Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) MAI 2014

Nawẹ Mí Dona Nọ ‘Na Gblọndo Omẹ Dopodopo’ Gbọn?

Nawẹ Mí Dona Nọ ‘Na Gblọndo Omẹ Dopodopo’ Gbọn?

“Mì gbọ ohó mìtọn ni nọ gọ́ na ojọmiọn, . . . na mì nido sọgan yọ́n lehe mì na nọ gblọnhona ode awetọ do.”—KỌL. 4:6.

1, 2. (a) Dọ numimọ de he do nuhewutu e do yin nujọnu nado nọ kàn kanbiọ dagbe lẹ sè hia. (Pọ́n yẹdide he tin to bẹjẹeji hosọ ehe tọn.) (b) Naegbọn hosọ titengbe delẹ ma dona nọ gbàhundona mí?

TO OWHE delẹ die wayi, mẹmẹyọnnu de po asu mayisenọ etọn po to hodọdopọ gando Biblu go. Asu etọn yin hagbẹ sinsẹ̀n Mẹylọhodotọklisti tọn de tọn. To hodọdopọ yetọn whenu, asu etọn dọ dọ emi yí Atọ̀n-to-Dopomẹ sè. Na asi lọ doayi e go dọ asu lọ sọgan nọma mọnukunnujẹ nuhe Atọ̀n-to-Dopomẹ zẹẹmẹdo na taun tọn mẹ, e yí zinzin do kanse e dọ, “Be a yise dọ Jiwheyẹwhe yin Jiwheyẹwhe bọ Jesu yin Jiwheyẹwhe bọ gbigbọ wiwe sọ yin Jiwheyẹwhe, ṣogan bọ Jiwheyẹwhe dopo wẹ tin kakati nido yin atọ̀n wẹ ya?” E paṣa asu lọ bọ e gblọn dọmọ, “Lala, e ma yin nuhe n’yise niyẹn!” Hodọdopọ ojlofọndotenamẹ tọn de zindonukọn gando omẹ he Jiwheyẹwhe yin na taun tọn go.

2 Numimọ enẹ dohia dọ nujọnu wẹ e yin nado nọ yí zinzin do kàn kanbiọ he yin awuwlena ganji lẹ sè. E sọ do nuagokun de hia: Hosọ sinsinyẹn delẹ taidi Atọ̀n-to-Dopomẹ, olọnzomẹ kavi tintin Mẹdatọ de tọn ma dona nọ gbàhundona mí. Eyin mí nọ ganjẹ Jehovah po azọ́nplọnmẹ he e nọ na mí po go, mí sọgan na gblọndo he dutomẹji, yèdọ gblọndo he na jẹ ahun hosetọ mítọn lẹ  tọn mẹ. (Kọl. 4:6) Todin, mì gbọ mí ni gbadopọnna nuhe lizọnyizọnwatọ kọdetọn dagbenọ lẹ nọ wà to whenue yé to hodọdopọ hẹ mẹdevo lẹ do hosọ mọnkọtọn lẹ ji. Mí na gbadopọnna (1) lehe mí sọgan nọ yí kanbiọ lẹ zan nado whàn todoaitọ lọ nado dọ linlẹn etọn do, (2) lehe mí sọgan yihojlẹdohogo hẹ mẹlọ do nuhe Owe-wiwe lẹ dọ ji do (3) po lehe mí sọgan yí apajlẹ lẹ zan nado hẹn nuagokun lẹ họnwun do po.

NỌ YÍ KANBIỌ LẸ ZAN NADO YỌ́N NUHE MẸLỌ YISE

3, 4. Naegbọn e do yin nujọnu nado nọ yí kanbiọ lẹ zan nado yọ́n nuhe mẹde yise? Na apajlẹ.

3 Kanbiọ lẹ sọgan gọalọna mí nado yọ́n nuhe mẹde yise. Naegbọn e do yin nujọnu? Howhinwhẹn lẹ 18:13 dọmọ: “Ewọ he gblọnho jẹnukọnna sisè, nululu po winyan po wẹ na ẹn.” Na nugbo tọn, whẹpo mí nado bẹ hodọdopọ jẹeji gando nuhe Biblu dọ do hosọ tangan de ji go, e na yọ́n hugan dọ mí ni dovivẹnu nado yọ́n nuhe hosetọ mítọn yise nugbonugbo gando whẹho lọ go. Eyin e ma yin mọ, mí na gú whenu nado to tintẹnpọn nado jẹagọdo linlẹn de he ewọ ma yise pọ́n.—1 Kọl. 9:26.

4 Mí ni dọ dọ mí to hodọ hẹ mẹde do olọnzomẹ ji. Mẹdelẹ yise dọ olọnzomẹ yin nọtẹn de fie mẹylankan lẹ nọ yin yasana te to miyọ́n mẹ. Mẹdevo lẹ sọ tindo linlẹn voovo lẹ gandego. Enẹwutu, mí sọgan dọ dọ: “Na linlẹn voovo wẹ gbẹtọ lẹ nọ tindo gando olọnzomẹ go wutu, etẹwẹ yin linlẹn mìtọn gandego?” To whenue mí ko sè gblọndo mẹlọ tọn godo, mí sọgan gọalọna ẹn nado mọnukunnujẹ nuhe Biblu dọ gando hosọ lọ go mẹ.

5. Nawẹ kanbiọ lẹ yiyizan sọgan gọalọna mí nado yọ́n nuhewutu mẹde do yí nude sè gbọn?

5 Zinzin yíyí do kàn kanbiọ sè sọgan sọ gọalọna mí nado yọ́n nuhewutu mẹde do yí nude sè. Di apajlẹ, mí ni dọ dọ mí dukosọ hẹ mẹde to lizọnyizọn lọ mẹ, bọ e dọ dọ emi ma yise dọ Jiwheyẹwhe tin. Be e sọgbe nado wá tadona lọ kọ̀n dọ mí ko yọ́n nuhewutu mẹlọ do lẹnmọ wẹ ya? Lala. (Ps. 10:4) Mẹdelẹ ma tindo yise to Jiwheyẹwhe mẹ ba, na yajiji vẹadi he yé ko tindo numimọ etọn kavi he yé nọ mọ lẹdo yede pé wutu. E sọgan vẹawuna yé nado yise dọ Mẹdatọ owanyinọ de tin to whenuena yajiji mọnkọtọn lẹ gbayipe. Enẹwutu, eyin whétọ de dohia dọ emi ma yise dọ Jiwheyẹwhe de tin, mí sọgan kanse e dọ, “Sọn whetẹnu gbọ́n wẹ mì yí enẹ sè?” To whenue e na gblọndo godo, mí sọgan kanse e nuhewutu e ma do yise dọ Jiwheyẹwhe tin. Gblọndo etọn sọgan gọalọna mí nado yọ́n aliho dagbe hugan he mẹ mí sọgan gọalọna ẹn te.—Hia Howhinwhẹn lẹ 20:5.

6. Etẹwẹ mí dona nọ wà to kanbiọ kinkanse godo?

6 To kanbiọ kinkanse godo, mí dona dotoaina gblọndo mẹlọ tọn bo pà ẹ na numọtolanmẹ etọn lẹ he e dọna mí. Di apajlẹ, mẹde sọgan dohia dọ nugbajẹmẹji de wẹ zọ́n bọ emi ma do yise dọ Mẹdatọ owanyinọ de tin. Whẹpo mí nido na kunnudenu dọ Jiwheyẹwhe tin, e na yọ́n taun dọ mí ni vẹawu mẹlọ bo dohia ẹ dọ jọwamọnu wẹ e yin dọ nuhewutu mí nọ jiya ni duahunmẹna mí. (Hab. 1:2, 3) Eyin mí yí homẹfa po owanyi po do yinuwa hẹ mẹlọ, enẹ sọgan whàn ẹn nado tindo ojlo nado yọ́n nususu dogọ. *

NỌ YIHOJLẸDOHOGO SỌN OWE-WIWE LẸ MẸ

Na taun tọn, etẹwẹ nọ zọ́n bọ mí do nọ tindo kọdetọn dagbe to lizọnyizọn lọ mẹ? (Pọ́n hukan 7)

7. Etẹ ji wẹ kọdetọn dagbe he mí nọ tindo to lizọnyizọn lọ mẹ nọ sinai do?

7 Todin, mì gbọ mí ni gbadopọnna lehe mí sọgan nọ yihojlẹdohogo sọn Owe-wiwe lẹ mẹ do. Na nugbo tọn, Biblu wẹ yin azọ́nwanu tintan he mí nọ yizan to lizọnyizọn lọ mẹ. E nọ gọalọna mí nado “pegan to gigọ́ mẹ, bo yin hinhẹn sọgbe mlẹnmlẹn na azọ́n dagbe lẹpo.” (2 Tim. 3:16, 17) Obá he mẹ mí nọ tindo kọdetọn dagbe to lizọnyizọn lọ mẹ jẹ ma sinai do wefọ nẹmu he mí hia ji gba,  ṣigba do aliho he mẹ mí nọ yihojlẹdohogo bo nọ basi zẹẹmẹ wefọ he mí hia lẹ tọn te ji. (Hia Owalọ lẹ 17:2, 3.) Di apajlẹ, lẹnnupọndo ninọmẹ atọ̀n ehelẹ ji.

8, 9. (a) Etẹwẹ yin aliho dopo he mẹ mí sọgan yihojlẹdohogo hẹ mẹde he yise dọ Jesu sọzẹn hẹ Jiwheyẹwhe te? (b) Aliho devo tẹlẹ mẹ wẹ a lẹndọ mí sọgan yihojlẹdohogo do whẹho ehe ji te bo tindo kọdetọn dagbe?

8 Ninọmẹ 1: To lizọnyizọn mítọn mẹ, mí dukosọ hẹ mẹde he yise dọ Jesu sọzẹn hẹ Jiwheyẹwhe. Wefọ tẹlẹ wẹ mí sọgan yizan nado yihojlẹdohogo hẹ mẹlọ do whẹho lọ ji? Mí sọgan biọ to mẹlọ si nado hia Johanu 6:38, fie Jesu dọ te dọmọ: “Yẹn ko jẹte sọn olọn mẹ wá, e ma yin nado wà ojlo ṣie gba, ṣigba ojlo ewọ he do mi hlan tọn.” To wefọ lọ hihia godo, mí sọgan kanse e dọmọ: “Eyin Jesu wẹ yin Jiwheyẹwhe, mẹnu wẹ do e hlan sọn olọn mẹ? Be Omẹ enẹ ma yiaga hugan Jesu ya? To popolẹpo mẹ, mẹhe do mẹde hlan nọ yiaga hugan mẹhe e dohlan.”

9 To yidogọ mẹ, mí sọgan hia Filippinu lẹ 2:9, fie apọsteli Paulu basi zẹẹmẹ nuhe Jiwheyẹwhe wà to okú po fọnsọnku Jesu tọn po godo tọn te. Wefọ lọ dọmọ: “Jiwheyẹwhe ze [Jesu] daga do otẹn he yiaga de mẹ bo gbọn homẹdagbe dali na ẹn oyín lọ he yiaga hú oyín devo lẹpo.” Nado gọalọna mẹlọ nado lẹnayihamẹpọn do wefọ enẹ ji, mí sọgan kanse e dọmọ: “Eyin Jesu sọzẹn hẹ Jiwheyẹwhe jẹnukọnna okú etọn bọ Jiwheyẹwhe wá ze e daga do otẹn he yiaga de mẹ, be enẹ ma na zọ́n bọ Jesu na yiaga hugan Jiwheyẹwhe ya? Ṣigba, nawẹ mẹdevo de sọgan yiaga hú Jiwheyẹwhe gbọn?” Eyin mẹlọ tindo sisi na Ohó Jiwheyẹwhe tọn bo yin ahunjijlọnọ, hoyijlẹdohogo enẹ sọgan whàn ẹn nado gbadopọnna whẹho lọ yinukọn dogọ.—Owalọ 17:11.

10. (a) Nawẹ mí sọgan yihojlẹdohogo hẹ mẹde he yise to olọnzomẹ mẹ gbọn? (b) Hoyijlẹdohogo devo tẹwẹ a mọdọ e na tindo kọdetọn dagbe to hodidọ do olọnzomẹ ji?

10 Ninọmẹ 2: E vẹawuna whétọ he yin sinsẹ̀nnọ akonka de nado yise dọ mẹylankan lẹ ma na yin yasana kakadoi to olọnzomẹ. E sọgan ko tindo yise to olọnzomẹ mẹ, na e jlo dọ mẹylankan lẹ ni jiya kọdetọn nuylankan he yé wà lẹ tọn wutu. Nawẹ mí sọgan yihojlẹdohogo hẹ mẹhe tindo linlẹn mọnkọtọn gbọn? Tintan, mí sọgan hẹn ẹn deji dọ mẹylankan lẹ na yin yasana. (2 Tẹs. 1:9) Enẹgodo, mí sọgan biọ to e si nado hia Gẹnẹsisi 2:16, 17, ehe dohia dọ ale ylando tọn wẹ okú. Mí sọgan basi zẹẹmẹ na ẹn dọ ylando Adam tọn wẹ zọ́n bọ gbẹtọvi lẹpo do yin ylandonọ. (Lom. 5:12) Mí sọgan zinnudeji dọ Jiwheyẹwhe ma dọna yé dọ yé na yin yasana to olọnzomẹ. Enẹgodo, mí sọgan kanse dọ, “Eyin olọnzomẹ wẹ Adam po Evi po na yin yasana kakadoi te, be e ma na ko sọgbe dọ Jiwheyẹwhe ni na yé avase jẹnukọn gando enẹ go ya?” To whenẹnu, mí sọgan hia  Gẹnẹsisi 3:19, fie whẹdanamẹ he yé mọyi to ylando yetọn godo tin te, ṣigba nudepope ma yin didọ gando olọnzomẹ go. Kakatimọ, Jiwheyẹwhe dọna Adam dọ e na lẹgọ do kọ́gudu mẹ. Mí sọgan kanse e dọ, “Be e na ko sọgbe nado dọna Adam dọ e na lẹgọ do kọ́gudu mẹ to whenuena e yindọ ewọ na yin zizedlan olọnzomẹ ya?” Eyin mẹlọ ma yin hẹngogonọ, kanbiọ mọnkọtọn sọgan whàn ẹn nado lẹnnupọndo whẹho ehe ji sisosiso.

11. (a) Etẹwẹ yin dopo to aliho he mẹ mí sọgan yihojlẹdohogo hẹ mẹde he yise dọ mẹdagbe lẹpo wẹ na yì olọn mẹ te? (b) Hoyijlẹdohogo devo tẹwẹ a lẹndọ e na tindo kọdetọn dagbe do whẹho olọn mẹ yìyì tọn ji?

11 Ninọmẹ 3: To lizọnyizọn mítọn mẹ, mí dukosọ hẹ mẹde he yise dọ mẹdagbe lẹpo wẹ na yì olọn mẹ. Nuyise mọnkọtọn sọgan yinuwado aliho he mẹ whétọ lọ nọ basi zẹẹmẹ do nuhe Biblu dọ lẹ ji te ji. Di apajlẹ, mí ni dọ dọ mí to dogbapọnna Osọhia 21:4 hẹ ẹ. (Hia.) Mẹlọ sọgan lẹndọ dona he yin nùdego to wefọ ehe mẹ lẹ gando gbẹninọ to olọn mẹ go. Nawẹ mí sọgan yihojlẹdohogo hẹ ẹ gbọn? Kakati nado yí wefọ devo lẹ zan taidi kunnudenu, mí sọgan na ayidonugo nudọnamẹ titengbe de to wefọ lọ mẹ. Wefọ lọ dọ dọ “okú ma nasọ tin ba.” Mí sọgan kanse mẹlọ eyin e kọngbedopọ dọ, eyin nude ma nasọ tin ba, be nulọ ko tin to ojlẹ de mẹ wayi. E yọnbasi dọ e na yigbe dọ mọwẹ. Enẹgodo, mí sọgan zinnudeji dọ okú ma tin to olọn mẹ pọ́n gbede, aigba ji kẹdẹ wẹ gbẹtọ lẹ nọ kú te. Enẹwutu, e sọgbe hẹ lẹnpọn dagbe dọ Osọhia 21:4 to alọdlẹndo dona sọgodo tọn he mí na duvivi etọn to aigba ji lẹ.—Ps. 37:29.

NỌ YÍ APAJLẸ LẸ ZAN NADO HẸN NUAGOKUN LỌ HỌNWUN

12. Naegbọn Jesu nọ yí apajlẹ lẹ zan?

12 Gbọnvona kanbiọ lẹ, Jesu sọ yí apajlẹ lẹ zan to azọ́n yẹwhehodidọ tọn etọn mẹ. (Hia Matiu 13:34, 35.) Apajlẹ Jesu tọn lẹ gọalọ nado do mẹwhinwhàn todoaitọ etọn lẹ tọn hia. (Mat. 13:10-15) Apajlẹ lẹ sọ zọ́n bọ nuplọnmẹ Jesu tọn lẹ nọ dutomẹji bo ma nọ yin winwọn. Nawẹ mí sọgan nọ yí apajlẹ lẹ zan to whenue mí to mẹplọn gbọn?

13. Apajlẹ tẹwẹ mí sọgan yizan nado dohia dọ Jiwheyẹwhe yiaga hugan Jesu?

13 Apajlẹ he bọawu lẹ wẹ nọ saba yọ́n-na-yizan hugan. Di dohia, to whenue mí to zẹẹmẹ basi dọ Jiwheyẹwhe yiaga hugan Jesu, mí sọgan tẹnpọn nado yí nuyijlẹdonugo he bọdego ehe zan. Mí sọgan dohia mẹlọ dọ Jiwheyẹwhe po Jesu po nọ yí hogbe he gando whẹndo go lẹ zan nado dọho gando haṣinṣan he yé omẹ awe lẹ tindo go. Jiwheyẹwhe nọ dlẹnalọdo Jesu taidi Visunnu etọn, podọ Jesu nọ dlẹnalọdo Jiwheyẹwhe taidi Otọ́ etọn. (Luku 3:21, 22; Joh. 14:28) Enẹgodo, mí sọgan kanse whétọ lọ dọmọ: “Eyin mì jlo na plọn mi dọ omẹ awe sọzẹn, hagbẹ whẹndo tọn tẹlẹ wẹ mì na dlẹnalọdo nado do enẹ hia?” Mẹlọ sọgan donù nọvi-nọvi lẹ go, etlẹ yin ahoho lẹ. Eyin e wàmọ, mí sọgan dohia ẹ dọ nuyijlẹdonugo enẹ sọgbe taun. To whenẹnu mí sọgan kanse dọmọ: “Eyin yẹn po mì po sọgan yí apajlẹ ehe zan po awubibọ po, nẹmunẹmu wẹ Jesu, yèdọ Mẹplọntọ Daho lọ ma na ko lẹnnupọndo nuyijlẹdonugo mọnkọtọn de ji? Ṣigba, e dọho gando Jiwheyẹwhe go taidi Otọ́ etọn. Gbọnmọ dali, Jesu do Jiwheyẹwhe hia taidi mẹhe yin mẹho na ẹn bosọ tindo aṣẹ hugan ẹn.”

14. Apajlẹ tẹwẹ dohia dọ e ma sọgbe hẹ lẹnpọn dagbe dọ Jiwheyẹwhe ni deazọ́nna Lẹgba nado sayana gbẹtọ lẹ to olọnzomẹ?

14 Lẹnnupọndo apajlẹ devo ji. Mẹdelẹ yise dọ Satani wẹ paṣẹna olọnzomẹ. Apajlẹ ehe sọgan gọalọna mẹjitọ de nado mọdọ e ma sọgbe hẹ lẹnpọn dagbe dọ Jiwheyẹwhe ni deazọ́nna Lẹgba nado nọ sayana gbẹtọ lẹ to olọnzomẹ. Mí sọgan dọ nude taidi: “Mí ni dọ dọ ovi towe lẹzun atẹṣitọ de bo nọ wà onú ylankan susu. Etẹwẹ hiẹ na wà?” Mẹjitọ lọ sọgan dọ dọ emi na domẹplọnlọ ovi emitọn go. Ewọ sọgan gọalọna ovi lọ whlasusu nado doalọtena onú ylankan wiwà. (Howh.  22:15) To whenẹnu, mí sọgan kanse mẹjitọ lọ nuhe e na wà eyin ovi etọn gbẹ́ alọgọ he e na ẹn lẹpo dai. Suhugan mẹjitọ lẹ tọn na dọ dọ emi na gbọ bo domẹplọnlọ sinsinyẹn ovi lọ go. Enẹgodo, mí sọgan kanse dọ, “Etẹwẹ hiẹ na wà eyin a wá mọdọ mẹylankan de wẹ plọnnu ovi towe bọ ewọ do lẹzun atẹṣitọ sọmọ?” Matin ayihaawe, mẹjitọ lọ na gblehomẹ do omẹ mọnkọtọn go. Nado hẹn nuagokun apajlẹ lọ tọn họnwun, mí sọgan kanse mẹjitọ lọ dọ, “Eyin hiẹ yọnẹn dọ mẹylankan de wẹ plọnnu ovi towe, be hiẹ nasọ biọ to omẹ mọnkọtọn si nado domẹplọnlọ ovi towe go do otẹn towe mẹ wẹ ya?” E họnwun dọ lala wẹ gblọndo etọn na yin. Enẹwutu, e họnwun dọ Jiwheyẹwhe ma na yí Satani zan nado sayana gbẹtọ he ji Lẹgba lọsu yinuwado nado wà nuylankan lẹ!

HẸN PỌNDOHLAN JLẸKAJI TỌN GO

15, 16. (a) Naegbọn mí ma dona donukun dọ mẹhe mí dọyẹwheho na lẹpo wẹ na kẹalọyi owẹ̀n Ahọluduta lọ tọn? (b) Be mí dona tindo nunina mẹpinplọn tọn vonọtaun whẹpo do plọnnumẹ po kọdetọn dagbe po wẹ ya? Basi zẹẹmẹ. (Sọ pọ́n apotin lọ, “ Azọ́nwanu de He Nọ Gọalọna Mí Nado Namẹ Gblọndo.”)

15 Mí yọnẹn dọ e ma yin mẹhe mí dọyẹwheho na lẹpo wẹ na kẹalọyi owẹ̀n Ahọluduta lọ tọn. (Mat. 10:11-14) Eyin mí tlẹ nọ kàn kanbiọ he sọgbe hugan lẹ sè, yihojlẹdohogo to aliho dagbe hugan mẹ bo yí apajlẹ he yọ́n hugan lẹ zan, mẹlẹpo ma na kẹalọyi owẹ̀n lọ. To popolẹpo mẹ, omẹ vude poun wẹ kẹalọyi nuplọnmẹ Jesu tọn lẹ, dile etlẹ yindọ ewọ wẹ yin Mẹplọntọ daho hugan he nọgbẹ̀ pọ́n to aigba ji!—Joh. 6:66; 7:45-48.

16 To alọ devo mẹ, eyin mí tlẹ nọ mọdọ mí ma tindo nunina mẹpinplọn tọn sọmọ, mí sọgan tindo kọdetọn dagbe to lizọnyizọn mítọn mẹ. (Hia Owalọ lẹ 4:13.) Ohó Jiwheyẹwhe tọn na mí whẹwhinwhẹ́n dolido nado yise dọ “mẹhe tindo ninọmẹ ahun mẹ tọn he jẹna ogbẹ̀ madopodo lẹ” na kẹalọyi wẹndagbe lọ. (Owalọ 13:48) Enẹwutu, mì gbọ mí ni wleawuna pọndohlan jlẹkaji tọn gando míde po mẹhe mí nọ tẹnpọn nado lá wẹndagbe Ahọluduta lọ tọn na lẹ po go bosọ hẹn pọndohlan enẹ go. Mì gbọ mí ni nọ yí azọ́nplọnmẹ he Jehovah nọ na mí lẹ do yizan mẹ to gigọ́ mẹ, bo deji dọ míwlẹ po mẹhe nọ dotoaina mí lẹ po na mọaleyi sọn enẹ mẹ. (1 Tim. 4:16) Jehovah sọgan gọalọna mí nado yọ́n lehe mí dona nọ ‘na gblọndo omẹ dopodopo’ do. Aliho dopo nado tindo kọdetọn dagbe to lizọnyizọn mítọn mẹ wẹ nado hodo Osẹ́n Sika tọn, dile mí na mọ do to hosọ he bọdego mẹ.

^ huk. 6 Pọ́n hosọ lọ “Est-il possible de devenir croyant?” to Atọ̀họ̀-Nuhihọ́ lọ Tọn [Flansegbe] 1er octobre 2009 mẹ.