Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) DÉCEMBRE 2014

E ‘Yọ́n Aliho Lọ’

E ‘Yọ́n Aliho Lọ’

GUY HOLLIS PIERCE, he yin dopo to Hagbẹ Anademẹtọ Kunnudetọ Jehovah tọn lẹ tọn mẹ, dotana gbẹzan aigba ji tọn etọn to mardi 18 mars 2014. Owhe 79 wẹ e tindo to whenue todido etọn nado yin dopo to mẹmẹsunnu Klisti tọn he yin finfọnsọnku lẹ mẹ mọ hẹndi.Heb. 2:10-12; 1 Pita 3:18.

Guy Pierce yin jiji to 6 novembre 1934 to Auburn, Californie, to États-Unis, bo yí baptẹm to 1955. To 1977, e wlealọ hẹ mẹyiwanna etọn Penny bọ yé do whẹndo de ai. Numimọ he e tindo taidi tatọ́ whẹndo tọn zọ́n bọ e nọ yinuwa hẹ mẹdevo lẹ taidi otọ́ yetọn. To 1982, ewọ po Penny po hẹn alọnu ján to azọ́n gbehosọnalitọ tọn mẹ, podọ to 1986 e bẹ azọ́n nugopọntọ lẹdo tọn jẹeji bo wà ẹ na owhe 11 to États-Unis.

To 1997, Guy po Penny Pierce po lẹzun dopo to hagbẹ whẹndo Bẹtẹli États-Unis tọn lẹ mẹ. Mẹmẹsunnu Pierce wazọ́n to Azọ́nwatẹn Sinsẹ̀nzọn tọn, podọ to 1998 e yin azọ́ndena nado nọ gọalọ to Wedegbẹ́ Nukunpedomẹgo tọn he Hagbẹ Anademẹtọ lọ zedai mẹ. Mẹmẹsunnu Pierce wá yin dide taidi dopo to Hagbẹ Anademẹtọ lọ mẹ podọ nulila lọ yin bibasi to 2 octobre 1999, to opli whemẹwhemẹ tọn Watch Tower Bible and Tract Society of Pennsylvania tọn whenu. To owhe agọe tọn lẹ mẹ, e wazọ́n to Wedegbẹ́ Nukunpedomẹgo, Wekinkan, Wezinjẹgbonu, po Anadenanutọ po tọn mẹ.

Gbẹtọ lẹ sọn akọ̀ po aṣa voovo lẹ po mẹ nọ dọnsẹpọ Mẹmẹsunnu Pierce, na nukiko etọn nọ dọnmẹdogo podọ e sọ nọ dọ fànfún taun. Ṣigba, jẹhẹnu tangan he wutu mẹdevo lẹ do yiwanna ẹn lẹ wẹ owanyi, mẹdezewhè, sisi tintindo na osẹ́n po nunọwhinnusẹ́n dodo tọn lẹ po, gọna yise dolido etọn to Jehovah mẹ. E họnwun na Guy Pierce dọ nude sọgan glọnalina owhè ma nado zẹ̀, amọ́ nudepope ma sọgan glọnalina opagbe Jehovah tọn lẹ nado mọ hẹndi, podọ e jlo na hẹn nugbo ehe zun yinyọnẹn na gbẹtọ lẹ lẹdo aihọn pé.

Agbọ́ ma nọ pé Mẹmẹsunnu Pierce to sinsẹ̀nzọn Jehovah tọn mẹ, e nọ yawu fọ́n to afọnnu lẹ, podọ e nọ saba wazọ́n kakajẹ zánhomẹ. E zingbejizọnlin yì fisusu lẹdo aihọn pé nado na tuli mẹmẹsunnu po mẹmẹyọnnu etọn lẹ po, podọ alọnu etọn ma nọ ján zẹjlẹgo nado yí whenu zan hẹ hagbẹ whẹndo Bẹtẹli tọn dopodopo gọna mẹdepope he tindo nuhudo gbẹdohẹmẹ, ayinamẹ, po alọgọ etọn po tọn. Podọ to owhe susu godo, yisenọ hatọ etọn lẹ gbẹ́ nọ flin johẹmẹ, họntọnjihẹmẹ, po tulinamẹ sinai do Owe-wiwe ji etọn lẹ po.

Mẹmẹsunnu mítọn podọ họntọn vivẹ́ mítọn sin asi po ovi etọn ṣidopo lẹ po, gọna ovivi lẹ po ovi ovivi etọn lẹ tọn po na jẹdò etọn. E sọ tindo ovi gbigbọmẹ tọn madosọha lẹ. Mẹmẹsunnu Mark Sanderson he yin dopo to hatọ etọn lẹ mẹ to Hagbẹ Anademẹtọ lọ mẹ, na hodidọ ayidego tọn de gando Mẹmẹsunnu Pierce go to samedi 22 mars 2014, to Bẹtẹli Brooklyn tọn. To hodidọ etọn mẹ, e dọhodo todido olọn mẹ tọn Mẹmẹsunnu Pierce tọn ji bo hia hogbe Jesu tọn lẹ dọmọ: “Fininọ susu wẹ tin to owhé Otọ́ ṣie tọn gbè. . . . Eyin yẹn yì bo wleawu otẹn de tọn na mì, yẹn na lẹkọwa bo na yí mì do whégbè do dee dè, na fihe yẹn te mìlọsu nido to finẹ. Podọ fihe yẹn jei, mì yọ́n aliho lọ.”Joh. 14:2-4.

Na nugbo tọn, mí na jẹdò Mẹmẹsunnu Pierce tọn taun. Ṣigba, homẹ mítọn hùn dọ ewọ ‘yọ́n aliho lọ’ he plan ẹn yì “fininọ” kakadoi tọn etọn.