Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) MARS 2015

Be “Mì Nọ Họ́ Mìde” Ya

Be “Mì Nọ Họ́ Mìde” Ya

“Enẹwutu, mì nọ họ́ mìde, na mì ma yọ́n azán kavi gànmẹ lọ gba.”—MAT. 25:13.

1, 2. (a) Etẹwẹ Jesu dọ gando azán godo tọn lẹ go? (b) Kanbiọ tẹlẹ wẹ mí na gbadopọnna?

YÍ NUKUN homẹ tọn do pọ́n lehe e na ko jiawu do nado sinai to Osó Olivie tọn ji, bo to tẹmpli Jelusalẹm tọn pọnhlan odò, to whenue Jesu dọ dopo to dọdai ojlofọndotenamẹ tọn etọn lẹ mẹ. Pita, Andle, Jakọbu, po Johanu po dotoaina Jesu po sọwhiwhe po dile ewọ to dọdai nuhe na jọ to sọgodo lẹ tọn dọ. E dọ nususu na yé gando azán godo tọn titonu ylankan ehe tọn go, yèdọ ojlẹ he mẹ ewọ na to gandu to Ahọluduta Jiwheyẹwhe tọn mẹ te. E dọna yé dọ to ojlẹ ayidego tọn enẹ mẹ, “afanumẹ nugbonọ podọ nuyọnẹntọ” he emi de wẹ na yin afọzedaitọ emitọn to aigba ji, bo na nọ na núdùdù gbigbọmẹ tọn devizọnwatọ emitọn lẹ to ojlẹ sisọ mẹ.—Mat. 24:45-47.

2 Enẹgodo, to dọdai dopolọ mẹ, Jesu na apajlẹ awhli ao lẹ tọn. (Hia Matiu 25:1-13.) Todin, mì gbọ mí ni na ayidonugo kanbiọ ehelẹ: (1) Etẹwẹ apajlẹ enẹ plọnmẹ taun? (2) Nawẹ mẹyiamisisadode lẹ ko yí nuhe apajlẹ lọ plọnmẹ do yizan mẹ gbọn, podọ ale tẹlẹ wẹ enẹ hẹnwa? (3) Nawẹ dopodopo mítọn sọgan mọaleyi sọn apajlẹ he Jesu na lọ mẹ gbọn to egbehe?

 ETẸWẸ APAJLẸ LỌ PLỌNMẸ?

3. To ojlẹ de mẹ wayi, aliho tẹ mẹ wẹ owe mítọn lẹ nọ basi zẹẹmẹ apajlẹ awhli ao lọ lẹ tọn te, podọ kọdetọn tẹwẹ enẹ sọgan ko hẹnwa?

3 To hosọ he wayi mẹ, mí mọnukunnujẹemẹ dọ sọn owhe delẹ die, afanumẹ nugbonọ lọ masọ nọ basi zẹẹmẹ dọ kandai Biblu tọn de nọtena nuhe na wá jọ to nukọn mẹ sọmọ ba, ṣigba nuplọnmẹ yọ́n-na-yizan he e bẹhẹn lẹ ji wẹ ewọ nọ zinnudo hugan. To ojlẹ de mẹ wayi, owe mítọn lẹ nọ dọ to whedelẹnu dọ onú flinflin lẹ, etlẹ yin miyọ́ngbán, amì, ogò po mọmọ po sọyi he yin nùdego to apajlẹ Jesu tọn he gando awhli ao lẹ go mẹ lẹ nọtena nude. Ṣigba, be e yọnbasi dọ ayidonugo nina onú enẹlẹ zọ́n bọ mí gboawupo nado mọ nuplọnmẹ he bọawu po owẹ̀n niyaniya tọn he apajlẹ lọ bẹhẹn po ya? Hosọ ehe na gọalọna mí nado mọdọ gblọndo kanbiọ ehe tọn yin nujọnu taun.

4. To apajlẹ lọ mẹ, nawẹ mí sọgan yọ́n (a) mẹhe yin asisunọ yọyọ lọ gbọn? (b) mẹhe yin awhli lọ lẹ gbọn?

4 Mì gbọ mí ni gbadopọnna onú titengbe he Jesu jlo na plọnmẹ to apajlẹ ehe mẹ. Jẹnukọn whẹ́, lẹnnupọndo mẹhe e bẹhẹn lẹ ji. Mẹnu wẹ yin asisunọ yọyọ lọ he yin nùdego to apajlẹ lọ mẹ? E họnwun dọ Jesu lọsu wẹ. To nujijọ devo whenu, ewọ do ede hia taidi asisunọ yọyọ! (Luku 5:34, 35) Etẹwẹ dogbọn awhli lọ lẹ dali? To apajlẹ lọ mẹ, Jesu dọ dọ awhli lọ lẹ dona wleawufo bọ miyọ́ngbán yetọn dona to titá to whenue asisunọ yọyọ lọ na wá. Doayi ayinamẹ mọnkọtọn he Jesu na “lẹngbọpa pẹvi” etọn he bẹ hodotọ mẹyiamisisadode lẹ hẹn go dọmọ: “Mì ni blagbajana mìde bo gbọ miyọ́ngbán mìtọn ni to jiji, podọ mìlọsu lẹ ni taidi dawe lọ lẹ he to tenọpọn whenue oklunọ yetọn na lẹkọwa sọn alọwle.” (Luku 12:32, 35, 36) Humọ, gbigbọ wiwe gọalọna apọsteli Paulu po apọsteli Johanu po nado yí hodotọ yiamisisadode Klisti tọn lẹ jlẹdo awhli he to wiweji lẹ go. (2 Kọl. 11:2; Osọ. 14:4) E họnwun dọ Jesu jlo dọ apajlẹ he yin kinkandai to Matiu 25:1-13 mẹ ni yin ayinamẹ podọ avase de na hodotọ yiamisisadode etọn lẹ.

5. Nawẹ Jesu do whenue nuhe ewọ dọ to apajlẹ lọ mẹ lẹ na jọ te hia gbọn?

5 Todin, lẹnnupọndo whenue nujijọ lọ lẹ na wá aimẹ te ji. Whetẹnu wẹ nuhe Jesu dọ to apajlẹ lọ mẹ lẹ na jọ? Nuhe Jesu dọ sẹpọ vivọnu apajlẹ lọ tọn dọmọ: “Asisunọ yọyọ lọ wá,” gọalọna mí nado yọ́n ojlẹ lọ. (Mat. 25:10) Dile mí plọn do to Atọ̀họ̀-Nuhihọ́ lọ tọn 15 juillet 2013 tọn mẹ, whla ṣinatọ̀n wẹ Jesu dọho gando ‘wiwá’ etọn go to dọdai etọn he yin kinkandai to Matiu weta 24 po 25 po mẹ; podọ hogbe Glẹki tọn dopolọ lẹ wẹ e yizan. To hodidọ enẹlẹ dopodopo mẹ, Jesu to alọdlẹndo whenue ewọ na wá nado hẹn whẹdida ṣẹ to nukunbibia daho lọ whenu, podọ ehe godo e na và aihọn ylankan ehe sudo. Enẹwutu, e họnwun dọ adà godo tọn apajlẹ ehe tọn na wá aimẹ to azán godo tọn lẹ mẹ, ṣigba bo na wá vivọnu to nukunbibia daho lọ whenu.

6. Sọgbe hẹ lẹdo hodidọ lọ tọn, etẹwẹ apajlẹ lọ plọnmẹ taun?

6 Etẹwẹ apajlẹ enẹ plọnmẹ taun? Flin lẹdo hodidọ lọ tọn. Jesu ṣẹṣẹ dọho gando “afanumẹ nugbonọ podọ nuyọnẹntọ lọ” go. Afanumẹ enẹ na yin pipli pẹvi sunnu yiamisisadode lẹ tọn de he na nọ deanananu to hodotọ Klisti tọn lẹ ṣẹnṣẹn to azán godo tọn lẹ mẹ. Jesu na avase sunnu enẹlẹ dọ yé dona gbọṣi nugbonọ-yinyin mẹ. Enẹgodo, e basi zẹẹmẹ yinukọn dogọ bo yí apajlẹ ehe zan nado dotuhomẹna hodotọ yiamisisadode etọn lẹpo he na nọgbẹ̀ to azán godo tọn lẹ mẹ nado ‘nọ họ́ yede,’ na ahọsumẹ họakuẹ yetọn nikaa gbọ yé go. (Mat. 25:13) Todin, mì gbọ mí ni gbeje apajlẹ lọ pọ́n nado mọ lehe mẹyiamisisadode lẹ ko yí ayinamẹ he e bẹhẹn do yizan mẹ do.

 NAWẸ MẸYIAMISISADODE LẸ YÍ NUHE APAJLẸ LỌ PLỌNMẸ DO YIZAN MẸ GBỌN?

7, 8. (a) Onú awe tẹlẹ wẹ dohia dọ awhli nuyọnẹntọ lọ lẹ wleawufo? (b) Nawẹ mẹyiamisisadode lẹ dohia dọ yé wleawudai gbọn?

7 Apajlẹ he Jesu na lọ zinnudeji dọ to vogbingbọn mẹ na awhli nulunọ lọ lẹ, awhli nuyọnẹntọ lọ lẹ wleawufo na wiwá asisunọ yọyọ lọ tọn. Naegbọn mí sọgan dọ mọ? Na onú awe wutu: yé wleawudai bosọ tin to aṣeji. Awhli he yin dide nado nọ zánnukle bo nọtepọn wiwá asisunọ yọyọ lọ tọn lẹ dona gbọṣi nukle na gànhiho susu bo dike miyọ́ngbán yetọn ni to jiji kakajẹ whenue nujijọ ayajẹ tọn lọ na wá aimẹ. Enẹwutu, to vogbingbọn mẹ na awhli nulunọ lọ lẹ, awhli nuyọnẹntọ atọ́n lọ lẹ wleawudai nugbonugbo, na yé do amì miyọ́ngbán yetọn mẹ bosọ hẹn amì do ogò mẹ dogọ. Be mẹyiamisisadode he yin nugbonọ lẹ lọsu wleawudai ya?

8 Nado dọ hójọhó, yé wàmọ! To owhe lẹ gblamẹ, Klistiani yiamisisadode lẹ ko yinuwa taidi awhli nuyọnẹntọ enẹlẹ, bo wleawudai nado sọgan hẹn azọ́ndenamẹ yetọn di po nugbonọ-yinyin po kakajẹ opodo. Yé lẹnnupọndo nuhe sinsẹ̀nzọn lọ wiwà po nugbonọ-yinyin po na biọ to yé si ji, bo doayi e go sọn bẹjẹeji dọ azọ́ndenamẹ yetọn na biọ dọ yé ni gbẹ́ susu to nuhe aihọn Satani tọn sọgan zedonukọnna yé lẹ mẹ dai. Yé ze yede jo mlẹnmlẹn na Jehovah bo nọ basi sinsẹ̀n hlan ẹn, e ma yin na azán vonọtaun kavi dogbó he kọ̀n yé dona jẹ de to ahunmẹduna yé wutu gba, ṣigba na owanyi gọna nugbonọ-yinyin yetọn na ewọ po Visunnu etọn po nọ whàn yé wutu. Yé hẹn tenọgligo, bo ma joawuna gbigbọ aihọn ylankan ehe tọn he bẹ agbasanu bibẹpli, walọ ylankan, po nukunkẹn po hẹn. Ehe dohia dọ yé wleawufo bo to wunhọ́n taidi hinhọ́n lẹ, podọ yé ma to nuhà dọ wiwá Asisunọ yọyọ lọ tọn to dindẹn.—Flp. 2:15.

9. (a) Na jọwamọnu wẹ e yin na gbẹtọvi lẹ nado samlọngọ wutu, nawẹ Jesu na avase gandego gbọn? (b) Nawẹ mẹyiamisisadode lẹ yinuwa gbọn to whenue yé sè awhágbe lọ dọ, “Asisunọ yọyọ lọ die”? (Sọ pọ́n nudọnamẹ odò tọn.)

9 Onú awetọ he gọalọna awhli lọ lẹ nado gbọṣi nukle wẹ aṣejininọ. Be e yọnbasi dọ Klistiani yiamisisadode de ni samlọngọ to whenue e ko nọ zánnukle na ojlẹ dindẹn ya? Gbau. Doayi e go dọ Jesu dọho gando awhli ao lọ lẹ go dọ “yemẹpo samlọngọ bo damlọn” to whenue e taidi dọ asisunọ yọyọ lọ to dindẹn. Jesu yọnẹn ganji dọ onú sọgan ṣikọna mẹhe tlẹ yí ojlo po zohunhun po do to tenọpọn wiwá emitọn. Mẹyiamisisadode he yin nugbonọ lẹ ko yí avase enẹ do yizan mẹ bo dovivẹnu vẹkuvẹku nado gbọṣi aṣeji, bo nọ nukle. To apajlẹ lọ mẹ, awhli lọ lẹpo wẹ yinuwa to whenue yé sè awhágbe de to zánhomẹ dọmọ: “Asisunọ yọyọ lọ die!” Ṣigba, awhli nuyọnẹntọ lọ lẹ kẹdẹ wẹ gbọṣi aṣeji kakajẹ opodo. (Mat. 25:5, 6; 26:41) Etẹwẹ dogbọn mẹyiamisisadode he yin nugbonọ lẹ dali to egbehe? To azán godo tọn lẹ mẹ, yelọsu yinuwa to whenue yé mọ kunnudenu nujọnu tọn he taidi awhágbe lọ dọ, “Asisunọ yọyọ lọ die,” mẹhe wiwá etọn ko sẹpọ pete. Yé ko doakọnnanu, bo ko sọ wleawufo hugan gbede pọ́n na wiwá Asisunọ yọyọ lọ tọn. * Ṣigba, adà godo tọn apajlẹ lọ tọn dlẹnalọdo ojlẹ tangan de. Gbọnna?

AHỌSUMẸ NA NUYỌNẸNTỌ LẸ PODỌ YASANAMẸ NA NULUNỌ LẸ

10. Kanbiọ sinsinyẹn tẹwẹ hodọdopọ he wá aimẹ to awhli nuyọnẹntọ lọ lẹ po awhli nulunọ lọ lẹ po ṣẹnṣẹn fọndote?

10 E yọnbasi dọ adà he gẹdẹ hugan to apajlẹ  lọ mẹ wẹ hodọdopọ he awhli nulunọ lọ lẹ po awhli nuyọnẹntọ lọ lẹ po tindo sẹpọ vivọnu apajlẹ lọ tọn. (Hia Matiu 25:8, 9.) Hodọdopọ ehe fọ́n kanbiọ de dote, enẹ wẹ: “To whenuho omẹ Jiwheyẹwhe tọn lẹ tọn mẹ, whetẹnu wẹ nugbonọ lẹ na gbẹ́ nado gọalọna mẹhe na biọ alọgọ sọn yé si lẹ?” Nulinlẹnpọn whladopo dogọ do whenue nujijọ lọ lẹ na wá aimẹ te ji na hẹn adà he gẹdẹ ehe họnwun na mí. Flin vọjlado he yin bibasi gando nukunnumọjẹnumẹ mítọn go dọ Jesu, yèdọ Asisunọ yọyọ lọ na wá sẹpọ vivọnu nukunbibia daho lọ tọn nado hẹn whẹdida ṣẹ. To whelọnu lo, be e ma yọnbasi dọ adà apajlẹ lọ tọn ehe to alọdlẹndo nuhe na jọ jẹnukọnna ojlẹ whẹdida tọn enẹ ya? E yọnbasi dọ ni yinmọ, na to ojlẹ enẹ mẹ, mẹyiamisisadode lẹ na ko mọ hiadogonamẹ godo tọn yetọn yí.

11. (a) Etẹwẹ na jọ to ojlẹ vude jẹnukọnna bẹjẹeji nukunbibia daho lọ tọn? (b) To whenue awhli nuyọnẹntọ lọ lẹ dọna awhli nulunọ lọ lẹ dọ yelọsu ni yì amìsatọ lẹ dè, etẹwẹ enẹ dohia?

11 Enẹwutu, jẹnukọnna bẹjẹeji nukunbibia daho lọ tọn, mẹyiamisisadode he tin to aigba ji lẹpo na ko mọ hiadogonamẹ godo tọn yetọn yí. (Osọ. 7:1-4) Bẹsọn whenẹnu sọyi, ayihaawe ma na tin gando ahọsumẹ olọn mẹ tọn yetọn go. Ṣigba, lẹnnupọndo ojlẹ he na jẹnukọnna bẹjẹeji nukunbibia lọ tọn ji. Etẹwẹ na jọ do mẹyiamisisadode he ma hẹn tenọgli yetọn go bo gboawupo nado gbọṣi nukle lẹ go? Yé na hẹn ahọsumẹ olọn mẹ yetọn bu. E họnwun dọ yé ma na mọ hiadogonamẹ godo tọn yí jẹnukọnna bẹjẹeji nukunbibia lọ tọn. To ojlẹ enẹ mẹ, omẹ nugbonọ devo lẹ na yin yíyí amisisadode nado diọtẹnna yé. To whenue nukunbibia lọ na bẹjẹeji, nulunọ lọ lẹ sọgan jẹflumẹ to whenue yé na mọ vasudo Babilọni Daho lọ tọn. Vlavo ojlẹ enẹ mẹ wẹ yé na wá doayi e go te dọ yé ma ko wleawufo na wiwá Asisunọ yọyọ lọ tọn. Etẹwẹ na jọ eyin yé biọ alọgọ vẹkuvẹku to gànhiho godo tọn enẹlẹ mẹ? Apajlẹ he Jesu na lọ do gblọndo lọ hia. Awhli nuyọnẹntọ lọ lẹ gbẹ́ nado na amì yetọn awhli nulunọ lọ lẹ, bo dọna yé dọ yelọsu ni yì amìsatọ lẹ dè. Amọ́, flindọ “zánhomẹ pete” wẹ. Be yé na penugo nado mọ amìsatọ to ogàn enẹ mẹ ya? Lala. Whenu ko fẹ́.

12. (a) To nukunbibia daho lọ whenu, adán tẹwẹ na gbò mẹyiamisisadode he jo tenọgligo-hinhẹn do jẹnukọnna hiadogonamẹ godo tọn lọ? (b) Etẹwẹ na jọ do mẹhe yinuwa taidi awhli nulunọ lọ lẹ go?

12 Mọdopolọ, to nukunbibia daho lọ whenu, mẹyiamisisadode he yin nugbonọ lẹ ma sọgan gọalọna mẹdepope he ma yin nugbonọ. Omẹ mọnkọtọn lẹ ma sọgan mọ alọgọ depope yí. Na whenu ko fẹ́. To whelọnu lo, etẹwẹ na jọ do yé go to godo mẹ? Jesu basi zẹẹmẹ nuhe na jọ do awhli nulunọ lọ lẹ go tọn to whenue yé na yì amì jẹ gbé, dọmọ: “Asisunọ yọyọ lọ wá, bọ awhli he ko wleawufo lọ lẹ biọ họmẹ hẹ ẹ yì hùnwhẹ alọwle tọn lọ; ohọ̀n lọ sọ yin súsú.” To whenue Klisti wá to gigo etọn mẹ sẹpọ vivọnu nukunbibia lọ tọn, e na bẹ mẹyiamisisadode etọn he yin nugbonọ lẹ pli do olọn mẹ. (Mat. 24:31; 25:10; 1 Tẹs. 4:17) Na nugbo tọn, ohọ̀n lọ na yin súsú do mẹhe ma yin nugbonọ lẹ, yèdọ mẹhe yinuwa taidi awhli nulunọ lọ lẹ. To linlẹn de mẹ, yé sọgan dawhá dọmọ: “Mẹdaho, mẹdaho, hùnhọ̀n na mí!” Ṣigba, e na gblọnna yé to azán whẹdida tọn enẹ gbè dọmọ: “Nugbo wẹ yẹn dọna mì, yẹn ma yọ́n mì.” Lehe e blawu do sọ!—Mat. 7:21-23; 25:11, 12.

13. (a) Naegbọn e ma sọgbe nado wá tadona kọ̀n dọ susu to hodotọ yiamisisadode Klisti tọn lẹ mẹ ma na hẹn nugbonọ-yinyin go? (b) Naegbọn mí sọgan dọ dọ avase he Jesu na lọ dohia dọ e tindo jidide do mẹyiamisisadode lẹ go? (Pọ́n yẹdide he tin to bẹjẹeji hosọ ehe tọn.)

13 Po nuhe mí ko gbadopọnna ehelẹ po, tadona tẹ kọ̀n wẹ mí sọgan wá? Be nuhe dọ Jesu te wẹ yindọ susu to mẹyiamisisadode etọn lẹ mẹ ma na hẹn nugbonọ-yinyin go bọ mẹdevo lẹ na jẹ otẹn yetọn mẹ wẹ ya? Lala. Flindọ e ṣẹṣẹ na avase “afanumẹ nugbonọ podọ nuyọnẹntọ” etọn ma nado lẹzun afanumẹ ylankan gbede. Ṣigba, enẹ ma dohia dọ e  to nukundo dọ onú mọnkọtọn ni jọ do yé go gba. Mọdopolọ, apajlẹ ehe bẹ avase sinsinyẹn de hẹn. Dile awhli atọ́n yin nulunọ bọ atọ́n yin nuyọnẹntọ do, mọdopolọ dopodopo mẹyiamisisadode lẹ tọn wẹ tindo nugopipe nado basi nudide vlavo eyin yé na wleawudai bo tin to aṣeji kavi yé na yinuwa taidi nulunọ bo ma na yin nugbonọ. Apọsteli Paulu yin gbigbọdo nado zinnudo nuagokun dopolọ ji to whenue e to hodọna Klistiani yiamisisadode hatọ etọn lẹ. (Hia Heblu lẹ 6:4-9; yijlẹdo Deutelonomi 30:19 go.) Doayi e go dọ avase he Paulu na yé sinyẹn taun, ṣigba e yí hogbe he gọ́ na owanyi lẹ zan nado dohia yé dọ emi deji dọ “onú dagbe lẹ” to sẹdotẹnmẹ na mẹmẹsunnu po mẹmẹyọnnu emitọn lẹ po. Mọdopolọ, avase he Jesu na to apajlẹ etọn mẹ gọ́ na owanyi po jidenamẹ po. Klisti yọnẹn dọ mẹyiamisisadode dopodopo sọgan gbọṣi nugbonọ-yinyin mẹ bo mọ ahọsumẹ jiawu lọ yí!

NAWẸ “LẸNGBỌ DEVO” KLISTI TỌN LẸ SỌGAN MỌALEYI GBỌN?

14. Naegbọn “lẹngbọ devo” lẹ lọsu sọgan mọaleyi sọn apajlẹ awhli ao lọ lẹ tọn mẹ?

14 To whenuena e yindọ apajlẹ awhli ao lẹ tọn he Jesu na lọ gando hodotọ yiamisisadode etọn lẹ go, be mí dona wá tadona kọ̀n dọ “lẹngbọ devo” Klisti tọn lẹ ma sọgan mọaleyi sọn e mẹ wẹ ya? (Joh. 10:16) Lala! Flindọ apajlẹ lọ bẹ ayinamẹ he họnwun de hẹn he dọmọ: “Mì nọ họ́ mìde.” Be mẹyiamisisadode lẹ kẹdẹ go wẹ ehe gando ya? Jesu dọ to ojlẹ de mẹ dọmọ: “Nuhe yẹn dọna mì, yẹn dọna mẹlẹpo, Mì nọ họ́ali.” (Malku 13:37) Jesu biọ to hodotọ etọn lẹpo si dọ yé ni wleawuna ahun yetọn nado sọgan wà sinsẹ̀nzọn lọ po nugbonọ-yinyin po, bosọ nọ gbọṣi aṣeji. Enẹwutu, Klistiani lẹpo nọ hodo anademẹ he mẹyiamisisadode lẹ zedai to whẹho ehe mẹ gbọn apajlẹ dagbe yetọn hihodo, po lizọnyizọn lọ zizedo otẹn tintan mẹ to gbẹzan yetọn mẹ po dali. Dopodopo mítọn dona sọ hẹn do ayiha mẹ dọ awhli nulunọ lọ lẹ biọ to awhli nuyọnẹntọ lọ lẹ si nado na emi amì pẹẹde. Obiọ yetọn he yin gbigbẹdai flinnu mí dọ mẹde ma sọgan yin nugbonọ do otẹn mítọn mẹ, gbọṣi nugbo mẹ do otẹn mítọn mẹ, kavi tin to aṣeji do otẹn mítọn mẹ. Dopodopo mítọn wẹ na dogbè na Whẹdatọ dodonọ he Jehovah ko de lọ. Ewọ na wá to madẹnmẹ! Enẹwutu, mí dona wleawufo.

Obiọ he yé basi nado mọ amì pẹẹde yí flinnu mí dọ mẹde ma sọgan yin nugbonọ do otẹn mítọn mẹ kavi tin to aṣeji do otẹn mítọn mẹ

15. Naegbọn homẹ Klistiani nugbo lẹpo tọn do hùn do alọwle Klisti po asi, yèdọ mẹyiamisisadode etọn lẹ po tọn he to nukọn ja lọ go?

15 Klistiani lẹpo sọgan sọ mọaleyi sọn nujijọ titengbe he go apajlẹ Jesu tọn donù lọ mẹ. To popolẹpo mẹ, mẹnu to mí mẹ wẹ alọwle he to nukọn ja lọ ma na hẹn homẹhun? Mẹyiamisisadode lẹ na yì olọn mẹ; podọ to awhàn Amagẹdọni tọn godo, yé na lẹzun asi Klisti tọn. (Osọ. 19:7-9) Enẹgodo, mẹhe to aigba ji lẹpo na mọaleyi sọn alọwle he na yin bibasi to olọn mẹ enẹ mẹ, na ehe na zọ́n bọ gbẹtọvi lẹpo na duvivi gandudu pipé de tọn. Mahopọnna todido depope he mí tindo, vlavo olọn mẹ tọn kavi aigba ji tọn, mì gbọ mí ni magbe nado gbadopọnna nuplọnmẹ titengbe he tin to apajlẹ awhli ao lẹ tọn mẹ. Mì gbọ mí ni dohia dọ mí wleawufo gbọn awuwiwlena ahun mítọn po tenọgligo hinhẹn zọnmii po dali, bosọ gbọṣi aṣeji hugan gbede pọ́n. Eyin mí wàmọ, mí sọgan duvivi sọgodo gigonọ he Jehovah tindo to sẹdotẹnmẹ na mí tọn!

^ huk. 9 To apajlẹ lọ mẹ, to whenue awhágbe lọ “Asisunọ yọyọ lọ die!” yin sisè godo, (wefọ 6) ojlẹ de juwayi whẹpo asisunọ yọyọ lọ do wá nugbonugbo (wefọ 10). To azán godo tọn lẹ mẹ, mẹyiamisisadode he tin to aṣeji lẹ ko doayi ohia tintin tofi Jesu tọn lẹ go. Gbọnmọ dali, yé yọnẹn dọ ewọ ko tin tofi, bo to gandu taidi Ahọlu. Yé yí linsinsinyẹn do to akọndonanu kakajẹ whenue e na wá.