Yì hosọ lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

De ogbè dopo Gungbe

 HOSỌ OPLỌN TỌN 30

Lehe Mí Sọgan Jẹ Ahun Mayisenọ lẹ Tọn mẹ Do

Lehe Mí Sọgan Jẹ Ahun Mayisenọ lẹ Tọn mẹ Do

“Yẹn ko lẹzun nulẹpo na gbẹtọ wunmẹ lẹpo, na yẹn nido gbọn aliho he yọnbasi lẹpo mẹ whlẹn mẹdelẹ gán.”—1 KỌL. 9:22.

OHÀN 82 “Mì Dike Hinhọ́n Mìtọn Ni Họnwun”

BLADOPỌ *

1. Diọdo tẹlẹ wẹ ko wá aimẹ to otò delẹ mẹ to owhe agọe tọn lẹ mẹ?

NA OWHE fọtọ́n susu lẹ, e nọ taidi dọ suhugan gbẹtọ lẹ tọn to aihọn lọ mẹ tin to sinsẹ̀n de mẹ. Ṣigba, to owhe agọe tọn lẹ mẹ, diọdo daho de wá aimẹ. Mẹhe masọ nọ pọ́n yede di sinsẹ̀nnọ lẹ fọ́n bo to jijideji. Na nugbo tọn, to otò delẹ mẹ, suhugan gbẹtọ lẹ tọn nọ dọ dọ emi ma yin sinsẹ̀nnọ. *Mat. 24:12.

2. Etẹwẹ sọgan ko zọ́n bọ mẹsusu masọ yin sinsẹ̀nnọ ba?

2 Naegbọn sọha mẹhe nọ ylọ yede dọ mayisenọ * lẹ tọn fọ́n bo to jijideji sọmọ? Vlavo gbẹdudu kavi magbọjẹ lẹ wẹ fẹayihasẹna mẹdelẹ. (Luku 8:14) Mẹdelẹ masọ yise ba dọ Jiwheyẹwhe tin. Mẹdevo lẹ tindo yise to Jiwheyẹwhe mẹ, amọ́ bo nọ lẹndọ aṣa sinsẹ̀n tọn lẹ ko dohó, ma yọ́n-na-yizan bo ma sọgbe hẹ lẹnunnuyọnẹn po lẹnpọn dagbe po. Yé sọgan ko sè sọn họntọn gọna mẹplọntọ lẹ kavi sọn gbẹtọ nukundeji lẹ dè to linlinnamẹnu lẹ mẹ dọ ogbẹ̀ wá aimẹ na ede wẹ, ṣigba yelọsu ma nọ saba sè whẹwhinwhẹ́n nujọnu tọn lẹ nado yise dọ Jiwheyẹwhe tin. Sinsẹ̀n-hó ko tlọ́n awọntin mẹ na mẹdelẹ, na nukunkẹn sinsẹ̀ngán lẹ tọn na akuẹ po ogántẹn po wutu. To otò delẹ mẹ, gandudu lẹ de osẹ́n tọ́n nado na dogbó nuwiwa sinsẹ̀n tọn lẹ.

3. Etẹwẹ yin yanwle hosọ ehe tọn?

3 Jesu degbena mí nado “hẹn gbẹtọ lẹ sọn akọta lẹpo mẹ zun devi lẹ.” (Mat. 28:19) Nawẹ mí sọgan gọalọna mayisenọ lẹ nado wleawuna owanyi na Jiwheyẹwhe bo lẹzun devi Klisti tọn lẹ  gbọn? Mí dona mọnukunnujẹemẹ dọ nuyiwa mẹde tọn hlan owẹ̀n mítọn sọgan sinai do lẹdo he mẹ mẹlọ yin pinplọn whẹ́n te ji. Di apajlẹ, nuyiwa mẹhe whẹ́n to Europe lẹ tọn sọgan gbọnvona mẹhe wá sọn Asie lẹ tọn. Etẹwutu? To Europe, mẹsusu yọ́n nudelẹ gando Biblu go bosọ jẹakọ hẹ linlẹn lọ dọ Jiwheyẹwhe wẹ dá nulẹpo. Amọ́ to Asie, suhugan gbẹtọ lẹ tọn yọ́n onú vude kavi ma tlẹ yọ́n nudepope gando Biblu go, podọ yé sọgan nọma yise dọ Mẹdatọ de tin. Yanwle hosọ ehe tọn wẹ nado gọalọna mí nado jẹ ahun omẹ enẹlẹ he mí nọ dukosọna to lizọnyizọn mítọn mẹ lẹpo tọn mẹ, mahopọnna lẹdo he mẹ yé sọgan wá sọn.

NỌ HẸN PỌNDOHLAN DAGBE GO

4. Naegbọn mí sọgan hẹn pọndohlan dagbe de go?

4 Nọ Tindo Pọndohlan Dagbe. To whemẹwhemẹ, mayisenọ susu wẹ nọ lẹzun Kunnudetọ Jehovah tọn. Susu yetọn tindo walọ dagbe bosọ gbẹwanna yẹnuwiwa sinsẹ̀n tọn. Mẹdevo lẹ ma do walọ dagbe, podọ susu yetọn tindo aṣa ylankan lẹ he yé dona jodo. Po alọgọ Jehovah tọn po, mí sọgan deji dọ mí na mọ “mẹhe tindo ninọmẹ ahun mẹ tọn he jẹna ogbẹ̀ madopodo” lẹ.—Owalọ 13:48; 1 Tim. 2:3, 4.

Nọ diọada na nuzedonukọnnamẹ towe to whenue a to kunnudena mẹhe ma tindo yise to Biblu mẹ lẹ (Pọ́n hukan 5, 6tọ) *

5. Etẹwẹ nọ saba zọ́n bọ mẹlẹ nọ kẹalọyi owẹ̀n mítọn?

5 Nọ Do Homẹdagbe po Zinzin po Hia. Gbẹtọ lẹ nọ saba kẹalọyi owẹ̀n mítọn, e ma yin na nuhe mí dọ wutu, ṣigba na aliho he mẹ mí dọ ẹ te wutu. Yé nọ yọ́n pinpẹn etọn eyin mí do homẹdagbe po zinzin po hia, podọ eyin mí tindo ojlo nujọnu tọn to yé mẹ. Mí ma nọ hẹn yé po huhlọn po nado dotoaina nuhe dọ mí te. Kakatimọ, mí nọ tẹnpọn nado mọnukunnujẹ nuhewutu yé do tindo pọndohlan de gando sinsẹ̀n go mẹ. Di apajlẹ, mẹdelẹ ma nọ jlo na dọhodo sinsẹ̀n ji hẹ jonọ de. Mẹdelẹ nọ mọdọ mẹmasi wẹ e yin nado kanse mẹde nuhe e lẹn gando Jiwheyẹwhe go. Podọ winyan nọ hù mẹdelẹ to whenue mẹdevo lẹ mọ bọ yé to Biblu hia, titengbe to pọmẹ hẹ Kunnudetọ Jehovah tọn de. Depope he whẹho lọ yin, mí nọ tẹnpọn nado mọnukunnujẹ numọtolanmẹ yetọn mẹ.—2 Tim. 2:24, Odò.

6. Nawẹ apọsteli Paulu dohia gbọn dọ emi nọ diọalọ, podọ nawẹ mí sọgan hodo apajlẹ etọn gbọn?

6 Etẹwẹ mí sọgan wà eyin e taidi dọ hogbe lọ lẹ “Biblu,” “nudida,” “Jiwheyẹwhe,” kavi “sinsẹ̀n” ma nọ jẹeji na mẹde? Mí sọgan hodo apajlẹ apọsteli Paulu tọn bo diọadana nuzedonukọnnamẹ mítọn sọgbe hẹ mẹlọ. Whenue apọsteli Paulu to hodọ hẹ Ju lẹ, e yihojlẹdohogo sọn Owe-wiwe lẹ mẹ. Ṣigba, whenue e to hodọna tamẹnuplọnmẹtọ Glẹkinu lẹ to Aleopagu, e ma donù Biblu go tlọlọ. (Owalọ 17:2, 3, 22-31) Nawẹ mí sọgan hodo apajlẹ Paulu tọn gbọn? Eyin mí dukosọ hẹ mẹde he ma kẹalọyi Biblu, e sọgan yọ́n taun ma nado donù Biblu go tlọlọ whenue mí to hodọ hẹ mẹlọ. Eyin a mọdọ mẹde sọgan nọma nọ voawu to whenue mẹdevo lẹ mọ bọ e to Biblu hia, tẹnpọn nado do wefọ lẹ hia ẹ to aliho he ma dọ̀n ayidonugo de mẹ vlavo to nuyizan lẹtliki tọn de ji.

7. Etẹwẹ mí sọgan wà nado hodo apajlẹ Paulu tọn he yin zẹẹmẹ basina to 1 Kọlintinu lẹ 9:20-23 mẹ?

7 Nọ Mọnukunnujẹ Mẹlẹ mẹ bo Nọ Dotoai. Mí dona tẹnpọn nado nọ mọnukunnujẹ nuhe ko yinuwado mẹhe mí dukosọna lẹ ji mẹ. (Howh. 20:5) Sọ lẹnnupọndo apajlẹ Paulu tọn ji. Ewọ whẹ́n to Ju lẹ ṣẹnṣẹn. Matin ayihaawe, ewọ dona diọalọ dile e to yẹwhehodọ na Kosi lẹ, yèdọ mẹhe yọ́n onú vude kavi ma yọ́n nudepope gando Jehovah po Owe-wiwe lẹ po go lẹ. E sọgan biọ dọ mí ni basi dodinnanu delẹ kavi kanhose numimọnọ lẹ to agun mẹ nado sọgan ze míde do otẹn mẹhe mí mọ to aigba-denamẹ mítọn ji lẹ tọn mẹ bo mọnukunnujẹ ninọmẹ yetọn mẹ.—Hia 1 Kọlintinu lẹ 9:20-23.

8. Etẹwẹ yin dopo to aliho he mẹ mí sọgan bẹ hodọdopọ sinai do Biblu ji jẹeji te lẹ mẹ?

8 Yanwle mítọn wẹ nado mọ “mẹhe jẹ” lẹ. (Mat. 10:11) Nado wà enẹ po kọdetọn dagbe  po, mí dona nọ biọ to mẹlẹ si nado dọ linlẹn yetọn lẹ, podọ enẹgodo, mí na dotoaina yé po sọwhiwhe po. Mẹmẹsunnu de to Angleterre nọ biọ to gbẹtọ lẹ si nado dọ nuhe yé lẹn gando lehe whẹndo sọgan yin ayajẹnọ do, lehe yè sọgan plọn ovi lẹ whẹ́n do kavi lehe yè sọgan doakọnna mawadodo do go. To whenue e dotoaina gblọndo yetọn lẹ godo, e nọ dọ dọ, “Etẹwẹ mì lẹn gando ayinamẹ he ko yin kinkan sọn nudi owhe 2 000 die ehe go?” Enẹgodo, e nọ do wefọ he e ko ṣinyan delẹ hia yé to alokan etọn ji bo ma tlẹ nọ donù hogbe lọ “Biblu” go.

NỌ JẸ AHUN GBẸTỌ LẸ TỌN MẸ

9. Nawẹ mí sọgan gọalọna mẹhe ma nọ saba jlo na dọho gando Jiwheyẹwhe go lẹ gbọn?

9 Mí sọgan jẹ ahun mẹhe ma nọ saba jlo na dọho gando Jiwheyẹwhe go lẹ tọn mẹ gbọn hodidọ na yé do nuhe yé ko jẹakọ hẹ ganji de ji dali. Di apajlẹ, mẹsusu wẹ jọwamọnu gbẹ̀mẹ tọn lẹ nọ jiawu na. Enẹwutu, mí sọgan dọ nude taidi: “Mì sọgan ko sè dọ jọwamọnu lẹ wẹ lẹnunnuyọnẹntọ lẹ nọ pọ́n do wleawuna susu nuhe yé nọ detọ́n lẹ tọn. Di dohia, otó wẹ yé gbejepọ́n do wleawuna nuyizan hoyidokanji tọn, bo gbeje nukun pọ́n nado wleawuna nuyizan oyẹ̀ yiyidokanji tọn. Amọ́ etẹwẹ mì nọ lẹn eyin mì sè hogbe lọ jọwamọnu lẹ? Be mì nọ lẹndọ yé wá aimẹ na yede wẹ ya, dọ mẹde wẹ dá yé ya, kavi nudevo?” To whenue mí ko yí sọwhiwhe do dotoaina yé godo, mí sọgan yidogọ dọ: “Whenuena e yindọ lẹnunnuyọnẹntọ lẹ plọnnu sọn aliho he mẹ otó po nukun po yin awuwlena te mẹ, mí sọgan kanse míde mẹhe dè yé to nuplọn sọn. Nuhe ohó milomilo-kantọ hohowhenu tọn de kàn yinuwado ji e taun: ‘Mẹlọ he wleawuna otó, be e ma gán sènu wẹ? Mẹlọ he basi nukun, be e ma gán mọnú wẹ? . . . Ewọ wẹ Mẹlọ he nọ namẹ oyọnẹn!’ Lẹnunnuyọnẹntọ delẹ ko wá tadona dopolọ kọ̀n.” (Salm. 94:9, 10) Enẹgodo, mí sọgan do video de hia mẹlọ to jw.org® ji, sọn dehe tin to adà lọ “Pọndohlan lẹ Gando Bẹjẹeji Ogbẹ̀ Tọn Go” mẹ lẹ mẹ, ehe tin to “Hokansemẹ po Numimọ lẹ Po” glọ. (Pọ́n OWE LẸ > VIDEO LẸ glọ.) Kavi mí sọgan na ẹn dopo to alọnuwe lọ lẹ La vie a-t-elle été créée? kavi Cinq questions à se poser sur l’origine de la vie mẹ.

10. Nawẹ mí sọgan nọ bẹ hodọdopọ jẹeji hẹ mẹhe ma nọ jlo na dọhodo Jiwheyẹwhe ji de gbọn?

10 Suhugan gbẹtọ lẹ tọn wẹ to jijlo vẹkuvẹku nado tindo sọgodo he pọnte de. Ṣigba, mẹsusu nọ dibu dọ aigba na yin vivasudo, kavi lẹzun fie gbẹninọ ma na yọnbasi te. Nugopọntọ tomẹyitọ de to Norvège dọ dọ mẹhe ma nọ jlo na dọho gando Jiwheyẹwhe go lẹ nọ saba jlo na dọhodo ninọmẹ aihọn tọn ji. To nudidọdo mẹlẹ godo, e nọ dọ, “Etẹwẹ mì nọ lẹn gando nukundido  mítọn nado tindo sọgodo he pọnte de go? Be todido dagbe hugan mítọn tin to alọ tonudọtọ lẹ, lẹnunnuyọnẹntọ lẹ kavi alọ mẹdevo de tọn mẹ wẹ ya?” To whenue e dotoai po sọwhiwhe po godo, e nọ hia kavi nọ yihodọ sọn wefọ he dọhodo sọgodo dagbe de ji mẹ. Opagbe Biblu tọn lọ dọ aigba na tin kakadoi bọ gbẹtọ dagbe lẹ na nọgbẹ̀ to e ji doidoi nọ fọnjlodotena mẹdelẹ taun.—Salm. 37:29; Yẹwh. 1:4.

11. Naegbọn mí dona nọ tẹ́n aliho nuzedonukọnnamẹ tọn voovo lẹ pọ́n, podọ nawẹ mí sọgan hodo apajlẹ he Paulu zedai to Lomunu lẹ 1:14-16 mẹ gbọn?

11 E na yọ́n dọ mí ni nọ yí aliho nuzedonukọnnamẹ tọn voovo zan hẹ mẹhe mí nọ dukosọna lẹ. Etẹwutu? Na mẹlẹpo ma yin nudopolọ. Nuhe fọnjlodotena mẹde sọgan nọma jẹeji na mẹdevo. Mẹdelẹ nọ kẹalọyi nado dọhodo Jiwheyẹwhe kavi Biblu ji, amọ́ mẹdevo lẹ nọ kẹalọyi nado dọhodo nudevo lẹ ji jẹnukọn. Depope he whẹho lọ yin, mí dona nọ yí dotẹnmẹ hundote lẹ zan nado dọhona gbẹtọ wunmẹ lẹpo. (Hia Lomunu lẹ 1:14-16.) Na nugbo tọn, mí ni hẹn do ayiha mẹ dọ Jehovah wẹ nọ hẹn nugbo lọ whẹ́n to ahun mẹhe yiwanna dodowiwa lẹ tọn mẹ.—1 Kọl. 3:6, 7.

NUGBO LỌ PINPLỌN MẸHE WÁ SỌN ASIE LẸ

Wẹnlatọ Ahọluduta lọ tọn susu nọ do ojlo hia to mẹdevo lẹ he wá sọn otò he mẹ mẹsusu ma yin Klistiani te lẹ mẹ, bosọ nọ má nuyọnẹn yọ́n-na-yizan he to Biblu mẹ lẹ hẹ yé (Pọ́n hukan 12,13tọ)

12. Etẹwẹ mí sọgan wà nado dekunnuna mẹhe wá sọn otò Asie tọn mẹ bo ma ko lẹnnupọn gbede do tintin Mẹdatọ de tọn ji lẹ?

12 Lẹdo aihọn pé, wẹnlatọ susu wẹ nọ dukosọna mẹhe wá sọn akọta Asie tọn lẹ mẹ lẹ, ehe bẹ mẹdelẹ hẹn he wá sọn otò he mẹ gandudu lẹ ko ze dogbó lẹ dai gando nuwiwa sinsẹ̀n tọn go te lẹ. To otò Asie tọn delẹ mẹ, mẹsusu ma ko lẹnnupọn sisosiso gbede do tintin Mẹdatọ de tọn ji. Mẹdelẹ nọ jlo na dindonanu bo nọ kẹalọyi plọnmẹ Biblu he yin zizedonukọnna yé tlọlọ, ṣigba mẹdevo lẹ nọ whleawu to tintan whenu nado gbadopọnna nuplọnmẹ yọyọ lẹ. Etẹwẹ mí sọgan wà nado gọalọna yé? Wẹnlatọ numimọnọ delẹ ko tindo kọdetọn dagbe to whenue yé bẹ hodọdopọ jẹeji do onú paa de ji, do ojlo nujọnu tọn hia to omẹ enẹlẹ mẹ, podọ to ojlẹ he sọgbe mẹ, donù lehe gbẹzan yelọsu tọn pọnte do go to whenue yé jẹ nunọwhinnusẹ́n Biblu tọn tangan de yido yizan mẹ ji.

13. Etẹwẹ sọgan whàn mẹlẹ nado tindo ojlo to Biblu mẹ? (Pọ́n yẹdide he to wepa lọ ji.)

13 To tintan whenu, mẹsusu wẹ nuyọnẹn yọ́n-na-yizan he to Biblu mẹ lẹ nọ fọnjlodotena. (Yẹwh. 7:12) To New York, mẹmẹyọnnu de he nọ dla mẹhe nọ do Mandarin-gbè lẹ pọ́n dọmọ: “N’nọ tẹnpọn nado do ojlo hia to gbẹtọ lẹ mẹ bo nọ dotoaina yé. Eyin n’sè dọ yé ṣẹṣẹ sẹtẹn wá wẹ, n’gán kanse dọ: ‘Nawẹ mì to akọjẹ hẹ lẹdo lọ do? Mì ko mọ azọ́n de ya? Be kọmẹnu mìtọn lẹ nọ jọmẹ hẹ mì ya?’” Whedelẹnu, ehe nọ hùn dotẹnmẹ dote nado ze plọnmẹ Biblu donukọnna mẹlọ. Eyin mẹmẹyọnnu lọ mọdọ e jẹ, e sọgan yidogọ dọ: “Etẹwẹ yin aṣli lọ nado nọ jijọho mẹ hẹ gbẹtọ lẹ? Be n’gán do nuhe howhinwhẹn Biblu tọn de dọ hia mì ya? E dọmọ: ‘Avùn de bibẹjẹeji nọ taidi whenue dogbó osin tọn lẹ yin hùnhùn; whẹpo whẹgbè nido bẹ, yawu tọ́n sọn finẹ.’ Be mì lẹndọ ayinamẹ ehe sọgan gọalọna mí nado nọ jijọho mẹ hẹ mẹdevo lẹ ya?” (Howh. 17:14) Hodọdopọ mọnkọ lẹ sọgan gọalọna mí nado doayi mẹhe na jlo dọ mí ni nọ lẹkọwa yé dè lẹ go.

14. Nawẹ mẹmẹsunnu de to Whèzẹtẹn Asie tọn nọ gọalọna mẹhe nọ dọ dọ emi ma yí Jiwheyẹwhe sè lẹ gbọn?

14 Etẹwẹ dogbọn mẹhe nọ dọna mí dọ emi ma tindo yise to Jiwheyẹwhe mẹ lẹ dali? Mẹmẹsunnu de he ko to yẹwhehodọ na mayisenọ lẹ sọn ojlẹ dindẹn die to Whèzẹtẹn Asie tọn dọmọ: “To paa mẹ, to file, eyin mẹde dọ ‘N’ma yise to Jiwheyẹwhe mẹ,’ nuhe dọ e te wẹ yindọ, emi ma tindo yise to sinsẹ̀n-bibasi na yẹwhe lẹ mẹ. Enẹwutu, n’nọ saba kọngbedopọ hẹ yé dọ suhugan yẹwhe he tin lẹ tọn yin nudoai gbẹtọ tọn bo ma yin yẹwhe jọ yẹwhe lẹ. N’nọ saba hia Jelemia 16:20: ‘Be mẹde sọgan basi yẹwhe lẹ na ede  to whenuena e yindọ yé ma yin yẹwhe nujọnu tọn lẹ ya?’ Enẹgodo, n’nọ kanse dọ, ‘Nawẹ mí sọgan yọ́n yẹwhe nujọnu tọn lọ dovo na yẹwhe he gbẹtọ lẹ doai lẹ gbọn?’ N’nọ dotoaina yé po sọwhiwhe po, bo nọ wá hia Isaia 41:23 he dọmọ: ‘Mì dọ nuhe na wá jọ to sọgodo na mí, na mí nido yọnẹn dọ yẹwhe lẹ wẹ mì nugbonugbo.’ Enẹgodo, n’nọ na yé apajlẹ lehe Jehovah ko dọ dọdai nuhe wá jọ to godo mẹ de tọn do.”

15. Etẹwẹ mí sọgan plọn sọn apajlẹ mẹmẹsunnu Whèzẹtẹn Asie tọn de tọn mẹ?

15 Mẹmẹsunnu de sọn Whèzẹtẹn Asie tọn nọ yí aliho nuzedonukọnnamẹ tọn de zan to gọyìpọn lẹ whenu. E dọmọ: “N’nọ na yé apajlẹ lẹ gando nuyọnẹn Biblu tọn, dọdai Biblu tọn he mọ hẹndi lẹ po osẹ́n he nọ deanana wẹkẹ lọ po lẹ go. Enẹgodo, n’nọ dohia yé lehe onú ehe lẹpo hẹn ẹn họnwun do dọ Mẹdatọ nujọnu tọn, podọ nuyọnẹntọ de tin. Whenue mẹde kẹalọyi dọ e yọnbasi dọ Jiwheyẹwhe tin, n’nọ jẹ nuhe Biblu dọ gando Jehovah go lẹ dohia ẹ ji.”

16. Sọgbe hẹ Heblu lẹ 11:6, naegbọn e do yin dandan dọ nuplọntọ lẹ ni tindo yise to Jiwheyẹwhe po Biblu po mẹ, podọ nawẹ mí sọgan gọalọna yé nado wleawuna ẹn gbọn?

16 Whenue mí to anadena plọnmẹ Biblu mẹhe yin mayisenọ sọn odò lẹ tọn, mí dona zindonukọn nado nọ hẹn yise yetọn to tintin Jiwheyẹwhe tọn mẹ lodo. (Hia Heblu lẹ 11:6.) Podọ mí dona gọalọna yé nado wleawuna yise to Biblu mẹ. Ehe sọgan biọ dọ mí ni nọ zinnudo nuplọnmẹ delẹ ji whlasusu. To oplọn dopodopo whenu, e sọgan biọ dọ mí ni nọ dọhodo kunnudenu he dohia dọ Biblu yin Ohó Jiwheyẹwhe tọn lẹ ji. Ehe sọgan bẹ hodọdopọ kleun de do dọdai Biblu tọn he mọ hẹndi lẹ, gbesisọ-yinyin Biblu tọn to lẹnunnuyọnẹn po whenuho po liho, kavi nuyọnẹn yọ́n-na-yizan Biblu tọn ji hẹn.

17. Nawẹ owanyi mítọn na gbẹtọ lẹ sọgan yinuwado yé ji gbọn?

17 Mí nọ gọalọna gbẹtọ lẹ nado lẹzun devi Klisti tọn gbọn owanyi didohia yé dali, vlavo yé yin sinsẹ̀nnọ kavi lala. (1 Kọl. 13:1) Dile mí to nuplọn yé, yanwle mítọn wẹ nado dohia dọ Jiwheyẹwhe yiwanna mí bosọ jlo dọ mílọsu ni yiwanna ewọ. To owhe lẹpo mẹ, gbẹtọ fọtọ́n susu he tindo ojlo vude kavi ma tindo depope to sinsẹ̀n mẹ dai lẹ wẹ nọ yí baptẹm, na yé plọn nado yiwanna Jiwheyẹwhe wutu. Enẹwutu, nọ tindo pọndohlan dagbe bo nọ do owanyi po ojlo dagbe po hia to gbẹtọ wunmẹ lẹpo mẹ. Nọ dotoaina yé. Nọ tẹnpọn nado mọnukunnujẹ yé mẹ. Gbọn apajlẹ towe dali, plọn yé nado lẹzun devi Klisti tọn lẹ.

OHÀN 76 Na E Nọ te Na We?

^ huk. 5 Mí nọ saba dukosọna mayisenọ lẹ todin hugan gbede pọ́n. Hosọ ehe dọhodo lehe mí sọgan má nugbo Biblu tọn hẹ yé gọna lehe mí sọgan gọalọna yé nado wleawuna jidide to Biblu mẹ bosọ tindo yise to Jehovah, Jiwheyẹwhe mẹ do ji.

^ huk. 1 Sọgbe hẹ dodinnanu lẹ, delẹ to otò enẹlẹ mẹ wẹ: Albanie, Allemagne, Australie, Autriche, Azerbaïdjan, Canada, Chine, Corée du Sud, Danemark, Espagne, France, Hong Kong, Irlande, Israël, Japon, Norvège, Pays-Bas, République tchèque, Royaume-Uni, Suède, Suisse po Vietnam po.

^ huk. 2 ZẸẸMẸ HOGBE LẸ TỌN: To hosọ ehe mẹ, hogbe lọ mayisenọ dlẹnalọdo mẹhe ma tin to sinsẹ̀n de mẹ kavi ma yí Jiwheyẹwhe sè lẹ.

^ huk. 54 ZẸẸMẸ YẸDIDE TỌN: Mẹmẹsunnu de to kunnudena dotozọ́nwatọ-gbẹ́ etọn de, mẹhe to godo mẹ wá to dogbapọnna Tito Biblu Pinplọn to Intẹnẹt Ji tọn mítọn.