Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) JUIN 2015

“Eyin Kingsley Penugo Nado Wàmọ, Be Yẹnlọsu Sọgan Wàmọ!”

“Eyin Kingsley Penugo Nado Wàmọ, Be Yẹnlọsu Sọgan Wàmọ!”

TO WHENUE Kingsley mọdọ mẹde hò abọ́ ji na emi yẹẹ de, e bẹ Biblu hihia etọn jẹeji. Azọ́n tintan he e wà to Wehọmẹ Lizọnyizọn Yẹwhehọluduta tọn mẹ to agun mítọn mẹ niyẹn. E ylọ hogbe dopodopo tọ́n po sọwhiwhe po, bo ma lọ́n dasá nukinkan depope. Amọ́ e ma to Biblu etọn mẹ pọ́n! Be a yọ́n nuhewutu wẹ ya?

Kingsley yin nukuntọ́nnọ bo nọ nọ̀ Sri Lanka. Podọ e ma nọ sènu ganji, bọ e sọ tindo nuhudo kẹkẹ sẹkunọ tọn de nado sẹtẹn yì fidepope. Nawẹ dawe ehe plọnnu gando Jehovah go bo pegan nado ze yinkọ dai to Wehọmẹ Lizọnyizọn Yẹwhehọluduta tọn mẹ gbọn? Mì gbọ ma basi zẹẹmẹ na mì.

To tintan whenue he n’dukosọ hẹ Kingsley, lehe nugbla sinsinyẹn nugbo Biblu tọn to hùhù i do, yinuwado ji e taun. E ko plọn Biblu hẹ Kunnudetọ susu lẹ, bo tindo vọkan owe lọ Oyọnẹn He Nọ Planmẹ Sọyi Ogbẹ̀ Madopodo Mẹ tọn he yin kinkan po wekinkan nukuntọ́nnọ lẹ tọn po, ṣigba e ko zan ẹn kaka bọ e dohó. * N’biọ to e si eyin e jlo nado gọ̀ oplọn etọn bẹ, bọ e yigbe. Amọ́ mí pehẹ avùnnukundiọsọmẹnu awe.

Tintan, gbẹtọ susu wẹ nọ nọ̀ owhé he gbè Kingsley te, yèdọ fie yọnhonọ lẹ po mẹhe tindo oblọ lẹ po nọ nọ̀. Na Kingsley ma nọ sènu ganji bọ zingidi sọ nọ sù to lẹdo lọ mẹ wutu, e nọ biọ dọ ma dọho po gbèzeyiaga po. Na nugbo tọn, mẹlẹpo to owhé  lọ gbè wẹ nọ sè nuhe dọ mí te to oplọn sẹmẹsẹmẹ tọn mítọn whenu!

Awetọ, Kingsley ma sọgan hiawe susu podọ onú yọyọ pẹẹde poun wẹ e sọgan plọn bo hẹn do ayiha mẹ to oplọn dopodopo whenu. Kingsley nọ yí sọwhiwhe do wleawu, na nupinplọn mítọn lẹ nido tindo kọdetọn dagbe dogọ. Whẹpo n’na do wá, e ko nọ hia owe he mí to pinplọn lọ bo nọ vọ́ ẹ hia, bosọ nọ hia wefọ lẹ to Biblu nukuntọ́nnọ lẹ tọn mẹ, enẹgodo e nọ wleawuna gblọndo kanbiọ lẹ tọn do ayiha mẹ. Mọwiwà hẹn kọdetọn dagbe wá. To oplọn mítọn lẹ whenu, e nọ sinai do ozàn ji bo nọ há afọ etọn lẹ, podọ e nọ yí alọ do to aigba hò dile e yí ogbè lélé do to zẹẹmẹ nuhe e ko plọn lẹ tọn basi po homẹhunhun po. To ojlẹ vude godo, mí nọ plọnnu whla awe to osẹ dopo mẹ, bo nọ yí gànhiho awe zan to oplọn dopodopo whenu!

E NỌ YÌ OPLI LẸ BO NỌ TINDO MAHẸ TO YÉ MẸ

Kingsley po Paul po

Kingsley nọ jlo taun nado wá opli lẹ to Plitẹnhọ Ahọluduta tọn mẹ, ṣigba ehe ma nọ bọawuna ẹn. Nado yì opli lẹ to Plitẹnhọ Ahọluduta tọn mẹ bo lẹkọ, e nọ biọ dọ mẹde ni ze e do kẹkẹ sẹkunọ tọn etọn mẹ podọ do mọto mẹ bosọ ze e jẹte. Ṣigba to agun lọ mẹ, mẹsusu nọ diọ yede nado gọalọna ẹn, podọ yé nọ pọ́n ehe hlan taidi lẹblanulọkẹyi de. To opli lẹ whenu, Kingsley nọ ze nuyizan gbèzeyiaga tọn de sẹpọ otó etọn, ehe nọ zọ́n bọ e nọ dotoai po sọwhiwhe po, bo tlẹ nọ na gblọndo!

To whenue Kingsley plọnnu na ojlẹ de godo, e basi nudide nado ze yinkọ dai to Wehọmẹ Lizọnyizọn Yẹwhehọluduta tọn mẹ. Osẹ awe jẹnukọnna azọ́ndenamẹ etọn tintan he yin Biblu hihia, n’kanse e eyin e ko to awuwlena azọ́n etọn. E dọna mi po nujikudo po dọ, “Gbau, Mẹmẹsunnu ṣie, n’ko hia ẹ nudi whla 30.” N’pà ẹ na vivẹnudido etọn lẹ bo biọ to e si dọ ni hia ma sè. E hùn Biblu etọn, bo ze alọvi etọn lẹ do wekinkan nukuntọ́nnọ lẹ tọn lọ ji bosọ jẹ hihia ji. Ṣigba, n’doayi e go dọ e ma to alọvi etọn lẹ ze gbọn wekinkan lọ lẹ ji dile e nọ yin do to paa mẹ. E ko plọn Biblu hihia lọ blebu do tamẹ!

Dasin wayi do mi, bọ n’to pinpọn ẹn suu bo ma gán yí nuhe mọ n’te sè. N’kanse Kingsley lehe e wagbọn do flin wehihia lọ to whenuena e yindọ whla 30 poun wẹ e hia ẹ. E gblọn dọmọ: “Lala, whla 30 wẹ n’nọ hia ẹ to azán dopodopo gbè.” Na osun dopo linlán, Kingsley nọ sinai to ozàn etọn ji, bo nọ hia fie yin didena ẹn lọ, bosọ nọ vọ́ ẹ hia kakajẹ whenue e penugo nado hẹn ẹn do ayiha mẹ.

Enẹgodo azán lọ pé na e nido wà azọ́n lọ to Plitẹnhọ Ahọluduta tọn mẹ. To whenue Kingsley dotana azọ́ndenamẹ etọn, mẹplidopọ lẹ yí ayajẹ daho do jẹ pẹ́hò ji, podọ mẹsusu viavi to whenue yé doayi gbemima nuplọntọ yọyọ ehe tọn go. Yọnnu de he ko doalọtena azọ́nwiwa to wehọmẹ lizọnyizọn tọn mẹ na obu wutu, vọ́ yinkọ zedai whladopo dogọ. Etẹwutu? E dọmọ: “Eyin Kingsley penugo nado wàmọ, be yẹnlọsu sọgan wàmọ!”

To 6 septembre 2008, to whenue Kingsley plọn Biblu na owhe atọ̀n godo, e do klandowiwe etọn hlan Jehovah hia gbọn baptẹm yíyí to osin mẹ dali. Kingsley yin Kunnudetọ nugbonọ de kakajẹ whenue e kú to 13 mai 2014, po nujikudo lọ po dọ to whenue aigba na lẹzun Paladisi, emi na tindo huhlọn podọ agbasalilo dagbe de nado zindonukọn to sinsẹ̀nzọn emitọn mẹ po nugbonọ-yinyin po. (Isa. 35:5, 6)—Dile e yin didọ gbọn Paul McManus dali.

^ huk. 4 Yin zinzinjẹgbonu to 1995; ṣigba e ma nọ yin zinzinjẹgbonu ba.