Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) MARS 2015

“Hiẹ Mọdọ E Yọ́n Nado Yinuwa to Aliho Ehe Mẹ”

“Hiẹ Mọdọ E Yọ́n Nado Yinuwa to Aliho Ehe Mẹ”

“Hiẹ ko yí sọwhiwhe do whlá onú ehelẹ do nuyọnẹntọ lẹ po weyọnẹntọ lẹ po bo ko de yé hia ovivu lẹ.”—LUKU 10:21.

1. Etẹwẹ whàn Jesu nado “gọ́ na ayajẹ susu gbọn gbigbọ wiwe gblamẹ”? (Pọ́n yẹdide he tin to bẹjẹeji hosọ ehe tọn.)

BE A sọgan yí nukun homẹ tọn do pọ́n Jesu Klisti to whenue e “gọ́ na ayajẹ susu gbọn gbigbọ wiwe gblamẹ” ya? Vlavo a sọgan mọdọ e to nuko bọ nukunmẹ etọn sọ gọ́ na ayajẹ susu. Etẹwẹ wẹ na ko whàn ẹn sọmọ? E ṣẹṣẹ do devi etọn 70 lẹ hlan nado yì lá wẹndagbe Ahọluduta Jiwheyẹwhe tọn. Lehe yé na hẹn azọ́ndenamẹ yetọn di do to ahunmẹduna ẹn sisosiso. Yé na pehẹ mẹhe gbẹwanna wẹndagbe lọ to aliho sinsinyẹn mẹ lẹ, taidi wekantọ po Falesi lẹ po he sewé taun bosọ yọnnuin. Yé nọ hẹn gbẹtọ lẹ nado pọ́n Jesu hlan taidi whlẹpatọ de poun, podọ nado nọ pọ́n devi etọn lẹ taidi mẹhe “ma sewé bosọ yin omẹ tata lẹ.” (Owalọ 4:13; Malku 6:3) Etomọṣo, devi lẹ gọ́ na ayajẹ to whenue yé lẹkọ sọn azọ́n wẹndagbe lọ lilá tọn mẹ. Yé dọyẹwheho mahopọnna nukundiọsọmẹ, etlẹ yin dehe yé pehẹ sọn aovi lẹ dè! Ṣigba, etẹwẹ zọ́n bọ yé do tindo ayajẹ po adọgbigbo po?—Hia Luku 10:1, 17-21.

2. (a) Linlẹn tẹ mẹ wẹ devi Jesu tọn lẹ taidi ovivu lẹ te? (b) Etẹwẹ gọalọna hodotọ Klisti tọn lẹ nado mọnukunnujẹ nugbo họakuẹ Owe-wiwe tọn lẹ mẹ?

2 Jesu dọna Jehovah dọmọ: “Yẹn pà we to gbangba, hiẹ Otọ́, Oklunọ olọn po aigba po tọn, na hiẹ ko whlá onú ehelẹ do nuyọnẹntọ lẹ po weyọnẹntọ lẹ po bo ko de yé hia ovivu lẹ. Mọwẹ, Otọ́ E, na  hiẹ mọdọ e yọ́n nado yinuwa to aliho ehe mẹ.” (Mat. 11:25, 26) Na nugbo tọn, Jesu ma to didọ dọ devi emitọn lẹ yin ovivu paa lẹ gba. Kakatimọ, e yọnẹn dọ yé taidi ovivu lẹ, eyin yè yí yé jlẹdo nuyọnẹntọ po wesetọ daho ojlẹ lọ mẹ tọn he yin nuyọnẹntọ to nukun yedetiti tọn mẹ lẹ po go. Abajọ, Jesu plọn hodotọ etọn lẹ nado taidi ovivu lẹ he nọ whiwhẹ yede bo nọ kẹalọyi nuplọnmẹ. (Mat. 18:1-4) Nawẹ yé mọaleyi sọn whiwhẹnọ-yinyin yetọn mẹ gbọn? Jehovah gọalọna yé gbọn gbigbọ wiwe etọn gblamẹ nado mọnukunnujẹ nugbo họakuẹ Owe-wiwe tọn lẹ mẹ, to whenue nuyọnẹntọ po wesetọ daho he nọ gbẹwanna yé lẹ po yin zizedo wunvi mẹ gbọn Satani po goyiyi yetọn titi po dali.

3. Etẹwẹ mí na gbadopọnna to hosọ ehe mẹ?

3 Ayihaawe ma tin dọ enẹ wẹ zọ́n bọ Jesu do gọ́ na ayajẹ! Homẹ etọn hùn nado mọ lehe Jehovah do nugbo gbigbọmẹ tọn he siso lẹ hia mẹdepope he yin whiwhẹnọ lẹ do, mahopọnna obá he mẹ mẹlọ sewé kavi yọnnuin jẹ. Homẹ etọn sọ hùn dọ Otọ́ etọn mọdọ e yọ́n nado plọnmẹ to aliho ehe mẹ. Be Jehovah ko diọ wẹ ya, podọ nawẹ ewọ dohia dọ emi gbẹ́ mọdọ e yọ́n nado plọnmẹ to aliho ehe mẹ gbọn? Dile mí na to dogbapọnna kanbiọ ehe, gblọndo lọ na hẹn homẹ mítọn hùn dile e hẹn Jesu tọn hùn do.

ZẸẸMẸ NUGBO SISOSISO LẸ TỌN YIN HINHẸN BỌAWU NA MẸLẸPO

4. Aliho tẹlẹ mẹ wẹ Atọ̀họ̀-Nuhihọ́ lọ Tọn he bọawu yin alọgọ daho de te?

4 To owhe agọe tọn lẹ mẹ, anademẹ gbigbọmẹ tọn he titobasinanu Jehovah tọn wleawuna lẹ dohia dọ e ko dovivẹnu nado hẹn nuplọnmẹ etọn lẹ bọawu bo hẹn yé họnwun dogọ. Mì gbọ mí ni gbadopọnna apajlẹ atọ̀n delẹ. Tintan, zinjẹgbonu Atọ̀họ̀-Nuhihọ́ lọ Tọn he bọawu yin awuwlena. * Na nugbo tọn, zinjẹgbonu ehe yin alọgọ daho de na mẹhe ma segbè ganji kavi mẹhe wehihia nọ vẹawuna lẹ. Tatọ́ whẹndo tọn lẹ doayi e go dọ ovi yetọn lẹ nọ mọnukunnujẹ oplọn zinjẹgbonu ehe tọn mẹ todin, yèdọ asisa tangan he gblamẹ mí nọ mọ núdùdù gbigbọmẹ tọn yí te. Mẹsusu wẹ ko kanwe nado do pinpẹn-nutọn-yinyọnẹn ahundopo tọn yetọn hia. Mẹmẹyọnnu de wlan dọ emi ma nọ na gblọndo to oplọn Atọ̀họ̀-Nuhihọ́ lọ Tọn whenu ba. E dọmọ: “Obu nọ di mi taun.” Amọ́ e masọ yinmọ todin ba! To whenue e zan zinjẹgbonu ehe godo, e wlan dọmọ: “Todin n’nọ penugo nado na gblọndo hugan whladopo, podọ obu masọ nọ di mi ba! N’dopẹna Jehovah podọ na afanumẹ lọ.”

5. Ale tẹlẹ wẹ mí na mọyi sọn zinjẹgbonu Les Saintes Écritures—Traduction du monde nouveau he yin vivọjlado lọ mẹ?

5 Awetọ, Biblu Les Saintes Écritures—Traduction du monde nouveau Glẹnsigbe tọn yin didetọn to opli whemẹwhemẹ tọn he yin bibasi to 5 octobre 2013 whenu. * Todin, hogbe he wefọ susu bẹhẹn yin didepo, ṣogan zẹẹmẹ yetọn ma diọ bo tlẹ sọ họnwun dogọ. Di apajlẹ, Job 10:1 sin hogbe lẹ yin didepo sọn 27 jẹ 19; Howhinwhẹn lẹ 8:6 sin hogbe lẹ yin didepo sọn 20 jẹ 13. Etomọṣo, wefọ ehelẹ gbẹ́ họnwun to Biblu yọyọ lọ mẹ. Na nugbo tọn, mẹmẹsunnu mẹyiamisisadode he ko to Jehovah sẹ̀n po nugbonọ-yinyin po sọn owhe susu die de dọmọ: “Tlolo he n’hia owe Job tọn to Biblu yọyọ lọ mẹ, e taidi dọ whla tintan die n’mọnukunnujẹemẹ!” Mẹsusu wẹ ko sọ dọ nudopolọ.

6. Etẹwẹ yin numọtolanmẹ towe gando vọjlado he yin bibasi do nukunnumọjẹnumẹ he mí tindo do Matiu 24:45-47 ji go?

6 Atọ̀ntọ, lẹnnupọndo vọjlado he yin bibasi to agọe gando nukunnumọjẹnumẹ mítọn go lẹ ji. Di apajlẹ, homẹ mítọn hùn taun to whenue nukunnumọjẹnumẹ mítọn gando “afanumẹ nugbonọ podọ nuyọnẹntọ lọ”  go yin vivọjlado to Atọ̀họ̀-Nuhihọ́ lọ Tọn 15 juillet, 2013 tọn mẹ. (Mat. 24:45-47) Mí mọnukunnujẹemẹ dọ afanumẹ nugbonọ lọ wẹ yin Hagbẹ Anademẹtọ lọ, bọ “devizọnwatọ whégbè tọn” lẹ wẹ mẹhe nọ mọ núdùdù gbigbọmẹ tọn yí lẹpo, vlavo mẹlọ yin mẹyiamisisadode kavi “lẹngbọ devo.” (Joh. 10:16) Lehe e yin homẹhunnu nado plọn nugbo ehelẹ bosọ do yé hia mẹdevo lẹ do sọ! Aliho devo tẹlẹ mẹ wẹ Jehovah dohia te dọ emi mọdọ e yọ́n nado plọnmẹ to aliho he họnwun bosọ bọawu mẹ?

ZẸẸMẸ KANDAI BIBLU TỌN LẸ TỌN YIN HINHẸN BỌAWU BOSỌ HỌNWUN DOGỌ

7, 8. Apajlẹ tẹlẹ wẹ dohia dọ kandai Biblu tọn delẹ nọ nọtena nuhe na wá jọ to nukọn mẹ lẹ?

7 Eyin a ko to Jehovah sẹ̀n sọn owhe susu die, a sọgan ko doayi e go dọ aliho he mẹ owe mítọn lẹ nọ basi zẹẹmẹ kandai Biblu tọn lẹ tọn te nọ diọ sọn ojlẹ de mẹ jẹ devo mẹ. Gbọnna? To ojlẹ de mẹ wayi, owe mítọn lẹ nọ saba basi zẹẹmẹ dọ kandai Owe-wiwe lẹ tọn de nọtena onú vonọtaun de he na wá jọ to nukọn mẹ. Be whẹwhinwhẹ́n nujọnu tọn lẹ tin nado nọ basi zẹẹmẹ kandai Owe-wiwe lẹ tọn to aliho ehe mẹ ya? Mọwẹ. Di apajlẹ, Jesu dọho gando “ohia Jona yẹwhegán lọ tọn” go. (Hia Matiu 12:39, 40.) Jesu basi zẹẹmẹ dọ ojlẹ he Jona yizan to ohò whèvi tọn mẹ, yèdọ fie sọgan ko yin yọdò Jona tọn eyin Jehovah ma whlẹn ẹn gán dai, nọtena ojlẹ he Jesu lọsu na yizan to yọdò mẹ.

8 Biblu bẹ kandai gbọdo devo lẹ hẹn he nọtena nuhe na wá jọ to nukọn mẹ lẹ. Apọsteli Paulu basi zẹẹmẹ kandai mọnkọtọn lẹ susu tọn. Di apajlẹ, e basi zẹẹmẹ dọ haṣinṣan he Ablaham tindo hẹ Hagali podọ hẹ Sala nọtena haṣinṣan he Jehovah tindo hẹ akọta Islaeli tọn podọ hẹ adà olọn mẹ tọn titobasinanu Jiwheyẹwhe tọn. (Gal. 4:22-26) Mọdopolọ, gòhọtúntún po tẹmpli lọ po, Azán Ovẹsè tọn, yẹwhenọ daho lọ, po adà osẹ́n Mose tọn devo lẹ po yin “oyẹ̀ onú dagbe he ja lẹ tọn.” (Heb. 9:23-25; 10:1) Eyin mí plọnnu gando kandai mọnkọtọn lẹ go, enẹ nọ hẹn awuji mí bo nọ hẹn yise mítọn lodo dogọ. Ṣigba, be mí sọgan wá tadona kọ̀n todin dọ, gbẹtọ, nujijọ, gọna nuhe yin nùdego to Biblu mẹ lẹpo wẹ nọtena mẹde kavi nude ya?

9. To dai, nawẹ kandai Biblu tọn he gando Naboti go yin zẹẹmẹ basina gbọn?

9 To hohowhenu, owe mítọn lẹ nọ saba basi zẹẹmẹ dọ mẹde, nujijọ, gọna nude to kandai Biblu tọn delẹ mẹ nọtena mẹdevo de kavi nude. Di apajlẹ, lẹnnupọndo kandai Naboti tọn ji. Ahọsi Jezebẹli kàn ayiha na yè nido dawhẹ agọ̀ na Naboti bo hù i, na vẹngle etọn nido lẹzun Ahabi asu etọn tọn. (1 Ahọ. 21:1-16) To 1932, Atọ̀họ̀-Nuhihọ́ lọ tọn dohia dọ kandai enẹ yin yẹhiadonu nuhe na wá jọ to nukọn mẹ tọn. Podọ e dọ dọ Ahabi po Jezebẹli po nọtena Satani po titobasinanu etọn po; Naboti nọtena Jesu; podọ okú Naboti tọn nọtena okú Jesu tọn. Ṣigba to owhe susu godo, owe lọ “Que ton nom soit sanctifié” he yin zinzinjẹgbonu to 1961 dohia dọ, Naboti nọtena mẹyiamisisadode lẹ, podọ Jezebẹli nọtena sinsẹ̀n Mẹylọhodotọklisti tọn. Enẹwutu, homẹkẹn he Jezebẹli do Naboti nọtena homẹkẹn he mẹyiamisisadode lẹ na pehẹ to azán godo tọn lẹ mẹ. Na owhe susu, omẹ Jiwheyẹwhe tọn lẹ mọdọ aliho he mẹ kandai Biblu tọn ehe yin zẹẹmẹ basina te hẹn yise yetọn lodo. To whelọnu lo, naegbọn zẹẹmẹ lẹ masọ nọ yin bibasi to aliho enẹ mẹ ba?

10. (a) Nawẹ nuyọnẹn gọalọna afanumẹ lọ nado tin to aṣeji dogọ to whenue e to zẹẹmẹ basi do kandai Biblu tọn delẹ ji gbọn? (b) Etẹlẹ wẹ owe mítọn lẹ nọ bẹhẹn to egbehe?

10 Dile mí sọgan ko donukun etọn do, Jehovah gọalọna “afanumẹ nugbonọ podọ nuyọnẹntọ lọ” vudevude to owhe lẹ gblamẹ nado lẹzun nuyọnẹntọ dogọ. Nuyọnẹn gọalọna yé nado tin to aṣeji dogọ, ma nado nọ basi zẹẹmẹ dọ kandai Biblu tọn de nọtena nuhe na wá jọ to nukọn mẹ de, adavo eyin  whẹwhinwhẹ́n he họnwun bo sinai do Owe-wiwe lẹ ji tin nado wàmọ. Humọ, e ko yin ayidego dọ zẹẹmẹ he yin bibasi do kandai Biblu tọn delẹ ji nado dohia dọ yé nọtena onú vonọtaun he na wá jọ to nukọn mẹ lẹ nọ vẹawu taun na mẹsusu nado mọnukunnujẹemẹ. Nudọnamẹ he nuplọnmẹ mọnkọtọn lẹ nọ bẹhẹn, yèdọ mẹhe mẹde nọtena po nuhewutu e do yinmọ po, sọgan vẹawu nado mọnukunnujẹemẹ, nado flin, podọ nado yí do yizan mẹ. Nuhe sọ ylan hugan wẹ yindọ, eyin nupinplọn mítọn nọ yin zize sinai do nuhe kandai Biblu tọn lẹ nọtena ji, enẹ sọgan zọ́n bọ nuplọnmẹ yọ́n-na-yizan he yé bẹhẹn lẹ ma na họnwun na mí. Enẹwutu to egbehe, mí mọdọ linlinnamẹwe mítọn lẹ nọ bẹ nuplọnmẹ he bọawu, bo yọ́n-na-yizan lẹ hẹn sinai do yise, akọndonanu, mẹdezejo na Jiwheyẹwhe, gọna jẹhẹnu titengbe devo lẹ he mí nọ plọn sọn kandai Biblu tọn mẹ lẹ ji. *

Mí plọn onú titengbe de sọn apajlẹ Naboti tọn mẹ (Pọ́n hukan 11)

11. (a) Nawẹ mí mọnukunnujẹ kandai he gando Naboti go mẹ gbọn todin, podọ naegbọn apajlẹ etọn do yin nuplọnmẹ dagbe de na mímẹpo? (b) To owhe agọe tọn lẹ mẹ, naegbọn owe mítọn lẹ ma nọ basi zẹẹmẹ dọ kandai Biblu tọn de nọtena onú vonọtaun de sọmọ ba? (Pọ́n “Kanbiọ lẹ sọn Wehiatọ lẹ Dè” to zinjẹgbonu ehe mẹ.)

11 Todin, nawẹ mí mọnukunnujẹ kandai he gando Naboti go mẹ gbọn? Mí mọdọ e họnwun bosọ bọawu dogọ. E ma yindọ dawe dodonọ enẹ nọtena Jesu kavi mẹyiamisisadode lẹ wẹ zọ́n bọ e do kú gba, ṣigba na e hẹn tenọgli etọn go wutu. E tẹdo Osẹ́n Jehovah tọn go mahopọnna homẹkẹn sinsinyẹn he e pehẹ sọn ahọlu lọ po asi etọn po dè. (Sọh. 36:7; 1 Ahọ. 21:3) Enẹwutu, nuplọnmẹ dagbe de wẹ apajlẹ etọn yin na mí, na depope to mí mẹ wẹ sọgan pehẹ homẹkẹn mọnkọtọn. (Hia 2 Timoti 3:12.) Gbẹtọ lẹpo wẹ sọgan mọnukunnujẹ nuplọnmẹ he nọ hẹn yise lodo enẹ mẹ po awubibọ po, bo flin in, bosọ yí i do yizan mẹ.

12. (a) Tadona tẹ kọ̀n wẹ mí ma dona wá na nuhe dù kandai Biblu tọn lẹ? (b) Etẹwẹ nọ gọalọna mí nado mọ zẹẹmẹ he họnwun lẹ yí etlẹ yin do nuplọnmẹ he siso lẹ ji? (Pọ́n nudọnamẹ odò tọn.)

12 Be mí dona wá tadona kọ̀n dọ nuplọnmẹ yọ́n-na-yizan lẹ kẹdẹ wẹ kandai Biblu tọn lẹ bẹhẹn bo masọ tindo zẹẹmẹ devo wẹ ya? Lala. To egbehe, owe mítọn lẹ nọ saba plọnmẹ lehe kandai Biblu tọn de flinnu mí  gando devo go do kavi lehe yé tindo kanṣiṣa do. Yé ma nọ basi zẹẹmẹ kandai Biblu tọn lẹ tọn nado dohia dọ yé nọtena onú vonọtaun he na wá jọ to nukọn mẹ lẹ sọmọ ba. Di apajlẹ, mí sọgan dọ dọ tenọgligo hinhẹn Naboti tọn to homẹkẹn glọ kakajẹ okú flinnu mí gando tenọgli Klisti po mẹyiamisisadode etọn lẹ po tọn go. Mọdopolọ, e sọ flinnu mí gando tenọgli mẹsusu he yin “lẹngbọ devo lẹ” tọn go. Aliho mẹpinplọn tọn he họnwun bosọ bọawu ehe dohia dọ Jiwheyẹwhe wẹ to mí plọn. *

ZẸẸMẸ HE BỌAWU DO APAJLẸ JESU TỌN LẸ JI

13. Apajlẹ tẹlẹ wẹ dohia dọ mí nọ basi zẹẹmẹ apajlẹ Jesu tọn lẹ tọn to aliho he bọawu bosọ họnwun mẹ?

13 Jesu Klisti wẹ Mẹplọntọ daho hugan lọ he nọ aigba ji. Dopo to aliho mẹpinplọn tọn he e yiwanna lẹ mẹ wẹ apajlẹ lẹ yiyizan. (Mat. 13:34) Apajlẹ lẹ nọ hẹn hodidọ de họnwun, ehe nọ yinuwado ayiha po ahun mítọn po ji. Be owe mítọn lẹ ko basi zẹẹmẹ apajlẹ Jesu tọn lẹ tọn to aliho he bọawu bosọ họnwun mẹ to owhe lẹ gblamẹ ya? Ayihaawe ma tin dọ mọwẹ! Be awú ma ji mí to whenue nukunnumọjẹnumẹ mítọn do apajlẹ Jesu tọn he gando otọ́n, okún mutaldi tọn, po odọ̀ lọ po go ji yin vivọjlado to Atọ̀họ̀-Nuhihọ́ lọ Tọn 15 juillet 2008 tọn mẹ ya? Todin, mí wá mọnukunnujẹemẹ hezeheze dọ apajlẹ ehelẹ gando Ahọluduta Jiwheyẹwhe tọn po kọdetọn ayidego tọn he Ahọluduta lọ tindo nado gọalọna mẹsusu nado tọ́n sọn aihọn ylankan ehe mẹ bo lẹzun hodotọ Klisti tọn lẹ po go.

14. (a) Nawẹ mí ko basi zẹẹmẹ apajlẹ Samalianu kọmẹnu dagbe lọ tọn wayi gbọn? (b) Nawẹ mí mọnukunnujẹ apajlẹ Jesu tọn mẹ gbọn to egbehe?

14 Ṣigba, etẹwẹ dogbọn otàn kavi apajlẹ Jesu tọn he bẹ nudọnamẹ susu hẹn lẹ dali? Nugbo wẹ dọ delẹ to yé mẹ nọtena nuhe na wá jọ to nukọn mẹ lẹ; podọ devo lẹ zinnudo nuplọnmẹ yọ́n-na-yizan lẹ ji. Ṣigba, nawẹ mí sọgan yọ́n dehe nọtena nuhe na wá jọ to nukọn mẹ lẹ gbọnvona dehe tindo nuplọnmẹ yọ́n-na-yizan lẹ gbọn? To owhe lẹ gblamẹ, gblọndo lọ ko họnwun vudevude. Di apajlẹ, lẹnnupọndo aliho he mẹ mí ko basi zẹẹmẹ apajlẹ Jesu tọn he gando Samalianu kọmẹnu dagbe lọ go wayi te ji. (Luku 10:30-37) To 1924, Atọ̀họ̀-Nuhihọ́ lọ Tọn dọ dọ Samalianu lọ nọtena Jesu; aliho he jẹte sọn Jelusalẹm yì Jẹliko lọ nọtena ninọmẹ gbẹtọvi lẹ tọn he to yinylan deji sọn atẹṣiṣi Edẹni tọn whenu; ajotọ he tin to aliho lọ ji lẹ nọtena azọ́nwhé daho lẹ po ajọwatọ nukunkẹnnọ lẹ po; podọ yẹwhenọ lọ po Levinu lọ po nọtena sinsẹ̀n lalo lẹpo. To egbehe, owe mítọn lẹ nọ yí apajlẹ enẹ zan nado flinnu Klistiani lẹpo dọ mí ma dona nọ homẹnukuntapọn nado gọalọna mẹhe tin to nuhudo mẹ lẹ, titengbe mẹhe tindo nuhudo gbigbọmẹ tọn lẹ. Be homẹ mítọn ma hùn nado mọdọ Jehovah hẹn nuplọnmẹ etọn lẹ họnwun na mí ya?

15. Etẹwẹ mí na gbadopọnna to hosọ he bọdego mẹ?

15 To hosọ he bọdego mẹ, mí na gbadopọnna apajlẹ Jesu tọn devo, enẹ wẹ dehe gando awhli ao lẹ go. (Mat. 25:1-13) Nawẹ Jesu jlo dọ hodotọ etọn lẹ ni mọnukunnujẹ apajlẹ ayidego tọn enẹ mẹ gbọn to azán godo tọn lẹ mẹ? Be e jlo dọ mí ni pọ́n apajlẹ lọ hlan taidi nuhe na wá jọ to nukọn mẹ, bọ gbẹtọ, nujijọ, po nudevo he yin nùdego to e mẹ lẹ po nọtena gbẹtọ kavi onú tangan de wẹ ya? Kavi e jlo dọ hodotọ emitọn lẹ ni yí nuplọnmẹ yọ́n-na-yizan he apajlẹ ehe bẹhẹn lẹ zan nado deanana yede to azán godo tọn lẹ mẹ? Mì gbọ mí ni pọ́n.

^ huk. 4 Glẹnsigbe wẹ yin ogbè tintan he mẹ Atọ̀họ̀-Nuhihọ́ lọ Tọn he bọawu yin awuwlena te to juillet 2011. Enẹgodo, zinjẹgbonu ehe yin awuwlena to ogbè delẹ mẹ dogọ.

^ huk. 5 Azọ́n to yìyì to alọnu, na Biblu yọyọ ehe nido yin didetọn to ogbè devo lẹ mẹ.

^ huk. 10 Di apajlẹ, owe lọ Hodo Apajlẹ Yise Yetọn Tọn basi zẹẹmẹ gigọ́ do gbẹzan omẹ 14 he yin nùdego to Biblu mẹ tọn ji. Owe lọ ma basi zẹẹmẹ kandai omẹ enẹlẹ tọn taidi nuhe na wá jọ to nukọn mẹ lẹ gba, kakatimọ e zinnudo nuplọnmẹ yọ́n-na-yizan he mí sọgan mọyi sọn apajlẹ yetọn mẹ lẹ ji.

^ huk. 12 Nugbo wẹ dọ Ohó Jiwheyẹwhe tọn sọ bẹ nuhe sọgan “vẹawu nado mọnukunnujẹemẹ” lẹ hẹn, ehe bẹ adà delẹ to kandai Paulu tọn lẹ mẹ hẹn. Ṣigba, Biblu-kantọ lẹpo wẹ yin anadena gbọn gbigbọ wiwe dali. Gbigbọ enẹ sọ nọ gọalọna Klistiani nugbo lẹ to egbehe nado mọnukunnujẹ nugbo Jiwheyẹwhe tọn lẹ mẹ, bo nọ hẹn “etlẹ yin onú sisosiso Jiwheyẹwhe tọn lẹ” bọawu bosọ nọ hẹn yé họnwun na mí.—2 Pita 3:16, 17; 1 Kọl. 2:10.