Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) FÉVRIER 2015

Japon Mọ Nunina Madonukun de Yí

Japon Mọ Nunina Madonukun de Yí

TO OPLI vonọtaun de whenu to Nagoya, Japon, to 28 avril 2013, Anthony Morris he yin dopo to Hagbẹ Anademẹtọ lọ mẹ basi nulila ayajẹ tọn de he mẹplidopọ lẹ ma tlẹ donukun, enẹ wẹ didetọn owe yọyọ de tọn he hosọ etọn yin The Bible—The Gospel According to Matthew. Gbẹtọ 210 000 linlán he wá opli lọ kavi dotoaina tito-to-whinnu lọ sọn fidevo gbọn tito Intẹnẹt tọn de dali lẹ wẹ yí ayajẹ do hopẹ́ na ojlẹ dindẹn.

Owe Wẹndagbe Matiu tọn he tin to Biblu Lẹdogbedevomẹ Aihọn Yọyọ Tọn Japon-gbè tọn mẹ wẹ yin vivọ́zin nado basi owe weda 128 tọn de, he yin awuwlena to aliho vonọtaun de mẹ. Mẹmẹsunnu Morris dọ dọ owe lọ yin awuwlena “sọgbe hẹ nuhudo aigba-denamẹ he ji yè nọ do Japon-gbè te lẹ tọn.” Aliho tẹ mẹ wẹ owe Biblu tọn ehe yin awuwlena te? Naegbọn e do yin didetọn? Podọ nawẹ gbẹtọ lẹ nọ kẹalọyi i gbọn?

ALIHO TẸ MẸ WẸ E YIN AWUWLENA TE?

Aliho he mẹ owe Matthew tọn ehe yin awuwlena te paṣa mẹplidopọ lẹ taun. Wekun Japon-gbè tọn lẹ sọgan yin kinkan ode to ode glọ sọn aga wá odò kavi yin kinkan sọn amiyọn mẹ yì adusi mẹ, podọ wekun lẹ yin kinkan sọn amiyọn mẹ yì adusi mẹ to owe aihọn tọn vude poun mẹ, gọna owe mítọn agọe tọn lẹ. Ṣigba to owe yọyọ ehe mẹ, wekun lẹ yin kinkan ode to ode glọ, podọ lehe nukinkan lẹ yin tito do yin nudopolọ hẹ linlinwe po owe Japon-gbè tọn devo lẹ po tọn. Susu mẹhe nọ hia Japon-gbè lẹ tọn wẹ kẹalọyi dọ e nọ bọawu nado hia owe he yin kinkan to aliho ehe mẹ lẹ. Humọ, nuagokun he tin to aga weda dopodopo tọn to Biblu Lẹdogbedevomẹ Aihọn Yọyọ Tọn mẹ lẹ yin zizedo fie hóvila lẹ nọ nọ̀, na wehiatọ lẹ nido sọgan mọnukunnujẹ nuagokun adà dopodopo tọn mẹ po awubibọ po.

Mẹmẹsunnu po mẹmẹyọnnu lẹ po to Japon ko jẹ alemọyi ji sọn owe Matthew tọn lọ mẹ. Mẹmẹyọnnu de he tindo owhe 80 dọmọ: “Whlasusu wẹ n’ko hia owe wẹndagbe Matiu tọn, amọ́ aliho he mẹ e yin awuwlena te todin bọ wekun lẹ yin kinkan ode to ode glọ, gọna hóvila lẹ zọ́n bọ n’mọnukunnujẹ Yẹwhehodidọ Osó ji tọn lọ mẹ to gigọ́ mẹ.” Mẹmẹyọnnu devo wlan dọmọ: “N’hia owe Matthew tọn lọ blebu tlolo he n’yí i. Wekun he yin kinkan sọn amiyọn mẹ yì adusi mẹ lẹ wẹ n’jẹakọ hẹ, amọ́ Japon-nu susu wẹ yiwanna wekun he yin kinkan ode to ode glọ lẹ.”

OWE DE NA MẸHE NỌ DO JAPON-GBÈ LẸ

Naegbọn owe Biblu tọn ehe do sọgbe hẹ nuhudo aigba-denamẹ he ji yè nọ do Japon-gbè te lẹ tọn? Dile etlẹ yindọ Japon-nu susu ma jẹakọ hẹ Biblu, yé nọ tindo ojlo nado hia ẹ. Zinjẹgbonu owe Wẹndagbe Matiu tọn ehe na hùn dotẹnmẹ dote na mẹdelẹ he ma ko mọ Biblu pọ́n nado hẹn apadewhe Owe-wiwe ehe tọn do alọ yetọn mẹ bo hia ẹ.

Naegbọn owe Matiu tọn wẹ yin dide? Eyin suhugan Japon-nu lẹ tọn sè hogbe lọ “Biblu,” ayiha yetọn nọ yawu yì Jesu Klisti ji. Enẹwutu wẹ owe Matiu tọn do yin dide, na e bẹ kandai kúnkan Jesu tọn, jiji etọn, Yẹwhehodidọ ayidego tọn Osó ji tọn etọn, po dọdai huhlọnnọ he e dọ gando azán godo tọn lẹ go po hẹn wutu, yèdọ onú delẹ he na fọnjlodotena Japon-nu susu.

 To Japon, wẹnlatọ Ahọluduta lọ tọn lẹ yí zohunhun do to owe yọyọ ehe má sọn whédegbè jẹ whédegbè podọ to gọyìpọn lẹ whenu. Mẹmẹyọnnu de wlan dọmọ: “Todin, n’nọ tindo dotẹnmẹ hundote susu nado ze Ohó Jiwheyẹwhe tọn donukọnna gbẹtọ lẹ to aigba-denamẹ mítọn ji. Nado dọ hójọhó, n’tlẹ penugo bo do vọkan owe Matthew tọn lọ tọn dopo gbonu to whèjai opli vonọtaun lọ tọn!”

NAWẸ GBẸTỌ LẸ NỌ KẸALỌYI I GBỌN?

Nawẹ wẹnlatọ lẹ nọ ze owe Matthew tọn lọ donukọnna gbẹtọ lẹ gbọn? Japon-nu susu wẹ jẹakọ hẹ hogbe delẹ taidi, “họntonu bibó lọ,” ‘yìn peali lẹ donukọnna ohàn lẹ,’ po “mì yin magbọjẹnọ na osọ he ja gbede blo” po. (Mat. 6:34; 7:6, 13) E nọ paṣa yé nado mọdọ Jesu Klisti wẹ dọ ohó ehelẹ. Eyin yé mọ hogbe enẹlẹ to Wẹndagbe Matiu tọn mẹ, susu yetọn nọ dọ dọ: “E ko nọ jlo mi nado hia Biblu sọn hoho gbọ́n etlẹ yin whla dopo tata.”

Eyin wẹnlatọ lẹ lẹkọyi mẹhe kẹalọyi owe Matthew tọn lẹ dè, yé nọ saba dọ dọ tlolo he emi yí owe lọ janwẹ emi hia ẹ fó kavi adà etọn de. Dawe de he tindo owhe 60 dọna wẹnlatọ de dọmọ: “Whlasusu wẹ n’ko hia owe lọ fó, podọ e miọnhomẹna mi taun. Mì jaale bo plọn mi nususu dogọ do Biblu ji.”

Owe Matthew tọn lọ sọ nọ yin zizedonukọnnamẹ to kunnudide gbangba tọn mẹ. Mẹmẹyọnnu de he to mahẹ tindo to aliho kunnudide tọn ehe mẹ yí adlẹsi Intẹnẹt tọn etọn na yọnnu jọja de he kẹalọyi owe Matthew tọn lọ. To gànhiho dopo godo, yọnnu lọ do wekanhlanmẹ de hlan mẹmẹyọnnu lọ gbọn Intẹnẹt ji, bo dọ dọ emi ko hia apadewhe owe Biblu tọn lọ tọn bo jlo na mọnukunnujẹ nususu mẹ dogọ. To osẹ dopo godo, mẹmẹyọnnu lọ basi plọnmẹ Biblu tintan hẹ ẹ, podọ e ma dẹn bọ e jẹ opli lẹ wá ji.

Hugan vọkan 1 600 000 owe The Bible—The Gospel According to Matthew tọn wẹ yin didohlan agun he tin to Japon lẹ, podọ to sunmẹsunmẹ Kunnudetọ lẹ nọ do vọkan fọtọ́n susu gbonu. Hodidọ jẹnukọn owe lọ tọn do numọtolanmẹ zinjẹgbonutọ lẹ tọn hia dọmọ: “Mí tindo todido ahundopo tọn dọ owe ehe hihia na hẹn ojlo he mì tindo to Biblu mẹ siso deji.”