Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) NOVEMBRE 2014

 SỌN ONÚ HOHO SẸDOTẸN MÍTỌN

Hinhọ́n Nugbo lọ Tọn Wá Aigba Whèzizẹ Tọn Ji

Hinhọ́n Nugbo lọ Tọn Wá Aigba Whèzizẹ Tọn Ji

Oylọ-basinamẹwe he yin mimá to Tokyo, bọ agahun lẹ sọ vúnvún pé gbọn Osaka

JAPON-VIJIJI DE he yin agun-ji-pọntọ (nugopọntọ tomẹyitọ) to États-Unis, yin didohlan Japon taidi mẹdehlan to 6 septembre 1926. Omẹ dopo gee he to tepọn ẹn nado dokuavọna ẹn wẹ dawe de he ze yinkọ dai bo nọ sú akuẹ nado yí Atọ̀họ̀-Nuhihọ́ lọ Tọn to sunmẹsunmẹ. Dawe lọ ko jẹ Biblu plọn pipli de ji to tòdaho Kobe tọn mẹ. To 2 janvier 1927, Biblu Plọntọ lẹ basi plidopọ tintan to tòdaho enẹ mẹ. Omẹ 36 wẹ wá, bọ omẹ 8 to yé mẹ yí baptẹm. Bẹjẹeji dagbe de wẹ ehe yin, ṣigba, nawẹ pipli pẹvi ehe na penugo nado hẹn owẹ̀n lọ jẹ gbẹtọ livi 60 he to Japon bo tindo nuhudo hinhọ́n nugbo Biblu tọn lọ tọn lẹ dè gbọn?

To mai 1927, Biblu Plọntọ lẹ yí zohunhun do basi nujijla de nado basi oylọna gbẹtọ lẹ nado wá dotoaina togunmẹho Biblu tọn voovo delẹ. Nado ylọ gbẹtọ lẹ wá togunmẹho tintan he yin nina to Osaka, mẹmẹsunnu lẹ tẹ́ oylọ-basinamẹwe lẹ do adógo to afọgbọntẹn lẹ bo basi owhlẹ daho nujijla tọn lẹ gbọn tòdaho lọ mẹ, bosọ do oylọ-basinamẹwe 3 000 hlan gbẹtọ nukundeji lẹ. Yé má oylọ-basinamẹwe 150 000, bo basi nujijla togunmẹho lọ tọn to linlinwe Osaka tọn he nọ yin hihia hugan lẹ mẹ, bosọ kàn nujijla lọ do tike he yè nọ yí do biọ pinpán mẹ 400 000 ji. To azán he ji togunmẹho lọ yin nina, agahun awe gbọn tòdaho lọ mẹ bo vúnvún oylọ-basinamẹwe 100 000 do kọmẹ. Gbẹtọ nudi 2 300 wẹ wá nupọntẹn daho Osaka Asahi tọn nado sè hodidọ lọ he hosọ etọn yin “Ahọluduta Jiwheyẹwhe Tọn Ko Sẹpọ.” Ohọ̀ lọ gọ́ sọmọ bọ nudi gbẹtọ livi dopo ma mọ tẹnmẹ bo to dandannu glọ nado lẹkọ. To hodidọ lọ godo, todoaitọ 600 linlán wẹ nọte bo tindo mahẹ to tito kanbiọ po gblọndo po tọn de mẹ. To osun he bọdego lẹ mẹ, togunmẹho Biblu tọn devo lẹ yin nina to Kyoto podọ to tòdaho whèyihọ-waji Japon tọn devo lẹ mẹ.

To octobre 1927, Biblu Plọntọ lẹ basi tito nado na togunmẹho delẹ to Tokyo. Yé do oylọ-basinamẹwe lẹ hlan omẹ vonọtaun delẹ, taidi agbagogán tintan otò lọ tọn, dẹ́mẹnu lẹ, nukọntọ sinsẹ̀n tọn po nukọntọ awhànfuntọ lẹ tọn po. Oylọ-basinamẹwe lọ yin titẹ́ do owhlẹ nujijla tọn daho lẹ go, sọawuhia to linlinwe lẹ mẹ, bọ 710 000 yin mimá, podọ gbẹtọ 4 800 plipli wẹ wá sè togunmẹho atọ̀n he yin nina to tatọ́-tònọ Japon tọn mẹ.

OWE-MÁTỌ ZOHUNHUNNỌ LẸ

Katsuo po Hagino Miura po

Owe-mátọ lẹ (gbehosọnalitọ lẹ) yí adà daho de wà nado hẹn owẹ̀n lọ jẹ gbẹtọ lẹ dè. Matsue Ishii, he yin dopo to omẹ tintan he lẹzun owe-mátọ lẹ mẹ to Japon, po asu etọn Jizo po lá owẹ̀n lọ diblayin gbọn otò lọ blebu mẹ, yèdọ sọn Sapporo, he tin agewaji pete otò lọ tọn kaka yì Sendai, Tokyo, Yokohama, Nagoya, Osaka, Kyoto, Okayama, po Tokushima po. Mẹmẹyọnnu Ishii po mẹmẹyọnnu mẹhomẹ he nọ yin Sakiko Tanaka po, do awù gaa sọgbe hẹ aṣa otò lọ tọn bo yì dọyẹwheho na ahọluzọnwatọ nukundeji delẹ. Dopo to ahọluzọnwatọ lọ lẹ mẹ zọ́n owe La Harpe de Dieu 300 po Délivrance  300 po, na e nido bẹ yé do wesẹdotẹn gànpa lẹ tọn mẹ.

Katsuo po Hagino Miura po yí owe delẹ to mẹmẹyọnnu Ishii si bo kẹalọyi nugbo lọ to afọdopolọji. Yé yí baptẹm to 1931 bo lẹzun owe-mátọ. Haruichi po Tane Yamada po, gọna hẹnnumẹ yetọn susu kẹalọyi owẹ̀n Ahọluduta tọn lọ to ojlẹ de mẹ jẹnukọnna 1930. Haruichi po Tane po wá lẹzun owe-mátọ, podọ nọviyọnnu yetọn Yukiko wà sinsẹ̀nzọn to Bẹtẹli he to Tokyo.

“JEHU LẸ”—DAHO PO PẸVI PO

Jehu Daho he mẹ gbehosọnalitọ ṣidopo nọ mlọn

To whelọnu, mọto vẹahi taun bọ aliho lẹ ma yọ́n depope. Enẹwutu, Kazumi Minoura po owe-mátọ jọja devo lẹ po nọ yí ohọ̀ he nọ nọ̀ mọto daho lẹ godo zan taidi owhé. Yé sù yinkọ na ohọ̀ enẹlẹ dọ Jehu, yèdọ yinkọ mẹhe nọ kùn osọ́-kẹkẹ ganji de tọn, he wá lẹzun dopo to ahọlu Islaeli tọn lẹ mẹ. (2 Ahọ. 10:13-16) Yé wleawuna Jehu Daho atọ̀n. Jehu dopo nọ dite na mẹtlu 2,2, nọ gblo na mẹtlu 1,9 bosọ nọ yiaga na mẹtlu 1,9 bọ gbehosọnalitọ ṣidopo sọgan damlọn to e mẹ. Humọ, alahọ Japon tọn wleawuna Jehu Pẹvi 11 he kẹkẹ afọ tọn nọ dọ̀n bọ omẹ awe sọgan damlọn to e mẹ. Kiichi Iwasaki he tindo mahẹ to Jehu lọ lẹ bibasi mẹ dọ dọ, “Jehu dopodopo tindo họta, gọna bateli mọto tọn he nọ tá miyọ́n do yé mẹ.” Owe-mátọ lẹ hẹn nugbo lọ gbayipe to Japon, bo nọ to Jehu lẹ dọ̀n pé dile yé to osó lẹ hẹ bo to tejẹ bosọ to agbàdo lẹ dasá sọn agewaji Hokkaido tọn yì hùwaji Kyushu tọn.

Jehu Pẹvi he nọ hẹn omẹ awe

Ikumatsu Ota, he yin owe-mátọ de dọmọ: “Eyin mí jẹ tòpẹvi de mẹ, mí nọ ze Jehu mítọn do tọ̀sisa de tó, kavi do ogle de mẹ. Omẹ nukundeji he to tòpẹvi lọ mẹ lẹ dè wẹ mí nọ yì jẹnukọn, taidi ogán lẹdo lọ tọn, enẹgodo mí nọ yì owhé devo lẹ gbè nado ze owe mítọn lẹ donukọnna gbẹtọ lẹ. Eyin mí wazọ́n fó to aigba-denamẹ enẹ ji, mí nọ sẹtẹn yì tòpẹvi devo mẹ.”

Ojlẹ he mẹ Biblu Plọntọ 36 he to Kobe lẹ basi plidopọ tintan te yin bẹjẹeji “onú pẹvi lẹ tọn.” (Zek. 4:10) To owhe atọ́n poun godo, to 1932, owe-mátọ 103 po wẹnlatọ he to Japon lẹ po na linlin sinsẹ̀nzọn tọn bo do owe 14 000 gbonu. To egbehe, tito dagbe kunnudide gbangba tọn de to yìyì to tòdaho Japon tọn lẹ mẹ, podọ wẹnlatọ nudi 220 000 wẹ to hinhọ́n nugbo lọ tọn hẹn họnwun to Aigba Whèzizẹ Tọn lọ ji.—Sọn onú hoho sẹdotẹn mítọn to Japon.

Yẹdide he Kiichi Iwasaki de lẹ, mẹhe tindo mahẹ to Jehu lẹ bibasi mẹ to Bẹtẹli Japon tọn