Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) JANVIER 2014

Nudide He N’Basi to Ovu Whenu

Nudide He N’Basi to Ovu Whenu

Whenue n’gbẹ́ pò to ovu

Owhe ao poun wẹ n’tindo to 1985 to whenue ovi delẹ tọ́n sọn Cambodge bo wá jẹ wehọmẹ ṣie yì ji to Columbus, Ohio to États-Unis. Dopo to visunnu lọ lẹ mẹ sè Glẹnsigbe pẹẹde. E nọ yí yẹdide lẹ zan nado pìn otàn budonamẹ tọn he gando yasanamẹ, mẹhuhu po mẹhe to hinhọ̀n na owù lẹ po go na mi. N’nọ dawhá to zánmẹ eyin ayiha ṣie jẹ ovi enẹlẹ ji. E nọ jlo mi nado dọhona yé gando todido Paladisi po fọnsọnku po tọn go, ṣigba yé ma sè ogbè ṣie. Dile etlẹ yindọ n’gbẹ́ pò to ovu, n’de nado plọn Cambodge-gbè nado sọgan dọhona klasigbẹ́ ṣie lẹ gando Jehovah go. N’ma tlẹ lẹn to whenẹnu dọ nudide enẹ na yinuwado sọgodo ṣie ji.

Cambodge-gbè pinplọn ma bọawu. Whla awe wẹ n’dibla hònúpla, ṣigba Jehovah na mi tuli gbọn mẹjitọ ṣie lẹ gblamẹ. To nukọn mẹ, mẹplọntọ wehọmẹ tọn lẹ po klasigbẹ́ ṣie lẹ po jẹ tulina mi ji nado doafọna agbasazọ́n he pekuẹ de. Ṣigba, n’jlo na lẹzun gbehosọnalitọ, podọ n’de nado plọn nude to wehọmẹ daho he na gọalọna mi nado mọ agbasazọ́n whenu-gli tọn de nado jẹ yanwle ṣie kọ̀n. Eyin n’tlọ́n wehọmẹ, n’nọ saba yì wazọ́n hẹ gbehosọnalitọ delẹ to lizọnyizọn lọ mẹ. N’sọ nọ gọalọna wehọmẹvi he to Glẹnsigbe plọn taidi jonọgbè lẹ—yèdọ nudide de he hẹn ale wá na mi taun to nukọn mẹ.

To whenue n’tindo owhe 16, n’sè dọ kándo Cambodge-gbè tọn de tin to Long Beach, Californie to États-Unis. N’yì finẹ bo plọn Cambodge-gbè. Tlolo he n’mọ gbedewema wehọmẹ tọn yí, n’bẹ azọ́n gbehosọnalitọ tọn jẹeji bo zindonukọn nado nọ dọyẹwheho na Cambodge-nù he to owhé mítọn pá lẹ. To whenue n’tindo owhe 18, n’jẹ linlẹn ji nado sẹtẹn yì Cambodge. Lẹdo owùnọ de wẹ e yin to whenẹnu, ṣigba n’yọnẹn dọ omẹ vude poun to gbẹtọ livi ao he nọ nọ̀ Cambodge lẹ mẹ wẹ ko sè wẹndagbe Ahọluduta lọ tọn. To ojlẹ enẹ mẹ, agun dopo gee he bẹ wẹnlatọ 13 hẹn wẹ tin to otò lọ blebu mẹ. To whenue n’tindo owhe 19 wẹ n’disa yì Cambodge whla tintan. To owhe awe godo, n’basi dide nado sẹtẹn yì finẹ. N’mọ azọ́n whenu-gli tọn de nado basi lẹdogbedevomẹ bo nọ plọnmẹ Glẹnsigbe nado penukundo dee go to lizọnyizọn ṣie mẹ. To ojlẹ de godo, n’mọ asi de he tindo yanwle ṣie nkọtọn lẹ. To pọmẹ, mí ko duvivi alọgigọna Cambodge-nù susu nado klan gbẹzan yetọn do wiwe hlan Jiwheyẹwhe tọn.

Jehovah ko na mi ‘ojlo ayiha ṣie mẹ tọn lẹ.’ (Ps. 37:4) Gbẹtọ lẹ hinhẹn zun devi wẹ yin azọ́n he nọ hẹn pekọ wá hugan. To owhe 16 he n’ko yizan to Cambodge lẹ gblamẹ, pipli pẹvi devizọnwatọ Jehovah tọn 13 enẹlẹ tọn ko jideji bo lẹzun agun 12 po kándo 4 po!—Dile e yin didọ gbọn Jason Blackwell dali.