Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Décembre 2014

Be Hiẹ Flin Ya?

Be Hiẹ Flin Ya?

Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Be e sọgbe dọ Klistiani lẹ ni nọ mẹ̀ oṣiọ to miyọ́n mẹ ya?

Nudide mẹdetiti tọn wẹ e yin nado mẹ̀ mẹhe ko kú de to miyọ́n mẹ kavi lala. Dile etlẹ yindọ, Biblu ma na nudọnamẹ de tlọlọ do oṣiọ lẹ mimẹ̀ to miyọ́n mẹ ji, e jẹna ayidego dọ oṣiọ Ahọlu Sauli po visunnu etọn Jonatani po tọn yin mimẹ̀, enẹgodo yé yin dìdì. (1 Sam. 31:2, 8-13)—15/6, weda 7.

Avùnnukundiọsọmẹnu tẹlẹ wẹ mẹhe sẹtẹn yì tògodo nado sẹ̀n to fie nuhudo sù te de sọgan pehẹ?

Avùnnukundiọsọmẹnu atọ̀n delẹ die; e na biọ dọ (1) ni diọ aliho gbẹninọ tọn etọn, (2) ni duto ajlù owhé tọn ji, podọ (3) ni dovivẹnu nado jihọntọn hẹ mẹmẹsunnu he tin to finẹ lẹ. Mẹsusu he duto avùnnukundiọsọmẹnu ehelẹ ji ko mọ dona susugege yí.—15/7, weda 4-5.

Naegbọn alọnuwe pẹvi yọyọ lọ lẹ yiyizan ma vẹawu bosọ nọ hẹn kọdetọn dagbe wá?

Yemẹpo wẹ yin awuwlena to aliho dopolọ mẹ. Alọnuwe pẹvi lọ lẹ dopodopo nọ deanana mí nado hia wefọ Biblu tọn de podọ nado kàn kanbiọ de sè whétọ lọ. Mahopọnna gblọndo he ewọ na, mí sọgan hùn alọnuwe pẹvi lọ do ṣẹnṣẹn bo do nuhe Biblu dọ hia ẹ. Mí sọgan sọ fọ́n kanbiọ de dote he ji mí na dọhodo to gọyìpọn whenu.—15/8, weda 13-14.

Taidi lẹngbọhọtọ de, etẹwẹ mẹjitọ Klistiani lẹ sọgan wà nado yìn ovi yetọn lẹ?

Nujọnu wẹ e yin nado nọ dotoaina ovi lẹ nado sọgan yọ́n yé. Yé dona dovivẹnu nado nọ penukundo yé go to gbigbọ-liho. Yé dona nọ yí owanyi do deanana yé, di apajlẹ, to whenue ovi lẹ to tintẹnpọn nado duto ayihaawe he yé tindo gando nugbo lọ go lẹ ji.—15/9, weda 18-21.

Etẹlẹ wẹ ma na tin ba to Ahọluduta Jiwheyẹwhe tọn glọ?

Azọ̀n, okú, azọ́nmamọwa, awhàn, núdùdù whèdomẹ, po ohẹ́n po ma na tin ba.—1/10, weda 6-7.

Alẹnu tẹ to Biblu mẹ wẹ hẹn ẹn yọnbasi na mẹdevo lẹ nado dugán hẹ Klisti?

To whenue Jesu ko dù Juwayi godo tọn hẹ apọsteli etọn lẹ godo, ewọ basi alẹnu de hẹ devi nugbonọ etọn lẹ, he nọ yin yiylọdọ alẹnu Ahọluduta tọn. (Luku 22:28-30) Alẹnu ehe na yé jide dọ yé na dugán hẹ Jesu to olọn mẹ.—15/10, weda 16-17.

Mẹnu lẹ wẹ yin ‘akọta he yin dide na oyín Jehovah tọn’ he go Jakọbu donù to Owalọ 15:14 mẹ?

Omẹ ehelẹ bẹ Ju lẹ po yisenọ he ma yin Juvi lẹ po hẹn, he Jiwheyẹwhe de taidi akọ̀ dide de nado “lá gigo daho” Omẹ lọ he ylọ yé tọn lẹ. (1 Pita 2:9, 10)—15/11, weda 24-25.