Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) JUILLET 2015

Dovivẹnu Nado Hẹn Paladisi Gbigbọmẹ Tọn lọ Pọnte Dogọ

Dovivẹnu Nado Hẹn Paladisi Gbigbọmẹ Tọn lọ Pọnte Dogọ

“Yẹn nasọ hẹn otẹn afọ ṣie tọn zun gigonọ.”—ISA. 60:13.

OHÀN LẸ: 102, 75

1, 2. Etẹwẹ hogbe lọ “tokloafọligbe” sọgan dlẹnalọdo to Owe-wiwe Heblu tọn lẹ mẹ?

JEHOVAH JIWHEYẸWHE ko gbọn gbesisọ dali lá dọmọ: “Olọn wẹ ofìn ṣie, aigba wẹ tokloafọligbe ṣie tọn.” (Isa. 66:1) Ewọ sọ dọ gando “tokloafọligbe” etọn go dọmọ: “Yẹn nasọ hẹn otẹn afọ ṣie tọn zun gigonọ.” (Isa. 60:13) Nawẹ ewọ wà enẹ gbọn? Podọ, etẹwẹ ehe zẹẹmẹdo na mí to whenuena e yindọ “tokloafọligbe” Jiwheyẹwhe tọn wẹ mí to gbẹnọ te?

2 Gbọnvona dọ hogbe lọ “tokloafọligbe” nọ dlẹnalọdo aigba, e sọ nọ yin yiyizan to yẹhiadonu-liho to Owe-wiwe Heblu tọn lẹ mẹ nado basi zẹẹmẹ tẹmpli he Islaelivi lẹ nọ yizan to hohowhenu tọn. (1 Otan. 28:2; Ps. 132:7) Tẹmpli lọ tin to aigba ji, bo nọtena ahọnkan sinsẹ̀n-bibasi nugbo tọn. Enẹ wẹ zọ́n bọ tẹmpli lọ do yọnwhanpẹ taun to nukun Jehovah tọn mẹ, podọ tintin-to-aimẹ etọn lọsu nọ hẹn gigo wá na otẹn afọ Jehovah tọn.

3. Etẹwẹ yin tẹmpli gbigbọmẹ tọn Jehovah tọn he klohugan lọ, podọ whetẹnu wẹ e yin didoai?

3 To egbehe, ahọnkan sinsẹ̀n-bibasi nugbo tọn lọ ma yin tẹmpli yinukundomọ de to aigba ji ba. Ṣigba, tẹmpli gbigbọmẹ tọn de tin, he nọ hẹn gigo wá na Jehovah hugan ohọ̀ devo depope. Awuwledainanu de wẹ ehe yin, he nọ hẹn ẹn yọnbasi na mí nado gbọwhẹ hẹ Jiwheyẹwhe gbọn tito yẹwhenọduta tọn po  avọ́sinsan Jesu Klisti tọn po gblamẹ. Awuwledainanu ehe wá aimẹ to owhe 29 W.M., to whenue Jesu yí baptẹm bo yin amisisadode taidi Yẹwhenọ Daho to tẹmpli gbigbọmẹ tọn Jehovah tọn he klohugan lọ mẹ.—Heb. 9:11, 12.

4, 5. (a) Nawẹ Psalm 99tọ do ojlo ahundopo tọn he sinsẹ̀n-basitọ nugbo Jehovah tọn lẹ tindo hia gbọn? (b) Kanbiọ tẹwẹ mí dona kanse míde?

4 Nado dohia dọ mí yọ́n pinpẹn tẹmpli gbigbọmẹ tọn he yin awuwlena lọ tọn, mí nọ pagigona Jehovah gbọn yinkọ etọn hinhẹn zun yinyọnẹn na mẹdevo lẹ dali, bosọ nọ dopẹna ẹn na ofligọ lọ he e gbọn lẹblanu dali wleawu etọn na mí. Lehe e yin ayajẹnu nado yọnẹn dọ Klistiani nugbo he hugan livi ṣinatọ̀n wẹ to gigopana Jehovah po zohunhun po to egbehe do sọ! To vogbingbọn mẹ na sinsẹ̀nnọ delẹ he nọ lẹndọ to whenue yé na tọ́n sọn aigba ji bo yì olọn mẹ godo wẹ yé na pagigona Jiwheyẹwhe, Kunnudetọ Jehovah tọn lẹpo mọnukunnujẹemẹ dọ to aigba ji fi podọ todin wẹ yé dona pagigona ẹn te.

5 Gbọnmọ dali, mí to apajlẹ devizọnwatọ nugbonọ Jehovah tọn lẹ tọn hodo, mẹhe go Psalm 99:1-3, 5 basi zẹẹmẹ gando. (Hia.) Dile Psalm enẹ dohia do, Mose, Aalọn, po Samuẹli po nọgodona tito sinsẹ̀n-bibasi nugbo tọn lọ to ojlẹ yetọn mẹ to gigọ́ mẹ. (Psalm 99:6, 7) To egbehe, pipotọ mẹmẹsunnu yiamisisadode Jesu tọn lẹ tọn to sinsẹ̀nzọnwa po nugbonọ-yinyin po to awánu aigba ji tọn tẹmpli gbigbọmẹ tọn lọ tọn, whẹpo yé nado wá yì olọn mẹ nado wà sinsẹ̀nzọn hẹ ẹ taidi yẹwhenọ lẹ. Livi susu “lẹngbọ devo lẹ” tọn yí nugbonọ-yinyin do to godonọna yé. (Joh. 10:16) Dile etlẹ yindọ todido voovo wẹ pipli awe ehelẹ tindo, yemẹpo to pọmẹ wẹ nọ sẹ̀n Jehovah to aigba ji fi, yèdọ to tokloafọligbe Jiwheyẹwhe tọn. Ṣigba, dopodopo mítọn na wà dagbe nado kanse ede dọ, ‘Be n’to godonọna tito sinsẹ̀n-bibasi wiwe tọn Jehovah tọn lọ to gigọ́ mẹ ya?’

MẸHE TO SINSẸ̀N TO TẸMPLI GBIGBỌMẸ TỌN JIWHEYẸWHE TỌN MẸ LẸ WÁ YIN YINYỌNẸN

6, 7. Nuhahun tẹwẹ wá aimẹ to Klistiani dowhenu tọn lẹ ṣẹnṣẹn, podọ etẹwẹ jọ to owhe kanweko susu lẹ godo?

6 To whenue agun Klistiani tọn yin didoai godo, e ma pé owhe kanweko bọ atẹṣiṣi he dọdai etọn yin didọ lọ bẹjẹeji. (Owalọ 20:28-30; 2 Tẹs. 2:3, 4) Dile ojlẹ to yìyì, e wá vẹawu nado yọ́n mẹhe to sinsẹ̀nzọnwa nugbonugbo to tẹmpli gbigbọmẹ tọn Jiwheyẹwhe tọn mẹ lẹ. Ṣigba, to nuhe hugan owhe 1 800 godo, ojlẹ sọ na Jehovah nado hẹn nulẹ họnwun gbọn Jesu Klisti, yèdọ Ahọlu he e ṣẹṣẹ zedo ofìn ji lọ dali.

7 To 1919, mẹhe Jehovah kẹalọyi bọ yé to sinsẹ̀nzọnwa to tẹmpli gbigbọmẹ tọn etọn mẹ lẹ yin yinyọnẹn hezeheze. Yé yin kiklọ́we to gbigbọ-liho na sinsẹ̀nzọn yetọn nido yin alọkẹyi dogọ to nukun Jiwheyẹwhe tọn mẹ. (Isa. 4:2, 3; Mal. 3:1-4) Nuhe apọsteli Paulu mọ to numimọ de mẹ to nuhe hugan owhe 1 800 jẹnukọn, wá jẹ hẹndi mọyi ji jẹ obá de mẹ.

8, 9. Adà voovo atọ̀n tẹlẹ wẹ “paladisi” he Paulu mọ to numimọ de mẹ lọ bẹhẹn?

8 Numimọ he Paulu mọ lọ yin kinkandai to 2 Kọlintinu lẹ 12:1-4 mẹ. (Hia.) Nuhe Paulu mọ to numimọ jiawu de mẹ yin yiylọdọ osọhia de. E ma yin nujijọ de he wá aimẹ to azán etọn gbè gba, kakatimọ nujijọ sọgodo tọn de wẹ. “Paladisi” tẹwẹ Paulu mọ to whenue ewọ “yin zize sọyi olọn atọ̀ntọ mẹ”? Paladisi he go Paulu dọho gando lọ na mọ hẹndi voovo atọ̀n, enẹ wẹ paladisi yinukundomọ de, gbigbọmẹ tọn de, po olọn mẹ tọn de po, podọ ehe lẹpo na wá aimẹ to ojlẹ dopolọ mẹ to sọgodo. E sọgan dlẹnalọdo paladisi yinukundomọ, enẹ wẹ aigba ji tọn lọ he na wá to madẹnmẹ. (Luku 23:43) E sọgan sọ dlẹnalọdo paladisi gbigbọmẹ tọn lọ, ehe mí na duvivi etọn to gigọ́ mẹ to aihọn yọyọ lọ mẹ. Podọ, e sọgan dlẹnalọdo “paladisi Jiwheyẹwhe tọn,” yèdọ ninọmẹ dagbedagbe he tin to olọn mẹ to Jehovah dè.—Osọ. 2:7.

 9 Ṣigba, naegbọn Paulu do dọ dọ emi “sè ohó he ma dona yin didọ lẹ he yè ma na dotẹnmẹ mẹdepope nado dọ”? Na ojlẹ ma ko sọ na ẹn nado basi zẹẹmẹ gigọ́ do nujiawu he e mọ to numimọ lọ mẹ lẹ ji wutu wẹ. Ṣigba to egbehe, dotẹnmẹ lọ hundote nado dọhodo dona he omẹ Jiwheyẹwhe tọn lẹ to vivi etọn dù lẹ ji!

10. Naegbọn hogbe lọ lẹ “paladisi gbigbọmẹ tọn” po “tẹmpli gbigbọmẹ tọn” po ma do yin nudopolọ?

10 Hogbe lọ “paladisi gbigbọmẹ tọn” ko lẹzun dopo to hogbe yẹwhehọluduta tọn he mí nọ yizan lẹ mẹ. E nọ dlẹnalọdo ninọmẹ vonọtaun gbigbọmẹ tọn he mẹ mí nọ duvivi onú gbigbọmẹ tọn susu te, ehe nọ hùn dotẹnmẹ dote na mí nado tin to jijọho mẹ hẹ Jiwheyẹwhe podọ hẹ mẹmẹsunnu mítọn lẹ. Ṣigba, mí ma dona wá tadona kọ̀n dọ hogbe lọ “paladisi gbigbọmẹ tọn,” po “tẹmpli gbigbọmẹ tọn” po yin nudopolọ gba. Tẹmpli gbigbọmẹ tọn lọ wẹ yin tito he Jiwheyẹwhe zedai na sinsẹ̀n-bibasi nugbo. Paladisi gbigbọmẹ tọn lọ nọ gọalọ nado yọ́n mẹhe Jiwheyẹwhe kẹalọyi bọ yé to sinsẹ̀n ẹn to tẹmpli gbigbọmẹ tọn etọn mẹ to egbehe lẹ.—Mal. 3:18.

11. Dotẹnmẹ tẹwẹ yin nina mí to egbehe gando paladisi gbigbọmẹ tọn lọ go?

11 Lehe e yin homẹhunnu do sọ nado yọnẹn dọ sọn 1919 gbọ́n, Jehovah ko na dotẹnmẹ gbẹtọvi mapenọ lẹ nado wazọ́n dopọ hẹ ẹ nado wleawuna paladisi gbigbọmẹ tọn lọ to aigba ji, bo hẹn ẹn dote, bosọ hẹn ẹn gblodeji! Be a nọ yí nukun homẹ tọn do mọdọ a to mahẹ tindo to azọ́n dagbedagbe ehe mẹ ya? Be a ma yin whinwhàn nado to azọ́nwa hẹ Jehovah bo to gigopana ‘otẹn afọ etọn tọn’ zọnmii ya?

JEHOVAH TO TITOBASINANU ETỌN HẸN PỌNTE DOGỌ

12. Nujikudo tẹwẹ mí tindo to whenue mí mọdọ Isaia 60:17 ko mọ hẹndi? (Pọ́n yẹdide he tin to bẹjẹeji hosọ ehe tọn.)

12 Vọjlado ayidego tọn de he gando adà aigba ji tọn titobasinanu Jehovah tọn lọ go yin didọdai to Isaia 60:17 mẹ. (Hia.) Mẹhe ṣẹṣẹ wá nugbo lọ mẹ kavi yí nugbo to agọe lẹ ko hiawe gando kunnudenu he dohia dọ vọjlado ehe wá aimẹ lẹ go kavi ko sèhó gandego. Ṣigba, lẹblanulọkẹyi daho de wẹ e yin na mẹmẹsunnu po mẹmẹyọnnu lẹ po he mọ lehe vọjlado ehe wá aimẹ do! Abajọ yé do kudeji dọ Jehovah wẹ to nukunpedo titobasinanu Etọn go bo to anadena ẹn gbọn Ahọlu he e zedo ofìn ji lọ dali! Yé yọnẹn dọ nujikudo yetọn sọgbe, podọ nujikudo dopolọ wẹ mímẹpo tindo. Eyin a nọ dotoaina hodidọ ahundopo tọn yetọn lẹ, enẹ na hẹn yise towe lodo, bo na hẹn jidide he a tindo to Jehovah mẹ jideji. (Pọ́n yẹdide he tin to bẹjẹeji hosọ ehe tọn.)

13. Etẹwẹ yin bibiọ to mí si to Psalm 48:12-14 mẹ?

13 Mahopọnna owhe he mí ko yizan to nugbo lọ mẹ, mí dona nọ dọhona mẹdevo lẹ gando titobasinanu Jehovah tọn go. Nujiawu de wẹ e yin to azán mítọn gbè, dọ paladisi gbigbọmẹ tọn de tin to aihọn ylankan, mawadodo tọn, he mẹ owanyi ma tin te ehe mẹ! Mí dona nọ yí homẹhunhun do dọhona “whẹndo he ja to godo” lẹ gando onú jiawu he titobasinanu Jehovah tọn kavi “Ziọni” basi lẹ go, bosọ nọ dọ nugbo lọ gando paladisi gbigbọmẹ tọn go na yé.—Hia Psalm 48:12-14.

14, 15. Vọjlado tẹlẹ wẹ wá aimẹ to titobasinanu lọ mẹ to owhe 1970 lẹ gblamẹ podọ nawẹ yé hẹn ale wá gbọn?

14 Na owhe susu lẹ, mẹhomẹ he tin to ṣẹnṣẹn mítọn lẹ ko tindo numimọ vọjlado delẹ tọn he yin bibasi nado hẹn adà aigba ji tọn titobasinanu Jehovah tọn pọnte dogọ. Yé nọ flin ojlẹ he mẹ agun lẹ nọ tindo devizọnwatọ agun tọn dopo kakati nido yin pipli mẹho lẹ tọn de, bọ otò lẹ nọ tindo devizọnwatọ alahọ tọn dopo kakati nido yin Wedegbẹ́ Alahọ tọn de, podọ ojlẹ he mẹ azinponọ de nọ deanana Ogbẹ́ Watch Tower tọn kakati nido yin Hagbẹ Anademẹtọ Kunnudetọ Jehovah tọn lẹ tọn he yin yinyọnẹn ganji de. Dile etlẹ yindọ mẹmẹsunnu mẹdezejotọ enẹ lẹpo nọ tindo alọgọtọ nugbonọ lẹ, na taun tọn mẹdopo wẹ nọ tindo azọngban lọ nado basi nudide lẹ to agun lẹ mẹ, to wekantẹn alahọ tọn lẹ mẹ, podọ to tatọ́-tẹnnọ mítọn. To owhe 1970 lẹ  gblamẹ, vọjlado lẹ yin bibasi bọ azọngban nukunpedonugo tọn nọ yin didena pipli mẹho lẹ tọn, kakati nido yin na mẹdopo.

15 Be vọjlado enẹlẹ hẹn ale wá ya? Mọwẹ, podọ e sọgbe dọ ni yinmọ. Etẹwutu? Na vọjlado lọ lẹ yin zize sinai do oyọnẹn he mí tindo dogọ gando apajlẹ he yin zizedai to Owe-wiwe mẹ lẹ go ji. Kakati nido yindọ mẹdopo wẹ na tindo aṣẹpipa nado nọ deanana nulẹ, jẹhẹnu dagbedagbe ‘sunnu he yin ninamẹ di nunina’ gbọn Jehovah dali lẹpo tọn to pọmẹ, nọ hẹn ale wá na titobasinanu lọ.—Efe. 4:8; Howh. 24:6.

Jehovah to anademẹ he gbẹtọ lẹ tindo nuhudo etọn hugan lẹ na yé to filẹpo (Pọ́n hukan 16, 17)

16, 17. Vọjlado he yin bibasi to agọe tẹlẹ wẹ yinuwado jiwe hugan, podọ etẹwutu?

16 Sọ lẹnnupọndo vọjlado agọe tọn lẹ ji, taidi diọdo he yin bibasi gando awusọhia linlinnamẹwe mítọn lẹ tọn, hosọ he yé nọ bẹhẹn lẹ, po aliho he mẹ mí nọ ze yé donukọnnamẹ te lẹ po go. Lehe owe mítọn he yọ́n-na-yizan, bo dọnmẹdogo, bosọ nọ fọnjlodotenamẹ lẹ yiyizan to lizọnyizọn lọ mẹ nọ hẹn homẹ mítọn hùn do sọ! Podọ to whenue mí yí nuyọyọ he azọ́n nuyọnẹn wintinwintin tọn detọ́n lẹ zan, taidi nọtẹn Intẹnẹt tọn jw.org, nado hẹn nugbo lọ gbayipe, mí nọ dohia dọ mí tindo ojlo dopolọ hẹ Jehovah, enẹ wẹ nado na anademẹ gbẹtọ lẹ to filẹpo, yèdọ anademẹ he suhugan yetọn tindo nuhudo etọn hugan.

17 Nudevo he sọ jẹna ayidego wẹ vọjlado nuyọnẹn tọn he yin bibasi nado gọalọna mí nado nọ mọ whenu dogọ na sinsẹ̀n-bibasi whẹndo tọn kavi na oplọn mẹdetiti tọn. Mí sọ yọ́n pinpẹn diọdo he wá aimẹ gando tito-to-whinnu plidopọ lẹ tọn go tọn. To owhe dopodopo mẹ, mí nọ saba dọ dọ plidopọ ehe gbọnvo taun! Podọ, ayihaawe ma tin dọ homẹ mítọn nọ hùn na azọ́nplọnmẹ susu he mí to mimọyi gbọn wehọmẹ yẹwhehọluduta tọn mítọn voovo lẹ dali. E họnwun dọ Jehovah nọ nọgodona vọjlado enẹ lẹpo. Ewọ nọ hẹn titobasinanu etọn po paladisi gbigbọmẹ tọn he  mí to vivi etọn dù todin lọ po pọnte vudevude!

SỌGAN GỌALỌ NADO HẸN PALADISI GBIGBỌMẸ TỌN LỌ PỌNTE DOGỌ

18, 19. Nawẹ mí sọgan gọalọ nado hẹn paladisi gbigbọmẹ tọn lọ pọnte dogọ gbọn?

18 Gbégbò de wẹ e yin dọ Jehovah na mí dotẹnmẹ nado gọalọ to paladisi gbigbọmẹ tọn mítọn hinhẹn pọnte dogọ mẹ. Mí nọ wà ehe gbọn zohunhun yíyí do dọyẹwheho wẹndagbe Ahọluduta lọ tọn po gbẹtọ susu hinhẹn zun devi po dali. Mí nọ hẹn paladisi gbigbọmẹ tọn lọ gblodeji, to whedepopenu he mí gọalọna mẹde nado plọnnu yinukọn bo lẹzun Klistiani he klan ede do wiwe de.—Isa. 26:15; 54:2.

19 Mí sọgan sọ hẹn paladisi gbigbọmẹ tọn mítọn pọnte dogọ, gbọn vivẹnudido nado hẹn jẹhẹnu Klistiani tọn he mí tindo lẹ pọnte dogọ dali. Gbọnmọ dali, mí nọ hẹn paladisi ehe yọnwhanpẹ dogọ, bọ e nọ dọ̀n ayidonugo mẹdevo lẹ tọn. Gbọnvona dọ oyọnẹn Biblu tọn nọ dọ̀n gbẹtọ lẹ, walọ wiwe mítọn po jijọho mítọn po wẹ yin onú tintan he nọ dọ̀n yé wá titobasinanu lọ mẹ, podọ gbọnmọ dali yé nọ wá Jiwheyẹwhe po Klisti po dè.

Hiẹ sọgan gọalọ nado hẹn paladisi gbigbọmẹ tọn lọ gblodeji (Pọ́n hukan 18, 19)

20. To kọndopọ mẹ hẹ Howhinwhẹn lẹ 14:35, etẹwẹ dona yin ojlo mítọn?

20 Homẹ Jehovah po Jesu po tọn na ko hùn taun nado mọdọ paladisi gbigbọmẹ tọn mítọn yin hinhẹn pọnte dogọ to egbehe! Ayajẹ he mí nọ tindo to egbehe dile mí to azọ́nwa nado hẹn paladisi ehe pọnte dogọ, yin dohia ayajẹ he mí na tindo to sọgodo tọn, to whenue mí na to azọ́nwa nado hẹn aigba lọ zun paladisi yinukundomọ de. Mì gbọ mí ni hẹn hogbe Howhinwhẹn lẹ 14:35 tọn do ayiha mẹ, he dọmọ: “Nukundagbe ahọlu tọn tin to devi nuyọnẹntọ dè.” Mì gbọ mí ni nọ yinuwa po nuyọnẹn po to whelẹponu dile mí to vivẹnudo nado hẹn paladisi gbigbọmẹ tọn lọ pọnte dogọ!