Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) AOÛT 2014

Nọ Yí Ohó Jiwheyẹwhe Tọn Zan—Na E Tin to Ogbẹ̀!

Nọ Yí Ohó Jiwheyẹwhe Tọn Zan—Na E Tin to Ogbẹ̀!

“Ohó Jiwheyẹwhe tọn tin to ogbẹ̀ bo tindo huhlọn.”—HEB. 4:12.

1, 2. Azọ́n tẹwẹ Jehovah dena Mose, podọ jide tẹwẹ E sọ na ẹn?

MÍ NI dọ dọ a yin dide taidi afọzedaitọ de nado dọhona ahọlu he yin huhlọnnọ hugan to aigba ji do omẹ Jehovah tọn lẹ tamẹ. Etẹwẹ na yin numọtolanmẹ towe? Hiẹ sọgan mọdọ a ma pegan podọ obu nasọ di we sọmọ bọ a ma na penugo nado dọho. Nawẹ a na wleawuna nuhe a na dọ gbọn? Etẹwẹ a na wà na hodidọ towe nido dutomẹji taidi afọzedaitọ Jiwheyẹwhe ganhunupotọ lọ tọn?

2 Ninọmẹ mọnkọtọn pẹpẹ mẹ wẹ Mose mọ ede te. Jehovah ko do ewọ he “yin homẹmimiọnnọ tlala hú mẹhe tin to nukunmẹ aigba lọ tọn ji lẹpo” hlan Falo dè nado whlẹn omẹ Jiwheyẹwhe tọn lẹ sọn kọgbidinamẹ po afanumẹ-yinyin po mẹ to Egipti. (Sọh. 12:3) Dile nujijọ lẹ na wá dohia do, Falo yin dawe goyitọ de he ma nọ símẹ. (Eks. 5:1, 2) Etomọṣo, Jehovah jlo dọ Mose ni degbena Falo nado tún afanumẹ livi susu etọn lẹ dote bo dike yé ni yì sọn otò etọn mẹ! Owhẹ̀ Mose tọn whẹ́n nado kanse Jehovah dọmọ: “Mẹnu wẹ yẹn, bọ yẹn nado yì Falo dè, bọ yẹn nado hẹn ovi Islaeli tọn lẹ tọ́n sọn Egipti?” Mose na ko mọdọ emi ma pegan nado wàmọ. Ṣigba, Jiwheyẹwhe na ẹn jide dọ emi ma na jo e do. Jehovah dọmọ: “Nugbonugbo yẹn na tin po hiẹ po.”—Eks. 3:9-12.

3, 4. (a) Naegbọn Mose do to budi? (b) Etẹwẹ sọgan hẹn we tindo numọtolanmẹ taidi Mose tọn nkọ?

3 Naegbọn Mose do to budi? E họnwun dọ e to budi dọ Falo ma  na kẹalọyi kavi dotoaina afọzedaitọ Jehovah Jiwheyẹwhe tọn. Mose sọ to budi dọ omẹ emitọn titi lẹ ma na yise dọ Jehovah ko de emi nado plan yé tọ́n sọn Egipti. Enẹwutu, Mose dọna Jehovah dọmọ: “Doayi e go, yé ma to na nató ogbè ṣie gba: na yé na dọ, OKLUNỌ ma ko sọawuhia hlan we gba.”—Eks. 3:15-18; 4:1.

4 Nuhe Jehovah dọna Mose po nujijọ he bọdego lẹ po plọn mí onú titengbe de. Nugbo wẹ dọ hiẹ sọgan nọma dọhona togán daho de gbede. Ṣigba, be e ko vẹawuna we pọ́n nado dọho gando Jiwheyẹwhe po Ahọluduta etọn po go na mẹhe a nọ dukosọ hẹ egbesọegbesọ lẹ ya? Eyin mọ wẹ, lẹnnupọndo nuhe mí sọgan plọn sọn apajlẹ Mose tọn mẹ ji.

“ETẸWẸ TIN TO ALỌ TOWE MẸ?”

5. Etẹwẹ Jehovah na Mose, podọ nawẹ enẹ gọalọna ẹn nado duto obu ji gbọn? (Pọ́n yẹdide he tin to bẹjẹeji hosọ ehe tọn.)

5 To whenue Mose dọ dọ yé ma na yí ohó emitọn sè, Jiwheyẹwhe gọalọna ẹn nado wleawudaina nuhe e na pehẹ. Kandai lọ to owe Eksọdusi tọn mẹ dọmọ: “OKLUNỌ sọ dọhlan [Mose], Etẹwẹ tin to alọ towe mẹ nẹ? Ewọ sọ dọmọ, Opò de. Ewọ sọ dọmọ, Ze e dlan aigba. Ewọ sọ ze e dlan aigba, e sọ lẹzun odàn de; Mose sọ họnyi sọn nukọn etọn. OKLUNỌ lọ sọ dọhlan Mose, De alọ towe jẹgbonu, bo ze e gbọn osi dali: (ewọ sọ de alọ etọn jẹgbonu bo tẹdo e go, e sọ lẹzun opò to alọ etọn mẹ:) na yé nido yise dọ OKLUNỌ . . . wẹ ko sọawuhia we.” (Eks. 4:2-5) Jiwheyẹwhe na Mose nuhe e sọgan yizan nado dohia dọ Jehovah dè wẹ owẹ̀n emitọn wá sọn. Nuhe ma hugan opò tata de to nukun mẹdevo lẹ tọn mẹ lẹzun onú gbẹ̀te gbọn huhlọn Jiwheyẹwhe tọn dali! Azọ́njiawu ehe na zọ́n bọ ohó Mose tọn lẹ na dutomẹji, bo dohia dọ wẹnsagun Jehovah tọn wẹ ewọ! Enẹwutu, Jehovah dọna ẹn dọmọ: “Hiẹ na ze opò he hẹn to alọ towe mẹ, ehe tọn hiẹ nado basi ohia lẹ.” (Eks. 4:17) Todin he Mose tindo nuhe do aṣẹpipa Jiwheyẹwhe hia to alọ etọn mẹ, e penugo nado yì bo yí adọgbigbo do ze afọ Jiwheyẹwhe tọn dai to omẹ etọn titi lẹ po Falo po nukọn.—Eks. 4:29-31; 7:8-13.

6. (a) Etẹwẹ dona nọ tin to alọ mítọn mẹ to whenue mí to yẹwhehodọ, podọ etẹwutu? (b) Basi zẹẹmẹ lehe “Ohó Jiwheyẹwhe tọn tin to ogbẹ̀” do podọ lehe e “tindo huhlọn” do tọn.

6 Kanbiọ dopolọ sọgan yin kinkanse gando mí go to whenue mí yì nado lá owẹ̀n Biblu tọn na mẹdevo lẹ dọ, “Etẹwẹ tin to alọ towe mẹ?” To whẹho susu mẹ, Biblu nọ tin to alọ mítọn mẹ, bọ mí nọ wleawufo nado yí i zan. Dile etlẹ yindọ, mẹdelẹ sọgan pọ́n Biblu hlan taidi owe de poun, Jehovah nọ dọhona mí gbọn Ohó gbọdo etọn gblamẹ. (2 Pita 1:21) E bẹ opagbe Jiwheyẹwhe tọn lẹ gando nuhe Ahọluduta etọn tọn na wà lẹ go hẹn. Enẹwutu wẹ apọsteli Paulu do wlan dọmọ: “Ohó Jiwheyẹwhe tọn tin to ogbẹ̀ bo tindo huhlọn.” (Hia Heblu lẹ 4:12.) Opagbe Jehovah tọn lẹpo wẹ tindo huhlọn, na ewọ nọ to azọ́nwa madoalọte nado hẹn yé di. (Isa. 46:10; 55:11) Tlolo he mẹde yọ́n nugbo ehe gando Ohó Jiwheyẹwhe tọn go, nuhe e hia to Biblu mẹ sọgan tindo huhlọn sinsinyẹn do gbẹzan etọn ji.

7. Nawẹ mí sọgan ‘nọ yí ohó nugbo tọn lọ zan to aliho he sọgbe mẹ’ gbọn?

7 Na nugbo tọn, Jehovah ko yí Ohó etọn he to ogbẹ̀ do alọ mítọn mẹ, ehe mí sọgan yí do dohia dọ owẹ̀n mítọn wá sọn ewọ dè bo sọgan yin jidedego. Abajọ to whenue Paulu kanwehlan Heblu lẹ, e dotuhomẹna ovi gbigbọmẹ tọn etọn Timoti nado ‘nọ wà nuhe go e pé lẹpo nado nọ yí ohó nugbo tọn lọ zan to aliho he sọgbe mẹ.’ (2 Tim. 2:15) Nawẹ mílọsu sọgan yí ayinamẹ Paulu tọn do yizan mẹ gbọn? Mí na wà ehe, eyin mí nọ yí gbèzeyiaga do hia wefọ he mí ko yí sọwhiwhe do de lẹ, ehe sọgan jẹ ahun gbẹtọ lẹ tọn mẹ. Nado wà enẹ pẹpẹ, alọnuwe pẹvi he yin didetọn to 2013 lẹ yin awuwlena nado gọalọna mí.

 NỌ HIA WEFỌ HE A KO YÍ SỌWHIWHE DO DE LẸ!

8. Etẹwẹ nugopọntọ sinsẹ̀nzọn tọn de dọ gando alọnuwe pẹvi lọ lẹ go?

8 Alọnuwe pẹvi yọyọ lọ lẹpo wẹ yin awuwlena to aliho dopolọ mẹ. Enẹwutu, eyin mí plọn lehe mí sọgan yí dopo zan do, be mí ko plọn nado nọ yí yemẹpo zan niyẹn. Be e vẹawu nado yí yé zan wẹ? Nugopọntọ sinsẹ̀nzọn tọn de to Hawaii, États-Unis d’Amérique wlan dọmọ: “Mí ma tlẹ yọnẹn dọ azọ́nwanu yọyọ ehelẹ na tindo kọdetọn dagbe sọmọ to azọ́n whédegbè jẹ whédegbè tọn po kunnudide gbangba tọn po mẹ.” E wá mọdọ aliho he mẹ alọnuwe pẹvi lọ lẹ yin kinkan te nọ zọ́n bọ e nọ bọawuna gbẹtọ lẹ nado dọho, podọ ehe nọ saba dekọtọn do hodọdopọ dagbe de mẹ. E mọdọ kanbiọ po gblọndo etọn voovo he tin to adà tintan alọnuwe pẹvi lọ lẹ tọn ji po wẹ zọ́n. Whétọ lọ ma na hanú dọ gblọndo emitọn ma na sọgbe.

9, 10. (a) Nawẹ alọnuwe pẹvi mítọn lẹ nọ deanana mí nado yí Biblu zan gbọn? (b) Alọnuwe pẹvi tẹwẹ a nọ yizan bo nọ tindo kọdetọn dagbe hugan, podọ etẹwutu?

9 Alọnuwe pẹvi lọ lẹ dopodopo nọ deanana mí nado hia wefọ he yin dide po sọwhiwhe po de. Di apajlẹ, pọ́n alọnuwe pẹvi lọ Be Yajiji Na Wá Doalọte Gbèdopo Ya? Vlavo whétọ lọ na gblọndo dọ “mọwẹ” “lala” kavi “n’ma yọnẹn,” hùn alọnuwe pẹvi lọ do ṣẹnṣẹn bo dọ dọ, “Nuhe Biblu dọ die.” Enẹgodo, hia Osọhia 21:3, 4.

10 Mọdopolọ, to whenue hiẹ to alọnuwe pẹvi lọ Nukun Tẹwẹ Hiẹ Nọ Yí Do Pọ́n Biblu? yizan, whétọ de sọgan de gblọndo depope to adà tintan alọnuwe pẹvi lọ tọn ji. Hùn alọnuwe lọ do ṣẹnṣẹn poun bo dọmọ: “Biblu dọ dọ ‘Owe-wiwe lẹpo wẹ yin gbigbọdo sọn Jiwheyẹwhe dè.’” Hiẹ sọgan yidogọ dọ, “Wefọ lọ dọ nususu hugan mọ.” Enẹgodo, hùn Biblu towe do 2 Timoti 3:16, 17 bo hia wefọ lọ pete.

11, 12. (a) Etẹwẹ nọ hẹn ayajẹ wá na we to lizọnyizọn lọ mẹ? (b) Nawẹ alọnuwe pẹvi lẹ sọgan gọalọna we nado wleawuna gọyìpọn lẹ gbọn?

11 Nuyiwa whétọ lọ tọn wẹ na do obá he mẹ a na hia alọnuwe pẹvi lọ bo dọhodeji hẹ ẹ jẹ hia. To whẹho susu mẹ, to whenue a yí alọnuwe pẹvi de na gbẹtọ lẹ godo, wefọ delẹ hihia sọn Ohó Jiwheyẹwhe tọn mẹ na hẹn ayajẹ wá na we, eyin etlẹ yin dopo kavi awe to dlapọn towe tintan whenu. Hiẹ sọgan lẹkọyi to whedevonu nado zindonukọn to hodọdopọ lọ mẹ.

12 Adà godo tọn alọnuwe pẹvi lọ lẹ  dopodopo tọn bẹ kanbiọ de hẹn to hosọ lọ “Dindonanu” glọ, po wefọ he ji mí sọgan dọhodo to gọyìpọn whenu lẹ po. To alọnuwe pẹvi lọ Etẹwẹ Yin Linlẹn Towe Gando Sọgodo Go? mẹ, kanbiọ he mí sọgan yizan to dlapọn he bọdego whenu wẹ “Etẹwẹ Jiwheyẹwhe na wà nado hẹn aihọn ehe pọnte dogọ?” Matiu 6:9, 10 po Daniẹli 2:44 po yin dide do finẹ. Na nuhe dù alọnuwe pẹvi lọ, Be Oṣiọ lẹ Sọgan Gọwá Nọgbẹ̀ Nugbonugbo Ya? kanbiọ he mí sọgan yizan to dlapọn he bọdego whenu wẹ “Naegbọn mí do nọ poyọnho bo nọ kú?” Gẹnẹsisi 3:17-19 po Lomunu lẹ 5:12 po yin dide do finẹ.

13. Nawẹ hiẹ sọgan yí alọnuwe pẹvi lẹ zan nado bẹ plọnmẹ Biblu lẹ jẹeji gbọn?

13 Nọ yí alọnuwe pẹvi lẹ zan nado bẹ plọnmẹ Biblu lẹ jẹeji. Eyin mẹde yí ohia he tin to adà godo tọn alọnuwe pẹvi de tọn ji zan to Intẹnẹt ji, ewọ na yì nọtẹn Intẹnẹt tọn mítọn ji, fie e na yin tuli na nado plọn Biblu te. Alọnuwe pẹvi lọ lẹ sọ zinnudo alọnuwe de ji he nọ yin Wẹndagbe de sọn Jiwheyẹwhe Dè! bo dlẹnalọdo nupinplọn tangan delẹ to e mẹ. Di apajlẹ, alọnuwe pẹvi lọ, Mẹnu Wẹ to Gandu Do Aihọn Ji Taun? dlẹnalọdo nupinplọn 5tọ to alọnuwe enẹ mẹ. Alọnuwe pẹvi lọ, Etẹwẹ Sọgan Hẹn Ayajẹ Wá Whẹndo Mẹ? dlẹnalọdo nupinplọn 9tọ to alọnuwe enẹ mẹ. Eyin hiẹ nọ yí alọnuwe pẹvi lẹ zan to aliho he mẹ yé yin awuwlena te mẹ, a na wleawuna aṣa dagbe nado nọ yí Biblu zan to dlapọn tintan whenu podọ to gọyìpọn lẹ whenu. Taidi kọdetọn de, enẹ na zọ́n bọ hiẹ na bẹ plọnmẹ Biblu susu jẹeji. Onú devo tẹwẹ hiẹ sọgan wà nado nọ yí Ohó Jiwheyẹwhe tọn zan po kọdetọn dagbe po to lizọnyizọn towe mẹ?

NỌ DỌHODO NUHE NỌ DUAHUNMẸNA GBẸTỌ LẸ JI

14, 15. Nawẹ hiẹ sọgan hodo apajlẹ Paulu tọn to lizọnyizọn lọ mẹ gbọn?

14 Paulu tindo ojlo vẹkuvẹku nado nọ diọadana hodidọ etọn sọgbe hẹ “suhugan gbẹtọ lẹ tọn” to lizọnyizọn etọn mẹ. (Hia 1 Kọlintinu lẹ 9:19-23.) Doayi e go dọ Paulu tindo todido ‘nado duale Ju lẹ tọn, nado duale mẹhe to osẹ́n glọ lẹ tọn, nado duale mẹhe ma tindo osẹ́n lẹ tọn, podọ nado duale madogánnọ lẹ tọn.’ Na nugbo tọn, e jlo na gọalọna “gbẹtọ wunmẹ lẹpo, na [ewọ] nido gbọn aliho lẹpo mẹ whlẹn mẹdelẹ gán.” (Owalọ 20:21) Nawẹ mí sọgan hodo apajlẹ Paulu tọn gbọn to whenue mí to awuwle nado yì lá nugbo lọ na “gbẹtọ wunmẹ lẹpo” to aigba-denamẹ mítọn ji?—1 Tim. 2:3, 4.

15 Nuzedonukọnnamẹ he mí sọgan yizan lẹ nọ yin awuwlena do Lizọnyizọn Ahọluduta Tọn Mítọn mẹ to osun dopodopo mẹ. Nọ yí yé zan. Ṣigba, eyin onú devo lẹ nọ duahunmẹna gbẹtọ lẹ to aigba-denamẹ towe ji, nọ wleawuna nuzedonukọnnamẹ he na sọgbe hẹ nuhudo yetọn lẹ. Lẹnnupọndo lẹdo he mẹ a nọ nọ̀, mẹhe nọ nọ̀ lẹdo lọ mẹ lẹ, po nuhe nọ duahunmẹna yé hugan lẹ po ji. Enẹgodo, dín wefọ he dọhodo nuhudo yetọn lẹ ji. Nugopọntọ lẹdo tọn de dọho gando aliho he mẹ ewọ po asi etọn po nọ na ayidonugo Biblu te go dọmọ: “Suhugan whétọ lẹ tọn na na mí dotẹnmẹ nado hia wefọ dopo eyin mí nọ nọ̀ glido bo yì nuagokun lọ ji. To whenue mí ko dọnudo whétọ lọ sọgbe hẹ aṣa yetọn po Biblu mítọn he yin hùnhùn po to alọmẹ, mí nọ hia wefọ lọ.” Hosọ, kanbiọ, po wefọ delẹ po tin to hukan he bọdego lẹ mẹ, ehe hiẹ sọgan tẹnpọn to aigba-denamẹ mìtọn ji.

Be hiẹ nọ yí Biblu po alọnuwe pẹvi lẹ po zan po kọdetọn dagbe po to lizọnyizọn towe mẹ ya? (Pọ́n hukan 8-13)

16. Nawẹ mí sọgan yí Mika 4:3, 4 zan to lizọnyizọn mítọn mẹ gbọn?

16 Eyin hiẹ nọ nọ̀ lẹdo he mẹ jijọho ma nọ saba tin te, hiẹ sọgan kanse mẹde dọmọ: “Be a lẹndọ e na wá jọ to gbèdopo bọ hiẹ na mọ hosọ ehe to weda tintan linlinwe de tọn ji ya? Hosọ lọ wẹ: ‘Awhàn ma tin to aihọn mẹ ba.’ Nuhe Biblu dọ to Mika 4:3, 4 mẹ niyẹn. Na nugbo tọn, Biblu bẹ opagbe Jiwheyẹwhe tọn susu he gando ojlẹ ayajẹ tọn he ja to sọgodo go hẹn.” Enẹgodo, hia dopo to opagbe enẹlẹ mẹ na ẹn sọn Biblu mẹ.

17. Nawẹ hiẹ sọgan yí Matiu 5:3 zan to hodọdopọ de whenu gbọn?

 17 Be e nọ vẹawuna mẹsusu to lẹdo towe mẹ nado mọ dùdù po nùnù po ya? Eyin mọ wẹ, hiẹ sọgan bẹ hodọdopọ jẹeji gbọn kanbiọ ehe yiyizan dali dọmọ: “Akuẹ nẹmu wẹ sunnu de dona dín na whẹndo etọn nido sọgan tindo ayajẹ?” To whenue mẹlọ dọ akuẹ he e lẹn godo, hiẹ sọgan dọmọ: “Sunnu susu nọ dín akuẹ he hugan mọ, ṣigba whẹndo yetọn ma nọ tindo pekọ. Enẹwutu, etẹ sin nuhudo wẹ yé tindo na taun tọn?” Enẹgodo, hia Matiu 5:3 bo biọ to e si nado plọn Biblu hẹ ẹ.

18. Nawẹ hiẹ sọgan yí Jelemia 29:11 zan nado miọnhomẹna mẹdevo lẹ gbọn?

18 Be mẹhe nọ nọ̀ lẹdo towe mẹ lẹ to yaji na nugbajẹmẹji de jọ to agọe wutu wẹ ya? A sọgan bẹ hodọdopọ jẹeji dọmọ: “Nuhewutu n’do wáfi wẹ nado miọnhomẹna we. (Hia Jelemia 29:11.) Be a doayi onú awe he Jiwheyẹwhe jlo na mí lẹ go to wefọ ehe mẹ ya? Enẹ wẹ ‘jijọho’ po ‘todido’ po. Be homẹ towe ma hùn nado yọnẹn dọ ewọ jlo gbẹzan dagbe na mí ya? Ṣigba, nawẹ enẹ na yọnbasi gbọn?” Enẹgodo, dọhodo nupinplọn he sọgbe de ji to alọnuwe lọ, Wẹndagbe De mẹ.

19. Nawẹ mí sọgan yí Osọhia 14:6, 7 zan nado dọho hẹ sinsẹ̀nnọ lẹ gbọn?

19 Be gbẹtọ lẹ yin sinsẹ̀nnọ to lẹdo towe mẹ ya? Eyin mọ wẹ, hiẹ sọgan bẹ hodọdopọ jẹeji gbọn kanbiọ ehe kinkanse dali dọmọ: “Eyin angẹli de dọhona we, be hiẹ na dotoaina nuhe e jlo na dọ ya? (Hia Osọhia 14:6, 7.) Eyin angẹli lọ dọna we dọ a ni ‘dibusi Jiwheyẹwhe,’ be e ma na yin nujọnu nado dindona Jiwheyẹwhe he hodọ e te ya? Mí ni dọ dọ angẹli lọ dọna mí dọ ‘Jiwheyẹwhe he dá olọn po aigba po wẹ.’ Mẹnu wẹ ewọ?” Enẹgodo hia Psalm 124:8 he dọmọ: “Alọgọ mítọn tin to oyín OKLUNỌ Mẹhe dá olọn po aigba po tọn mẹ.” Enẹgodo, basi zẹẹmẹ susu lẹ na ẹn dogọ gando Jehovah Jiwheyẹwhe go.

20. (a) Aliho tẹ mẹ wẹ mí sọgan yí Howhinwhẹn lẹ 30:4 zan nado do yinkọ Jiwheyẹwhe tọn hia mẹde to Biblu mẹ te? (b) Wefọ tẹwẹ a nọ yizan to lizọnyizọn lọ mẹ bo nọ tindo kọdetọn dagbe hugan?

20 Nado bẹ hodọdopọ jẹeji hẹ jọja de, hiẹ sọgan dọmọ: “N’jlo na hia wefọ de na we he kàn kanbiọ titengbe hugan de sè. (Hia Howhinwhẹn lẹ 30:4.) Gbẹtọvi depope ma sọgan wà nuhe yin didọ to wefọ ehe mẹ, enẹwutu Mẹdatọ mítọn wẹ e dona yin. * Nawẹ mí sọgan yọ́n yinkọ etọn gbọn? Homẹ ṣie na hùn nado do yinkọ etọn hia we to Biblu mẹ.”

NỌ YÍ HUHLỌN HE OHÓ JIWHEYẸWHE TỌN TINDO ZAN TO LIZỌNYIZỌN TOWE MẸ

21, 22. (a) Nawẹ wefọ he mí yí sọwhiwhe do de lẹ sọgan diọ gbẹzan gbẹtọ lẹ tọn gbọn? (b) Etẹwẹ a magbe nado nọ wà to lizọnyizọn towe mẹ?

21 Hiẹ ma sọgan yọ́n lehe wefọ he a yí sọwhiwhe do de lẹ na yinuwado gbẹtọ lẹ ji do. Di apajlẹ, Kunnudetọ awe to Australie húhúhọ̀n nawe de tọn. Dopo to yé mẹ kanse nawe lọ dọ, “Be hiẹ yọ́n yinkọ Jiwheyẹwhe tọn ya?” bo hia wefọ dopo, enẹ wẹ Psalm 83:18. Nawe lọ dọmọ: “E paṣa mi taun! To whenue yé yì godo, n’kùnhún na kilomẹtlu 56 yì ṣọfu he mẹ owe lẹ nọ yin sisà te de mẹ nado pọ́n yinkọ lọ to lẹdogbedevomẹ Biblu tọn devo lẹ po wezẹhomẹ de po mẹ. Todin he n’kudeji dọ Jehovah wẹ oyín Jiwheyẹwhe tọn, n’mọdọ nususu gbẹ́ pò na mi nado plọn.” Ojlẹ vude to enẹgodo, ewọ po asu sọgodo tọn etọn po jẹ Biblu plọn ji podọ to godo mẹ yé yí baptẹm.

22 Ohó Jiwheyẹwhe tọn nọ diọ gbẹzan mẹhe nọ hia ẹ bo nọ tindo yise to opagbe Jehovah tọn he tin to ogbẹ̀ lẹ mẹ lẹ tọn. (Hia 1 Tẹsalonikanu lẹ 2:13.) Owẹ̀n Biblu tọn tindo huhlọn hugan nudepope he mí sọgan dọ nado jẹ ahun gbẹtọ lẹ tọn mẹ. Enẹwutu, mí dona nọ yí Ohó Jiwheyẹwhe tọn zan to dotẹnmẹ hundote depope whenu, na e tin to ogbẹ̀ wutu!

^ huk. 20 Pọ́n Atọ̀họ̀-Nuhihọ́ lọ Tọn 15 mai 2002, weda 5.