Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) MARS 2014

Be Ohó Towe ‘Mọwẹ Nọ Wá Yin Lala’ Wẹ Ya?

Be Ohó Towe ‘Mọwẹ Nọ Wá Yin Lala’ Wẹ Ya?

Lẹnnupọndo apajlẹ ehe ji: Mẹho agun tọn de he yin hagbẹ Wedegbẹ́ Whẹgbọtọ Dotowhé tọn basi tito nado wazọ́n dopọ hẹ mẹmẹsunnu jọja de to lizọnyizọn lọ mẹ to Sẹgbe afọnnu. Ṣigba to afọnnu enẹ, mẹmẹsunnu de ylọ mẹho lọ nado wá gọalọna ẹn to niyaniya mẹ, na asi etọn basi asidan bo yin pinplan yì dotowhé wutu. E biọ to mẹho lọ si dọ ewọ ni gọalọna emi nado mọ doto he na kọngbedopọ hẹ ẹ do whẹho ohùn tọn ji. Enẹwutu, mẹho lọ zẹhù do tito kunnudegbe tọn he e ko basi hẹ jọja lọ ji nado sọgan nọgodona whẹndo lọ to whẹho niyaniya tọn enẹ mẹ.

Sọ lẹnnupọndo apajlẹ devo ji: Asu po asi po de basi oylọna onọ̀ godoponọ de he tin to agun yetọn mẹ bo tindo ovi awe nado wá nọpọ́ hẹ yé to whèjai dopo. To whenue onọ̀ ehe dọho lọ na ovi etọn lẹ, e vivi na yé taun. Yé to jejeji nado yì kọnawudopọ hẹ yé to whèjai lọ. Ṣigba, to whenue azán lọ pò osọ, asu po asi po lọ dọna onọ̀ godoponọ lọ dọ nujijọ madonukun de wá aimẹ bọ yé dona zẹhù do oylọ-basinamẹ lọ ji. To godo mẹ, onọ̀ lọ wá sè nuhewutu yé do wàmọ. To whenue asu po asi po lọ ko basi oylọna ẹn godo, họntọn delẹ sọ basi oylọna asu po asi po lọ nado wá owhé yetọn gbè to whèjai dopolọ bọ yé yigbe.

Na nugbo tọn, taidi Klistiani lẹ, mí dona nọ yin nugbonọ na opagbe mítọn lẹ. Mí ma dona nọ dọ gbede dọ, “mọwẹ podọ to enẹgodo lala,” enẹ wẹ yindọ mí ma dona yigbe nado wà nude bo wá diọ linlẹn matin whẹwhinwhẹ́n dagbe de. (2 Kọl. 1:18) Etomọṣo, dile apajlẹ awe he go mí donù lẹ dohia do, ninọmẹ lẹpo ma nọ yin dopolọ. E sọgan wá jọ bọ mí na tin to dandannu glọ nado zẹhù do opagbe he mí ko do de ji. Onú mọnkọtọn jọ do apọsteli Paulu lọsu go pọ́n.

MẸDELẸ DỌ DỌ APỌSTELI PAULU YIN DẸGBÈAWENỌ

To owhe 55 W.M., to whenue apọsteli Paulu tin to Efesu to gbejizọnlin mẹdehlan tọn etọn atọ̀ntọ whenu, linlẹn etọn wẹ nado dasá Ohù Égée yì Kọlinti, bo zingbejizọnlin sọn finẹ yì Makedonia. E basi tito nado dla agun Kọlinti tọn pọ́n whla awetọ to whenue ewọ na lẹkọ jei Jelusalẹm, na ewọ nido sọgan bẹ nunina homẹdagbe tọn yetọn yì na mẹmẹsunnu he tin to Jelusalẹm lẹ. (1 Kọl. 16:3) Nuhe 2 Kọlintinu lẹ 1:15, 16 dohia niyẹn, fie mí hia te dọmọ: “Po jidide ehe po, yẹn to linlẹn dai nado wá mì dè, na mì nido sọgan tindo whẹwhinwhẹ́n awetọ nado jaya, podọ to whenue yẹn na ko zẹ̀ mì dè dile yẹn jei Makedonia, podọ to whenue yẹn na lẹkọ sọn Makedonia wá mì dè bọ mìwlẹ na ko yìn mi vude jẹ aliho ji to whenue yẹn jei Jude.”

E taidi dọ apọsteli Paulu ko donù tito etọn go na mẹmẹsunnu Kọlinti tọn lẹ to wekanhlanmẹ etọn de mẹ. (1 Kọl. 5:9) Ṣigba, ojlẹ vude to wekanhlanmẹ enẹ godo, Paulu sè  gbọn whédo Kloe tọn gblamẹ dọ gbemanọpọ lẹ tin to agun lọ mẹ. (1 Kọl. 1:10, 11) Paulu basi dide nado diọ tito etọn tintan, podọ e kàn wekanhlanmẹ he mí yọnẹn todin taidi 1 Kọlintinu lẹ. To wekanhlanmẹ enẹ mẹ, Paulu gbọn owanyi dali na yé ayinamẹ po anademẹ lẹ po. E sọ dọna yé dọ emi ko diọ tito gbejizọnlin tọn emitọn, bo na yì Makedonia whẹpo do wá Kọlinti.—1 Kọl. 16:5, 6. *

E taidi dọ to whenue mẹmẹsunnu he tin Kọlinti lẹ mọ wekanhlanmẹ etọn yí, delẹ to “apọsteli dahodaho” he tin to agun lọ mẹ lẹ mẹ sawhẹdokọna ẹn dọ dẹgbèawenọ wẹ ewọ, bo ma nọ yin nugbonọ na opagbe etọn lẹ. Nado yiavùnlọna ede, Paulu kanse dọmọ: “Todin, to whenue yẹn tindo linlẹn mọnkọtọn, yẹn ma yinuwa po vọdonanu depope po, kavi yẹn wàmọ wẹ? Kavi nuhe yẹn lẹn lẹ, be yẹn lẹn yé sọgbe hẹ agbasalan wẹ, dọ to yẹn dè ‘Mọwẹ,’ nido yin ‘Mọwẹ’ podọ ‘Lala,’ ni yin ‘Lala’?”—2 Kọl. 1:17; 11:5.

Mí sọgan kanse dọ, To ninọmẹ enẹlẹ mẹ, be apọsteli Paulu “yinuwa po vọdonanu” po nugbonugbo wẹ ya? Lala! Hogbe lọ he yin lilẹdo “vọdonanu” bẹ linlẹn dẹgbèawenọ-yinyin tọn hẹn, taidi mẹhe go yè ma sọgan dejido, yèdọ mẹhe ma nọ yin nugbonọ na opagbe etọn lẹ. Paulu kàn kanbiọ mẹhẹnlẹnnupọn tọn ehe sè dọ, “nuhe yẹn lẹn lẹ, be yẹn lẹn yé sọgbe hẹ agbasalan wẹ?” Kanbiọ enẹ dona ko hẹn ẹn họnwun na Klistiani he tin to Kọlinti lẹ dọ, Paulu ma diọ tito etọn na ewọ yin mẹhe go yè ma sọgan dejido wutu gba.

Paulu gbẹ́ whẹsadokọnamẹ lọ dai gbidigbidi bo wlan dọmọ: “Ṣigba, dile Jiwheyẹwhe sọgan yin jidedego do, ohó he mí dọna mì ma yin Mọwẹ podọ to enẹgodo Lala gba.” (2 Kọl. 1:18) Matin ayihaawe, dagbemẹninọ mẹmẹsunnu po mẹmẹyọnnu he tin to Kọlinti lẹ po tọn wẹ zọ́n bọ Paulu do diọ tito etọn lẹ. Mí hia to 2 Kọlintinu lẹ 1:23 mẹ dọ, ‘nado whlá yé’ wutu wẹ ewọ do diọ tito etọn bo ma yì Kọlinti jẹnukọn. Na nugbo tọn, e hùn dotẹnmẹ dote na yé nado jla ninọmẹ lẹ do whẹpo ewọ nido wá yé dè. Sọgbe hẹ todido etọn, to whenue Paulu tin to Makedonia, Titu na ẹn linlin dọ wekanhlanmẹ etọn whàn yé nado blawu bo lẹnvọjọ, podọ enẹ hẹn ayajẹ susu wá na Paulu.—2 Kọl. 6:11; 7:5-7.

JESU GBLAMẸ WẸ “NIṢẸ” NỌ YIN DIDỌHLAN JIWHEYẸWHE TE

Owhẹ̀ dẹgbèawenọ-yinyin tọn he yin sisadokọna Paulu sọgan dohia dọ, eyin yè ma sọgan deji dọ ewọ na yin nugbonọ na opagbe etọn lẹ to gbẹzan egbesọegbesọ tọn mẹ, be yè ma sọgan dejido azọ́n yẹwhehodidọ tọn etọn go. Ṣigba, Paulu flin Kọlintinu lẹ dọ emi ko dọyẹwheho na yé gando Jesu Klisti go. “Visunnu Jiwheyẹwhe tọn, Klisti Jesu, mẹhe go yẹn po Silvanu po gọna Timoti dọyẹwheho gando to ṣẹnṣẹn mìtọn, ma lẹzun Mọwẹ podọ to enẹgodo Lala gba, ṣigba Mọwẹ ko lẹzun Mọwẹ to whẹho etọn mẹ.” (2 Kọl. 1:19) Be Jesu Klisti, mẹhe sin apajlẹ Paulu nọ hodo, yin mẹhe go yè ma sọgan dejido to aliho depope mẹ wẹ ya? Lala! Nugbo kẹdẹ wẹ Jesu dọ to gbẹzan etọn po lizọnyizọn etọn blebu po mẹ. (Joh. 14:6; 18:37) Eyin yẹwheho Jesu tọn yin nugbo bọ yè sọgan dejidego, bọ Paulu lọsu dọyẹwheho owẹ̀n dopolọ tọn, be yè sọgan dejido yẹwhehodidọ etọn go ga.

Na nugbo tọn, Jehovah wẹ “Jiwheyẹwhe nugbo tọn.” (Ps. 31:5) Nuhe Paulu wlan bọdego do enẹ hia dọmọ: “Mahopọnna lehe opagbe Jiwheyẹwhe tọn lẹ sù sọ, yé ko lẹzun Mọwẹ gbọn ewọ gblamẹ,” enẹ wẹ gbọn Klisti gblamẹ. Tenọgli pipé he go Jesu hẹn to whenue e tin to aigba ji, dohia hezeheze dọ mí sọgan dejido opagbe Jehovah tọn lẹ go mlẹnmlẹn. Paulu zindonukọn dọmọ: “Enẹwutu, gbọn [Jesu] gblamẹ ga wẹ ‘Niṣẹ’ nọ yin didọ hlan Jiwheyẹwhe te na gigo gbọn míwlẹ gblamẹ.” (2 Kọl. 1:20) Etẹwẹ e zẹẹmẹdo dọ Jesu wẹ yin “Niṣẹ” lọ? E zẹẹmẹdo dọ Jesu wutu wẹ mí sọgan deji dọ opagbe he Jehovah Jiwheyẹwhe do lẹpo na mọ hẹndi!

Dile Jehovah po Jesu po nọ dọ nugbo to whelẹponu do, Paulu lọsu nọ yinuwa sọgbe hẹ nuhe e dọ to whelẹponu. (2 Kọl. 1:19) Ewọ ma yin dẹgbèawenọ, yèdọ mẹhe nọ dopagbe  “sọgbe hẹ agbasalan.” (2 Kọl. 1:17) Kakatimọ, e ‘zinzọnlin gbọn gbigbọ dali.’ (Gal. 5:16) To nuyiwa hẹ mẹdevo lẹ mẹ, dagbemẹninọ yetọn wẹ nọ duahunmẹna ẹn. Mọwẹ etọn nọ yin Mọwẹ!

BE MỌWẸ TOWE NỌ YIN MỌWẸ YA?

To egbehe, e ko lẹzun aṣa na mẹhe ma nọ nọgbẹ̀ sọgbe hẹ nunọwhinnusẹ́n Biblu tọn lẹ nado nọ dopagbe lẹ bo ma nọ hẹn yé di eyin nuhahun flinflin delẹ wá fọ́n kavi eyin yé mọ nudevo he yé yiwanna hugan. To whẹho ajọwiwa tọn lẹ mẹ, “mọwẹ” ma nọ yin “mọwẹ” to whepoponu, etlẹ yin to whenue mẹhe go e gando lẹ ko doalọ owe gbekọndopọ tọn de mẹ. Mẹsusu masọ nọ pọ́n alọwle, yèdọ gbekọndopọ to omẹ awe ṣẹnṣẹn hlan taidi gbemima tẹgbẹ tọn de ba. Kakatimọ, sọha gbẹdai tọn he fọ́n bo to agayi dohia dọ mẹsusu nọ pọ́n alọwle hlan taidi pọninọ mọmọ tọn de, ehe yè sọgan sánkanna to whedepopenu.—2 Tim. 3:1, 2.

Etẹwẹ dogbọn hiẹ dali? Be Mọwẹ towe nọ yin Mọwẹ ya? Nugbo wẹ dọ, dile apajlẹ he go mí donù to bẹjẹeji lẹ dohia do, e sọgan wá jọ bọ a na tin to dandannu glọ nado zẹhù do tito de ji, e ma yin na a yin dẹgbèawenọ wutu wẹ gba, ṣigba na ninọmẹ he hiẹ ma sọgan deanana delẹ biọ domọ wutu. Ṣigba taidi Klistiani de, eyin hiẹ dopagbe kavi magbe nude tọn, a dona wà nuhe go a pé lẹpo nado hẹn ẹn di. (Ps. 15:4; Mat. 5:37) Eyin a wàmọ, hiẹ na yin yinyọnẹn taidi mẹhe go yè sọgan dejido, yèdọ mẹhe nọ yin nugbonọ na ohó etọn lẹ, bo nọ dọ nugbo to whepoponu. (Efe. 4:15, 25; Jak. 5:12) Eyin gbẹtọ lẹ doayi e go dọ yè sọgan dejido gowe to whẹho egbesọegbesọ tọn lẹ mẹ, yé sọgan tindo ojlo dogọ nado dotoaina we to whenue a to nugbo he gando Ahọluduta Jiwheyẹwhe tọn go lẹ dọna yé. Enẹwutu, mì gbọ mí ni hẹn ẹn diun dọ Mọwẹ mítọn nọ yin Mọwẹ nugbonugbo!

^ huk. 7 Ojlẹ vude to whenue Paulu kàn wekanhlanmẹ 1 Kọlintinu lẹ tọn godo, e zingbejizọnlin gbọn Tloa yì Makedonia, fie e kàn wekanhlanmẹ 2 Kọlintinu lẹ tọn te. (2 Kọl. 2:12; 7:5) To nukọn mẹ, e wá yì Kọlinti dile e dọ do.