Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) FÉVRIER 2014

 SỌN ONÚ HOHO SẸDOTẸN MÍTỌN

Sinima He Hẹn Yise Gbẹtọ lẹ Tọn Lodo to Owhe 100 Die

Sinima He Hẹn Yise Gbẹtọ lẹ Tọn Lodo to Owhe 100 Die

“E taidi dọ Mẹmẹsunnu Russell lọsu mọ wẹ n’te tlọlọ!”—Dopo to mẹhe pọ́n “Photo-Drame de la Création” to 1914 lẹ mẹ.

TO OWHE ehe mẹ, e pé owhe 100 bọ “Photo-Drame de la Création” yin didohia whla tintan, yèdọ sinima de he dite taun bo yin awuwlena nado hẹn gbẹtọ lẹ tindo yise to Biblu mẹ taidi Ohó Jiwheyẹwhe tọn. To ojlẹ enẹ he mẹ nuplọnmẹ nulẹ tin yededenu tọn, homọdọdo Biblu go po ayihaawe tintindo po ko dekanpona yise mẹsusu tọn te, “Photo-Drame de la Création” yiavùnlọna Jehovah he yin Didatọ onú lẹpo tọn.

Charles T. Russell he to anadenanu to Biblu Plọntọ lẹ ṣẹnṣẹn, yí sọwhiwhe do dín aliho he na tindo kọdetọn dagbe hugan nado hẹn nugbo Biblu tọn gbayipe po awuyiya po. To whenẹnu, Biblu Plọntọ lẹ ko to owe zinjẹgbonu lẹ yizan na nuhe hugan owhe 30. Ṣigba, nuyizan yọyọ de dọ̀n ayidonugo yetọn, enẹ wẹ sinima.

YÉ YÍ SINIMA ZAN NADO HẸN WẸNDAGBE LỌ GBAYIPE

To owhe 1890 lẹ mẹ, sinima yẹdide tọn he ma tindo hodidọ lẹ jẹ yinyin didetọn ji. To 1903, ṣọṣi New York City tọn de do sinima sinsẹ̀n tọn de hia. To 1912, azọ́nwhé sinima tọn lẹ ma ko yinukọn sọmọ whẹpo Mẹmẹsunnu Russell do jẹ awuwlena “Photo-Drame de la Création” lọ ji po adọgbigbo po. E doayi e go dọ nuyizan he nọ namẹ nudọnamẹ enẹ sọgan hẹn nugbo Biblu tọn gbayipe to aliho he gbloada mẹ hugan lehe owe zinjẹgbonu lẹ kẹdẹ sọgan wà do.

“Photo-Drame de la Création” lọ dite na gànhiho ṣinatọ̀n bo nọ saba yin didohia do adà ẹnẹ ji, podọ e bẹ hodidọ sinai do Biblu ji kleunkleun 96 hẹn, ehe yin didọ gbọn hodọtọ he yè yọnẹn ganji bo tindo kọnugbè dagbe hugan to ojlẹ enẹ mẹ de dali. Podọ nuhiho nọ zọnpọ hẹ nupinpọn susu lẹ. Nuhotọ azọ́nyọnẹntọ lẹ nọ hò hodidọ po húnhiho he yin yíyí do glamafonu ji lẹ po dile yẹdide sinmẹ voovo lẹ gọna sinima wadohia otàn Biblu tọn he yin yinyọnẹn taun lẹ to yinyin didohia.

“E bẹ yẹdide lẹ hẹn sọn whenue sunwhlẹvu lẹ yin didá kakajẹ vivọnu gigonọ Gandudu Owhe Fọtọ́n Klisti tọn.”—F. Stuart Barnes, he tindo owhe 14 to 1914

Suhugan yẹdide po sinima kleunkleun lọ lẹ po tọn yin hihọ̀ to azọ́nwhé nuyidokanji tọn lẹ. To Philadelphie, New York, Paris po Londres po, anazọ́nwatọ lẹ yí osẹ̀n do de yẹdide sinima lọ tọn lẹ dopodopo do mẹpọ́nnu vonọtaun lẹ ji. Mẹmẹsunnu delẹ sọ tindo mahẹ to azọ́n ehe mẹ to Bẹtẹli bo tlẹ nọ vọ́ yẹdide he gble lẹ de. To yidogọ mẹ na yẹdide he yin hihọ̀ lẹ, hagbẹ whẹndo Bẹtẹli tọn delẹ yin yíyí do video ji to Yonkers,  New York he ma dẹn do Bẹtẹli, dile yé to nuyiwa taidi Ablaham, Isaki, po angẹli he glọnalina Ablaham nado yí Isaki do sanvọ́ po.—Gẹn. 22:9-12.

Mẹhe mọ azọ́nplọnmẹ yí ehelẹ wẹ deanananu to whenue sinima he dite taun, bo bẹ hoyidokanji 26 gọna yẹdide 500 hẹn lọ yin didohia

Azọ́nwatọ hatọ Mẹmẹsunnu Russell tọn de dọna linlinwekantọ lẹ dọ nuyizan he nọ namẹ nudọnamẹ enẹ na “whàn gbẹtọ fọtọ́n susu lẹ nado tindo ojlo to Owe-wiwe lẹ mẹ hugan nudepope he ko yin bibasi to whenuho gblamẹ na nukọnyiyi sinsẹ̀n tọn.” Be e vivi na nukọntọ sinsẹ̀n tọn lẹ nado mọdọ vivẹnu mọnkọtọn yin dido nado hẹn pekọ wá na huvẹ gbigbọmẹ tọn gbẹtọ susu lẹ tọn ya? Lala. Kakatimọ, nukọntọ sinsẹ̀n Mẹylọhodotọklisti tọn lẹ tọn to pọmẹ mọhodọdo “Photo Drame de la Création” go bọ delẹ to yé mẹ tlẹ kàn ayiha wintinwintin lẹ nado glọnalina gbẹtọ lẹ nado pọ́n ẹn. To gbèdopo he gbẹtọ lẹ to sinima lọ pọ́n, pipli sinsẹ̀ngán lẹ tọn de dọna mẹhe nọ penukundo miyọ́n lẹtliki tọn go lẹ nado ze miyọ́n sọyi.

Mẹmẹyọnnu ehelẹ wazọ́n taidi aisinnunamẹtọ bo má vọkan livi susu alọnuwe he bẹ yẹdide “Photo Drame de la Création” tọn susu hẹn vọnu

Mẹhe wá lẹpo wẹ mọ yẹdide pẹvi de yí, ehe yin yẹdide Jesu tọn to whenue e tin to ovu. Yẹdide lọ nọ flinnu mẹdopodopo dọ ewọ dona yin “visunnu jijọho tọn”

Etomọṣo, gbẹtọgun lẹ nọ gọ́ nupọntẹn lẹ nado pọ́n “Photo Drame de la Création” lọ vọnu. To États-Unis, nudi tòdaho 80 mẹ wẹ “Photo Drame de la Création” lọ nọ yin pinpọn te to gbèdopo. Awú nọ ji nupọntọ susu to whenue yé pọ́n ‘sinima he mẹ yè to hodọ te,’ whla tintan to gbẹzan yetọn mẹ. Yẹdide he yin dide to ojlẹ voovo mẹ lẹ gọalọna yé nado mọ lehe koklozìn de to fiflé bọ koklovi de to tintọ́n sọn e mẹ do, podọ lehe vounvoun de to sẹ́ gbà do. Nudọnamẹ he lẹnunnuyọnẹn na to ojlẹ enẹ mẹ lẹ do nuyọnẹn jiawu Jehovah tọn hia. Dile mí dọ do to bẹjẹeji hosọ ehe tọn, to whenue nupọntọ de mọ Mẹmẹsunnu Russell to sinima lọ mẹ bọ e to hodidọ bẹjẹeji tọn dọ gando “Photo Drame de la Création” lọ go, e dọ dọ “e taidi dọ Mẹmẹsunnu Russell lọsu mọ wẹ n’te tlọlọ.”

NUJIJỌ AYIDEGO TỌN DE TO WHENUHO BIBLU PINPLỌNMẸ TỌN MẸ

“Photo Drame de la Création” yin didohia whla tintan to 11 janvier 1914 to nupọntẹn dagbe New York City tọn ehe, yèdọ nutindo Ogbẹ́ Biblu Plọntọ Akọjọpli tọn lẹ tọn to ojlẹ enẹ mẹ

Tim Dirks he yin whenuho-kantọ bosọ nọ basi sinima dọ dọ “Photo Drame de la Création” wẹ yin “sinima nujọnu tọn tintan he tindo nuhiho po hodidọ po, ehe sọgan yin pinpọn to televiziọn ji, gọna yẹdide sinmẹ voovo he nọ whàngo lẹ.” Sinima he yin didetọn jẹnukọnna “Photo Drame de la Création” lẹ bẹ delẹ to adà ehelẹ mẹ hẹn, ṣigba sinima de ma bẹ adà ehe lẹpo hẹn pọ́n, titengbe sinima he sinai do Biblu ji lẹ. Podọ mẹsusu ma pọ́n depope to yé mẹ sọmọ pọ́n. To owhe tintan he mẹ e yin didetọn, gbẹtọ livi ṣinẹnẹ wẹ pọ́n ẹn to Amérique du Nord, Europe, Australie, po Nouvelle-Zélande po!

“Photo Drame de la Création” yin didohia whla tintan to 11 janvier 1914 to New York City. To osun ṣinawe godo, nugbajẹmẹji de jọ, ehe wá yin yiylọ to godo mẹ dọ Wẹkẹ-Whàn I. Etomọṣo, gbẹtọ susu gbẹ́ nọ pli dopọ lẹdo aihọn pé nado pọ́n “Photo Drame de la Création” lọ, bọ yẹdide whanpẹnọ etọn he do dona he Ahọluduta lọ na hẹnwa hia lẹ nọ fakọna yé. To 1914, sinima ayidego tọn de wẹ “Photo Drame de la Création” yin, mahopọnna nudepope he go mí sọgan yí i jlẹdo.

Vọkan“Photo Drame de la Création” lọ tọn voovo 20 wẹ yin yiyizan gbọn pipli delẹ dali to Amérique du Nord