Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) JUIN 2015

E Yiwanna Gbẹtọvi Lẹ

E Yiwanna Gbẹtọvi Lẹ

“Homẹhunhun ṣie sọ tin to ovi gbẹtọ tọn lẹ dè.”—HOWH. 8:31.

1, 2. Etẹwẹ yin dopo to kunnudenu he dohia dọ Jesu tindo owanyi sisosiso na gbẹtọvi lẹ mẹ?

VISUNNU plọnji Jiwheyẹwhe tọn wẹ nọ do nuyọnẹn mayọnjlẹ Jehovah tọn hia to pipé mẹ podọ sọn hohowhenu gbọ́n. Ewọ wẹ apajlẹ pipé nuyọnẹn tọn, yèdọ “azọ́nwatọgan” Otọ́ etọn tọn. Mí sọgan yí nukun homẹ tọn do pọ́n lehe e na ko gọ́ na ayajẹ do to whenue Otọ́ etọn “to awú olọn tọn wle” podọ whenue e to “osẹ́n etọn na [dodonu] aigba tọn.” Ṣigba, dile etlẹ yindọ Visunnu plọnji Jiwheyẹwhe tọn yọ́n pinpẹn nudida he ma tindo gbọfufu enẹlẹ tọn, ewọ nọ tindo ‘homẹhunhun taun to ovi gbẹtọ tọn lẹ mẹ.’ (Howh. 8:22-31) Na nugbo tọn, Jesu tindo homẹhunhun to gbẹtọvi lẹ mẹ kavi tindo owanyi sisosiso na yé whẹpo do wá aigba ji.

2 To nukọn mẹ, Viplọnji Jiwheyẹwhe tọn do nugbonọ-yinyin etọn po owanyi he e tindo na Otọ́ etọn po, gọna owanyi sisosiso he e tindo na “ovi gbẹtọ tọn lẹ” hia, to whenue e desọn ojlo mẹ bo “jo onú lẹpo do” bosọ wá nọ aigba ji taidi gbẹtọvi de. E wàmọ nado wleawuna “ofligọ de do ota mẹsusu tọn mẹ.” (Flp. 2:5-8; Mat. 20:28) Owanyi nankọ die e tindo na gbẹtọvi lẹ! To whenue Jesu tin to aigba ji, Jiwheyẹwhe na ẹn huhlọn nado wà azọ́njiawu lẹ, ehe do obá he mẹ ewọ yiwanna gbẹtọvi lẹ jẹ hia. Gbọnmọ dali,  Jesu do onú jiawu he na jọ lẹdo aihọn pé to madẹnmẹ lẹ hia.

3. Etẹwẹ mí na gbadopọnna todin?

3 To whenue Jesu wá aigba ji, ehe hẹn yọnbasi na ẹn nado “lá wẹndagbe ahọluduta Jiwheyẹwhe tọn.” (Luku 4:43) Jesu yọnẹn dọ Ahọluduta ehe wẹ na klan yinkọ Otọ́ etọn tọn do wiwe, bo nasọ hẹn pọngbọ tẹgbẹ tọn wá na nuhahun gbẹtọvi tọn lẹ. Abajọ Jesu wà azọ́njiawu susu to lizọnyizọn etọn whenu he yin kunnudenu dọ onú gbẹtọvi lẹ tọn nọ duahunmẹna ẹn sisosiso. Naegbọn mí dona plọnnu gando ehe go? Na nuhe mí na plọn lẹ na whàn mí nado tindo jidide po todido po na sọgodo. Mì gbọ mí ni gbadopọnna ẹnẹ to azọ́njiawu Jesu tọn lẹ mẹ.

‘HUHLỌN TIN TO EWỌ JI NADO HẸNAZỌ̀NGBỌNAMẸ’

4. Nawẹ Jesu dukosọna pòtọnọ de gbọn?

4 Jesu ko yinukọn taun to lizọnyizọn etọn mẹ, podọ lẹdo he mẹ e ṣẹṣẹ wazọ́n fó te wẹ Galili. To dopo to tòdaho he tin to finẹ lẹ mẹ, Jesu mọ nude he blawu taun. (Malku 1:39, 40) Dawe de tin to nukọn etọn he to azọ̀n ylankan de jẹ, enẹ wẹ pòzọ̀n. Dotozọ́nwatọ Luku do obá he mẹ azọ̀n dawe lọ tọn ko sinyẹn jẹ hia to whenue e dọ dọ e to “pòzọ̀n sinsinyẹn” jẹ. (Luku 5:12) “To whenue e mọ Jesu, [pòtọnọ lọ] ṣinyọ́n nukunmẹ etọn ai bo vẹ̀ ẹ dọmọ: ‘Oklunọ, eyin hiẹ jlo domọ, hiẹ sọgan hẹn mi zun wiwe.’” E họnwun na dawe lọ dọ Jesu tindo huhlọn nado hẹn emi jẹgangan, ṣigba nuhe e ma ko yọnẹn wẹ yindọ, be Jesu tindo ojlo lọ nado wàmọ ya? Nawẹ Jesu na yinuwa gando obiọ ahundopo tọn dawe lọ tọn go gbọn? Etẹwẹ Jesu na ko to linlẹn to whenue e mọ dawe he pòzọ̀n sọgan ko hẹn agbasa gblena lọ? Be Jesu na yinuwa taidi Falesi lẹ, yèdọ mẹhe ma nọ tindo awuvẹmẹ depope na mẹhe to azọ̀n ehe jẹ lẹ wẹ ya? Eyin a to otẹn Jesu tọn mẹ, etẹwẹ hiẹ na ko wà?

5. Etẹwẹ whàn Jesu nado dọ, “Yẹn jlo” to whenue e to azọ̀nhẹngbọna pòtọnọ lọ?

5 E yọnbasi dọ dawe pòtọnọ lọ gboawupo nado dawhá dọ, “Mawé, mawé,” kẹdẹdile Osẹ́n Mose tọn biọ do. Jesu ma dowhẹ ẹ na enẹ tọn wutu. Kakatimọ, e na ayidonugo dawe lọ po nuhudo etọn lẹ po. (Lev. 13:43-46) Mí ma sọgan dọ nuhe Jesu to linlẹn to ayiha mẹ taun, ṣigba mí yọ́n nuhe tin to ahun etọn mẹ. Awuvẹmẹ he Jesu tindo whàn ẹn nado wà nuhe paṣamẹ taun de. E dlẹnalọ etọn, bo doalọ pòtọnọ lọ go, podọ po ogbè he tata bosọ gọ́ na awuvẹmẹ de po, Jesu dọmọ: “Yẹn jlo. Yin hinhẹn zun wiwe.” Enẹgodo, “pòzọ̀n etọn busẹ sọn e go.” (Luku 5:13) Na nugbo tọn, huhlọn Jehovah tọn wẹ gọalọna Jesu Klisti nado wà azọ́njiawu enẹ, podọ nado do obá he mẹ ewọ yiwanna gbẹtọvi lẹ jẹ hia.—Luku 5:17.

6. Etẹwẹ jẹna ayidego gando azọ́njiawu he Jesu wà lẹ go, podọ etẹwẹ enẹ dohia?

6 Huhlọn Jiwheyẹwhe tọn gọalọna Jesu Klisti nado wà azọ́njiawu voovo susu lẹ he hẹn awujimẹ taun. E ma yin pòtọnọ lẹ kẹdẹ wẹ e hẹnazọ̀ngbọna gba, ṣigba e hẹn azọ̀n wunmẹ lẹpo gbọ bosọ hẹn mẹhe tindo oblọ lẹ jẹgangan. Kandai gbọdo lọ dọna mí dọmọ: “Awuji gbẹtọgun lọ dile yé mọ unbọpẹnnọ lẹ to hodọ, sẹkunọ lẹ to zọnlinzin, bọ nukuntọ́nnọ lẹ to numọ.” (Mat. 15:31) To egbehe, doto lẹ nọ yí awutugonu mẹde tọn bo nọ diọ ẹ do awutugonu mẹdevo he to azọ̀njẹ de tọn tẹnmẹ nado hẹn ẹn jẹgangan. Ṣigba, fie oblọ te to agbasa mẹlọ tọn go kavi awutugonu etọn he tindo oblọ wẹ Jesu nọ hẹn jẹgangan! Podọ e nọ hẹnazọ̀ngbọna gbẹtọ lẹ to afọdopolọji, bo tlẹ nọ wàmọ sọn fidindẹn to whedelẹnu. (Joh. 4:46-54) Etẹwẹ apajlẹ he hẹn awujimẹ ehelẹ dohia? Yé dohia dọ, todin he Jesu ko lẹzun Ahọlu to olọn mẹ, ewọ tindo huhlọn po ojlo po nado hẹn pọngbọ tẹgbẹ tọn wá na gbẹtọvi lẹ. Nupinplọn gando aliho he mẹ Jesu yinuwa hẹ gbẹtọ lẹ te go, nọ na  mí jide dọ to aihọn yọyọ lọ mẹ, dọdai Biblu tọn ehe na mọ hẹndi: “Ewọ na tindo lẹblanu to oyànọ po agbátọnọ po ji.” (Ps. 72:13) Na nugbo tọn, to ojlẹ enẹ mẹ, Jesu na yinuwa sọgbe hẹ ojlo ahun etọn mẹ tọn nado gọalọna mẹhe to azọ̀njẹ lẹpo.

“FỌ́N, ZE ADỌZAN TOWE BO ZINZỌNLIN”

7, 8. Nujijọ tẹlẹ wẹ wá aimẹ whẹpo Jesu do dukosọna dawe de to osindò Bẹtsata tọn kọ̀n he to azọ̀njẹ?

7 Osun delẹ ko juwayi sọn whenue Jesu dukosọna dawe pòtọnọ lọ to Galili. Todin, e basi gbejizọnlin sọn Galili yì Jude nado dọyẹwheho bo lá wẹndagbe Ahọluduta Jiwheyẹwhe tọn. Owẹ̀n he Jesu lá po aliho he mẹ e yinuwa te lẹ po na ko yinuwado gbẹtọ fọtọ́n susu lẹ ji. E họnwun dọ ojlo etọn wẹ nado lá wẹndagbe na wamọnọ lẹ, nado lá mẹdekannujẹ hlan mẹmẹglọ lẹ, podọ nado hẹn pọngbọ wá na mẹhe ayiha yetọn yin awublanọ lẹ.—Isa. 61:1, 2; Luku 4:18-21.

8 Enẹgodo, osun Nisan tọn wá. Jesu setonuna gbedide Otọ́ etọn tọn bo basi gbejizọnlin yì Jelusalẹm na hùnwhẹ Juwayi tọn. Gbẹtọ lẹ sù to tòdaho lọ mẹ, na yé wá nado basi hùnwhẹ wiwe ehe wutu. Osindò de to agewaji tẹmpli lọ tọn he nọ yin yiylọdọ Bẹtsata, podọ Jesu dukosọna dawe he to azọ̀njẹ de to finẹ.

9, 10. (a) Etẹwẹ hẹn gbẹtọ lẹ wá osindò Bẹtsata tọn kọ̀n? (b) Etẹwẹ Jesu wà to osindò lọ kọ̀n, podọ etẹwẹ ehe plọn mí? (Pọ́n yẹdide he tin to bẹjẹeji hosọ ehe tọn.)

9 Mẹhe to azọ̀njẹ po mẹhe tindo oblọ lẹ po susu lẹ wẹ pli dopọ to Bẹtsata. Etẹwẹ hẹn yé wá finẹ? Na whẹwhinwhẹ́n he ma yin yinyọnẹn delẹ wutu, yé yise dọ eyin mẹhe to azọ̀njẹ de biọ osindò lọ mẹ to whenue osin lọ wlu, azọ̀n etọn na gbọ to azọ́njiawu-liho. Yí nukun homẹ tọn do pọ́n numọtolanmẹ mẹhe to finẹ lẹ tọn! Ayihaawe ma tin dọ mẹhe tin to finẹ lẹ na ko jẹflumẹ, bo to nuhà kavi tlẹ ko hẹn todido bu. Ṣigba, etẹwẹ hẹn Jesu he yin mẹpipe bo ma tindo oblọ depope wá finẹ? Lẹblanu wẹ whàn Jesu nado dọnsẹpọ dawe de he ko to azọ̀njẹ na ojlẹ dindẹn whẹpo Jesu do wá aigba ji.—Hia Johanu 5:5-9.

10 Be a sọgan yí nukun homẹ tọn do pọ́n lehe nukunmẹ dawe lọ tọn na ko do todido matindo hia do to whenue Jesu kanse e eyin ewọ jlo nado yin hinhẹn jẹgangan ya? E na gblọndo to afọdopolọji. Dawe lọ jlo na jẹgangan ṣigba e ma yọ́n lehe e na wàmọ do, na e ma tindo mẹdepope he na gọalọna ẹn nado biọ osindò lọ mẹ wutu. Enẹgodo, Jesu degbena dawe lọ nado wà nuhe e ma lẹndọ emi sọgan wà gbede, enẹ wẹ nado ze adọzan etọn bo zinzọnlin. E setonuna gbedide Jesu tọn, bo ze adọzan etọn bosọ jẹ zọnlinzin ji. Homẹmiọnnamẹnu nankọ die he do nuhe Jesu na wà to aihọn yọyọ lọ mẹ hia! Mí sọ mọdọ Jesu do awuvẹmẹ hia to azọ́njiawu ehe mẹ. Ewọ lọsu wẹ nọ dín mẹhe tin to nuhudo mẹ lẹ mọ. Apajlẹ Jesu tọn dona whàn mí nado zindonukọn bo nọ dín mẹhe jẹflumẹ na nuylankan he to jijọ to aihọn lọ mẹ lẹ mọ to aigba-denamẹ mítọn lẹ ji.

“MẸNU WẸ DOALỌ AWUGBÓ ṢIE LẸ GO?”

11. Nawẹ Malku 5:25-34 do awuvẹmẹ he Jesu tindo na mẹhe to azọ̀njẹ lẹ hia gbọn?

11 Hia Malku 5:25-34. Winyan ko to yọnnu lọ hù na owhe 12. Azọ̀n he jẹ e te ko yinuwado adà gbẹzan etọn tọn lẹpo ji, kakajẹ sinsẹ̀n-bibasi etọn ji. Mahopọnna dọ “e ko jiya susu sọn nukunpedomẹgo dotozọ́nwatọ voovo lẹ tọn mẹ bo ko zan nutindo etọn lẹpo,” ninọmẹ etọn gbẹ́ to yinylan deji. Ṣigba to gbèdopo, nawe lọ lẹnnupọndo nudevo he e na wà nado mọ pọngbọ ji. E lẹn nado dọnsẹpọ dawe de he nọ yin yiylọdọ Jesu. E biọ gbẹtọgun de mẹ bo doalọ awugbó Jesu tọn go. (Lev. 15:19, 25) Jesu doayi e go dọ huhlọn tọ́n sọn emi go, enẹwutu e kàn mẹhe doalọ emi go sè. Yọnnu lọ he “to budi bo to sisọsisọ, . . .  jẹklo to nukọnna ẹn bosọ dọ nugbo lọ lẹpo na ẹn.” To whenue Jesu mọdọ Otọ́ emitọn, Jehovah ko hẹnazọ̀ngbọna yọnnu lọ, e yinuwa hẹ ẹ po homẹdagbe po bo dọmọ: “Viyọnnu ṣie, yise towe ko hẹn we jẹgangan. Yì to jijọho mẹ, bo tindo agbasalilo sọn azọ̀n sinsinyẹn towe mẹ.”

Jesu dohia hezeheze gbọn azọ́njiawu etọn lẹ dali dọ emi nọ hò mítọn pọ́n podọ nuhahun mítọn lẹ nọ duahunmẹna emi (Pọ́n hukan 11, 12)

12. (a) Po nuhe mí ko gbadopọnna lẹpo po, nawẹ hiẹ sọgan basi zẹẹmẹ lehe Jesu nọ yinuwa hẹ gbẹtọ lẹ do tọn gbọn? (b) Apajlẹ tẹwẹ Jesu zedai na mí?

12 Lehe Jesu yin homẹdagbenọ do sọ! Mí mọdọ onú mẹhe to azọ̀njẹ lẹ tọn nọ duahunmẹna ẹn sisosiso. Satani jlo na hẹn mí nado yise dọ mẹde ma yiwanna mí podọ mí ma yin nuhọakuẹ na mẹde. Ṣigba, Jesu dohia hezeheze gbọn azọ́njiawu etọn lẹ dali dọ emi nọ hò mítọn pọ́n nugbonugbo podọ nuhahun mítọn lẹ nọ duahunmẹna emi. Lehe Ahọlu podọ Yẹwhenọ Daho mítọn yin mẹtọnhopọntọ do sọ! (Heb. 4:15) E sọgan nọma bọawuna mí nado mọnukunnujẹ numọtolanmẹ mẹhe to ahidi hẹ azọ̀n jẹmagbọ lẹ tọn mẹ, titengbe eyin mí ma ko jugbọn ninọmẹ mọnkọtọn mẹ pọ́n. Etomọṣo, mí sọgan hẹn do ayiha mẹ dọ Jesu nọ vẹawu mẹhe to azọ̀njẹ lẹ mahopọnna dọ ewọ lọsu ma jẹazọ̀n pọ́n. Mì gbọ apajlẹ Jesu tọn ni whàn mí nado wà nuhe go mí pé lẹpo nado nọ wà nudopolọ.—1 Pita 3:8.

“JESU KÙN DASIN”

13. Etẹwẹ fọnsọnku Lazalọsi tọn dohia gando gbẹtọ-yinyin Jesu tọn go?

13 Awufiẹsa mẹdevo lẹ tọn nọ yinuwado Jesu ji sisosiso. To whenue họntọn Jesu tọn Lazalọsi kú, lehe mẹdevo lẹ to awubla do biọlanmẹna ẹn taun, bọ e “wẹnhun” bosọ “biọ bẹwlu mẹ.” Ewọ tindo numọtolanmẹ enẹ, mahopọnna dọ e yọnẹn dọ emi na hẹn Lazalọsi gọwá ogbẹ̀ to madẹnmẹ. (Hia Johanu 11:33-36.) Jesu ma kuwinyan nado do numọtolanmẹ sinsinyẹn etọn hia. Mẹhe to finẹ lẹ na ko mọ owanyi sisosiso he Jesu tindo na Lazalọsi po whẹndo etọn po.  Awuvẹmẹ nankọ die Jesu dohia to whenue e yí huhlọn he Jiwheyẹwhe na ẹn zan nado hẹn họntọn etọn gọwá ogbẹ̀!—Joh. 11:43, 44.

14, 15. (a) Etẹwẹ dohia dọ Jehovah tindo ojlo vẹkuvẹku nado de oyà he ji gbẹtọvi lẹ te sẹ̀? (b) Naegbọn hodidọ lọ “yọdò oflin tọn lẹ” do jẹna ayidego?

14 Biblu basi zẹẹmẹ dọ Jesu yin ‘apajlẹ pipé Mẹdatọ lọ tọn.’ (Heb. 1:3) Enẹwutu, gbọn azọ́njiawu he Jesu wà lẹ dali, ewọ dohia dọ emi po Otọ́ emitọn po tindo ojlo nado de awufiẹsa he azọ̀n po okú po nọ hẹnwa sẹ̀. Ojlo yetọn ehe ma nọte do azọ́njiawu fọnsọnku tọn vude he yin kinkandai to Biblu mẹ lẹ kẹdẹ ji gba. Jesu dọmọ: “Ojlẹ lọ ja, to ehe mẹ mẹhe to yọdò oflin tọn lẹ mẹ lẹpo na . . . tọ́njẹgbonu.”—Joh. 5:28, 29.

15 E sọgbe dọ Jesu yí hodidọ lọ “yọdò oflin tọn lẹ” zan, na e gando nugopipe Jiwheyẹwhe tọn nado flinnu go. Jiwheyẹwhe Ganhunupotọ, yèdọ Mẹlọ he dá wẹkẹ gblagada ehe, sọgan flin nulẹpo he gando mẹyiwanna mítọn he ko kú lẹ dopodopo go, kakajẹ nugopipe he yé tindo to jọwamọ-liho po dehe yelọsu wleawuna lẹ po ji. (Isa. 40:26) Podọ, e ma yindọ ewọ sọgan flin yé kẹdẹ wẹ gba, ṣigba ewọ po Visunnu etọn po tindo ojlo lọ nado wàmọ. Fọnsọnku Lazalọsi tọn po mẹdevo lẹ tọn po he kandai yetọn yin bibasi do Biblu mẹ lẹ do nuhe na jọ lẹdo aihọn pé to aihọn yọyọ lọ mẹ hia.

AZỌ́NJIAWU JESU TỌN LẸ PO LEHE YÉ GANDO GOWE DO PO

16. Lẹblanulọkẹyi tẹwẹ Klistiani egbezangbe tọn susu he hẹn tenọgli yetọn go lẹ na tindo?

16 Eyin mí hẹn tenọgli mítọn go taidi Klistiani, mí na mọ dopo to azọ́njiawu daho hugan he ma ko jọ pọ́n lẹ mẹ, enẹ wẹ nado lùn nukunbibia daho lọ tọ́n to azọ́njiawu-liho. Tlolo to awhàn Amagẹdọni tọn godo, azọ́njiawu susu wẹ na yin wiwà, ehe na zọ́n bọ gbẹtọvi lẹ na gọjẹ agbasalilo pipé mẹ. (Isa. 33:24; 35:5, 6; Osọ. 21:4) Yí nukun homẹ tọn do pọ́n gbẹtọ lẹ dile yé na to onú delẹ bẹ dlan do, taidi gànnukun, opò sẹkunọ tọn, kẹkẹ sẹkunọ tọn, nuyizan he nọ gọalọna mẹhe ma nọ sènu ganji lẹ nado sènu, po onú mọnkọtọn devo lẹ po. Gbọnmọ dali, Jehovah na na agbasalilo dagbe mẹhe na lùn Amagẹdọni tọ́n lẹ. Omẹ enẹlẹ na wà azọ́n susu lẹ. Yé na zindonukọn po homẹhunhun po nado hẹn planẹti mítọn blebu, he yin nunina de sọn Jiwheyẹwhe dè zun paladisi.—Ps. 115:16.

17, 18. (a) Naegbọn Jesu do wà azọ́njiawu lẹ? (b) Naegbọn a dona dovivẹnu nado biọ aihọn yọyọ Jiwheyẹwhe tọn mẹ?

17 Azọ́njiawu azọ̀nhẹngbọ tọn he Jesu wà wayi lẹ nọ na tuli “gbẹtọ susugege” lọ to egbehe, bo nọ hẹn todido ayajẹ tọn he yé tindo lodo dogọ, dọ azọ̀n he jẹ yé te lẹpo na gbọ. (Osọ. 7:9) Azọ̀nhẹngbọ enẹlẹ do numọtolanmẹ sisosiso he Visunnu plọnji Jiwheyẹwhe tọn tindo na gbẹtọvi lẹ hia, bosọ do obá he mẹ ewọ yiwanna yé jẹ hia. (Joh. 10:11; 15:12, 13) Awuvẹmẹ Jesu tọn do mẹtọnhopọn he Jehovah nọ tindo na devizọnwatọ etọn lẹ dopodopo hia to aliho he họnwun mẹ.—Joh. 5:19.

18 Gbẹtọvi lẹ to hunwẹn, bo tin to awufiẹsa susu mẹ, bosọ to kúkú. (Lom. 8:22) Mí tindo nuhudo aihọn yọyọ Jiwheyẹwhe tọn, yèdọ fie opagbe azọ̀nhẹngbọ tẹgbẹ tọn he ewọ do lọ na mọ hẹndi te. Malaki 4:2 gọalọna mí nado deji dọ mẹhe yin azọ̀nhẹngbọna lẹ na “to sàjlo di oyìnvu apó mẹ tọn lẹ,” podọ homẹ yetọn na hùn bọ ayajẹ yetọn nasọ gọfla to whenue yé na jẹ mẹdekannu sọn mapenọ-yinyin si. Mì gbọ pinpẹn-nutọn-yinyọnẹn ahundopo tọn mítọn na Jiwheyẹwhe, gọna yise nujọnu tọn he mí tindo to opagbe etọn lẹ mẹ ni whàn mí nado wà nudepope he e biọ to egbehe nado pegan nado biọ aihọn yọyọ lọ mẹ. Homẹmiọnnamẹnu nankọ die nado yọnẹn dọ, azọ́njiawu he Jesu wà to whenue e to aigba ji lẹ yin apajlẹ pọngbọ tẹgbẹ tọn he gbẹtọvi lẹ na duvivi etọn to madẹnmẹ to gandudu Mẹsia tọn etọn glọ lẹ tọn!