Yì hosọ lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

De ogbè dopo Gungbe

 HOSỌ OPLỌN TỌN 29

‘Mì Yì bo Hẹn Gbẹtọ lẹ Zun Devi’

‘Mì Yì bo Hẹn Gbẹtọ lẹ Zun Devi’

“Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ.”—MAT. 28:19.

OHÀN 60 Ogbẹ̀ Yetọn Wẹ

BLADOPỌ *

1, 2. (a) Sọgbe hẹ gbedide Jesu tọn he tin to Matiu 28:18-20 mẹ, azọ́ndenamẹ titengbe tẹwẹ agun Klistiani tọn tindo? (b) Kanbiọ tẹlẹ wẹ mí na gbadopọnna to hosọ ehe mẹ?

APỌSTELI lẹ dona ko to nukundo nususu dile yé pli to osó de ji. To fọnsọnku Jesu tọn godo, ewọ do dope na yé do finẹ. (Mat. 28:16) Vlavo nujijọ enẹ whenu wẹ “e sọawuhia nuhe hugan mẹmẹsunnu 500 to ojlẹ dopo mẹ.” (1 Kọl. 15:6) Naegbọn Jesu do ylọ devi etọn lẹ wá opli enẹ? Na e jlo na ze azọ́n ojlofọndotenamẹ tọn de do alọmẹ na yé wutu wẹ. E dọmọ: “Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ.”—Hia Matiu 28:18-20.

2 Devi he sè ohó Jesu tọn lẹ lẹzun apadewhe agun Klistiani owhe kanweko tintan tọn. Azọ́ndenamẹ titengbe agun enẹ tọn wẹ nado hẹn gbẹtọ susu zun devi Klisti tọn lẹ. * To egbehe, gbẹtọ fọtọ́n susu wẹ to agun Klistiani tọn lẹ mẹ lẹdo aihọn pé, podọ azọ́ndenamẹ titengbe dopolọ wẹ agun enẹlẹ tindo. To hosọ ehe mẹ, mí na gbadopọnna kanbiọ ẹnẹ: Naegbọn gbẹtọ lẹ hinhẹn zun devi do yin nujọnu sọmọ? Etẹwẹ ehe wiwà bẹhẹn? Be Klistiani lẹpo wẹ nọ tindo mahẹ to gbẹtọ lẹ hinhẹn zun devi mẹ ya? Podọ, naegbọn mí do hudo homẹfa tọn to azọ́n ehe kọ̀n?

 NAEGBỌN GBẸTỌ LẸ HINHẸN ZUN DEVI DO YIN NUJỌNU SỌMỌ?

3. Sọgbe hẹ Johanu 14:6; 17:3, naegbọn azọ́n gbẹtọ lẹ hinhẹn zun devi tọn do yin nujọnu sọmọ?

3 Naegbọn azọ́n gbẹtọ lẹ hinhẹn zun devi tọn do yin nujọnu sọmọ? Na devi Klisti tọn lẹ kẹdẹ wẹ sọgan lẹzun họntọn Jiwheyẹwhe tọn wutu wẹ. Humọ, mẹhe yin hodotọ Klisti tọn lẹ nọ hẹn gbẹzan yetọn pọnte todin, bosọ tindo todido nado duvivi ogbẹ̀ madopodo tọn to sọgodo. (Hia Johanu 14:6; 17:3.) Na nugbo tọn, azọngban titengbe de wẹ Jesu zedo alọmẹ na mí, amọ́ mí ma nọ wazọ́n ehe míde ṣo. Apọsteli Paulu wlan gando ede po gbẹdohẹmẹtọ vivẹ́ etọn delẹ po go dọmọ: “Azọ́nwatọ hatọ Jiwheyẹwhe tọn lẹ wẹ mí yin.” (1 Kọl. 3:9) Lẹblanulọkẹyi nankọ die gbẹtọvi mapenọ lẹ tindo sọn Jehovah po Jesu po dè!

4. Etẹwẹ mí sọgan plọn sọn numimọ he Ivan po Matilde po tindo mẹ?

4 Gbẹtọ lẹ hinhẹn zun devi sọgan hẹn ayajẹ susu wá. Lẹnnupọndo apajlẹ Ivan po asi etọn Matilde po he nọ nọ̀ Colombie tọn ji. Yé dekunnuna dẹpẹ de he nọ yin Davier, bọ e dọna yé dọmọ: “N’jlo na basi diọdo lẹ to gbẹzan ṣie mẹ, amọ́ e ma gán pà mi.” Davier yin akotokún-yìntọ de he nọ zan amasin adínọ lẹ, nọ nùahàn zẹjlẹgo, bosọ nọ nọpọ́ hẹ họntọn etọn yọnnu, Erika. Ivan dọmọ: “Mí jẹ e dè yì ji to glètoho he to olá de mẹ, fie mí nọ kùn kẹkẹ afọ tọn lẹ yì gbọn ali he gọ́ na ogbọ̀n lẹ ji na gànhiho susu. Whenue Erika doayi e go dọ walọyizan po pọndohlan Davier tọn po jẹ didiọ ji, ewọ lọsu hopódona ẹn to Biblu pinplọn lọ mẹ.” Dile ojlẹ to yìyì, Davier doalọtena amasin adínọ zinzan, ahànnunu po akotokún-yìnyìn po. E sọ wlealọ hẹ Erika. Matilde dọmọ: “Whenue Davier po Erika po yí baptẹm to 2016, mí flindọ Davier nọ saba dọ to dai dọ, ‘N’jlo na diọ, amọ́ e ma gán pà mi.’ Homẹhun mí sọmọ bọ dasin wayi do mí.” Matin ayihaawe, homẹ mítọn nọ hùn taun eyin mí gọalọna gbẹtọ lẹ nado lẹzun devi Klisti tọn lẹ.

BE KLISTIANI LẸPO WẸ NỌ TINDO MAHẸ TO GBẸTỌ LẸ HINHẸN ZUN DEVI MẸ YA?

5. Etẹwẹ yin afọdide tintan lọ nado hẹn gbẹtọ lẹ zun devi?

5 Afọdide tintan he mí nọ ze nado hẹn gbẹtọ lẹ zun devi wẹ nado yì “dín” mẹhe tindo ninọmẹ ahun mẹ tọn he jẹ lẹ “mọ.” (Mat. 10:11) Mí nọ dohia dọ mí yin Kunnudetọ Jehovah tọn nujọnu tọn lẹ gbọn yẹwhehodidọ na mẹhe mí dukosọna lẹpo dali. Mí nọ do míde hia di Klistiani nugbo lẹ gbọn tonusisena gbedide Klisti tọn nado dọyẹwheho dali.

6. Etẹwẹ sọgan gọalọna mí nado tindo kọdetọn dagbe to lizọnyizọn lọ mẹ?

6 Mẹdelẹ nọ to jejeji nado plọn nugbo Biblu tọn lẹ, amọ́ susu mẹhe mí nọ dukosọna lẹ tọn sọgan nọma do ojlo hia to tintan whenu. E sọgan biọ dọ mí ni fọnjlodotena yé. Nado tindo kọdetọn dagbe to lizọnyizọn lọ mẹ, mí dona nọ wleawu ganji. Nọ ṣinyan hosọ tangan he sọgan fọnjlodotena mẹhe a na dukosọna lẹ. Enẹgodo, nọ lẹnnupọndo lehe a na bẹ hodọdopọ lẹ jẹeji do ji.

7. Nawẹ a sọgan bẹ hodọdopọ jẹeji hẹ mẹde gbọn, podọ naegbọn a do lẹndọ e yin nujọnu nado nọ dotoai bo nọ do sisi hia?

7 Di apajlẹ, a sọgan kanse whétọ towe dọ: “Be n’gán yọ́n linlẹn mìtọn gando whẹho de go ya? Susu nuhahun he mílọsu nọ pehẹ to egbehe lẹ tọn wẹ nọ yinuwado gbẹtọ lẹ ji lẹdo aihọn pé. Be mì lẹndọ mí do hudo gandudu lẹdo aihọn pé de tọn nado didẹ nuhahun aihọn tọn lẹ ya?” Enẹgodo, a sọgan dọhodo Daniẹli 2:44 ji. Kavi a sọgan dọna whétọ de dọ, “Etẹwẹ mì lẹndọ e yin aṣli lọ nado plọn ovi lẹ whẹ́n bọ yé na tindo walọ dagbe? E na jlo mi dọ ma  yọ́n linlẹn mìtọn.” Enẹgodo, dọhodo Deutelonomi 6:6, 7 ji. Mahopọnna hosọ depope he ji a de nado dọhodo, lẹnnupọndo todoaitọ towe lẹ ji. Yí nukun homẹ tọn do pọ́n ale he e na hẹnwa na yé eyin yé yọ́n nuhe Biblu plọnmẹ taun. To whenue a to hodọ hẹ yé, nujọnu wẹ e yin dọ a ni nọ dotoaina yé bo nọ na sisi pọndohlan yetọn. Gbọnmọ dali, a na mọnukunnujẹ yé mẹ ganji, podọ e yọnbasi taun dọ yé na dotoaina hiẹ lọsu.

8. Naegbọn gọyìpọn lẹ bibasi nọ biọ linsinsinyẹn?

8 Whẹpo mẹde nido wá basi dide nado plọn Biblu, e sọgan biọ dọ a ni zan whenu bosọ dovivẹnu nado basi gọyìpọn susu lẹ yì e dè. Etẹwutu? Na gbẹtọ lẹ sọgan nọma vò to whenue mí lẹkọyi yé dè. Humọ, e sọgan biọ dọ a ni lẹkọyi whlasusu whẹpo whétọ de nido vò ganji hẹ we bo kẹalọyi nado plọn Biblu. Flindọ, e yọnbasi taun dọ atin de ni whẹ́n eyin yè nọ húsinna ẹn whẹwhẹ. Mọdopolọ, e yọnbasi taun dọ owanyi he jlodotọ de tindo na Jehovah po Klisti po ni siso deji eyin mí nọ dọhodopọ hẹ ẹ whẹwhẹ do Ohó Jiwheyẹwhe tọn ji.

BE KLISTIANI LẸPO WẸ NỌ HẸN GBẸTỌ LẸ ZUN DEVI YA?

Kunnudetọ lẹ lẹdo aihọn pé wẹ nọ dín mẹhe jẹ lẹ mọ (Pọ́n hukan 9, 10tọ) *

9, 10. Naegbọn mí sọgan dọ dọ lizọnyizọnwatọ lẹpo wẹ to mahẹ tindo to azọ́n ahunjijlọnọ lẹ dindinmọ lọ tọn mẹ?

9 Lizọnyizọnwatọ lẹpo wẹ to alọgọ nado dín ahunjijlọnọ lẹ mọ. Mí sọgan yí azọ́n ehe jlẹdo ovi he bu de dindin go. Gbọnna? Lẹnnupọndo nujijọ jọnun visunnu owhe atọ̀n mẹvi he bu ehe tọn ji. Gbẹtọ 500 nkọ wẹ jẹ dindin in pé ji. Nudi gànhiho 20 to búbú visunnu lọ tọn godo, mẹdezejotọ he to dindin in de wá mọ ẹn to gbàdo-gle de mẹ. Mẹdezejotọ lọ ma jlo dọ gbẹtọ lẹ ni na emi pipà na visunnu lọ he e mọ wutu. E dọmọ: “Gbẹtọ kanweko susu wẹ wá dín in mọ.”

 10 Gbẹtọ susu wẹ tin to ninọmẹ ovi enẹ tọn nkọ mẹ. Yé nọ mọdọ emi ko buali. Yé ma tindo todido, ṣigba yé jlo dọ yè ni gọalọna emi. (Efe. 2:12) Mí omẹ livi ṣinatọ̀n linlán wẹ to tintẹnpọn nado dín mẹhe jẹ enẹlẹ mọ. Hiẹ lọsu na dewe sọgan nọma mọ mẹde he na jlo dọ a ni plọn Biblu hẹ emi. Ṣigba, wẹnlatọ devo lẹ he to aigba-denamẹ dopolọ ji hẹ we sọgan mọ mẹde he jlo na plọn nugbo Ohó Jiwheyẹwhe tọn. Eyin mẹmẹsunnu kavi mẹmẹyọnnu de dukosọna mẹde bọ e wá lẹzun devi Klisti tọn, mẹhe tindo mahẹ to azọ́n gbẹtọ lẹ dindin tọn lọ mẹ lẹpo wẹ tindo whẹwhinwhẹ́n dagbe nado jaya.

11. Eyin a ma tlẹ ko to anadena plọnmẹ Biblu de, aliho devo tẹlẹ mẹ wẹ a sọgan gọalọ nado hẹn gbẹtọ lẹ zun devi lẹ te?

11 Eyin a ma tlẹ ko to anadena plọnmẹ Biblu de todin, a sọgan gọalọ to azọ́n gbẹtọ lẹ hinhẹn zun devi tọn lọ mẹ to aliho devo lẹ mẹ. Di apajlẹ, a sọgan nọ dokuavọna mẹyọyọ lẹ bo nọ jihọntọn hẹ yé to whenue yé wá Plitẹnhọ Ahọluduta tọn mẹ. Gbọnmọ dali, a sọgan gọalọ nado hẹn yé kudeji dọ owanyi wẹ nọ dohiagona mí taidi Klistiani nugbo lẹ. (Joh. 13:34, 35) Gblọndo he a nọ na to opli lẹ ji, eyin yé tlẹ to kleun, sọgan plọn mẹyọyọ he to gbẹdo hẹ mí lẹ nado nọ do yise yetọn hia po ahundopo po, podọ po sisi po. A sọgan sọ hodo wẹnlatọ yọyọ de to lizọnyizọn lọ mẹ bo gọalọna ẹn nado yihojlẹdohogo hẹ gbẹtọ lẹ sọn Owe-wiwe lẹ mẹ. Gbọnmọ dali, a na plọn ẹn nado nọ hodo apajlẹ Klisti tọn.—Luku 10:25-28.

12. Be mí dona tindo nugopipe vonọtaun lẹ nado hẹn gbẹtọ lẹ zun devi lẹ wẹ ya? Basi zẹẹmẹ.

12 Depope mítọn ma dona nọ lẹndọ mí do nuhudo nugopipe vonọtaun lẹ tọn nado plọn mẹdevo lẹ nado yin devi Jesu tọn lẹ. Etẹwutu? Lẹnnupọndo apajlẹ Faustina he nọ nọ̀ Bolivie tọn ji. E ma yọ́n wehia to whenue e jẹ gbẹdo hẹ Kunnudetọ Jehovah tọn lẹ ji. Sọn whenẹnu, e plọn nuhihia jẹ obá de mẹ. Todin, e ko yí baptẹm, podọ e yiwanna nado nọ plọnnu mẹdevo lẹ. E nọ saba deanana plọnmẹ Biblu atọ́n to osẹ dopodopo mẹ. Mahopọnna dọ Faustina ma sọgan nọ hiawe sọ suhugan nuplọntọ etọn lẹ tọn, e gọalọna omẹ ṣidopo nado yí baptẹm.—Luku 10:21.

13. Eyin alọnu mítọn tlẹ nọ ján taun, dona tẹlẹ sin vivi wẹ mí sọgan dù dile mí to azọ́n gbẹtọ lẹ hinhẹn zun devi tọn lọ wà?

13 Klistiani susu sin alọnu wẹ nọ ján na azọngban susu he go yé dona penukundo lẹ wutu. Etomọṣo, yé nọ mọ whenu nado deanana plọnmẹ Biblu lẹ, podọ yé nọ mọ ayajẹ susu to ehe wiwà mẹ. Doayi apajlẹ Melanie tọn go. Mẹjitọ godoponọ de wẹ he nọ nọ̀ Alaska bo tindo viyọnnu owhe ṣinatọ̀n mẹvi de. Podọ agbasazọ́n whenu-gigọ́ tọn de wẹ e  nọ wà, bosọ nọ penukundo mẹjitọ he to azọ̀n kansẹẹ tọn jẹ de go. Melanie wẹ yin Kunnudetọ dopo gee he tin to tòpẹvi etọn he to olá mẹ. E nọ saba biọ huhlọn to odẹ̀ mẹ nado yì dekunnu mahopọnna fifá, na ewọ jlo vẹkuvẹku nado mọ mẹde he e na plọn Biblu hẹ wutu. To godo mẹ, e dukosọ hẹ Sara, yèdọ mẹhe homẹ etọn hùn taun nado plọn dọ Jiwheyẹwhe tindo yinkọ mẹdetiti tọn de. To ojlẹ de godo, Sara yigbe nado plọn Biblu. Melanie dọmọ: “To vendredi whèjai lẹ, agbọ́ nọ pé mi taun, amọ́ yẹn po viyọnnu ṣie po nọ mọaleyi taun eyin mí tọ́n nado yì deanana oplọn enẹ. Mí nọ yiwanna nado dín gblọndo na kanbiọ Sara tọn lẹ, podọ homẹ mítọn hùn nado mọdọ e lẹzun họntọn Jehovah tọn.” Sara pehẹ nukundiọsọmẹ po adọgbigbo po, bo jo sinsẹ̀n etọn do bo yí baptẹm.

NUHEWUTU GBẸTỌ LẸ HINHẸN ZUN DEVI DO NỌ BIỌ HOMẸFA

14. (a) Nawẹ gbẹtọ lẹ hinhẹn zun devi yin yiyijlẹdo azọ́n whèhuhu tọn go gbọn? (b) Nuyiwadomẹji tẹwẹ ohó Paulu tọn he tin to 2 Timoti 4:1, 2 mẹ nọ tindo do ji we?

14 Eyin lizọnyizọn towe tlẹ taidi nuhe ma to sinsẹ́n detọ́n, ma hẹn todido lọ dọ emi sọgan gbẹ́ mọ devi sọgodo tọn lẹ bu blo. Flindọ, Jesu yí azọ́n gbẹtọ lẹ hinhẹn zun devi tọn jlẹdo whèhuhu go. Whèhutọ lẹ sọgan yí gànhiho susu zan whẹpo do wle whèvi dopo. Yé nọ saba wazọ́n to zánhomẹ kavi to afọnnu fuu, podọ to whedelẹnu, e nọ biọ dọ yé ni yì fidindẹn. (Luku 5:5) Mọdopolọ, mẹhe nọ hẹn gbẹtọ lẹ zun devi delẹ nọ yí homẹfa do yí gànhiho susu lẹ zan nado dín mẹhe sọgan kẹalọyi nugbo lọ lẹ to ojlẹ voovo lẹ mẹ podọ to ofi voovo lẹ. Etẹwutu? Nado sọgan dukosọna  gbẹtọ susu dogọ. Mẹhe nọ dovivẹnu susu lẹ nọ saba yin ahọsuna, na yé nọ mọ mẹhe tindo ojlo na owẹ̀n mítọn lẹ. Be a sọgan tẹnpọn nado nọ dọyẹwheho to ojlẹ he mẹ e yọnbasi dogọ te dọ a ni dukosọna gbẹtọ lẹ kavi to fie e yọnbasi dọ a ni mọ yé te ya?—Hia 2 Timoti 4:1, 2.

Nọ yí homẹfa do gọalọna nuplọntọ towe lẹ nado yinukọn to gbigbọ-liho (Pọ́n hukan 15, 16tọ) *

15. Naegbọn anadidena plọnmẹ Biblu lẹ nọ biọ homẹfa?

15 Naegbọn anadidena plọnmẹ Biblu lẹ nọ biọ homẹfa? Whẹwhinwhẹ́n dopo wẹ yindọ mí dona wà nususu hú alọgigọna nuplọntọ lọ nado wá yọ́n nuplọnmẹ he tin to Biblu mẹ lẹ bosọ yiwanna yé. Mí dona gọalọna yé nado wá yọ́n Dowatọ Biblu tọn, Jehovah bosọ yiwanna ewọ. Podọ, gbọnvona dọ mí dona plọn nuplọntọ de nuhe Jesu biọ to devi etọn lẹ si, mí sọ dona gọalọna ẹn nado yọ́n lehe yè nọ nọgbẹ̀ do taidi Klistiani nugbo de. Mí dona yí homẹfa do gọalọna ẹn dile e to vivẹnudo nado yí nunọwhinnusẹ́n Biblu tọn lẹ do yizan mẹ. Mẹdelẹ nọ penugo nado diọ pọndohlan yetọn po walọyizan yetọn po to osun kleun delẹ poun gblamẹ; ṣigba na mẹdevo lẹ, e nọ dẹn humọ.

16. Etẹwẹ a plọn sọn apajlẹ Raúl tọn mẹ?

16 Mẹdehlan de to Pérou tindo numimọ de he dohia dọ homẹfa didohia nọ hẹn ale wá. E dọmọ: “N’ko plọn owe awe hẹ Biblu plọntọ de he nọ yin Raúl. Amọ́, e gbẹ́ to pipehẹ avùnnukundiọsọmẹnu sinsinyẹn lẹ to gbẹzan etọn mẹ. Nuhahun ma nọ hán to alọwle etọn mẹ gbede, e nọ yí hogbe agbàagba lẹ zan, podọ ovi etọn lẹ ma nọ na ẹn sisi. E nọ wá opli lẹ whẹwhẹ, enẹwutu n’zindonukọn nado nọ dla ẹ pọ́n nado gọalọna ewọ po whẹndo etọn po. Owhe atọ̀n linlán to whenue n’dukosọna ẹn godo, e pegan na baptẹm.”

17. Etẹwẹ mí na gbadopọnna to hosọ he bọdego mẹ?

17 Jesu dọna mí nado “yì bo hẹn gbẹtọ lẹ sọn akọta lẹpo mẹ zun devi lẹ.” Nado hẹn azọ́ndenamẹ enẹ di, mí nọ saba dọhona gbẹtọ he aliho nulẹnpọn tọn yetọn gbọnvona mítọn taun lẹ, ehe bẹ mẹhe ma nọ yì sinsẹ̀n depope kavi sọgan nọma yise dọ Jiwheyẹwhe tin lẹ hẹn. Hosọ he bọdego na gbadopọnna lehe mí sọgan ze wẹndagbe lọ donukọnna gbẹtọ he wá sọn ninọmẹ voovo mẹ lẹ do.

OHÀN 68 Okún Ahọluduta lọ Tọn Dido

^ huk. 5 Agun Klistiani tọn tindo azọ́ndenamẹ titengbe de, enẹ wẹ nado gọalọna gbẹtọ lẹ nado lẹzun devi Klisti tọn lẹ. Hosọ ehe na ayinamẹ yọ́n-na-yizan lẹ he na gọalọna mí nado hẹn azọ́ndenamẹ mítọn di.

^ huk. 2 ZẸẸMẸ HOGBE LẸ TỌN: Devi Klisti tọn lẹ ma nọ plọn nuhe Jesu plọnmẹ lẹ poun gba. Ṣigba humọ, yé nọ yí nuhe yé plọn lẹ do yizan mẹ. Yé nọ dovivẹnu nado hodo apajlẹ kavi afọdòmẹ Jesu tọn lẹ pẹkipẹki dile e yọnbasi do.—1 Pita 2:21.

^ huk. 52 ZẸẸMẸ YẸDIDE LẸ TỌN: Dawe de he jei gbọjẹ kẹalọyi owe de to Kunnudetọ lẹ si to agahun-glintẹn de. To nukọn mẹ, dile e to sadi, e mọ Kunnudetọ devo lẹ he to mahẹ tindo to kunnudide gbangba tọn mẹ. Whenue e lẹkọ sọn gbọjẹ, wẹnlatọ lẹ wá ohọ̀n etọn ji.

^ huk. 54 ZẸẸMẸ YẸDIDE LẸ TỌN: Dawe dopolọ kẹalọyi plọnmẹ Biblu de. To godo mẹ, e pegan na baptẹm.