Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) SEPTEMBRE 2014

Kanbiọ lẹ sọn Wehiatọ lẹ Dè

Kanbiọ lẹ sọn Wehiatọ lẹ Dè

Be nuhe Davidi dọ to Psalm 37:25 mẹ po hodidọ Jesu tọn he tin to Matiu 6:33 mẹ po dohia dọ Jehovah ma na dike gbede na Klistiani de ni gbọagba núdùdù he na pé e tọn wẹ ya?

Davidi wlan dọ emi ma ko “mọ yè gbẹ́ dodonọ dai, kavi okún etọn ni to núdùdù biọ.” Ewọ to hodọ to paa mẹ sọn numimọ ede titi tọn mẹ. E yọ́n aliho he mẹ Jiwheyẹwhe nọ penukundomẹgo te ganji. (Ps. 37:25) Ṣigba, hodidọ Davidi tọn ma dohia dọ sinsẹ̀n-basitọ depope ma ko gbọagba nude tọn pọ́n kavi ma na jẹdò nude tọn pọ́n gbede.

Ojlẹ delẹ tin bọ Davidi lọsu jugbọn ninọmẹ he kàn dẹpẹ biọ lẹ mẹ. Dopo to ojlẹ sinsinyẹn enẹlẹ mẹ wẹ whenue e to hinhọ̀nna Sauli. Núdùdù whèdo Davidi bọ e biọ akla he ewọ po mẹhe tin to e dè lẹ po na dù. (1 Sam. 21:1-6) Enẹwutu, to ninọmẹ enẹ mẹ, Davidi ‘biọ núdùdù.’ Etomọṣo, to ojlẹ sinsinyẹn enẹ mẹ, e yọnẹn dọ Jehovah ma gbẹ́ emi dai. Nugbo lọ wẹ yindọ, mí ma mọ hia to fidepope dọ Davidi lẹzun nubiọtọ nado ṣogan nọ mọ núdùdù he e tindo nuhudo etọn nado nọgbẹ̀.

To Matiu 6:33 mẹ, mí mọ jidenamẹ Jesu tọn dọ Jiwheyẹwhe na penukundo nuhudo devizọnwatọ nugbonọ he ze Ahọluduta lọ do otẹn tintan mẹ to gbẹzan yetọn mẹ lẹ tọn go. Jesu dọmọ: “Enẹwutu, mì zindonukọn nado to ahọluduta lọ po dodowiwa etọn po dín whẹ́, podọ onú devo ehe lẹpo [ehe bẹ núdùdù, nùnù, po avọ̀ po hẹn] na yin yiyidogọ na mì.” Ṣigba, Jesu sọ dohia dọ na homẹkẹn wutu, “mẹmẹsunnu” etọn lẹ sọgan tindo numimọ huvẹ tọn. (Mat. 25:35, 37, 40) Enẹ jọ do apọsteli Paulu go. To whedelẹnu, e tindo numimọ huvẹ po nugbla po tọn.—2 Kọl. 11:27.

Jehovah dọna mí dọ yè na do homẹkẹn mí to aliho voovo lẹ mẹ. Ewọ sọgan dike bọ mí na doakọnna ohẹ́n dile mí to vivẹnudo nado na gblọndo na whẹsadokọnamẹ he Lẹgba fọndote. (Job 2:3-5) Di apajlẹ, delẹ to Klistiani hatọ mítọn lẹ mẹ, taidi mẹhe yin wiwle do opá yasanamẹ Nazi tọn mẹ lẹ, ko wá mọ yede to owù mẹ na homẹkẹn wutu. Núdùdù ma mọ dù yin dopo to aliho he Lẹgba nọ yizan lẹ mẹ nado hẹn tenọgli Kunnudetọ lẹ tọn gble. Kunnudetọ he yin nugbonọ lẹ setonuna Jehovah; podọ ewọ ma gbẹ́ yé dai. E dike bọ yé jugbọn whlepọn enẹ mẹ, kẹdẹdile e nọ na dotẹnmẹ whlepọn paa devo lẹ nado wá Klistiani lẹpo ji do. Ṣigba, ayihaawe ma tin dọ Jehovah nọ nọgodona mẹhe nọ jiya na oyín etọn wutu lẹpo. (1 Kọl. 10:13) Mí sọgan hẹn ohó he tin to Filippinu lẹ 1:29 mẹ do ayiha mẹ, ehe dọmọ: “Mìwlẹ wẹ lẹblanulọkẹyi lọ ko yin nina na Klisti tọn wutu, e ma yin nado tindo yise to ewọ mẹ kẹdẹ gba, ṣigba nado jiya na ewọ tọn wutu ga.”

Jehovah dopagbe dọ emi na tin hẹ devizọnwatọ emitọn lẹ. Di apajlẹ, Isaia 54:17 dọmọ: “Avùnhonu depope he yè jlẹ do gowe ma na wà nude.” Opagbe ehe po devo lẹ po hẹn mí deji dọ omẹ Jiwheyẹwhe tọn lẹ na yin hihọ́-basina taidi pipli de. Ṣigba, Klistiani dopodopo sọgan jugbọn whlepọn lẹ mẹ, etlẹ yin kakajẹ okú.