Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) SEPTEMBRE 2014

Mì Nọ Flin Mẹhe to Sinsẹ̀nzọn Whenu-Gigọ́ Tọn mẹ Lẹ

Mì Nọ Flin Mẹhe to Sinsẹ̀nzọn Whenu-Gigọ́ Tọn mẹ Lẹ

“Whepoponu wẹ mí nọ flin azọ́n nugbonọ-yinyin tọn mìtọn po tuklajijẹ owanyinọ mìtọn po.”—1 TẸS. 1:3.

1. Numọtolanmẹ tẹwẹ Paulu tindo na mẹhe sẹ̀n Jehovah po vivẹnudido po lẹ?

APỌSTELI PAULU nọ flin mẹhe nọ wazọ́n sinsinyẹn na wẹndagbe lọ tọn wutu lẹ. Paulu wlan dọmọ: “Whepoponu wẹ mí nọ flin azọ́n nugbonọ-yinyin tọn mìtọn po tuklajijẹ owanyinọ mìtọn po gọna akọndonanu mìtọn na todido mìtọn to Oklunọ mítọn Jesu Klisti mẹ to Jiwheyẹwhe mítọn podọ Otọ́ mítọn nukọn.” (1 Tẹs. 1:3) Na nugbo tọn, Jehovah lọsu nọ flin tuklajijẹ owanyinọ mẹhe to sinsẹ̀n ẹn po nugbonọ-yinyin po lẹpo tọn, vlavo ninọmẹ gbẹ̀mẹ tọn yetọn na yé dotẹnmẹ nado wà nususu kavi vude.—Heb. 6:10.

2. Etẹwẹ mí na gbadopọnna to hosọ ehe mẹ?

2 To hohowhenu podọ to egbehe, susu to Klistiani hatọ mítọn lẹ mẹ ko yí nususu do sanvọ́ nado sọgan sẹ̀n Jehovah to sinsẹ̀nzọn whenu-gigọ́ tọn mẹ. To hosọ ehe mẹ, mí na mọ lehe mẹdelẹ sẹ̀n Jehovah do to owhe kanweko tintan whenu. Mí nasọ gbadopọnna adà sinsẹ̀nzọn whenu-gigọ́ tọn delẹ to ojlẹ mítọn mẹ, bo na mọ lehe mí sọgan nọ flin mẹmẹsunnu po mẹmẹyọnnu vivẹ́ mítọn lẹ po he ze yede jo nado sẹ̀n to aliho vonọtaun enẹlẹ mẹ do.

KLISTIANI OWHE KANWEKO TINTAN TỌN LẸ

3, 4. (a) Nawẹ mẹdelẹ sẹ̀n to owhe kanweko tintan whenu gbọn? (b) Nawẹ nuhudo agbasa tọn yetọn lẹ yin nukunpedego gbọn?

3 Ojlẹ vude to whenue Jesu yí baptẹm godo, e jẹ yẹwhehodọ ji gando Ahọluduta lọ go, podọ e plọn mẹdevo lẹ nado wà azọ́n dopolọ.  (Luku 3:21-23; 4:14, 15, 43) To okú etọn godo, apọsteli etọn lẹ jẹ anadena azọ́n yẹwhehodidọ tọn lọ ji bo hẹn ẹn gbayipe. (Owalọ 5:42; 6:7) Klistiani delẹ, taidi Filippi, sẹ̀n taidi wẹndagbe-jlatọ po mẹdehlan po to Palestine. (Owalọ 8:5, 40; 21:8) Paulu po mẹdevo lẹ po zingbejizọnlin yì aigba-denamẹ he dẹn hugan lẹ ji. (Owalọ 13:2-4; 14:26; 2 Kọl. 1:19) Mẹdevo lẹ, taidi Silvanu (Sila), Malku po Luku po, sẹ̀n taidi wekantọ lẹ. (1 Pita 5:12) Mẹmẹyọnnu lẹ wazọ́n to kọndopọ mẹ hẹ mẹmẹsunnu nugbonọ enẹlẹ. (Owalọ 18:26; Lom. 16:1, 2) Numimọ ojlofọndotenamẹ tọn yetọn gọalọ nado hẹn Owe-wiwe Glẹki tọn lẹ yin awuvivinu de nado hia bosọ dohia dọ Jehovah nọ flin devizọnwatọ etọn lẹ nugbonugbo bo nọ penukundo nuhudo yetọn lẹ go.

4 Nawẹ devizọnwatọ whenu-gigọ́ tọn dowhenu tọn enẹlẹ penukundo yede go to agbasa-liho gbọn? To ojlẹ delẹ mẹ, Klistiani hatọ lẹ nọ hẹjó yé bo nọ gọalọna yé to aliho devo lẹ mẹ, ṣigba yé ma nọ biọ alọgọ mọnkọtọn lẹ. (1 Kọl. 9:11-15) Mẹdelẹ desọn ojlo mẹ bo gọalọna yé, podọ agun delẹ sọ wàmọ ga. (Hia Owalọ lẹ 16:14, 15; Filippinu lẹ 4:15-18.) Paulu po azọ́nwatọgbẹ́ etọn lẹ po wà agbasazọ́n whenu-gli tọn nado sọgan pen b ukundo nuhudo yetọn titi lẹ go.

DEVIZỌNWATỌ WHENU-GIGỌ́ TỌN LẸ TO EGBEHE

5. Etẹwẹ yin numọtolanmẹ asu po asi po de tọn gando gbẹzan yetọn to sinsẹ̀nzọn whenu-gigọ́ tọn mẹ go?

5 Mọdopolọ to egbehe, mẹsusu nọ ze yede jo to adà voovo sinsẹ̀nzọn whenu-gigọ́ tọn mẹ. (Pọ́n apotin lọ “ Adà Sinsẹ̀nzọn Whenu-Gigọ́ Tọn Lẹ.”) Etẹwẹ yin numọtolanmẹ yetọn gando gbẹzan enẹ he yé de nado zan go? A sọgan kàn kanbiọ enẹ sè yé, podọ a na mọaleyi sọn gblọndo he yé na na we mẹ. Lẹnnupọndo apajlẹ dopo ji: Mẹmẹsunnu de he sẹ̀n taidi gbehosọnalitọ whepoponu tọn, gbehosọnalitọ titengbe, mẹdehlan bo gbẹ́ to sinsẹ̀n taidi dopo to hagbẹ whẹndo Bẹtẹli tọn mẹ to tògodo dọmọ: “N’mọdọ nudide dagbe hugan he n’sọgan basi to gbẹ̀mẹ wẹ nado biọ sinsẹ̀nzọn whenu-gigọ́ tọn mẹ. To whenue n’tindo owhe 18, e vẹawuna mi taun nado basi nudide dopo to wehọmẹ alavọ tọn yìyì, agbasazọ́n he pekuẹ ganji de po gbehosọnalitọ bibasi po ṣẹnṣẹn. Numimọ ṣie dohia dọ Jehovah ma nọ wọn avọ́sinsan he mẹde basi nado sẹ̀n ẹn to sinsẹ̀nzọn whenu-gigọ́ tọn mẹ. N’penugo nado yí nugopipe he Jehovah na mi lẹpo zan to aliho delẹ mẹ, ehe ma sọgan ko yọnbasi eyin agbasazọ́n wẹ n’de.” Asi etọn dọmọ: “Azọ́ndenamẹ he n’mọyi lẹpo gọalọna mi nado whèwhín. Mí mọ hihọ́-basinamẹ po anademẹ Jehovah tọn po whlasusu podọ to aliho delẹ mẹ, ehe ma sọgan ko yọnbasi gbede eyin mí de nado zan gbẹzan ahọvi de tọn. N’nọ dọnudo Jehovah to azán lẹpo ji na gbẹzan he zan mí te to sinsẹ̀nzọn whenu-gigọ́ tọn mẹ.” Be a jlo na zan gbẹzan mọnkọtọn ya?

6. Numọtolanmẹ tẹwẹ Jehovah nọ tindo gando sinsẹ̀nzọn mítọn go?

6 Nugbo wẹ dọ ninọmẹ mẹdelẹ tọn ma na yé dotẹnmẹ nado tindo mahẹ to sinsẹ̀nzọn whenu-gigọ́ tọn mẹ todin. Etomọṣo, mí sọgan deji dọ Jehovah yọ́n pinpẹn vivẹnudido ahundopo tọn yetọn tọn. Lẹnnupọndo mẹhe go Paulu donù to Filemọni 1-3 mẹ lẹ ji, ehe bẹ mẹhe tin to agun Kọlọsi tọn mẹ lẹpo hẹn. (Hia.) Paulu yọ́n pinpẹn yetọn taun, podọ Jehovah lọsu. Mọdopolọ, Otọ́ olọn mẹ tọn mítọn yọ́n pinpẹn sinsẹ̀nzọn towe tọn. Ṣigba, nawẹ a sọgan gọalọna mẹhe to sinsẹ̀nzọn whenu-gigọ́ tọn mẹ todin lẹ gbọn?

NỌ GỌALỌNA GBEHOSỌNALITỌ LẸ

7, 8. Etẹwẹ sinsẹ̀nzọn gbehosọnalitọ tọn bẹhẹn, podọ nawẹ mẹdevo lẹ to agun lọ mẹ sọgan gọalọna gbehosọnalitọ lẹ gbọn?

7 Taidi wẹndagbe-jlatọ owhe kanweko tintan tọn lẹ, gbehosọnalitọ zohunhunnọ lẹ nọ na tuli agun lẹ taun. Susu yetọn nọ dovivẹnu nado yí gànhiho 70 zan to osun dopo mẹ to lizọnyizọn lọ mẹ. Nawẹ hiẹ sọgan gọalọna yé gbọn?

8 Mẹmẹyọnnu gbehosọnalitọ de he nọ yin Shari dọmọ: “Gbehosọnalitọ lẹ nọ lodo taun, na yé nọ tin to lizọnyizọn lọ mẹ  egbesọegbesọ. Etomọṣo, yé tindo nuhudo tulinamẹ tọn.” (Lom. 1:11, 12) Mẹmẹyọnnu devo he penugo nado basi gbehosọnalitọ na owhe delẹ dọ gando gbehosọnalitọ agun etọn mẹ tọn lẹ go dọmọ: “Yé nọ wazọ́n sinsinyẹn madoalọte. Eyin mẹdevo lẹ de nado ze yé yì lizọnyizọn lọ mẹ, basi oylọna yé nado dùnú dopọ, na yé akuẹ kleun de nado jẹ amì kavi akuẹ kleun devo lẹ, yé nọ yọ́n pinpẹn etọn taun. Enẹ nọ dohia yé dọ a nọ hò yetọn pọ́n.”

9, 10. Etẹwẹ mẹdelẹ nọ wà nado gọalọna gbehosọnalitọ lẹ to agun yetọn mẹ?

9 Be e na jlo we nado nọ gọalọna gbehosọnalitọ lẹ to lizọnyizọn lọ mẹ ya? Gbehosọnalitọ de he nọ yin Bobbi dọmọ: “Mí nọ tindo nuhudo alọgọ tọn taun to osẹ lọ gblamẹ.” Gbehosọnalitọ hatọ etọn de to agun dopolọ mẹ yidogọ dọmọ: “E nọ vẹawu taun nado mọ azọ́nwatọgbẹ́ de to whèmẹ.” Mẹmẹyọnnu de he to sinsẹ̀n to Bẹtẹli Brooklyn tọn todin dọho po homẹhunhun po gando sinsẹ̀nzọn gbehosọnalitọ tọn etọn go dọmọ: “Mẹmẹyọnnu he tindo mọto de dọna mi dọ, ‘Whedepopenu he a ma mọ mẹhe na tọ́n hẹ we, ylọ mi, podọ n’na tọ́n hẹ we to lizọnyizọn lọ mẹ.’ E gọalọna mi taun to gbehosọnalitọ bibasi mẹ.” Podọ Shari dọmọ: “To whenue gbehosọnalitọ tlẹnnọ lẹ lẹkọ sọn lizọnyizọn lọ mẹ godo, yé nọ saba tin yedeṣo. A sọgan nọ basi oylọna mẹmẹsunnu kavi mẹmẹyọnnu tlẹnnọ lẹ sọn ojlẹ de mẹ jẹ devo mẹ nado kọnawudopọ hẹ we to sinsẹ̀n-bibasi whẹndo tọn towe whenu. Eyin a sọ basi oylọna yé nado kọnawudopọ hẹ we to nuwiwa devo lẹ mẹ, ehe na gọalọna yé nado to tuli mọyi zọnmii.”

10 Mẹmẹyọnnu de he ko tin to sinsẹ̀n whenu-gigọ́ tọn mẹ na nudi owhe 50 dọho gando alọgọ he ewọ po mẹmẹyọnnu gbehosọnalitọ tlẹnnọ devo lẹ po mọyi go dọmọ: “Mẹho agun tọn mítọn lẹ nọ dla mí pọ́n to osun awe awe gblamẹ. Yé nọ kanhose mí gando agbasalilo mítọn po agbasazọ́n mítọn po go, bo nọ dindona eyin mí tindo ahunmẹdunamẹnu de. Yé ka nọ wàmọ po ahundopo po. Yé nọ wá owhé mítọn gbè nado sọgan yọnẹn eyin vlavo mí tindo nuhudo alọgọ tọn.” Enẹ sọgan hẹn we flin pinpẹn-nutọn-yinyọnẹn he Paulu tindo na devizọn he tatọ́ whẹndo tọn de wà na ẹn to Efesu.—2 Tim. 1:18.

11. Etẹwẹ sinsẹ̀nzọn gbehosọnalitọ titengbe tọn bẹhẹn?

11 Agun delẹ tindo lẹblanulọkẹyi lọ nado tindo gbehosọnalitọ titengbe lẹ to ṣẹnṣẹn yetọn. Susu mẹmẹsunnu po mẹmẹyọnnu ehelẹ po tọn wẹ nọ yí gànhiho 130 zan to sinsẹ̀nzọn  kunnudegbe tọn mẹ to osun dopodopo mẹ. Na whenu he yé nọ yizan to lizọnyizọn lọ mẹ bosọ nọ gọalọ to aliho devo lẹ mẹ wutu, yé ma nọ yí whenu depope zan nado wà agbasazọ́n de. Mẹdelẹ nọ yí whenu vude poun zan to agbasazọ́n de mẹ. Enẹwutu, wekantẹn alahọ tọn nọ na yé apòmẹ-kuẹ kleun de na yé nido na ayidonugo lizọnyizọn lọ.

12. Nawẹ mẹho agun tọn lẹ po mẹdevo lẹ po sọgan gọalọna gbehosọnalitọ titengbe lẹ gbọn?

12 Nawẹ mí sọgan gọalọna gbehosọnalitọ titengbe lẹ gbọn? Mẹho agun tọn de he nọ wazọ́n to wekantẹn alahọ tọn bo nọ saba tindo hodọdopọ hẹ yé dọmọ: “Mẹho agun tọn lẹ dona nọ dọho hẹ yé, bo yọ́n ninọmẹ yetọn lẹ, podọ to enẹgodo kàn ayiha de nado sọgan gọalọna yé. Kunnudetọ delẹ nọ dọ dọ gbehosọnalitọ titengbe lẹ nọ yin nukunpedego ganji, na yé nọ mọ apòmẹ-kuẹ de yí wutu, ṣigba mẹmẹsunnu lẹ sọgan gọalọna yé to aliho susu mẹ.” Taidi gbehosọnalitọ whepoponu tọn lẹ, e nọ vivi na gbehosọnalitọ titengbe lẹ lọsu nado mọ mẹhe yé na wazọ́n hẹ to lizọnyizọn kunnudegbe tọn mẹ. Be a sọgan gọalọ to aliho enẹ mẹ ya?

NỌ GỌALỌNA NUGOPỌNTỌ LẸDO TỌN LẸ

13, 14. (a) Etẹwẹ mí dona nọ flin gando nugopọntọ lẹdo tọn lẹ go? (b) Etẹwẹ a lẹndọ a sọgan wà nado gọalọna nugopọntọ lẹdo tọn lẹ?

13 Nugopọntọ lẹdo tọn lẹ po asi yetọn lẹ po tindo numimọ bo lodo to gbigbọ-liho bosọ nọ na mí tuli. Etomọṣo, yelọsu tindo nuhudo tulinamẹ tọn gọna mẹmẹsunnu po mẹmẹyọnnu he na wazọ́n hẹ yé to lizọnyizọn lọ mẹ lẹ po tọn. Podọ e sọ nọ vivi na yé eyin yé yin oylọ-basina nado tindo mahẹ to ayidedai delẹ mẹ. Eyin yé jẹazọ̀n kavi yin ginglọn do dotowhé, vlavo na yè jlo na wazọ́n na yé kavi yè to nukunpedo yé go, yé nọ yin homẹmiọnna eyin mẹmẹsunnu lẹ gọalọna yé to nuhudo yetọn lẹ mẹ bo do ojlo ahundopo tọn hia yé. Yí nukun homẹ tọn do pọ́n lehe Luku, “dotozọ́nwatọ mẹyiwanna lọ,” he kàn owe Owalọ lẹ tọn, na ko vẹawu Paulu po gbẹdohẹmẹtọ etọn devo lẹ po do!—Kọl. 4:14; Owalọ 20:5–21:18.

14 Nugopọntọ lẹdo tọn lẹ po asi yetọn lẹ po tindo nuhudo họntọn vivẹ́ lẹ tọn bosọ nọ yiwanna yé taun. Nugopọntọ lẹdo tọn de dọmọ: “E taidi dọ họntọn ṣie lẹ nọ yọ́n whenue n’tindo nuhudo tulinamẹ tọn taun. Yé nọ kàn kanbiọ titengbe delẹ sè, ehe nọ gọalọna mi nado dọ nuhe to ahunmẹduna mi lẹ. Eyin yé tlẹ dotoaina mi poun, n’nọ mọ kọgbọ yí.” Nugopọntọ lẹdo tọn lẹ po asi yetọn lẹ po nọ yọ́n pinpẹn ojlo ahundopo tọn he mẹmẹsunnu po mẹmẹyọnnu yetọn lẹ po nọ dohia yé tọn taun.

NỌ GỌALỌNA HAGBẸ WHẸNDO BẸTẸLI TỌN LẸ

15, 16. Naegbọn azọ́n he mẹhe to sinsẹ̀n to Bẹtẹli po Plitẹnhọ Plidopọ tọn lẹ po nọ wà do yin nujọnu taun, podọ nawẹ mí sọgan nọ gọalọna yé gbọn?

15 Mẹhe nọ sẹ̀n to Bẹtẹli po Plitẹnhọ Plidopọ tọn po lẹdo aihọn pé lẹ nọ gọalọ taun nado nọgodona azọ́n Ahọluduta lọ tọn to otò he go wekantẹn alahọ tọn yetọn nọ penukundo lẹ mẹ. Eyin hagbẹ whẹndo Bẹtẹli tọn lẹ tin to agun kavi lẹdo towe mẹ, nawẹ a sọgan dohia dọ a nọ flin yé gbọn?

16 Tlolo he yé wá Bẹtẹli, ajlù whégbè tọn sọgan nọ wle yé, na yé jo whẹndo po họntọn vivẹ́ yetọn lẹ po do wutu. Lehe yé nọ yọ́n pinpẹn etọn do sọ to whenue hagbẹ whẹndo Bẹtẹli tọn devo lẹ po hagbẹ agun yọyọ yetọn tọn lẹ po nọ jihọntọn hẹ yé! (Malku 10:29, 30) Tito-to-whinnu azọ́nwiwa tọn yetọn nọ na yé dotẹnmẹ nado yì opli lẹ bo tindo mahẹ to sinsẹ̀nzọn kunnudegbe tọn mẹ to osẹ dopodopo mẹ. Ṣigba, sọn ojlẹ de mẹ jẹ devo mẹ, yé nọ tindo azọ́ndenamẹ susu dogọ nado wà. Eyin agun lẹ mọnukunnujẹ ehe mẹ bo nọ dohia dọ yé yọ́n pinpẹn hagbẹ whẹndo Bẹtẹli tọn lẹ tọn po azọ́n sinsinyẹn he wà yé te po, mẹlẹpo wẹ nọ mọaleyi sọn e mẹ.—Hia 1 Tẹsalonikanu lẹ 2:9.

NỌ GỌALỌNA DEVIZỌNWATỌ TÒGODO TỌN LẸ

17, 18. Azọ́ndenamẹ tẹlẹ wẹ sinsẹ̀nzọnwiwa to tògodo bẹhẹn?

17 Mẹhe yigbe nado yì sẹ̀n to tògodo lẹ sọgan pehẹ nuhahun delẹ taidi núdùdù, ogbè, aṣa po ninọmẹ he gbọnvo tlala na dehe yé ko  jẹakọ hẹ to otò yetọn mẹ lẹ po. Naegbọn yé nọ de nado kẹalọyi diọdo titengbe mọnkọtọn lẹ?

18 Delẹ to yé mẹ yin mẹdehlan lẹ, he nọ saba yí suhugan whenu yetọn tọn zan to lizọnyizọn kunnudegbe tọn mẹ, fie mẹsusu sọgan mọaleyi sọn azọ́npinplọn vonọtaun he yé mọyi mẹ te. Wekantẹn alahọ tọn nọ wleawu owhé po apòmẹ-kuẹ kleun de po tọn na mẹdehlan lẹ nado sọgan penukundo nuhudo tangan yetọn lẹ go. Mẹdevo lẹ he to sinsẹ̀n to tògodo nọ yin azọ́ndena nado sẹ̀n to alahọ mẹ kavi nọ gọalọ nado gbá wekantẹn alahọ tọn lẹ, wekantẹn lẹdogbedevomẹ tọn lẹ, Plitẹnhọ Plidopọ tọn lẹ kavi Plitẹnhọ Ahọluduta tọn lẹ. Yé nọ mọ núdùdù, adọtẹn kleun de po nukunpedomẹgo devo lẹ po yí. Taidi hagbẹ whẹndo Bẹtẹli tọn lẹ, yé nọ yì opli lẹ to gbesisọ mẹ bo nọ tindo mahẹ to lizọnyizọn lọ mẹ, enẹwutu dona de wẹ yé yin to aliho susu mẹ.

19. Etẹwẹ mí dona hẹn do ayiha mẹ gando mẹhe to sinsẹ̀n to tògodo lẹ go?

19 Nawẹ hiẹ sọgan hẹn devizọnwatọ whenu-gigọ́ tọn enẹlẹ do ayiha mẹ gbọn? Onú tintan he a dona yọnẹn wẹ yindọ yé sọgan nọma jẹakọ hẹ núdùdù lẹdo lọ mẹ tọn delẹ. Enẹwutu, to whenue a to oylọ-basina yé nado wá dùnú hẹ we, a sọgan kanse yé jẹnukọn nuhe sọgan yọ́n dù na yé kavi he yé na jlo nado dù pọ́n. Nọ fahomẹ hẹ yé dile yé to ogbè po aṣa lẹdo lọ mẹ tọn po plọn. E sọgan yí whenu whẹpo yé nido nọ mọnukunnujẹ nuhe dọ a te lẹpo mẹ, ṣigba a sọgan gọalọna yé po homẹdagbe po nado yọ́n lehe yè nọ ylọ hogbe lẹ do ganji. Yé tindo ojlo nado plọn onú yọyọ lẹ!

20. Aliho dagbe tẹ mẹ wẹ mí sọgan flin devizọnwatọ whenu-gigọ́ tọn lẹ po mẹjitọ yetọn lẹ po te?

20 Dile ojlẹ to yìyì, devizọnwatọ whenu-gigọ́ tọn he to sinsẹ̀n to fie dẹn do otò yetọn mẹ lẹ sọgan basi dide lehe yé na penukundo mẹjitọ yetọn lẹ go do tọn. Eyin mẹjitọ lọ lẹ yin Kunnudetọ, e na ko nọ jlo yé vẹkuvẹku dọ ovi yetọn lẹ ni gbọṣi azọ́ndenamẹ yetọn mẹ. (3 Joh. 4) Nugbo wẹ dọ eyin mẹjitọ yetọn lẹ tindo nuhudo nukunpedomẹgo tọn, devizọnwatọ whenu-gigọ́ tọn lẹ na wà nuhe go yé pé lẹpo, bo na nọ wá gọalọna yé whẹwhẹ dile e sọgan yọnbasi do. Etomọṣo, mẹhe tin to whé lẹ sọgan gọalọna devizọnwatọ whenu-gigọ́ tọn lẹ gbọn alọgigọna mẹjitọ yọnhonọ yetọn lẹ to whenue yé tindo nuhudo etọn dali. Flindọ devizọnwatọ whenu-gigọ́ tọn lẹ tindo azọngban susu lẹ to azọ́n titengbe hugan he ma ko yin wiwà to aihọn mẹ pọ́n lọ mẹ. (Mat. 28:19, 20) Be hiẹ kavi agun towe sọgan gọalọ to whenue mẹjitọ devizọnwatọ whenu-gigọ́ tọn de tindo nuhudo alọgọ tọn ya?

21. Numọtolanmẹ tẹwẹ devizọnwatọ whenu-gigọ́ tọn lẹ nọ tindo gando alọgọ po tuli he mẹdevo lẹ nọ na yé po go?

21 Mẹhe nọ biọ sinsẹ̀nzọn whenu-gigọ́ tọn mẹ lẹ ma nọ wàmọ nado jẹ adọkun, ṣigba nado nanú Jehovah po mẹdevo lẹ po wutu wẹ. Yé nọ yọ́n pinpẹn alọgọ depope he a sọgan na yé tọn taun. Mẹmẹyọnnu de he to sinsẹ̀n to tògodo dọ numọtolanmẹ he mẹsusu tindo dọmọ: “Eyin n’tlẹ mọ wekanhlanmẹ pinpẹn-nutọn-yinyọnẹn tọn kleun de yí, enẹ nọ dohia dọ mẹdevo lẹ nọ flin mi bọ homẹ yetọn nọ hùn do nuhe wà n’te go.”

22. Etẹwẹ yin numọtolanmẹ towe gando sinsẹ̀nzọn whenu-gigọ́ tọn go?

22 Gbẹzan he tindo ale hugan wẹ nado sẹ̀n Jehovah to sinsẹ̀nzọn whenu-gigọ́ tọn mẹ. Mẹhe tin to sinsẹ̀nzọn lọ mẹ lẹ nọ pehẹ avùnnukundiọsọmẹnu lẹ, bo nọ plọn nususu bosọ nọ tindo pekọ. Podọ enẹ nọ gọalọna yé nado wleawudaina sinsẹ̀nzọn ayajẹ whenu dindẹn tọn he to tepọn devizọnwatọ nugbonọ Jehovah tọn lẹpo to Ahọluduta Jiwheyẹwhe tọn glọ. Na mímẹpo ni ‘nọ flin azọ́n nugbonọ-yinyin tọn po tuklajijẹ owanyinọ’ devizọnwatọ whenu-gigọ́ tọn lẹ po tọn.—1 Tẹs. 1:3.