Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) MAI 2015

Kanbiọ lẹ sọn Wehiatọ lẹ Dè

Kanbiọ lẹ sọn Wehiatọ lẹ Dè

Mẹnu wẹ yin Gọgi Magọgi tọn he yin nùdego to owe Ezekiẹli tọn mẹ?

Na owhe susu lẹ, owe mítọn lẹ ko basi zẹẹmẹ dọ, yinkọ he yin didona Satani Lẹgba to whenue ewọ yin yinyan sọn olọn mẹ godo wẹ Gọgi Magọgi tọn. Zẹẹmẹ ehe sinai do nugbo he owe Osọhia tọn dohia ji, dọ Satani Lẹgba wẹ yin nukọntọ he na deanana mẹgbeyinyan lẹdo aihọn pé de sọta omẹ Jiwheyẹwhe tọn lẹ. (Osọ. 12:1-17) Enẹwutu, mí nọ lẹndọ Gọgi dona ko yin yinkọ dọdai tọn devo he dlẹnalọdo Satani.

Ṣigba, zẹẹmẹ enẹ fọ́n kanbiọ titengbe delẹ dote. Gbọnna? Lẹnnupọndo ehe ji: To whenue Jehovah to hodọ gando ojlẹ he mẹ Gọgi na yin vivasudo te go, e dọmọ: “Yẹn na jo we hlan ohẹ̀ wẹnyantọ hunkọ lẹpo tọn, podọ hlan gbekanlin danji tọn lẹ nado yin dùdù sudo.” (Ezek. 39:4) Enẹgodo, Jehovah yidogọ dọmọ: “E nasọ wá jọ to azán enẹ mẹ, wẹ yẹn na na otẹn de hlan Gọgi na ṣiọdidi to Islaeli mẹ, . . . finẹ wẹ yé nasọ di Gọgi te, po [awhànpa susugege] etọn lẹpo po.” (Ezek. 39:11) Ṣigba, nawẹ ‘ohẹ̀ wẹnyantọ lẹ po gbekanlin danji tọn lẹ po’ sọgan dù nudida gbigbọnọ de gbọn? Nawẹ ‘otẹn ṣiọdidi tọn de’ sọgan yin nina Satani to aigba ji gbọn? Biblu ma dọ dọ Satani na yin dùdù kavi dọ oṣiọ etọn na yin dìdì gba, kakatimọ Biblu dohia hezeheze dọ Satani na yin dindlan do odò mapote mẹ na owhe 1 000.—Osọ. 20:1, 2.

Owe-wiwe lẹ dohia mí dọ to vivọnu owhe 1 000 lọ tọn, Satani na yin tuntundote sọn odò mapote lọ mẹ, podọ “e nasọ tọ́nyi nado klọ akọta lẹ to agosu ẹnẹ aigba tọn lẹ ji, yèdọ Gọgi podọ Magọgi, nado bẹ yé pli dopọ na awhàn.” (Osọ. 20:8) Ṣigba, nawẹ Satani sọgan klọ Gọgi gbọn eyin ewọ lọsu wẹ yin Gọgi? Enẹwutu, yinkọ lọ “Gọgi” ma to alọdlẹndo Satani, vlavo to dọdai Ezekiẹli tọn mẹ kavi to owe Osọhia tọn mẹ gba.

Eyin mọ wẹ, mẹnu wẹ yin Gọgi Magọgi tọn? Nado na gblọndo kanbiọ enẹ tọn, mí dona basi dodinnanu to Owe-wiwe lẹ mẹ nado yọ́n mẹhe na yangbé omẹ Jiwheyẹwhe tọn lẹ tọn. Gbọnvona dọ Biblu dọho gando mẹgbeyinyan ‘Gọgi Magọgi tọn’ go, e sọ dọho gando mẹgbeyinyan “ahọlu agewaji tọn” po mẹgbeyinyan “ahọlu aigba ji tọn lẹ” tọn po go. (Ezek. 38:2, 10-13; Dan. 11:40, 44, 45; Osọ. 17:14; 19:19) Be mẹgbeyinyan ehelẹ gbọnvo na yede wẹ ya? E yọnbasi dọ yé ma gbọnvo. Ayihaawe ma tin dọ mẹgbeyinyan dopolọ wẹ Biblu to alọdlẹndo gbọn yinkọ voovo yiyizan dali. Naegbọn mí sọgan wá tadona enẹ kọ̀n? Na Owe-wiwe lẹ dọna mí dọ akọta aigba ji tọn lẹpo wẹ na doalọ to mẹgbeyinyan godo tọn ehe mẹ, he na dekọtọn do awhàn Amagẹdọni tọn mẹ.—Osọ. 16:14, 16.

 Eyin mí yí wefọ Owe-wiwe tọn ehe lẹpo he dọho gando mẹgbeyinyan godo tọn sọta omẹ Jiwheyẹwhe tọn lẹ go jlẹdo yedelẹ go, e nọ họnwun dọ yinkọ lọ Gọgi Magọgi tọn ma to alọdlẹndo Satani, ṣigba to alọdlẹndo bẹplidopọ akọta lẹ tọn de. Be “ahọlu agewaji tọn” yẹhiadonu tọn enẹ wẹ na deanana bẹplidopọ akọta lẹ tọn ehe ya? Mí ma sọgan dọ po nujikudo po. Ṣigba, e taidi nuhe sọgbe nado lẹndọ mọ wẹ, na Jehovah dọ gando Gọgi go dọmọ: ‘Hiẹ bo nasọ sọn otẹn towe mẹ wá sọn adà agewaji petepete tọn lẹ ji, hiẹ, po akọta susu po to dè we, popo yé he hẹ osọ́ lẹ ji lẹ tọn, ogbẹ́ daho de po awhànfuntọ hlọnhlọnnọ de po.’—Ezek. 38:6, 15.

Mọdopolọ, yẹwhegán Daniẹli he nọgbẹ̀ to ojlẹ dopolọ mẹ hẹ Ezekiẹli, dọ gando ahọlu agewaji tọn lọ go dọmọ: “Linlin lẹ sọn whèzẹtẹn ji podọ sọn agewaji na nọ dotukla ẹ: e nasọ jẹgbonu yì po homẹwlu daho po nado và podọ nado [sukúndona] mẹsusu. Ewọ bo nasọ do gòhọ họ̀nmẹ etọn tọn lẹ to ohù lẹ ṣẹnṣẹn to osó wiwe gigonọ lọ ji; ganṣo ewọ na wá jẹ opodo etọn, bọ mẹde ma nasọ gọalọna ẹn gba.” (Dan. 11:44, 45) E họnwun dọ ehe sọgbe hẹ nuhe owe Ezekiẹli tọn dọ gando lehe Gọgi na yinuwa do go.—Ezek. 38:8-12, 16.

Nujijọ tẹ mẹ wẹ mẹgbeyinyan godo tọn ehe na dekọtọn do? Daniẹli dọna mí dọmọ: “Podọ to ojlẹ enẹ ji wẹ Mikaẹli [Jesu Klisti] na tite [to Amagẹdọni whenu], ahọvi daho lọ he ṣite [sọn 1914 gbọ́n] na ovi omẹ towe lẹ tọn lẹ: ojlẹ tukla tọn de [nukunbibia daho lọ] nasọ tin finẹ, hunkọ he ma ko tin gbede sọn whenue akọta de ko tin yèdọ jẹ ojlẹ dopolọ enẹ mẹ: podọ to ojlẹ enẹ ji omẹ towe lẹ na yin whinwhlẹn, omẹ dopodopo he [yinkọ etọn] na yin mimọ wlan to owe lọ mẹ.” (Dan. 12:1) Nuyiwa Jesu tọn ehe, yèdọ mẹhe yin afọzedaitọ Jiwheyẹwhe tọn, sọ yin zẹẹmẹ basina to Osọhia 19:11-21 mẹ.

Ṣigba, mẹnu wẹ “Gọgi podọ Magọgi” he yin nùdego to Osọhia 20:8 mẹ lọ nọtena? To mẹtẹnpọn godo tọn he na wá aimẹ to vivọnu owhe 1 000 lọ tọn whenu, gbẹtọ he ṣiatẹ sọta Jehovah lẹ na do gbigbọ hlọnhuhu tọn ‘Gọgi Magọgi tọn’ nkọ hia, yèdọ bẹplidopọ akọta lẹ tọn lọ he na yangbé omẹ Jiwheyẹwhe tọn lẹ tọn to vivọnu nukunbibia daho lọ tọn. Podọ kọdetọn dopolọ wẹ to tepọn pipli awe enẹlẹ, enẹ wẹ okú madopodo! (Osọ. 19:20, 21; 20:9) Enẹwutu, e taidi nuhe sọgbe nado ylọ gbẹtọ he na ṣiatẹ to vivọnu Owhe Fọtọ́n lọ tọn lẹpo dọ “Gọgi podọ Magọgi.”

Taidi Ohó Jiwheyẹwhe tọn plọntọ zohunhunnọ lẹ, mí to nukọnpọnhlan po jejejininọ po nado yọ́n mẹhe na wá yinuwa taidi “ahọlu agewaji tọn lọ” to sọgodo he to yakẹ de mẹ. Ṣigba, mahopọnna mẹdepope he sọgan deanana bẹplidopọ akọta lẹ tọn enẹ, mí kudeji dọ onú awe delẹ na jọ: (1) ‘Gọgi Magọgi tọn’ po awhànpa etọn po na ṣíawhàn bo na yin vivasudo mlẹnmlẹn; podọ (2) Ahọlu mítọn, Jesu Klisti he ko to gandu, na whlẹn omẹ Jiwheyẹwhe tọn lẹ gán bo na deanana yé biọ aihọn yọyọ jijọho po hihọ́ nujọnu tọn po tọn de mẹ.—Osọ. 7:14-17.