Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) AOÛT 2014

 SỌN ONÚ HOHO SẸDOTẸN MÍTỌN

“Eurêka-Drame” Gọalọna Mẹsusu Nado Kẹalọyi Nugbo Biblu Tọn

“Eurêka-Drame” Gọalọna Mẹsusu Nado Kẹalọyi Nugbo Biblu Tọn

“EURÊKA!” Hogbe dopo enẹ zẹẹmẹdo “N’ko mọ ẹn!” To whenue mẹsusu to sika dín vẹkuvẹku to Californie, États-Unis d’Amérique to owhe kanweko 19tọ mẹ, hogbe ehe wẹ sika kùntọ lẹ nọ yizan nado dohia dọ emi ko mọ sika de. Ṣigba, Charles Taze Russell po Biblu Plọntọ hatọ etọn lẹ po mọ nuhe họakuẹ taun de, enẹ wẹ nugbo Biblu tọn. Podọ yé to jejeji nado má ẹn hẹ mẹdevo lẹ.

To alunlun whenu to 1914, gbẹtọ livi susu he tin to tòdaho lẹ mẹ lẹ wẹ pọ́n Photo-Drame de la création,” yèdọ sinima gànhiho ṣinatọ̀n tọn de he yin awuwlena gbọn Ogbẹ́ Biblu Plọntọ Akọjọpli tọn lẹ dali. Sinima he sinai do Biblu ji ehe bẹ yẹdide he nọ zọnpọ hẹ hodidọ, yẹdide sinmẹnọ lẹ, zẹẹmẹ ojlo fọndotenamẹ tọn lẹ, gọna nuhiho dagbe lẹ hẹn sọn bẹjẹeji nudida lẹ tọn gbọn whenuho gbẹtọvi tọn gblamẹ kakajẹ opodo Gandudu Owhe Fọtọ́n Jesu Klisti tọn.—Osọ. 20:4. *

Ṣigba, etẹwẹ dogbọn mẹhe nọ nọ̀ tòpẹvi lẹ mẹ po mẹhe tin to fihe dẹn do tòhomẹ po lẹ dali? Na mẹhe nugbla nugbo tọn to hùhù lẹ nikaa jẹdò etọn wutu, to août 1914 Ogbẹ́ Biblu Plọntọ Akọjọpli tọn lẹ de “Eurêka-Drame” tọ́n, yèdọ adà kleun“Photo-Drame” tọn he ma bẹ yẹdide he nọ whàngo lẹ hẹn. Wunmẹ etọn atọ̀n wẹ yin didetọn, ehe dopodopo yetọn tin to ogbè susu mẹ, podọ mẹde sọgan yí dehe jlo e zan: “Eurêka-Drame X” bẹ hoyidokanji zẹẹmẹ-basitọ lẹ tọn gọna nuhiho lọ lẹpo hẹn. “Eurêka-Drame Y” bẹ hoyidokanji lẹpo gọna yẹdide whanpẹnọ delẹ hẹn. Podọ “Eurêka-Drame pour les familles” bẹ zẹẹmẹ ṣinṣinyan lẹ po ohàn lẹ po hẹn, bo yin awuwlena nado nọ yin yiyizan to whégbè. Mẹhe jlo na yí yé zan sọgan họ̀ glamafonu he ma vẹakuẹ lẹ po nuhe nọ do yẹdide hia lẹ po.

Maṣinu ehe yin yiyizan nado do yẹdide sinmẹnọ adógo tọn lẹ hia

Matin zomọ yẹdide didohia tọn, Biblu Plọntọ lẹ sọgan yì glètoho lẹ mẹ po aigba-denamẹ yọyọ lẹ po ji bo ze sinima he bẹ owẹ̀n Ahọluduta lọ tọn hẹn ehe donukọnnamẹ vọnu. “Eurêka-Drame X” he bẹ nuhiho kẹdẹ hẹn sọgan yin hihò to okle kavi zánmẹ. “Eurêka-Drame Y” sọgan yin yiyizan po miyọ́ngbán vonọtaun de po matin zomọ he nọ zan miyọ́n lẹtliki tọn. Atọ̀họ̀-Nuhihọ́ lọ Tọn Finlande-gbè tọn na linlin dọmọ: “Mí sọgan do yẹdide ehelẹ hia diblayin to fidepope.” Lehe ehe yin nugbo do sọ!

Kakati nado haya nọtẹn aihundida tọn lẹ, Biblu Plọntọ nuyọnẹntọ ehelẹ nọ saba dín ohọ̀ vọnu lẹ  taidi, klasi wehọmẹ tọn, ohọ̀ whẹdatọ lẹ tọn, pinpán glintẹn, podọ etlẹ yin agbà owhé daho de tọn. Whlasusu wẹ yé nọ do nupinpọn lọ hia to gbangba to avọ̀ wewe daho de go, ehe yé nọ plá do ohọ̀ he mẹ yè nọ bẹ núdùdù kanlin lẹ tọn do go. Anthony Hambuch wlan dọmọ: “Glesi lẹ nọ wleawuna nọtẹn nupinpọn tọn kleun de to atin-sinsẹ́n lẹ glọ, bo nọ wleawu atin lẹ tọn, ehe ji gbẹtọ lẹ sọgan sinai do nado duvivi tito nupinpọn lọ tọn.” Pipli “Eurêka-Drame” dohiatọ lẹ tọn ehe nọ hẹn agbànhun de, ehe mẹ yé nọ bẹ azọ́nwanu, agbàn, gòhọ po nuhe yé na yí do danú lẹ po hẹn.

Gbẹtọ he pọ́n “Eurêka-Drame” lẹ jideji sọn omẹ vude ji yì kanweko. To tòpẹvi de mẹ to États-Unis fie gbẹtọ 150 nọ nọ̀, gbẹtọ 400 wẹ wá pọ́n sinima lọ to ohọ̀ wehọmẹ de tọn mẹ. To fidevo lẹ, mẹdelẹ zinzọnlin na kilomẹtlu 8 nado yì pọ́n “Eurêka-Drame” lọ. To Suède, kọmẹnu Charlotte Ahlberg tọn lẹ pli to ohọ̀ pẹvi etọn mẹ nado dotoaina hoyidokanji lọ, podọ ehe “yinuwado” yé ji taun. To Australie, gbẹtọ 1 500 wẹ pọ́n sinima lọ to tòdaho he to olá de mẹ, fie sika nọ yin kùnkùn te. Atọ̀họ̀-Nuhihọ́ lọ Tọn na linlin dọ to wehọmẹ daho lẹ, “yẹdide po hoyidokanji mítọn he yin hihò to glamafonu ji lẹ po yinuwado mẹplọntọ lẹ po wehọmẹvi lẹ po ji taun.” “Eurêka-Drame” gbayipe taun etlẹ yin to fihe sinima lẹ nọ yin didohia te.

NUKUNPIPEDO OKÚN NUGBO LỌ TỌN GO

“Eurêka-Drame” lọ wá lẹzun nuyizan de he yọ́n-na-yizan na “azọ́n klasi didoai tọn,” bọ Biblu Plọntọ lẹ nọ do hodọtọ lẹ hlan nado do klasi Biblu pinplọn tọn yọyọ lẹ ai. Mí ma sọgan dọ gbẹtọ sọha he pọ́n “Eurêka-Drame.” Sinima ehelẹ yin didohia whlasusu to fidopo lọ. Etomọṣo, to 1915 kẹdẹ, 14 to 86 ji pipli “Eurêka-Drame” dohiatọ lẹ tọn wẹ na linlin to gbesisọ mẹ. Nado do sọha linlin he ma yin nina lọ tọn hia, linlin owhe fifo tọn lọ yin bibladopọ, ehe dohia dọ gbẹtọ he hugan livi dopo wẹ ko pọ́n “Eurêka-Drame” lọ. Nudi gbẹtọ 30 000 wẹ basi nuzinzọn nado mọ owe sinai do Biblu ji lẹ yí.

“Eurêka-Drame” sọgan nọma yin finflin to whenuho mẹ, ṣigba sọn Australie jẹ Argentine, sọn Afrique du Sud jẹ Grande-Bretagne, Inde, po Caraïbe po, gbẹtọ livi susu sọgan ko pọ́n sinima vonọtaun ehe. Susu to yé mẹ wẹ kẹalọyi nugbo Biblu tọn, yèdọ nude he họakuẹ hugan sika, podọ yelọsu sọgan dawhá dọ “Eurêka!”

^ huk. 4 Pọ́n “Sọn Onú Hoho Sẹdotẹn Mítọn—Sinima He Hẹn Yise Gbẹtọ lẹ Tọn Lodo to Owhe 100 Die” to Atọ̀họ̀-Nuhihọ́ lọ Tọn 15 février 2014, weda 30-32 mẹ.