ gbọn nugbo lọ hinhẹn họnwun dali.”—2 Kọl. 4:2.

17. Nawẹ mẹmẹyọnnu jọja de dotoaina ayihadawhẹnamẹnu etọn gbọn?

17 Jacqueline plọnnu gando nutogbẹ̀ lẹ go to wehọmẹ to whenue e tindo owhe 16. E plọn nususu gando nuplọnmẹ nulẹ tin yededenu tọn go. E dọmọ: “Ayihadawhẹnamẹnu ṣie nọ to tuklado mi bọ n’ma sọgan nọ tindo mahẹ to hodọdopọ lẹ mẹ to klasi dile n’ko nọ wà do. N’ma sọgan kẹalọyi nuplọnmẹ nulẹ tin yededenu tọn. N’dọnsẹpọ mẹplọntọ mítọn bo do nuyise ṣie hia ẹ. E paṣa mi dọ e jọmẹ hẹ mi bo na mi dotẹnmẹ nado dọhodopọ hẹ klasi lọ blebu do nudida lẹ ji.” Homẹ Jacqueline tọn hùn taun dọ emi dotoaina ayihadawhẹnamẹnu emitọn he yin pinplọn gbọn Biblu dali bosọ yinuwa sọgbe hẹ ẹ. Be ayihadawhẹnamẹnu hiẹ lọsu tọn nọ whàn we nado wà nuhe sọgbe ya?

18. Naegbọn e do yin nujọnu nado tindo ayihadawhẹnamẹnu dagbe de he go yè sọgan dejido?

18 Lehe e yin alenu nado ze yanwle dai nado hẹn gbẹzan mítọn sọgbe hẹ nujinọtedo po aliho Jehovah tọn lẹ po do sọ! Ayihadawhẹnamẹnu sọgan gọalọna mí nado wà enẹ. Sọwhiwhe yíyí do plọn Ohó Jiwheyẹwhe tọn to gbesisọ mẹ, ayihamẹlinlẹnpọn do nuhe mí plọn lẹ ji, po vivẹnudido nado yí yé do yizan mẹ po nọ gọalọna mí nado plọn ayihadawhẹnamẹnu mítọn. Gbọnmọ dali, ayihadawhẹnamẹnu mítọn na yin nuhọakuẹ de to gbẹzan Klistiani tọn mítọn mẹ!

^ huk. 7 Pọ́n “Kanbiọ lẹ sọn Wehiatọ lẹ Dè” to Atọ̀họ̀-Nuhihọ́ lọ Tọn 15 juin 2004, weda 29-31 mẹ.