Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) OCTOBRE 2014

Wlebòna Lẹblanulọkẹyi He A Tindo Nado Wazọ́n hẹ Jehovah!

Wlebòna Lẹblanulọkẹyi He A Tindo Nado Wazọ́n hẹ Jehovah!

“Azọ́nwatọ hatọ Jiwheyẹwhe tọn lẹ wẹ mí yin.”—1 KỌL. 3:9.

1. Etẹwẹ nọ yin numọtolanmẹ Jehovah tọn gando azọ́n go, podọ etẹwẹ ehe whàn ẹn nado wà?

JEHOVAH yin azọ́nwatọ de he nọ tindo homẹhunhun to nuhe e nọ wà lẹ mẹ. (Ps. 135:6; Joh. 5:17) E jlo dọ angẹli po gbẹtọvi he e dá lẹ po ni nọ tindo homẹhunhun to azọ́n yetọn mẹ ga, enẹwutu Jehovah deazọ́n he mẹ yé sọgan mọ ayajẹ po pekọ po te na yé. Di apajlẹ, e na dotẹnmẹ Visunnu plọnji etọn nado tindo mahẹ to azọ́n nudida tọn Etọn mẹ. (Hia Kọlọsinu lẹ 1:15, 16.) Biblu dọna mí dọ whẹpo Jesu do wá aigba ji, ewọ tin to apá na Jiwheyẹwhe to olọn mẹ “di azọ́nwatọgan de.”—Howh. 8:30.

2. Etẹwẹ dohia dọ azọ́n nujọnu tọn he nọ hẹn pekọ wá lẹ nọ yin didena nudida gbigbọnọ lẹ to whepoponu?

2 Sọn Gẹnẹsisi jẹ Osọhia, mí mọ apajlẹ voovo he dohia dọ Jehovah nọ deazọ́nna visunnu gbigbọmẹ tọn etọn lẹ to whepoponu. To whenue Adam po Evi po ko waylando bo yin yinyan sọn Paladisi mẹ godo, Jiwheyẹwhe “sọ de do whèzẹtẹn jipa Edẹni tọn kelubimi lọ po jiji ohí de tọn po he to juju pé, nado họ́ aliho jẹ atin ogbẹ̀ tọn kọ̀n.” (Gẹn. 3:24) Podọ Osọhia 22:6 dohia dọ Jehovah nọ “do angẹli etọn hlan nado do nuhe dona jọ to madẹnmẹ lẹ hia afanumẹ etọn lẹ.”

 ETẸWẸ DOGBỌN GBẸTỌVI LẸ DALI?

3. To whenue Jesu tin to aigba ji, nawẹ e hodo apajlẹ Otọ́ etọn tọn gbọn?

3 To whenue Jesu tin to aigba ji taidi gbẹtọvi pipé de, e yí homẹhunhun do wazọ́n he Jehovah dena ẹn. Jesu hodo apajlẹ Otọ́ etọn tọn, bo deazọ́n titengbe de na devi etọn lẹ. Nado whàn devi etọn lẹ na yé nido tindo homẹhunhun gando azọ́ndenamẹ yetọn go, e dọmọ: “Nugbonugbo wẹ yẹn dọna mì dọ, Ewọ he nọ do yise hia to yẹn mẹ, ewọ lọsu na wà azọ́n he yẹn wà lẹ; ewọ nasọ wà azọ́n he klohu ehelẹ, na yẹn jei Otọ́ lọ dè wutu.” (Joh. 14:12) Nado zinnudo lehe azọ́n mọnkọtọn yin onú niyaniya tọn de do ji, Jesu dọmọ: “Mí dona wà azọ́n ewọ he do mi hlan tọn lẹ to whenue okle gbẹ́ pò to ote; ozán na wá kú bọ mẹdepope ma sọgan wazọ́n.”—Joh. 9:4.

4-6. (a) Naegbọn mí do dopẹ́ dọ Noa po Mose po hẹn azọ́n he Jehovah dena yé di? (b) Kọdetọn tẹwẹ azọ́n he Jiwheyẹwhe nọ dena gbẹtọvi lẹ nọ hẹnwa?

4 Ojlẹ dindẹn whẹpo Jesu do wá aigba ji, Jehovah deazọ́n he gbẹtọvi lẹ sọgan wà nado tindo pekọ na yé. Dile etlẹ yindọ Adam po Evi po gboawupo nado hẹn azọ́ndenamẹ he yé mọyi di, mẹdevo lẹ wà nuhe Jiwheyẹwhe biọ to yé si. (Gẹn. 1:28) Noa mọ anademẹ tangan lẹ yí gando lehe e na gbá aki de nado whlẹn ogbẹ̀ gbẹtọvi lẹ tọn gán to Singigọ daho lọ whenu do go. E yí sọwhiwhe do wà nuhe Jehovah biọ to e si. Mí dopẹ́ dọ e yí sọwhiwhe do hodo anademẹ he Jehovah na ẹn lẹ, na enẹ wẹ zọ́n bọ mí do togbẹ̀ to egbehe.—Gẹn. 6:14-16, 22; 2 Pita 2:5.

5 Mose mọ anademẹ tangan lẹ yí nado gbá gòhọtúntún lọ bo wleawuna tito yẹwhenọduta tọn, podọ e hodo anademẹ lọ lẹ pẹkipẹki. (Eks. 39:32; 40:12-16) Etlẹ yin to egbehe, azọ́ndenamẹ enẹ he e hẹndi po nugbonọ-yinyin po nọ hẹn ale wá na mí. Gbọnna? Apọsteli Paulu basi zẹẹmẹ dọ adà Osẹ́n lọ tọn enẹlẹ yin ohia “onú dagbe he ja lẹ tọn.”—Heb. 9:1-5, 9; 10:1.

6 Jiwheyẹwhe nọ deazọ́n voovo na devizọnwatọ etọn lẹ sọn ojlẹ de mẹ jẹ devo mẹ, sọgbe hẹ lehe lẹndai etọn to hẹndi mọ do. Etomọṣo, azọ́ndenamẹ yetọn nọ hẹn gigo wá na Jehovah to whepoponu bosọ nọ hẹn ale wá na gbẹtọvi he do yise hia lẹ. Nuhe Jesu wadotana to whenue e to olọn mẹ po whenue e wá aigba ji po lẹ do enẹ hia. (Joh. 4:34; 17:4) Mọdopolọ, azọ́n he nọ yin didena mí to egbehe nọ hẹn gigo wá na Jehovah. (Mat. 5:16; hia 1 Kọlintinu lẹ 15:58.) Naegbọn mí do dọmọ?

NỌ TINDO PỌNDOHLAN DAGBE GANDO AZỌ́NDENAMẸ LẸ GO

7, 8. (a) Basi zẹẹmẹ azọ́n he Klistiani lẹ tindo lẹblanulọkẹyi nado wà to egbehe tọn. (b) Nawẹ mí dona nọ yinuwa hlan anademẹ Jehovah tọn lẹ gbọn?

7 Hiẹ na yigbe dọ lẹblanulọkẹyi vonọtaun de wẹ e yin dọ Jehovah basi oylọna gbẹtọvi mapenọ lẹ nado sẹ̀n ẹn taidi azọ́nwatọ hatọ etọn lẹ. (1 Kọl. 3:9) Mẹhe nọ gbá Plitẹnhọ Plidopọ tọn lẹ, Plitẹnhọ Ahọluduta tọn lẹ, po alahọ lẹ po lẹ to mahẹ tindo to azọ́n yinukundomọ de mẹ dile Noa po Mose po wà do. Vlavo hiẹ to azọ́nwa to fie Plitẹnhọ Ahọluduta tọn de to yinyin vivọjlado te kavi to fie tatọ́-tẹnnọ mítọn to yinyin gbigbá te to Warwick, New York, wlebòna lẹblanulọkẹyi enẹ he a tindo. (Pọ́n yẹdide anazọ́nwiwa tọn he tin to bẹjẹeji hosọ ehe tọn.) Sinsẹ̀nzọn wiwe de wẹ. Ṣigba, Klistiani lẹpo nọ tindo mahẹ to azọ́n họ̀gbigbá gbigbọmẹ tọn de mẹ. Azọ́n ehe lọsu nọ hẹn gigo wá na Jehovah bosọ nọ hẹn ale wá na gbẹtọvi tonusetọ lẹ. (Owalọ 13:47-49) Titobasinanu Jiwheyẹwhe tọn nọ na anademẹ he sọgbe lẹ gando aliho dagbe hugan he mẹ azọ́n ehe sọgan yin wiwà te go. To whedelẹnu, ehe sọgan biọ dọ mí ni mọ azọ́ndenamẹ yọyọ lẹ yí.

8 Devizọnwatọ nugbonọ Jehovah tọn lẹ nọ de sọn ojlo mẹ nado setonuna anademẹ yẹwhehọluduta tọn lẹ to whelẹponu. (Hia Heblu lẹ 13:7, 17.) To tintan whenu, mí sọgan nọma yọ́n whẹwhinwhẹ́n he wutu mí dona  hẹn azọ́ndenamẹ mítọn di to aliho tangan de mẹ. Etomọṣo, mí yọnẹn ganji dọ eyin mí kọngbedopọ hẹ vọjlado he Jehovah to bibasi lẹ, enẹ nọ hẹn kọdetọn dagbe lẹ wá.

9. Apajlẹ tẹwẹ mẹho lẹ nọ zedai na agun lọ gando azọ́nwiwa go?

9 Aliho he mẹ mẹho lẹ nọ deanananu te to agun mẹ nọ dohia dọ yé jlo vẹkuvẹku nado wà ojlo Jehovah tọn. (2 Kọl. 1:24; 1 Tẹs. 5:12, 13) Yé nọ desọn ojlo mẹ nado wazọ́n sinsinyẹn bo nọ diọada sọgbe hẹ vọjlado voovo lẹ. Yé nọ yawu basi vọjlado lẹ na mí nido hodo aliho yọyọ he mẹ mí sọgan dọyẹwheho Ahọluduta Jiwheyẹwhe tọn te lẹ. Dile etlẹ yindọ mẹdelẹ sọgan whleawu to tintan whenu nado dọyẹwheho gbọn alokan ji, to bato-glintẹn lẹ kavi to gbangba, yé nọ wá mọ kọdetọn dagbe he e nọ hẹnwa lẹ. Di apajlẹ, gbehosọnalitọ ẹnẹ to Allemagne basi dide nado dekunnu to aigba-denamẹ ajọwiwa tọn he yin vọdona de ji. Michael dọmọ: “Mí tindo mahẹ to sinsẹ̀nzọn wunmẹ ehe mẹ din e ko dẹn taun, enẹwutu ahun mítọn to hihò na obu. Jehovah sọgan ko yọ́n numọtolanmẹ mítọn, na e na mí ayajẹ to lizọnyizọn lọ mẹ to afọnnu lọ, ehe mí ma gán wọn gbede. Lehe homẹ mítọn hùn dọ mí hodo anademẹ he yin nina to Lizọnyizọn Ahọluduta Tọn Mítọn mẹ bo dejido godonọnamẹ Jehovah tọn go do sọ!” Be hiẹ ko wleawufo nado tẹ́n aliho kunnudide tọn yọyọ lẹ pọ́n to aigba-denamẹ mìtọn ji ya?

10. To agọe, diọdo tẹlẹ wẹ wá aimẹ gando Bẹtẹli delẹ go?

10 To whedelẹnu, e nọ biọ dọ diọdo delẹ ni yin bibasi to titobasinanu lọ mẹ. To owhe agọe tọn lẹ mẹ, alahọ delẹ yin kinkọndopọ. Dile etlẹ nọ biọ dọ mẹmẹsunnu po mẹmẹyọnnu he to sinsẹ̀n to Bẹtẹli enẹlẹ po ni basi diọdo lẹ, to ojlẹ vude godo, yé nọ mọ ale he diọdo mọnkọtọn lẹ nọ hẹnwa. (Yẹwh. 7:8) Ayajẹnu daho wẹ e nọ yin na azọ́nwatọ he ze yede jo sọn ojlo mẹ wá enẹlẹ nado sọgan yí adà de wà to whenuho omẹ Jehovah tọn lẹ tọn mẹ!

11-13. Nuhahun tẹlẹ wẹ mẹdelẹ ko pehẹ na diọdo he wá aimẹ gando Bẹtẹli delẹ go?

11 Mí sọgan plọn nuhọakuẹ susu sọn mẹhe to sinsẹ̀n to alahọ he yin kinkọndopọ delẹ mẹ lẹ dè. Mẹdelẹ ko sẹ̀n to sinsẹ̀nzọn whenu-gigọ́ tọn mẹ to Bẹtẹli na owhe susu lẹ. Yè biọ to asu po asi po de si he sẹ̀n to whẹndo Bẹtẹli tọn pẹvi de mẹ to Amérique centrale nado yì sẹ̀n to whẹndo Bẹtẹli Mexique tọn mẹ, ehe klo hugan whẹndo Bẹtẹli tọn yetọn whla 30. Rogelio dọmọ: “E vẹawuna mi taun nado jo whẹndo po họntọn ṣie lẹ po do.” Juan, mẹmẹsunnu devo he si e yin bibiọ te nado sẹtẹn yì Mexique dọmọ: “E taidi dọ n’yin vivọji whladopo dogọ wẹ nkọ, n’dona wleawuna haṣinṣan yọyọ lẹ. E nọ biọ dọ yè ni diọada sọgbe hẹ aṣa yọyọ lẹ po aliho he mẹ mẹdevo lẹ nọ lẹnnupọn te po.”

12 To whenue alahọ he to otò Europe tọn mẹ delẹ yin kinkọndopọ, e yin bibiọ to susu mẹhe to sinsẹ̀n to finẹ lẹ tọn si nado sẹtẹn yì alahọ Allemagne tọn mẹ, podọ yelọsu pehẹ nuhahun lẹ. Mẹdelẹ he sẹtẹn sọn Suisse nọ jẹdò lẹdo osó whanpẹnọ lẹ tọn, podọ mẹdelẹ he wá sọn Autriche nọ jẹdò haṣinṣan pẹkipẹki he yé tindo hẹ họntọn lẹ to Bẹtẹli pẹvi yetọn dai tọn.

13 E nọ biọ dọ mẹhe sẹtẹn yì alahọ otò devo tọn mẹ lẹ ni plọn nado jẹakọ hẹ adọtẹn yọyọ yetọn, wazọ́n hẹ mẹmẹsunnu po mẹmẹyọnnu he yé ma ko yọnẹn dai lẹ po, bo tlẹ sọgan plọn nado wà azọ́n devo. Yé dona diọada sọgbe hẹ agun po aigba-denamẹ yọyọ lọ po, bo tlẹ sọ plọn ogbè devo. Diọdo mọnkọtọn lẹ bibasi sọgan vẹawu. Etomọṣo, hagbẹ whẹndo Bẹtẹli tọn susu wẹ basi diọdo enẹlẹ. Etẹwutu yé do wàmọ?

14, 15. (a) Nawẹ mẹsusu dohia dọ yé nọ wlebòna lẹblanulọkẹyi he yé tindo nado wazọ́n hẹ Jehovah to fidepope gbọn? (b) Aliho tẹ mẹ wẹ yé yin apajlẹ dagbe de na mímẹpo te?

14 Grethel dọmọ: “N’kẹalọyi oylọ-basinamẹ lọ, na aliho enẹ mẹ wẹ n’sọgan dohia Jehovah te dọ owanyi he n’tindo na ẹn zẹ̀  dogbó otò, ohọ̀ kavi lẹblanulọkẹyi depope tọn go.” Dayska dọmọ: “N’yí homẹhunhun do kẹalọyi oylọ-basinamẹ lọ, na n’yọnẹn dọ Jehovah dè wẹ e wá sọn.” André po Gabriela po dọmọ: “Mí mọdọ dotẹnmẹ hundote devo wẹ e yin nado sẹ̀n Jehovah gbọn ojlo mẹdetiti tọn mítọn lẹ zizedo apadopo dali. Mí dọna míde dọ, ‘To whenue mí mọ diọdo he wá sọn Jehovah dè lẹ, nue yọ́n hugan wẹ nado kọngbedopọ hẹ yé kakati nado jẹagọdo yé.’”

Lẹblanulọkẹyi daho hugan he mí tindo wẹ nado wà azọ́n Jehovah tọn!

15 To whenue alahọ lẹ yin kinkọndopọ, hagbẹ whẹndo Bẹtẹli tọn delẹ yin azọ́ndena nado sẹ̀n taidi gbehosọnalitọ. Nuhe jọ do hagbẹ whẹndo Bẹtẹli tọn delẹ go niyẹn to whenue alahọ Danemark, Norvège po Suède po tọn lẹ yin kinkọndopọ nado lẹzun alahọ Scandinavie tọn. Delẹ to omẹ ehelẹ mẹ wẹ Florian po Anja po he dọmọ: “Mí nọ pọ́n azọ́ndenamẹ yọyọ mítọn hlan taidi avùnnukundiọsọmẹnu de. Mí mọdọ, nujiawu wẹ e yin nado yin yiyizan gbọn Jehovah dali mahopọnna fidepope he mí to sinsẹ̀n te. Mí sọgan dọ po ahundopo po dọ mí mọ dona susu yí!” Dile etlẹ yindọ suhugan mítọn sọgan nọma basi diọdo mọnkọtọn lẹ pọ́n gbede, be e ma jẹ dọ mí ni hodo apajlẹ mẹmẹsunnu po mẹmẹyọnnu enẹlẹ po tọn he desọn ojlo mẹ nado ze Ahọluduta lọ to otẹn tintan mẹ ya? (Isa. 6:8) Jehovah nọ dona mẹhe wlebòna lẹblanulọkẹyi yetọn nado wazọ́n hẹ ẹ lẹ to whelẹponu, mahopọnna fidepope he azọ́n lọ sọgan tin te.

TO VIVI LẸBLANULỌKẸYI HE A TINDO NADO WAZỌ́N HẸ JEHOVAH TỌN DÙ!

16. (a) Etẹwẹ Galatianu lẹ 6:4 dọna mí nado nọ wà? (b) Lẹblanulọkẹyi daho hugan tẹwẹ gbẹtọvi depope sọgan tindo?

16 Gbẹtọvi mapenọ lẹ nọ saba yí yede jlẹdo mẹdevo lẹ go, ṣigba Ohó Jiwheyẹwhe tọn dọna mí dọ mí ni nọ na ayidonugo nuhe dopodopo mítọn penugo nado wà. (Hia Galatianu lẹ 6:4.) Suhugan mítọn ma tin to otẹn aṣẹpipa tọn mẹ to titobasinanu lọ mẹ. Podọ, e ma yin mímẹpo wẹ sọgan yin gbehosọnalitọ, mẹdehlan kavi sẹ̀n to Bẹtẹli. Na nugbo tọn, lẹblanulọkẹyi dagbe de wẹ azọ́n ehelẹ yin! Ṣigba, mí ma dona wọnji gbede dọ lẹblanulọkẹyi daho hugan he gbẹtọvi depope sọgan  tindo wẹ dehe mímẹpo tindo to pọmẹ. Enẹ wẹ nado yin azọ́nwatọ hatọ Jehovah tọn to lizọnyizọn Klistiani tọn mẹ. Mí dona wlebòna lẹblanulọkẹyi ehe taun!

17. Etẹlẹ wẹ sọgan jọ do mí go dile e na dẹnsọ bọ aihọn Satani tọn na gbẹ́ pò to ote, ṣigba naegbọn ehe ma dona hẹn mí gbọjọ?

17 Dile e na dẹnsọ bọ aihọn Satani tọn na gbẹ́ pò to ote, mí sọgan nọma penugo nado sẹ̀n Jehovah to gigọ́ mẹ dile mí na ko jlo do. Onú delẹ taidi azọngban whẹndo tọn, nuhahun agbasalilo tọn kavi ninọmẹ devo lẹ sọgan zẹ̀ huhlọn mítọn go. Ṣigba, enẹ ma yin whẹwhinwhẹ́n de nado gbọjọ. Ma yí nukunpẹvi do pọ́n nugopipe he a tindo nado wazọ́n hẹ Jiwheyẹwhe gbọn kunnudide gando oyín etọn po Ahọluduta etọn hinhẹn zun yinyọnẹn to dotẹnmẹ hundote lẹpo whenu po go blo. Onú titengbe lọ wẹ yindọ hiẹ to azọ́nwa hẹ ẹ sọgbe hẹ nugopipe towe bosọ to dẹ̀ho dọ ewọ ni dona mẹmẹsunnu towe he penugo nado wà nususu hugan we lẹ. Flindọ mẹdepope he nọ hẹn gigo wá na oyín Jehovah tọn wẹ họakuẹ to nukun etọn mẹ!

18. Etẹwẹ mí dona ze do apadopo, podọ etẹwutu?

18 Mahopọnna madogán po mapenọ-yinyin mítọn po, homẹ Jehovah tọn nọ hùn nado yí mí zan taidi azọ́nwatọ hatọ etọn lẹ. Lẹblanulọkẹyi nankọ die mí tindo nado wazọ́n hẹ Jiwheyẹwhe mítọn to azán godo tọn ehelẹ mẹ! Enẹwutu, mí dona nọ ze ojlo mẹdetiti tọn mítọn lẹ do apadopo, na mí yọnẹn dọ, to aihọn yọyọ lọ mẹ, Jehovah na na mí dotẹnmẹ nado duvivi “ogbẹ̀ nujọnu tọn lọ” tọn, enẹ wẹ ogbẹ̀ madopodo to ayajẹ po jijọho po mẹ.—1 Tim. 6:18, 19.

Be hiẹ nọ wlebòna lẹblanulọkẹyi he a tindo nado sẹ̀n Jehovah ya? (Pọ́n hukan 16-18)

19. Etẹwẹ Jehovah dopà nado wà na mí to sọgodo?

19 Dile mí ko tin to bẹbẹnu aihọn yọyọ lọ tọn, lẹnnupọndo nuhe Mose dọna Islaelivi lẹ ojlẹ vude whẹpo yé do biọ Aigba Pagbe tọn lọ mẹ ji. E dọmọ: “OKLUNỌ lọ Jiwheyẹwhe towe na hẹn we zun susunọ to azọ́n alọ towe mẹ tọn lẹpo mẹ.” (Deut. 30:9) To whenue Amagẹdọni na ko juwayi, mẹhe hẹn alọnu yetọn ján to azọ́nwiwa hẹ Jiwheyẹwhe mẹ lẹ na dugu aigba he ewọ ko dopagbe etọn na yé tọn. Enẹgodo, mí na na ayidonugo azọ́ndenamẹ yọyọ devo, enẹ wẹ nado hẹn aigba lọ zun paladisi whanpẹnọ de!